040.0300.010402
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«1» ապրիլի 2002 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
1 ապրիլի 2002 թվականի N 300
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԳՈՒՅՔԻ ԿԱՌԱՎԱՐՄԱՆ ՆԱԽԱՐԱՐՈՒԹՅԱՆԸ ԳՈՒՅՔ ՎԱՃԱՌԵԼՈՒ ԹՈՒՅԼՏՎՈՒԹՅՈՒՆ ՏԱԼՈՒ ՄԱՍԻՆ
Հայաստանի Հանրապետության կառավարությունը որոշում է.
1. Թույլատրել Հայաստանի Հանրապետության պետական գույքի կառավարման նախարարությանն իր տնօրինության` Երևանի Լենինգրադյան 46/1 հասցեում գտնվող «Սեբաստիա» հյուրանոցի գույքը (այսուհետև` գույք) վաճառել «Սեբաստիա» հյուրանոց» սահմանափակ պատասխանատվությամբ ընկերությանը (այսուհետև` գնորդ):
2. Սահմանել գույքի վաճառքի գինը` 25 հազար ԱՄՆ-ի դոլարին համարժեք դրամ:
3. Սահմանել, որ գնորդը պարտավոր է`
ա) սույն որոշումն ուժի մեջ մտնելուց հետո 30 օրվա ընթացքում «Պետական սեփականություն համարվող հիմնական միջոցների (ֆոնդերի) օտարումից մուտքեր» գանձապետական հաշվին վճարել սույն որոշման 2-րդ կետով սահմանված գումարը.
բ) իր միջոցների հաշվին վճարել անշարժ գույքի վաճառքից ծագող գույքային իրավունքների պետական գրանցման հետ կապված վճարներն ու տուրքերը.
գ) սույն որոշումն ուժի մեջ մտնելուց հետո եռամսյա ժամկետում` հյուրանոցում բնակվող փախստականների ընտանիքներին ապահովել համարժեք տարածքներով կամ կատարել համապատասխան դրամական փոխհատուցում:
4. Հայաստանի Հանրապետության կառավարությանն առընթեր միգրացիայի և փախստականների վարչությանը` գնորդի կողմից սույն որոշման 3-րդ կետի «գ» ենթակետով սահմանված պայմանների կատարումից հետո մեկամսյա ժամկետում ապահովել փախստականների ընտանիքների կողմից զբաղեցված տարածքների ազատումը:
5. Հայաստանի Հանրապետության պետական գույքի կառավարման նախարարությանը` սույն որոշման 3-րդ կետի «ա» ենթակետով նախատեսված վճարման և «գ» ենթակետով սահմանված պայմանների կատարումից հետո տասնօրյա ժամկետում գնորդի հետ կնքել առուվաճառքի պայմանագիր:
6. Սույն որոշումն ուժի մեջ է մտնում 2002 թվականի ապրիլի 1-ից: