041.0728.111001
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ
ՈՐՈՇՈՒՄ
11 հոկտեմբերի 2001 թվականի N 728
ՆԻԴԵՐԼԱՆԴՆԵՐԻ ԹԱԳԱՎՈՐՈՒԹՅԱՆ ՈՒԹՌԵԽԹ ՔԱՂԱՔԻ ՍՈՒՐԲ ԿԱՏԱՐԻՆԵ ԿՈՒՍԱՆՈՑԻ ԹԱՆԳԱՐԱՆՈՒՄ ՑՈՒՑԱՀԱՆԴԵՍ ԿԱԶՄԱԿԵՐՊԵԼՈՒ ՄԱՍԻՆ
1. Հայաստանի Հանրապետության մշակույթի, երիտասարդության հարցերի և սպորտի նախարարությանը` Մայր Աթոռ Սուրբ Էջմիածնի թանգարանների տնօրինության հետ Հայաստանում քրիստոնեության պետական կրոն հռչակման 1700-ամյակի տոնակատարության շրջանակներում 2001 թվականի նոյեմբերի 1-ից մինչև 2002 թվականի մարտի 3-ը Նիդերլանդների Թագավորության Ութռեխթ քաղաքի Սուրբ Կատարինե կուսանոցի թանգարանում կազմակերպել և անցկացնել ցուցահանդես և մինչև 2001 թվականի հոկտեմբերի 11-ը հաստատել ժամանակավորապես արտահանվող ցուցանմուշների ցանկը:
2. Հայաստանի Հանրապետության կառավարությանն առընթեր Մ. Մաշտոցի անվան հին ձեռագրերի գիտահետազոտական ինստիտուտին (Մատենադարան)` նշված ցուցահանդեսի կազմակերպման նպատակով Մատենադարանից 33 ձեռագիր 2001 թվականի հոկտեմբերի 11-ից մինչև 2002 թվականի մարտի 17-ը` սահմանված կարգով ժամանակավորապես հանձնել Հայաստանի Հանրապետության մշակույթի, երիտասարդության հարցերի և սպորտի նախարարության Հայաստանի պատմության պետական թանգարանին:
3. Հայաստանի Հանրապետության արտաքին գործերի նախարարությանը` աջակցել նշված ցուցահանդեսի կազմակերպմանն ու անցկացմանը:
4. Հայաստանի Հանրապետության կառավարությանն առընթեր մաքսային պետական կոմիտեին` նշված ցուցահանդեսի ցուցանմուշների ժամանակավոր արտահանման և վերադարձի ժամանակ զննումը կատարել Հայաստանի Հանրապետության մշակույթի, երիտասարդության հարցերի և սպորտի նախարարության հայտերին համապատասխան:
5. Հայաստանի Հանրապետության կառավարությանն առընթեր քաղաքացիական ավիացիայի գլխավոր վարչությանը` ապահովել նշված ցուցահանդեսի ցուցանմուշների ժամանակավոր արտահանումը Նիդերլանդների Թագավորության Ութռեխթ քաղաք` 2001 թվականի հոկտեմբերի 17-ին` Երևան-Ամստերդամ չվերթով, և ներմուծումը Երևան` 2002 թվականի մարտի 17-ին` Ամստերդամ-Երևան չվերթով:
6. Հայաստանի Հանրապետության ներքին գործերի նախարարությանը` ապահովել նշված ցուցահանդեսի ցուցանմուշների անվտանգ տեղափոխումը Հայաստանի պատմության պետական թանգարանից Երևանի «Զվարթնոց» օդանավակայան և վերադարձը Հայաստանի պատմության պետական թանգարան:
7. Ընդունել ի գիտություն, որ նշված ցուցահանդեսի կազմակերպման հետ կապված ծախսերը և ժամանակավորապես արտահանվող ցուցանմուշների ապահովագրությունն իրականացնում է հրավիրող կողմը: