050.0135.300501
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԲԱՆԿԻ ԽՈՐՀՈՒՐԴ
ՈՐՈՇՈՒՄ
30 մայիսի 2001 թվականի թիվ 135
50000 ԴՐԱՄ ԱՆՎԱՆԱԿԱՆ ԱՐԺԵՔՈՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀՈԲԵԼՅԱՆԱԿԱՆ ԹՂԹԱԴՐԱՄՆԵՐԸ ՇՐՋԱՆԱՌՈՒԹՅԱՆ ՄԵՋ ԴՆԵԼՈՒ ՄԱՍԻՆ
Հիմք ընդունելով «Հայաստանի Հանրապետության կենտրոնական բանկի մասին» Հայաստանի Հանրապետության օրենքի 41 և 42-րդ հոդվածները, ղեկավարվելով նույն օրենքի 20-րդ հոդվածի «է» կետով` Հայաստանի Հանրապետության կենտրոնական բանկի խորհուրդը որոշում է.
1. Հայաստանում քրիստոնեությունը պետական կրոն հռչակելու 1700-ամյակի կապակցությամբ 2001 թվականի հունիսի 4-ից շրջանառության մեջ դնել 2001 թվականի նմուշի 50000 դրամ անվանական արժեքով Հայաստանի Հանրապետության հոբելյանական թղթադրամները:
2. Սահմանել, որ 2001 թվականի հունիսի 4-ից 2001 թվականի նմուշի 50000 դրամ անվանական արժեքով Հայաստանի Հանրապետության հոբելյանական թղթադրամները Հայաստանի Հանրապետության տարածքում համարվում են օրինական վճարամիջոց և ենթակա են անվերապահ ընդունման իրենց անվանական արժեքով` փողով արտահայտված բոլոր պարտավորությունների դիմաց:
3. Սույն որոշումն ուժի մեջ է ընդունման պահից: