040.0783.290801
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«29» օգոստոսի 2001 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
29 օգոստոսի 2001 թվականի N 783
i
«ՀԱՅ ՕԳՆՈՒԹՅԱՆ ՄԻՈՒԹՅՈՒՆ» ԲԱՐԵԳՈՐԾԱԿԱՆ ՀԱՍԱՐԱԿԱԿԱՆ ԿԱԶՄԱԿԵՐՊՈՒԹՅԱՆՆ ԱՆՀԱՏՈՒՅՑ ԳՈՒՅՔ ՀԱՆՁՆԵԼՈՒ ՄԱՍԻՆ
Հաշվի առնելով «Հայ օգնության միություն» բարեգործական հասարակական կազմակերպության կողմից` զոհված ազատամարտիկների և աղետի գոտու ծնողազուրկ երեխաների խնամակալության բազմամյա փորձն ու նրանց հանգիստը կազմակերպելու համար ներդրում կատարելու պատրաստակամությունը և հիմք ընդունելով Հայաստանի Հանրապետության քաղաքացիական օրենսգրքի 605-րդ հոդվածը` Հայաստանի Հանրապետության կառավարությունը որոշում է.
1. «Գլխամասային կոմունալ տնտեսություն» պետական փակ բաժնետիրական ընկերության գույքի կազմից սահմանված կարգով առանձնացնել Դիլիջանի հանգստի բազան և այն որպես պետական սեփականություն, նվիրաբերել «Հայ օգնության միություն» բարեգործական հասարակական կազմակերպությանը` զոհված ազատամարտիկների և աղետի գոտու ծնողազուրկ երեխաների հանգիստը կազմակերպելու նպատակով օգտագործելու պայմանով:
2. Հայաստանի Հանրապետության քաղաքաշինության նախարարությանը` մեկամսյա ժամկետում ապահովել նշված բազայի նվիրաբերության պայմանագրի սահմանված կարգով կնքումը և գույքային իրավունքների պետական գրանցումը:
3. Սույն որոշումն ուժի մեջ է մտնում 2001 թվականի օգոստոսի 29-ից: