020.0298.150501
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ՈՐՈՇՈՒՄԸ
i
ԷՆԵՐԳԵՏԻԿ ԽԱՐՏԻԱՅԻ ՊԱՅՄԱՆԱԳՐԻ ԱՌԵՎՏՐԻ ՀԵՏ ԿԱՊՎԱԾ ԴՐՈՒՅԹՆԵՐԻ ՎԵՐԱԲԵՐՅԱԼ ՈՒՂՂՈՒՄՆԵՐԻՆ ԱՌՆՉՎՈՂ ՈՐՈՇՄԱՆ ՄԵՋ (ԿԻՑ ՀԱՎԵԼՎԱԾՆԵՐՈՎ) ԵՎ ԵԶՐԱՓԱԿԻՉ ԱԿՏՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
15 մայիսի 2001 թ. |
Հայաստանի Հանրապետության սահմանադրական դատարանը, նախագահությամբ` սահմանադրական դատարանի նախագահ Գ. Հարությունյանի, կազմով` սահմանադրական դատարանի նախագահի տեղակալ Վ. Հովհաննիսյանի, սահմանադրական դատարանի անդամներ Ա. Գյուլումյանի, Ֆ. Թոխյանի, Հ. Նազարյանի, Ռ. Պապայանի, Վ. Պողոսյանի, Վ. Սահակյանի,
մասնակցությամբ` Հայաստանի Հանրապետության Նախագահի պաշտոնական ներկայացուցիչ` Հայաստանի Հանրապետության էներգետիկայի նախարար Կ. Գալուստյանի,
համաձայն Հայաստանի Հանրապետության Սահմանադրության 100 հոդվածի 2 կետի, 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 25 հոդվածի 1 կետի և 56 հոդվածի,
դռնբաց նիստում քննեց «Էներգետիկ խարտիայի պայմանագրի առևտրի հետ կապված դրույթների վերաբերյալ ուղղումներին առնչվող որոշման մեջ (կից հավելվածներով) և եզրափակիչ ակտում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթը Հայաստանի Հանրապետության Նախագահի դիմումն է սահմանադրական դատարան:
Լսելով սույն գործով զեկուցող` Հայաստանի Հանրապետության սահմանադրական դատարանի անդամ Հ. Նազարյանի հաղորդումը, Հայաստանի Հանրապետության Նախագահի ներկայացուցիչ Կ. Գալուստյանի բացատրությունը, հետազոտելով եզրափակիչ ակտը, էներգետիկ խարտիայի կոնֆերանսի որոշումը, կից հավելվածները և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
1. Էներգետիկ խարտիայի պայմանագրի առևտրի հետ կապված դրույթների վերաբերյալ ուղղումներին առնչվող որոշումը` կից հավելվածներով, և եզրափակիչ ակտն ստորագրվել են Բրյուսելում` 1998 թվականի ապրիլի 23-24-ին, որոնց նպատակն է Էներգետիկ խարտիայի պայմանագրի առևտրի հետ կապված դրույթներում ուղղումներ կատարելու միջոցով Սակագների և առևտրի վերաբերյալ գլխավոր համաձայնագրին (ԳԱՏՏ) առնչվող մի շարք դրույթներ փոխարինել Առևտրի համաշխարհային կազմակերպության (ԱՀԿ) դրույթներով` այդ կազմակերպության կողմից մշակված պայմաններին համապատասխան` ստեղծելով իրավական բարենպաստ ռեժիմ էներգետիկայի ոլորտում համագործակցությունն ընդլայնելու, այդ նպատակով նյութերի, սարքավորումների միջպետական առևտուրը զարգացնելու համար:
2. Ուղղումներով փոփոխվում և լրացվում է Էներգետիկ խարտիայի պայմանագրի 29 հոդվածի, ներածության, մի շարք հոդվածների, հավելվածների բովանդակությունը.
3. Էներգետիկ խարտիայի պայմանագրի առևտրի հետ կապված դրույթների վերոհիշյալ ուղղումներով Կողմերն ստանձնում են հետևյալ հիմնական պարտավորությունները.
- ապահովելով մտքի սեփականության իրավունքների արդյունավետ պաշտպանությունը` ելնելով միջազգային ամենաբարձր չափանիշներից,
- Էներգետիկ խարտիայի պայմանագրի ուղղումների գործադրման պահից Էներգետիկ խարտիայի քարտուղարություն ներկայացնել էներգետիկային առնչվող սարքավորումների ներմուծման կամ արտահանման վերաբերյալ բոլոր մաքսատուրքերի և մյուս գանձումների` այդ պահին գործող մակարդակի վերաբերյալ ցանկ, ինչպես նաև ծանուցել Էներգետիկ խարտիայի քարտուղարությանն այդպիսի մաքսատուրքերի կամ այլ կարգի գանձումների վերաբերյալ ցանկացած փոփոխության մասին,
- էներգետիկային առնչվող սարքավորումների ներմուծման կամ արտահանման պահին կամ դրանց արտահանման հետ կապված ձգտել չբարձրացնել և ոչ մի մաքսատուրք կամ այլ կարգի գանձում` Էներգետիկ խարտիայի պայմանագրի պայմաններին համապատասխան, իսկ որոշ դեպքերում` պահպանել դրանց չափը ամենացածր մակարդակում,
- հարկման հարցերում չփոխել էներգետիկ սարքավորումների, հումքի արժեքի որոշման մեթոդը, տարադրամի կուրսը որոշել պայմանագրի դրույթներին համապատասխան:
4. Ուղղումներով նախատեսված են նաև էներգետիկ հումքերի և սարքավորումների առևտրի հետ կապված մաքսատուրքերի և այլ գանձումների մակարդակի բարձրացման առանձին դեպքեր:
5. Էներգետիկ խարտիայի առևտրի հետ կապված ուղղումներով ընդլայնվում են այդ ոլորտում միջպետական համագործակցության առարկայական խնդիրները նաև առևտրական վեճերի լուծման առնչությամբ, նախատեսվում է Առևտրի համաշխարհային կազմակերպության հիմնադրման համաձայնագրի դրույթների և այդ կազմակերպության անդամ չհանդիսացող պետությունների նկատմամբ Էներգետիկ խարտիայի պայմանագրի պայմանների, ինչպես նաև վերոհիշյալ ուղղումների ժամանակավոր կիրառման հետ կապված հարցերի լուծման ընթացակարգ:
6. Էներգետիկ խարտիայի պայմանագրի առևտրի հետ կապված դրույթների ուղղումներին առնչվող որոշման մեջ (կից հավելվածներով) և եզրափակիչ ակտում ամրագրված վերոհիշյալ պարտավորություններն իրենց բնույթով բխում են Հայաստանի Հանրապետության Սահմանադրության 9 հոդվածի դրույթներից, քանի որ միջազգային իրավունքի նորմերին համապատասխան` պետությունների հետ ապահովում են բարիդրացիական և փոխշահավետ համագործակցություն:
7. Ղեկավարվելով «Սահմանադրական դատարանի մասին» Հայաստանի Հանրապետության օրենքի 67 հոդվածի պահանջներով, ուսումնասիրելով Էներգետիկ խարտիայի պայմանագրի իրավակիրառական պրակտիկան, սահմանադրական դատարանը նաև պարզեց.
Էներգետիկ խարտիայի պայմանագիրը` կից արձանագրությամբ, ուժի մեջ է մտել 1998 թվականի ապրիլի 18-ին: Պայմանագրի կիրառմամբ Հայաստանի Հանրապետությունում հնարավորություններ են ստեղծվել էներգետիկ քաղաքականության ձևավորման և իրականացման համար:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. 1998 թվականի ապրիլի 23-24-ին Բրյուսելում ստորագրված Էներգետիկ խարտիայի պայմանագրի առևտրի հետ կապված դրույթների վերաբերյալ ուղղումներին առնչվող որոշման մեջ (կից հավելվածներով) և եզրափակիչ ակտում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
15 մայիսի 2001 թ.
ՍԴՈ-298