ՀՀ ՊԵՏԱԿԱՆ ԼԻԱԶՈՐ ՄԱՐՄՆԻՑ ՄԵԿ ԱՅԼ ՊԵՏԱԿԱՆ ԼԻԱԶՈՐ ՄԱՐՄԻՆ ԶԻՆԾԱՌԱՅՈՂՆԵՐԻՆ ՏԵՂԱՓՈԽԵ ...

040.1654.281002

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ

«28» հոկտեմբերի 2002 թ.

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

17 հոկտեմբերի 2002 թվականի N 1654-Ն

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԼԻԱԶՈՐ ՄԱՐՄՆԻՑ ՄԵԿ ԱՅԼ ՊԵՏԱԿԱՆ ԼԻԱԶՈՐ ՄԱՐՄԻՆ ՊԱՅՄԱՆԱԳՐԱՅԻՆ ԶԻՆԾԱՌԱՅՈՂՆԵՐԻՆ ՏԵՂԱՓՈԽԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ

Ղեկավարվելով «Զինվորական ծառայության և զինծառայողի կարգավիճակի մասին» Հայաստանի Հանրապետության օրենքի 44-րդ հոդվածի 2-րդ մասով` Հայաստանի Հանրապետության կառավարությունը որոշում է.

1. Սահմանել Հայաստանի Հանրապետության պետական լիազոր մարմնից մեկ այլ պետական լիազոր մարմին պայմանագրային զինծառայողներին տեղափոխելու կարգը` համաձայն հավելվածի:

(1-ին կետը փոփ. 07.04.2022 թիվ 442-Ն որոշում)

2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:

(վերնագիրն ու նախաբանը փոփ. 07.04.2022 թիվ 442-Ն որոշում)

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2002 ԹՎԱԿԱՆԻ ՀՈԿՏԵՄԲԵՐԻ 23-ԻՆ

Հավելված

Հայաստանի Հանրապետության

կառավարության 2002 թվականի

հոկտեմբերի 17-ի N 1654-Ն որոշման

ԿԱՐԳ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԼԻԱԶՈՐ ՄԱՐՄՆԻՑ ՄԵԿ ԱՅԼ ՊԵՏԱԿԱՆ ԼԻԱԶՈՐ ՄԱՐՄԻՆ ՊԱՅՄԱՆԱԳՐԱՅԻՆ ԶԻՆԾԱՌԱՅՈՂՆԵՐԻՆ ՏԵՂԱՓՈԽԵԼՈՒ

(վերնագիրը փոփ. 07.04.2022 թիվ 442-Ն որոշում)

1. Սույն կարգով սահմանվում է Հայաստանի Հանրապետության պետական լիազոր մարմնից մեկ այլ պետական լիազոր մարմին (այսուհետ` լիազոր մարմին) պայմանագրային զինծառայողներին (այսուհետ` զինծառայող)` հետագա ծառայությունը շարունակելու համար, տեղափոխելու կարգը:

(1-ին կետը փոփ. 07.04.2022 թիվ 442-Ն որոշում)

2. (2-րդ կետն ուժը կորցրել է 07.04.2022 թիվ 442-Ն որոշում)

3. Զինծառայողի տեղափոխությունն իրականացվում է լիազոր մարմինների միջև համաձայնեցված` զինծառայողի խնդրանքով կամ համաձայնությամբ:

4. Զինծառայողին, իր խնդրանքով, տեղափոխելու համար անհրաժեշտ է տվյալ լիազոր մարմնի` վերադասության կարգով բոլոր ուղղակի պետերի թույլտվությունը` մեկ այլ լիազոր մարմնին դիմելու համար:

Անհրաժեշտ թույլտվությունների առկայության դեպքում զինծառայողը համապատասխան լիազոր մարմնի ղեկավարին ներկայացնում է դիմում` հետագա ծառայությունն այդ մարմնի համակարգում շարունակելու խնդրանքով:

Զինծառայողի խնդրանքը բավարարելու դեպքում նշված լիազոր մարմնի ղեկավարը միջնորդում է համապատասխան լիազոր մարմնի ղեկավարի (համապատասխան տեղակալի) առջև` զինծառայողին տեղափոխելու մասին որոշում ընդունելու համար:

5. Լիազոր մարմնից մեկ այլ լիազոր մարմին զինծառայողը տեղափոխվում է նաև ծառայողական անհրաժեշտությունից ելնելով:

Ելնելով ծառայողական անհրաժեշտությունից` զինծառայողի տեղափոխությունը կատարվում է այն լիազոր մարմնի ղեկավարի հիմնավորված միջնորդության հիման վրա, որտեղ ծագել է նման անհրաժեշտությունը: Նշված հիմքով զինծառայողին տեղափոխելու դեպքում անհրաժեշտ է վերջինիս գրավոր համաձայնությունը:

6. Լիազոր մարմնից մեկ այլ լիազոր մարմին զինծառայողին տեղափոխելիս` հրաման է տրվում նրան զբաղեցրած պաշտոնից ազատելու, տվյալ լիազոր մարմնի անձնակազմի ցուցակներից հանելու և հետագա ծառայությունը շարունակելու համար համապատասխան լիազոր մարմին տեղափոխելու մասին:

7. Տեղափոխված զինծառայողը համապատասխան լիազոր մարմնի անձնակազմի ցուցակներում գրանցվում է տեղափոխման հրամանը տալու օրվանից և սահմանված կարգով նշանակվում է պաշտոնի: