041.0618.230801
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ
ՈՐՈՇՈՒՄ
23 օգոստոսի 2001 թվականի N 618
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԷԼԵԿՏՐԱԷՆԵՐԳԵՏԻԿ ՀԱՄԱԿԱՐԳԻ ՀԱՂՈՐԴՄԱՆ ԵՎ ԲԱՇԽԻՉ ԷԼԵԿՏՐԱԿԱՆ ՑԱՆՑԵՐԸ ՏԱՐԱՆՋԱՏԵԼՈՒ ՄԱՍԻՆ
Ելնելով Հայաստանի Հանրապետության էլեկտրաէներգետիկ համակարգի հաղորդման և բաշխիչ էլեկտրական ցանցերի տարանջատման, էլեկտրաէներգիայի ու հզորության հաշվառման բարելավման, սպառողներին հուսալի և անվտանգ էլեկտրաէներգիայի մատակարարման ապահովման անհրաժեշտությունից`
Հայաստանի Հանրապետության էներգետիկայի նախարարությանը, Հայաստանի Հանրապետության տրանսպորտի և կապի նախարարությանը` մինչև 2001 թվականի օգոստոսի 25-ը`
ա) ապահովել էներգետիկայի և տրանսպորտի բնագավառների 110 կՎ և բարձր լարման բոլոր ենթակայանների անվանացանկի կազմումը` յուրաքանչյուր ենթակայանի համար տալով ամփոփ տեխնիկական բնութագրեր, սնող և սնվող գծերի քանակն ու բնութագրերը, ինչպես նաև արտադրող էլեկտրակայաններից բաշխման նպատակով սնվող գծերի անվանացանկի կազմումը` իրենց բնութագրերով.
բ) ստեղծել աշխատանքային խումբ` կազմված էներգետիկայի և տրանսպորտի բնագավառների ընկերությունների, ինչպես նաև Հայաստանի Հանրապետության ֆինանսների և էկոնոմիկայի նախարարության համապատասխան մասնագետներից, անկախ փորձագետներից (համաձայնությամբ), համագործակցելով Հայաստանի Հանրապետության էներգետիկայի կարգավորող հանձնաժողովի հետ` ղեկավարվելով «էներգետիկայի մասին» Հայաստանի Հանրապետության օրենքում ամրագրված էլեկտրաէներգիայի հաղորդման և բաշխիչ ցանցերի տարանջատման հատկորոշիչներով, ինչպես նաև օրենքի 47-րդ հոդվածի 2-րդ կետով, նշված անվանացանկերից անջատել և խմբավորել այն ենթակայանները, էլեկտրասարքավորումներն ու սնման գծերը, որոնք ներգրավված են բացառապես էլեկտրաէներգիայի բաշխման գործառույթներում.
գ) Հայաստանի Հանրապետության կառավարության քննարկմանը ներկայացնել առաջարկություն նշված ենթակայանների, էլեկտրասարքավորումների ու սնման գծերի հանձնման-ընդունման, սպասարկման ու շահագործման կազմակերպման, ինչպես նաև անհրաժեշտ որակյալ անձնակազմով ապահովելու վերաբերյալ: