020.0315.180901
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ՈՐՈՇՈՒՄԸ
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՎ ԻՍՊԱՆԻԱՅԻ ԹԱԳԱՎՈՐՈՒԹՅԱՆ ՄԻՋԵՎ ՄԻՋԱԶԳԱՅԻՆ ԱՎՏՈՏՐԱՆՍՊՈՐՏԱՅԻՆ ՓՈԽԱԴՐՈՒՄՆԵՐԻ ՄԱՍԻՆ 2000 ԹՎԱԿԱՆԻ ՆՈՅԵՄԲԵՐԻ 14-ԻՆ ՄԱԴՐԻԴՈՒՄ ՍՏՈՐԱԳՐՎԱԾ ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
18 սեպտեմբերի 2001 թվականի |
Հայաստանի Հանրապետության սահմանադրական դատարանը, նախագահությամբ` սահմանադրական դատարանի նախագահ Գ. Հարությունյանի, կազմով` սահմանադրական դատարանի անդամներ Ա. Գյուլումյանի, Ֆ. Թոխյանի, Հ. Նազարյանի, Ռ. Պապայանի, Վ. Պողոսյանի, Վ. Սահակյանի, Մ. Սևյանի,
մասնակցությամբ` Հայաստանի Հանրապետության Նախագահի պաշտոնական ներկայացուցիչ` Հայաստանի Հանրապետության տրանսպորտի և կապի նախարար Ա. Մանուկյանի,
համաձայն Հայաստանի Հանրապետության Սահմանադրության 100 հոդվածի 2 կետի, 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 21 (1) հոդվածի, 25 հոդվածի 1 կետի և 56 հոդվածի,
դռնբաց նիստում գրավոր ընթացակարգով քննեց «Հայաստանի Հանրապետության և Իսպանիայի Թագավորության միջև միջազգային ավտոտրանսպորտային փոխադրումների մասին 2000 թվականի նոյեմբերի 14-ին Մադրիդում ստորագրված համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթ է հանդիսացել Հայաստանի Հանրապետության Նախագահի դիմումը սահմանադրական դատարան:
ՈՒսումնասիրելով սույն գործով զեկուցող` Հայաստանի Հանրապետության սահմանադրական դատարանի անդամ Վ. Սահակյանի հաղորդումը, Հայաստանի Հանրապետության Նախագահի ներկայացուցիչ Ա. Մանուկյանի բացատրությունները, հետազոտելով համաձայնագիրը և գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
1. Սույն համաձայնագիրն ստորագրվել է 2000թ. նոյեմբերի 14-ին Մադրիդում` երկու երկրների միջև ուղևորների և բեռների ավտոտրանսպորտային փոխադրումները կատարելագործելու և զարգացնելու նպատակով:
2. Համաձայնագրով Կողմերն ստանձնում են հետևյալ հիմնական պարտավորությունները.
- թույլատրել Պայմանավորվող կողմերի փոխադրողներին իրականացնել միջազգային ավտոտրանսպորտային փոխադրումներ` Կողմերի երկրների միջև, տարանցիկ փոխադրումներ կամ փոխադրումներ Կողմերից մեկի և երրորդ երկրի միջև, օգտագործելով այնպիսի փոխադրամիջոցներ, որոնք գրանցված են այն Կողմի երկրում, որտեղ դրանք տեղակայված են:
Կողմերի նշանակած իրավասու մարմինները համատեղ որոշում են թույլտվություն տալու պայմանները, մասնավորապես, ուղևորության տևողությունը, հաճախականությունը, ժամանակացույցը, սակագները` արդյունավետ և անարգել կանոնավոր փոխադրումներ կատարելու համար,
- Պայմանավորվող կողմի տարածքում գտնվելու ժամանակ ենթարկվել ճանապարհատրանսպորտային ոլորտը կարգավորող ազգային օրենսդրությանը և այն խախտելու դեպքում կրել լրիվ պատասխանատվություն,
- մյուս Պայմանավորվող կողմի փոխադրամիջոցների քաշի և չափերի վերաբերյալ չկիրառել ավելի սահմանափակ պայմաններ, քան այն պայմանները, որոնք նա կիրառում է իր տարածքում գրանցված փոխադրամիջոցների նկատմամբ,
- ազատել ճանապարհային երթևեկության հարկերից և տուրքերից այն փոխադրամիջոցները, որոնք գրանցված են մի Պայմանավորվող կողմի տարածքում և ժամանակավորապես մուտք են գործել մյուս Պայմանավորվող կողմի պետության տարածք:
3. Համաձայնագրով սահմանվում են Կողմերի միջև կանոնավոր և ոչ կանոնավոր, ինչպես նաև ճոճանակային փոխադրումների իրականացման կարգն ու պայմանները:
4. Պայմանավորվող կողմերը պետք է ստեղծեն համատեղ հանձնաժողով, որը պատասխանատու կլինի սույն համաձայնագրի դրույթների պատշաճ կատարման համար:
Համաձայնագիրը նախատեսում է նաև համաձայնագրի դրույթների խախտման հետևանքները, Պայմանավորվող կողմերի միջև վեճերի լուծման, համաձայնագրի ուժի մեջ մտնելու կարգը:
5. Համաձայնագիրը կոչված է կանոնավոր ավտոտրանսպորտային հաղորդակցություն հաստատել Պայմանավորվող կողմերի միջև, որը կարող է նպաստել երկու երկրների միջև քաղաքական, տնտեսական, մշակութային և այլ կապերի զարգացմանը:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
1. Հայաստանի Հանրապետության և Իսպանիայի Թագավորության միջև միջազգային ավտոտրանսպորտային փոխադրումների մասին 2000 թվականի նոյեմբերի 14-ին Մադրիդում ստորագրված համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
18 սեպտեմբերի 2001 թվականի
ՍԴՈ - 315