Սեղմել Esc փակելու համար:
ՋՐԻ ԱԶԳԱՅԻՆ ԽՈՐՀՐԴԻ ԿԱՆՈՆԱԿԱՐԳՆ ՈՒ ԿԱ...
Քարտային տվյալներ

Տեսակ
Գործում է
Ընդունող մարմին
Ընդունման ամսաթիվ
Համար

ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo

ՋՐԻ ԱԶԳԱՅԻՆ ԽՈՐՀՐԴԻ ԿԱՆՈՆԱԿԱՐԳՆ ՈՒ ԿԱԶՄԸ ՀԱՍՏԱՏԵԼՈՒ ՄԱՍԻՆ

 

 

041.0532.160902

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

ՈՐՈՇՈՒՄ

 

16 սեպտեմբերի 2002 թվականի N 532-Ն

 

ՋՐԻ ԱԶԳԱՅԻՆ ԽՈՐՀՐԴԻ ԿԱՆՈՆԱԿԱՐԳՆ ՈՒ ԿԱԶՄԸ ՀԱՍՏԱՏԵԼՈՒ ՄԱՍԻՆ

 

Հայաստանի Հանրապետության ջրային օրենսգրքի 8-րդ հոդվածի երկրորդ ու երրորդ մասերին և 121-րդ հոդվածի յոթերորդ մասի 1-ին կետին համապատասխան`

1. Հաստատել`

ա) ջրի ազգային խորհրդի կանոնակարգը` համաձայն N 1 հավելվածի.

բ) ջրի ազգային խորհրդի կազմը` համաձայն N 2 հավելվածի:

2. Սույն որոշումն ուժի մեջ է մտնում 2002 թվականի հոկտեմբերի 10-ից:

 

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2002 ԹՎԱԿԱՆԻ ՍԵՊՏԵՄԲԵՐԻ 16-ԻՆ

 

Հավելված N 1

Հայաստանի Հանրապետության

վարչապետի 2002 թվականի

սեպտեմբերի 16-ի N 532-Ն որոշման

 

ԿԱՆՈՆԱԿԱՐԳ ՋՐԻ ԱԶԳԱՅԻՆ ԽՈՐՀՐԴԻ

 

1. Ջրի ազգային խորհուրդը (այսուհետ` խորհուրդ) ջրային ռեսուրսների կառավարման բնագավառում բարձրագույն խորհրդատվական մարմին է, որը միջբնագավառային մասնակցության միջոցով քննարկում և առաջարկություններ է ներկայացնում ջրի ազգային քաղաքականության, ջրի ազգային ծրագրին ու բնագավառին վերաբերող այլ իրավական ակտերի վերաբերյալ:

2. Խորհրդի լիազորությունները սահմանվում են Հայաստանի Հանրապետության ջրային օրենսգրքով:

3. Խորհուրդը գործում է Հայաստանի Հանրապետության ջրային օրենսգրքին, այլ օրենքներին և սույն կանոնակարգին համապատասխան: Խորհուրդն ունի իր անվանմամբ ձևաթուղթ:

(3-րդ կետը փոփ. 03.02.06 թիվ 67-Ն որոշում)

4. Խորհրդի նախագահն ի պաշտոնե Հայաստանի Հանրապետության վարչապետն է:

5. Խորհրդի նախագահը`

ա) հրավիրում և վարում է խորհրդի նիստերը, որոշում է ընդունում հարցման կարգով խորհրդի նիստ հրավիրելու վերաբերյալ: Իր բացակայության դեպքում խորհրդի նախագահի լիազորությունը հանձնարարում է խորհրդի նախագահի տեղակալին, իսկ նրա բացակայության դեպքում` խորհրդի անդամներից որևէ մեկին.

բ) ապահովում է խորհրդի բնականոն գործունեությունը.

գ) խորհրդին է ներկայացնում խորհրդի նիստերի օրակարգերի նախագծերը.

դ) խորհրդի նիստերի միջև ընկած ժամանակահատվածում համակարգում է խորհրդի աշխատանքը:

(5-րդ կետը փոփ. 02.02.18 թիվ 67-Ն որոշում)

6. Խորհուրդն իր կազմից ընտրում է խորհրդի քարտուղար և ունի քարտուղարություն:

(6-րդ կետը փոփ. 03.02.06 թիվ 67-Ն որոշում)

7. Խորհրդի քարտուղարը`

ա) ապահովում է խորհրդի քննարկմանը ներկայացվող փաստաթղթերի և նյութերի պատրաստումը, այդ թվում` հարցման կարգով հրավիրվող խորհրդի նիստերի.

բ) ապահովում է խորհրդի նիստերի արձանագրության կազմումը.

գ) ապահովում է խորհրդի գործունեության մասին տեղեկատվության տարածումը.

դ) խորհրդի նախագահի հանձնարարությամբ իրականացնում է այլ լիազորություններ.

ե) ապահովում է քարտուղարության բնականոն գործունեությունը:

(7-րդ կետը փոփ. 03.02.06 թիվ 67-Ն, 02.02.18 թիվ 67-Ն որոշումներ)

8. Խորհրդի անդամն իրավունք ունի`

ա) մասնակցելու խորհրդի նիստերին` վերջինիս իրավասությանը վերաբերող բոլոր հարցերի նկատմամբ ձայնի իրավունքով.

բ) խորհրդի նիստերում հանդես գալու առաջարկություններով (այդ թվում` հարցման կարգով հրավիրվող խորհրդի նիստերի).

գ) խորհրդի որոշմամբ իրականացնելու այլ լիազորություններ:

(8-րդ կետը փոփ. 02.02.18 թիվ 67-Ն որոշում)

9. Խորհուրդն իր գործունեությունն իրականացնում է նիստերի, այդ թվում` հարցման կարգով նիստ հրավիրելու միջոցով: Խորհրդի նիստերը հրավիրվում են ըստ անհրաժեշտության, առնվազն երեք ամիսը մեկ անգամ:

(9-րդ կետը փոփ. 02.02.18 թիվ 67-Ն որոշում)

10. Խորհրդի նիստն իրավազոր է, եթե նիստին մասնակցում է խորհրդի անդամների ընդհանուր թվի կեսից ավելին: Հերթական նիստն սկսվում է օրակարգի հաստատմամբ: Խորհրդի անդամները նիստը վարելու կարգի վերաբերյալ առաջարկություններ անում են մինչև հարցի զեկուցումն ու քվեարկությունից առաջ: Զեկուցողի առաջարկությունը քվեարկության է դրվում առաջին հերթին: Զեկուցողի առաջարկությունը չընդունվելու դեպքում քվեարկվում են մյուս առաջարկությունները: Այն առաջարկությունը, որն իր բովանդակությամբ հակառակ է արդեն ընդունված առաջարկությանը, քվեարկության չի դրվում:

10.1. Հարցման կարգով խորհրդի նիստ հրավիրելու դեպքում խորհրդի քարտուղարը խորհրդի նախագահի հետ համաձայնեցված օրակարգի նախագիծը խորհրդի անդամներին գրավոր ներկայացնում է հարցման: Օրակարգը հաստատվելու դեպքում խորհրդի քարտուղարն օրակարգում ընդգրկված հարցերի նյութերը գրավոր ներկայացնում է խորհրդի անդամներին: Խորհրդի անդամները, խորհրդի նախագահի կողմից սահմանած ժամկետում, խորհրդի քարտուղարին ներկայացնում են գրավոր դիրքորոշում` հստակ նշելով հարցերից յուրաքանչյուրին «կողմ» կամ «դեմ» լինելու վերաբերյալ: Խորհրդի նախագահի կողմից սահմանած ժամկետում գրավոր դիրքորոշում չներկայացնելու կամ ներկայացված գրության մեջ հարցերի վերաբերյալ հստակ դիրքորոշում չներկայացնելու դեպքում խորհրդի անդամի դիրքորոշումը տվյալ հարցի վերաբերյալ համարվում է դրական:

(10.1-ին կետը լրաց. 02.02.18 թիվ 67-Ն որոշում)

10.2. Հարցման կարգով նիստերի որոշումները համարվում են ընդունված, եթե հարցման կարգով «կողմ» է արտահայտվել խորհրդի անդամների պարզ մեծամասնությունը:

(10.2-րդ կետը լրաց. 02.02.18 թիվ 67-Ն որոշում)

11. Խորհրդի որոշումներն ընդունվում են բաց քվեարկությամբ` նիստի մասնակիցների ձայների պարզ մեծամասնությամբ: Խորհրդի յուրաքանչյուր անդամ քվեարկությունների ժամանակ ունի 1 ձայն: Ձայների հավասարության դեպքում խորհրդի նախագահի ձայնը վճռորոշ է: Խորհրդի որոշումները կարող են վերանայվել միայն խորհրդի կողմից: Խորհրդի որոշումները խորհրդատվական բնույթ ունեն:

12. Խորհուրդն իրավունք ունի իր լիազորությունների իրականացման համար պետական մարմիններից, պաշտոնատար անձանցից, կազմակերպություններից ու քաղաքացիներից պահանջելու տեղեկանքներ, պարզաբանումներ և այլ փաստաթղթեր:

13. Խորհրդի նիստերում, բացի խորհրդի անդամներից, իրավունք ունեն ներկա գտնվելու խորհրդի նախագահի կողմից հրավիրված անձինք` խորհրդակցական ձայնի իրավունքով: Խորհուրդը կարևոր հարցերի վերաբերյալ կարող է կազմակերպել ընդլայնված լսումներ` հրավիրելով պաշտոնատար անձանց և մասնագետների: Խորհրդի քննարկումների բովանդակային խնդիրները ենթակա են հրապարակման: Խորհուրդը տարեկան մեկ անգամ հրապարակայնորեն հանդես է գալիս կատարած աշխատանքների մասին հաղորդմամբ:

Խորհրդի նիստերն արձանագրվում են: Խորհրդի նախագահի կամ խորհրդի անդամի պահանջի դեպքում նրա առարկությունը կամ վերապահումը պետք է արտացոլվի արձանագրության մեջ:

14. Խորհուրդն իր լիազորությունների սահմաններում առանձին խնդիրների լուծման նպատակով կարող է ստեղծել աշխատանքային խումբ (խմբեր)` ներգրավելով համապատասխան մասնագետների:

Քարտուղարության և աշխատանքային խմբերում ներգրավված մասնագետների վարձատրությունը խորհրդի ներկայացմամբ, սահմանվում է Հայաստանի Հանրապետության վարչապետի կողմից` Հայաստանի Հանրապետության օրենսդրությամբ սահմանված կարգով: Աշխատանքային խումբը (խմբերը) կատարած աշխատանքների մասին հաշվետվություն է ներկայացնում խորհրդին:

(14-րդ կետը փոփ. 03.02.06 թիվ 67-Ն որոշում)

15. Խորհրդի անդամն իր լիազորություններն իրականացնում է հասարակական հիմունքներով: Քարտուղարության և խորհրդի աշխատանքները կազմակերպելու համար հատկացվում են անհրաժեշտ նյութեր, սարքեր, սարքավորումներ, տեխնիկական միջոցներ, աշխատանքային տարածք և տրանսպորտային միջոցներ, որոնց տրամադրման կարգը խորհրդի ներկայացմամբ սահմանվում է Հայաստանի Հանրապետության վարչապետի կողմից:

(15-րդ կետը փոփ. 03.02.06 թիվ 67-Ն որոշում)

 

Հավելված N 2

Հայաստանի Հանրապետության

վարչապետի 2002 թվականի

սեպտեմբերի 16-ի N 532-Ն որոշման

 

ԿԱԶՄ

ՋՐԻ ԱԶԳԱՅԻՆ ԽՈՐՀՐԴԻ

 

    Ն. Փաշինյան        - ՀՀ վարչապետ (խորհրդի նախագահ)

 

    Է. Գրիգորյան       - ՀՀ բնապահպանության նախարար

 

    Ս. Պապիկյան        - ՀՀ տարածքային կառավարման և  զարգացման նախարար

 

    Ա. Խաչատրյան       - ՀՀ գյուղատնտեսության նախարար

 

    Ա. Ջանջուղազյան    - ՀՀ ֆինանսների նախարար

 

    Հ. Ռոստոմյան       - ՀՀ արտակարգ իրավիճակների նախարար

 

    Ա. Էլոյան          - ՀՀ քաղաքաշինության կոմիտեի նախագահ

 

    Մ. Սողոմոնյան      - ՀՀ հանրային ծառայությունները կարգավորող

                         հանձնաժողովի նախագահի տեղակալ (համաձայնությամբ)

 

    Ի. Գաբայան         - ՀՀ էներգետիկ ենթակառուցվածքների և  բնական

                         պաշարների նախարարության ջրային կոմիտեի նախագահ

 

    Ս. Ղազարյան        - ՀՀ վարչապետի խորհրդական

 

    Կ. Մուխսյան        - ՀՀ վարչապետի աշխատակազմի տարածքային զարգացման և

                         շրջակա միջավայրի հարցերի վարչության պետ

 

    Ս. Աթանեսյան       - ՀՀ տնտեսական զարգացման և  ներդրումների

                         նախարարության պետական գույքի կառավարման կոմիտեի

                         նախագահի տեղակալ

 

    Է. Փիրումյան       - ՀՀ բնապահպանության նախարարության ջրային

                         ռեսուրսների կառավարման գործակալության պետի

                         ժամանակավոր պաշտոնակատար

 

    Ա. Վանյան          - «Հիվանդությունների վերահսկման և  կանխարգելման

                         ազգային կենտրոն» պետական ոչ առևտրային

                         կազմակերպության գլխավոր տնօրեն

 

    Յու. Ջավադյան      - «Հայջրնախագիծ ինստիտուտ» փակ բաժնետիրական

                         ընկերության տնօրեն (համաձայնությամբ)

 

    Հ. Թոքմաջյան       - Հիդրավլիկական հետազոտությունների հայկական ազգային

                         ասոցիացիայի նախագահ (համաձայնությամբ)

 

(2-րդ հավելվածը փոփ. 19.08.03 թիվ 390-Ն, 02.12.03 թիվ 619-Ն, 12.04.04 թիվ 203-Ն, 20.07.05 թիվ 553-Ն, 03.02.06 թիվ 67-Ն, 06.05.06 թիվ 304-Ն, 08.10.07 թիվ 710-Ն, 25.10.08 թիվ 839-Ն, 21.03.11 թիվ 208-Ն, 17.01.13 թիվ 24-Ն, 18.07.14 թիվ 669-Ն, 10.02.15 թիվ 196-Ն, 03.06.15 թիվ 458-Ն, 28.09.15 թիվ 855-Ն, 30.12.15 թիվ 1286-Ն, 25.07.16 թիվ 667-Ն, 31.01.17 թիվ 71-Ա, 02.02.18 թիվ 67-Ն,  07.03.18 թիվ 229-Ն, 27.08.18 թիվ 1139-Ն որոշումներ)

 

 

pin
ՀՀ Վարչապետ
16.09.2002
N 532-Ն
Որոշում