040.0863.170901
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«17» սեպտեմբերի 2001 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
17 սեպտեմբերի 2001 թվականի N 863
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅԱՆ ՄԵՂՐՈՒ ՊԵՏԱԿԱՆ ՔՈԼԵՋ ՍՏԵՂԾԵԼՈՒ ՄԱՍԻՆ
Հայաստանի Հանրապետության կառավարությունը որոշում է.
1. Մեղրի քաղաքում ստեղծել միջին մասնագիտական պետական ուսումնական հաստատություն` Հայաստանի Հանրապետության կրթության և գիտության նախարարության Մեղրու պետական քոլեջ` նրան արտոնելով նաև նախնական (արհեստագործական) մասնագիտական կրթական ծրագիր իրականացնելու իրավունք:
2. Մեղրու պետական քոլեջի 2001 թվականի ընդունելության համար հատկացնել անվճար ուսուցման 20 տեղ` «0312 Դասավանդում տարրական դասարաններում» և 10 տեղ` «0601 էկոնոմիկա, հաշվապահական հաշվառում և աուդիտ» մասնագիտությունների գծով:
3. Մեղրու պետական քոլեջի 2001/2002 ուսումնական տարվա պարապմունքներն սկսել 2001 թվականի հոկտեմբերի 1-ից:
4. Հայաստանի Հանրապետության կրթության և գիտության նախարարությանը`
ա) Մեղրու պետական քոլեջի 2001 թվականի պահպանման ծախսերը կատարել «Հայաստանի Հանրապետության 2001 թվականի պետական բյուջեի մասին» Հայաստանի Հանրապետության օրենքի 7-րդ հոդվածով հաստատված բյուջետային ծախսերի գործառական դասակարգման N 1 հավելվածի 04 խմբի 07 ենթախմբի «1. Միջին մասնագիտական ուսումնական հաստատությունների պահպանում» ծրագրով Հայաստանի Հանրապետության կրթության և գիտության նախարարությանը նախատեսված միջոցների հաշվին.
բ) երկշաբաթյա ժամկետում հաստատել Մեղրու պետական քոլեջի կանոնադրությունը.
գ) ձեռնարկել անհրաժեշտ միջոցներ` սովորողների ընդունելության, ուսումնական գործընթացի կազմակերպման համար.
դ) Մեղրու պետական քոլեջն ապահովել մանկավարժական, մասնագիտական կադրերով, ուսումնամեթոդական փաստաթղթերով, գրադարանային-տեղեկատվական համակարգով.
ե) համաձայնեցնելով Հայաստանի Հանրապետության Սյունիքի մարզպետի հետ` Մեղրու պետական քոլեջում 2001 թվականին, ըստ անհրաժեշտության, վճարովի հիմունքով նախատեսել տարածաշրջանի սոցիալ-տնտեսական զարգացման պահանջներով պայմանավորված մասնագիտություններ:
5. Հայաստանի Հանրապետության ֆինանսների և էկոնոմիկայի նախարարությանը` քննարկել Հայաստանի Հանրապետության կրթության և գիտության նախարարության կողմից ներկայացված ծախսերի նախահաշվի հիման վրա Մեղրու պետական քոլեջի 2002 թվականի պահպանման ծախսերը Հայաստանի Հանրապետության 2002 թվականի պետական բյուջեում նախատեսելու հնարավորության հարցը:
6. Հայաստանի Հանրապետության Սյունիքի մարզպետին` ձեռնարկել միջոցներ` Մեղրու պետական քոլեջը համապատասխան շենքով, անհրաժեշտ այլ գույքով ապահովելու համար:
7. Սույն որոշումն ուժի մեջ է մտնում 2001 թվականի սեպտեմբերի 17-ից: