Սեղմել Esc փակելու համար:
«ՍԵՎԱՆ» ԱԶԳԱՅԻՆ ՊԱՐԿԻ ԵՎ ԴՐԱՆ ՀԱՐՈՂ Տ...
Քարտային տվյալներ

Տեսակ
Գործում է
Ընդունող մարմին
Ընդունման ամսաթիվ
Համար

Ստորագրման ամսաթիվ
ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo

«ՍԵՎԱՆ» ԱԶԳԱՅԻՆ ՊԱՐԿԻ ԵՎ ԴՐԱՆ ՀԱՐՈՂ ՏԱՐԱԾՔՆԵՐՈՒՄ ՀՈՂԱՄԱՍԵՐԻ ՎԱՐՁԱԿԱԼՈՒԹՅԱՆ, ԿԱՌՈ ...

 

 

040.1563.291208

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

 

18 դեկտեմբերի 2008 թվականի N 1563-Ն

 

i

«ՍԵՎԱՆ» ԱԶԳԱՅԻՆ ՊԱՐԿԻ ԵՎ ԴՐԱՆ ՀԱՐՈՂ ՏԱՐԱԾՔՆԵՐՈՒՄ ՀՈՂԱՄԱՍԵՐԻ ՎԱՐՁԱԿԱԼՈՒԹՅԱՆ, ԿԱՌՈՒՑԱՊԱՏՄԱՆ ԻՐԱՎՈՒՆՔԻ ՏՐԱՄԱԴՐՄԱՆ ԵՎ ՔԱՂԱՔԱՇԻՆԱԿԱՆ ԳՈՐԾՈՒՆԵՈՒԹՅԱՆ ԻՐԱԿԱՆԱՑՄԱՆ ՄԱՍԻՆ

 

Ելնելով Սևանա լճի էկոհամակարգի վերականգնման, բնական զարգացման ու օգտագործման, ինչպես նաև «Սևան» ազգային պարկի տարածքում քաղաքաշինական գործունեության կանոնակարգման անհրաժեշտությունից և հիմք ընդունելով «Սևանա լճի մասին» Հայաստանի Հանրապետության օրենքի 15-րդ հոդվածի «ա» կետի, «Քաղաքաշինության մասին» Հայաստանի Հանրապետության օրենքի 19-րդ հոդվածի, «Բնության հատուկ պահպանվող տարածքների մասին» Հայաստանի Հանրապետության օրենքի 26-րդ հոդվածի, «Սևանա լճի էկոհամակարգի վերականգնման, պահպանման, վերարտադրման և օգտագործման միջոցառումների տարեկան ու համալիր ծրագրերը հաստատելու մասին» Հայաստանի Հանրապետության օրենքի և Հայաստանի Հանրապետության կառավարության 2008 թվականի հուլիսի 31-ի N 812-Ն որոշման 2-րդ կետի պահանջները` Հայաստանի Հանրապետության կառավարությունը որոշում է.

i

1. Սահմանել, որ Հայաստանի Հանրապետության օրենսդրությամբ որպես քաղաքաշինական գործունեության հատուկ կարգավորման օբյեկտներ առանձնացված` Սևանա լճի կենտրոնական և անմիջական ազդեցության էկոլոգիական գոտիներում ընդգրկված տարածքները, ըստ կառուցապատման ռեժիմների, տարանջատվում են միմյանց հարող հետևյալ հաջորդական ենթագոտիների`

1) Սևանա լճի կենտրոնական էկոլոգիական գոտում`

ա. առաջին ենթագոտի` Սևանա լճի մակարդակի բարձրացման հետևանքով` Հայաստանի Հանրապետության օրենսդրությամբ սահմանված ջրածածկման և ողողման ենթակա տարածքները, որը ներառում է «Սևան» ազգային պարկի լճի ջրային սահմանից մինչև 1905.0 մետր բացարձակ նիշը.

բ. երկրորդ ենթագոտի` առաջին ենթագոտու սահմանից դեպի ցամաք` մինչև Հայաստանի Հանրապետության օրենսդրությամբ սահմանված «Սևան» ազգային պարկի սահմանն ընդգրկող տարածքները.

2) Սևանա լճի անմիջական ազդեցության էկոլոգիական գոտում` երրորդ ենթագոտի` «Սևան» ազգային պարկի սահմանից դուրս` դեպի ցամաք մինչև 500 մետր լայնությամբ շերտն ընդգրկող տարածքները (N 1 հավելվածում թվարկված համայնքների վարչական սահմաններում ընդգրկված տարածքային հատվածների ներառմամբ):

(1-ին կետը փոփ. 24.06.10 թիվ 788-Ն, 29.12.11 թիվ 1908-Ն որոշումներ)

1.1. (1.1-ին կետն ուժը կորցրել է 29.12.11 թիվ 1908-Ն որոշում)

i

(1.1-րդ կետը լրաց. 24.06.10 թիվ 788-Ն որոշում)

2. Սույն որոշմամբ սահմանված ենթագոտիների, լողափի, բուֆերային և այլ գոտիների տարանջատումն ու դրանց կառուցապատման չափորոշիչները ճշգրտվում և ամրագրվում են սահմանված կարգով մշակված ու հաստատված գոտևորման նախագծերով և կառուցապատման էսքիզներով (սխեմաներով):

i

3. Սույն որոշմամբ սահմանված առաջին և երկրորդ ենթագոտիներում պետական և համայնքային սեփականություն հանդիսացող հողամասերի կառուցապատման ու օգտագործման իրավունքի տրամադրման համար ստեղծել միջգերատեսչական հանձնաժողով` սույն որոշման 14-րդ կետի 1-ին ենթակետին համապատասխան: Սահմանել, որ`

1) միջգերատեսչական հանձնաժողովը`

ա. իրականացնում է հողամասերի վարձակալության կամ կառուցապատման իրավունքի տրամադրման մրցութային հանձնաժողովի գործառույթները, որոնք իրականացնում է Հայաստանի Հանրապետության օրենսդրության պահանջներին համապատասխան` հաշվի առնելով սույն որոշմամբ սահմանված առանձնահատկությունները,

բ. հողամասերի մրցույթի պայմանները ներկայացնում է Հայաստանի Հանրապետության կառավարության տարածքային զարգացման և բնապահպանական նախարարական կոմիտեի քննարկմանը.

2) Հայաստանի Հանրապետության հողային օրենսգրքով սահմանված այլ դեպքերում (առանց մրցույթի անհատույց օգտագործման և այլն) հողամասը տրամադրվում է միջգերատեսչական հանձնաժողովի դրական եզրակացության առկայության դեպքում.

3) սույն կարգին համապատասխան տրամադրված հողամասի կառուցապատման կամ օգտագործման իրավունքի մասին պայմանագրերը կնքվում են սույն որոշմամբ սահմանված`

ա. առաջին և երկրորդ ենթագոտիներում` «Սևան» ազգային պարկ» պետական ոչ առևտրային կազմակերպության հետ:

(3-րդ կետը փոփ. 26.11.09 թիվ 1353-Ն որոշում)

4. Սույն որոշման 1-ին կետով սահմանված ենթագոտիներում`

1) կառուցապատման նպատակով հողամասերն ու ճարտարապետահատակագծային առաջադրանքները տրամադրել, ինչպես նաև ճարտարապետաշինարարական նախագծային փաստաթղթերը մշակել սահմանված կարգով հաստատված գոտևորման նախագծերի և կառուցապատման էսքիզների (սխեմաների) դրույթներին համապատասխան.

2) ապահովել նախագծային փաստաթղթերի պարտադիր փորձաքննությունը` բացառելով Հայաստանի Հանրապետության կառավարության 2002 թվականի փետրվարի 2-ի «Քաղաքաշինական փաստաթղթերի փորձաքննության կարգը հաստատելու մասին» N 96 որոշմամբ հաստատված կարգի 4-րդ կետով սահմանված դրույթների կիրառումը: Շրջակա միջավայրի վրա ազդեցության փորձաքննությունն իրականացնել Հայաստանի Հանրապետության օրենսդրությամբ սահմանված կարգով.

3) մինչև սույն կետի 1-ին ենթակետով սահմանված գոտևորման նախագծերի և կառուցապատման էսքիզների (սխեմաների) հաստատումը ճարտարապետահատակագծային առաջադրանքների նախագծերը` կառուցապատման համար առաջարկվող հողամասերի տեղադրությամբ, Հայաստանի Հանրապետության Գեղարքունիքի մարզպետի ներկայացմամբ, համաձայնեցնել Հայաստանի Հանրապետության քաղաքաշինության նախարարության հետ.

i

4) քաղաքաշինական ծրագրային (տարածական պլանավորման) փաստաթղթերը Հայաստանի Հանրապետության օրենսդրությամբ սահմանված կարգով շահագրգիռ մարմինների և Սևանա լճի պահպանության փորձագիտական հանձնաժողովի հետ համաձայնեցվելուց հետո, Հայաստանի Հանրապետության քաղաքաշինության նախարարի ներկայացմամբ, հաստատում է Հայաստանի Հանրապետության կառավարությունը.

5) կառուցապատման էսքիզները (սխեմաները) հաստատում է պատվիրատուն` նախապես համաձայնեցնելով Հայաստանի Հանրապետության քաղաքաշինության նախարարության հետ:

5. Սույն որոշման 1-ին կետի 1-ին ենթակետի «ա» պարբերությամբ սահմանված առաջին ենթագոտին ներառում է լողափի և բուֆերային գոտու տարածքները: Առաջին ենթագոտում`

1) արգելվում է հիմնական օբյեկտների կառուցումը (բացառությամբ սույն կետի 3-րդ ենթակետով սահմանված դեպքերի): Հանգստի և սպասարկող օբյեկտների ֆունկցիոնալ կահավորումն ու բարեկարգումն իրականացնել միայն ոչ հիմնական շինություններով` Հայաստանի Հանրապետության օրենսդրության պահանջներին համապատասխան.

2) քաղաքաշինական գործունեություն իրականացնելու նպատակով կառուցապատման իրավունքի տրամադրման ժամկետը չի կարող գերազանցել 3 տարին, իսկ գյուղատնտեսական գործունեություն իրականացնելու նպատակով վարձակալության ժամկետը` 5 տարին, եթե նշված տարածքների մասով` օրենքով կամ Հայաստանի Հանրապետության կառավարության որոշմամբ այլ ժամկետ սահմանված չէ.

3) ափապաշտպան, ինժեներատրանսպորտային ենթակառուցվածքների և (կամ) հիդրոտեխնիկական բնույթի հիմնական օբյեկտների կառուցման անհրաժեշտության դեպքում` քաղաքաշինական գործունեության իրականացման նպատակով հողամասերը տրամադրել ու կառուցապատման գործընթացն իրականացնել բացառապես Հայաստանի Հանրապետության կառավարության կողմից հաստատված ծրագրերի (հողամասի օգտագործման տեխնիկատնտեսական հիմնավորումների ներառմամբ) հիման վրա` հաշվի առնելով բնապահպանական սահմանափակումները:

6. Սույն որոշման 1-ին կետի 1-ին ենթակետի «բ» պարբերությամբ սահմանված երկրորդ ենթագոտու կառուցապատման համար նախատեսված տարածքները, կախված ռելիեֆի առանձնահատկություններից, կարող են ներառել ջրի մակարդակի բարձրացմամբ պայմանավորված նոր (ապագա) լողափի, հին և նոր լողափերի բուֆերային գոտիները, ինչպես նաև հիմնական շենքերով ու շինություններով կառուցապատումը:

7. Երկրորդ ենթագոտու տարածքում կառուցապատման նպատակով պետական և համայնքային սեփականություն հանդիսացող հողամասերը կարող են տրամադրվել մինչև 25 տարի ժամկետով, իսկ եթե կառուցապատման համար ներդրումները կազմում են 150 մլն և ավելի դրամ, ապա հողամասերի կառուցապատման իրավունքի տրամադրման պայմանագրերը դրանց գործողության ընթացքում կամ դրանց գործողության ժամկետներն ավարտվելուց հետո կարող են երկարաձգվել մինչև 2060 թվականի դեկտեմբերի 31-ը, եթե Հայաստանի Հանրապետության օրենսդրությամբ այլ ժամկետ սահմանված չէ:

8. Եթե առաջին ենթագոտում վարձակալության կամ կառուցապատման իրավունքով տրամադրվող հողամասն ընդգրկում է նաև երկրորդ ենթագոտու տարածքային հատվածներ, որոնք կազմում են հողամասի ընդհանուր մակերեսի 50 և ավելի տոկոսը, ապա ամբողջ հողամասը վարձակալության կամ կառուցապատման իրավունքով տրամադրվում է երկրորդ ենթագոտու տարածքային հատվածների համար սահմանված ժամկետով: Ընդ որում, սույն որոշմամբ ամրագրված այլ սահմանափակումները կիրառվում են յուրաքանչյուր ենթագոտու համար նախատեսված կանոնակարգերով` համապատասխան նշում կատարելով հողամասի վարձակալության կամ կառուցապատման իրավունքի տրամադրման մասին պայմանագրում:

9. Օրենքով սահմանված` Սևանա լճի էկոտոնի ցամաքային ջրամերձ տարածքներում առանձնացվում են լողափի, իսկ դրան կից` դեպի ցամաք` բուֆերային գոտիներ: Գոտիների սահմանագծերը, ելնելով տարածքային առանձնահատկություններից, ենթակա են ճշգրտման` նախագծային փաստաթղթերի համաձայն:

i

10. Լողափերի կազմակերպման համար ֆիզիկական և իրավաբանական անձանց տրամադրվող հողամասերի մակերեսների գումարային չափը չի կարող գերազանցել լողափի գոտու ընդհանուր տարածքի 80 տոկոսը` մնացած հատվածում ապահովելով հանրության կողմից լողափի անարգել օգտագործման հնարավորությունը:

11. Սահմանել, որ Հայաստանի Հանրապետության օրենսդրությամբ սահմանված կարգով` ֆիզիկական և իրավաբանական անձանց հետ լողափի և բուֆերային գոտիներում գտնվող տարածքների նկատմամբ կնքվող համապատասխան պայմանագրերում անհրաժեշտ է նախատեսել դրույթներ` կապված հետևյալ պահանջների պահպանման հետ`

1) գործող սանիտարական կանոններին և նորմերին լողափի ջրի որակի և տարածքի սանիտարական վիճակի համապատասխանության ապահովում.

2) դեպի ջուր տանող հարմար, անվտանգ մոտեցումների կազմակերպում.

3) ջրի հատակի ռելիեֆի անվտանգության ապահովում (փոսերի, սուր առարկաների, ջրային բույսերի և այլնի բացակայություն).

4) բարենպաստ հիդրոլոգիական ռեժիմով (ջրապտույտների` 0,5 մ/վրկ ավելի հոսանքների բացակայություն) լողալու գոտու ջրային սահմանի, ինչպես նաև ջրային տրանսպորտի և սպորտային ինքնաշարժ միջոցների` դեպի ցամաք մուտքերի տարանջատում տարբերիչ նշաններով.

5) առանց փրկարարական և բուժսպասարկման ծառայությունների լողափերի շահագործման բացառում.

6) լողափի գոտու տարածքում տրանսպորտային միջոցների (բացառությամբ փրկարարական ու շտապ բուժօգնության մասնագիտացված ավտոտրանսպորտի և այլ արտակարգ իրավիճակները կանխարգելող միջոցների) մուտքի արգելում: Ջրային տրանսպորտի և սպորտային ինքնաշարժ միջոցներն օգտագործել լողալու գոտու ջրային սահմանից դուրս, իսկ դեպի ցամաք դրանց մուտքերը նախատեսել լողափերից դուրս` հատուկ առանձնացված տեղամասերում.

7) ավտոմեքենաների և այլ տրանսպորտային միջոցների կայանատեղերի կազմակերպում` ավտոմոբիլային ճանապարհներին հարակից հատվածներում: Տրանսպորտի կայանատեղերին կից` դեպի լիճ ուղղությամբ նախատեսել սանիտարապաշտպան կանաչ գոտի.

8) լողափի գոտում բաժանիչ պարիսպների կամ ցանկապատերի տեղադրման արգելում: Բուֆերային գոտում առանձին տարածքային հատվածներ կարող են սահմանազատվել ուղղահայաց կանաչապատմամբ ցանկապատերի (մինչև 1,5 մետր բարձրությամբ) կամ բուսական պատնեշների տեղադրման միջոցով.

9) բացառապես մաքրման կայանների միջոցով կեղտաջրերի մաքրման ապահովում` ըստ նորմատիվներով սահմանված չափաքանակների: Զուգարանների հորերը կոնսերվացնել ախտահանումից և սանիտարական ծառայությունների կողմից ակտավորումից հետո.

10) բազմամյա տնկիների աճեցման, բույսերի և կենդանիների նոր տեսակների ներմուծման և կլիմայավարժեցման, վնասատուների դեմ պայքարի ու հողերի պարարտացման նպատակով բույսերի պաշտպանության քիմիական միջոցների և պարարտանյութերի օգտագործման բացառում.

11) սույն որոշման N 2 հավելվածում նշված կահավորման ու սարքավորումների տարրերի տեխնիկական բնութագրերի ապահովում:

12. Սույն որոշման 1-ին կետի 2-րդ ենթակետով սահմանված երրորդ ենթագոտում հողամասերը տրամադրվում են Հայաստանի Հանրապետության օրենսդրությամբ սահմանված կարգով` առանց լրացուցիչ ժամկետային սահմանափակումների:

13. Հայաստանի Հանրապետության գյուղատնտեսության նախարարին` Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի նախագահի հետ համատեղ սույն որոշումն ուժի մեջ մտնելու օրվանից վեցամսյա ժամկետում` սահմանված կարգով Հայաստանի Հանրապետության կառավարության քննարկմանը ներկայացնել «Սևան» ազգային պարկի տարածքում հողամասերի օգտագործման առանձնահատկությունները:

14. Հայաստանի Հանրապետության բնապահպանության նախարարին` սույն որոշումն ուժի մեջ մտնելու օրվանից`

1) մեկամսյա ժամկետում` սահմանված կարգով Հայաստանի Հանրապետության վարչապետին ներկայացնել առաջարկություն սույն որոշման 1-ին կետով սահմանված ենթագոտիներում հողամասերի տրամադրման հարցերով միջգերատեսչական հանձնաժողովի ստեղծման և գործունեության կարգի վերաբերյալ.

2) 4-ամսյա ժամկետում` սահմանված կարգով Հայաստանի Հանրապետության կառավարության քննարկմանը ներկայացնել առաջարկություններ Հայաստանի Հանրապետության կառավարության 2002 թվականի մայիսի 30-ի «Սևան» ազգային պարկ» պետական հիմնարկը վերակազմակերպելու, «Սևան» ազգային պարկի և «Սևան» ազգային պարկ» պետական ոչ առևտրային կազմակերպության կանոնադրությունը հաստատելու մասին» N 927-Ն որոշումը սույն որոշման դրույթներին համապատասխանեցնելու վերաբերյալ.

3) մեկամյա ժամկետում` Հայաստանի Հանրապետության օրենսդրությամբ սահմանված կարգով ապահովել մինչև սույն որոշումն ուժի մեջ մտնելը սահմանված կարգով կնքված «Սևան» ազգային պարկ» պետական ոչ առևտրային կազմակերպությանն անժամկետ, անհատույց օգտագործման իրավունքով ամրացված հողատարածքներից վարձակալության կամ կառուցապատման իրավունքով տրամադրման մասին պայմանագրերի` սույն որոշման պահանջներին համապատասխանեցումը:

15. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:

 

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2008 ԹՎԱԿԱՆԻ ԴԵԿՏԵՄԲԵՐԻ 29-ԻՆ

 

Հավելված N 1

i

ՀՀ կառավարության

2008 թվականի դեկտեմբերի 18-ի

N 1563-Ն որոշման

 

«ՍԵՎԱՆ» ԱԶԳԱՅԻՆ ՊԱՐԿԻ ՍԱՀՄԱՆԻՑ ԴՈՒՐՍ` ԴԵՊԻ ՑԱՄԱՔ ՄԻՆՉԵՎ 500 ՄԵՏՐ ԼԱՅՆՈՒԹՅԱՄԲ ՇԵՐՏՆ ԸՆԴԳՐԿՈՂ ՏԱՐԱԾՔՆԵՐԸ

 

Համայնքներ`

Համայնքներ` Ծովազարդ, Լճափ, Բերդկունք, Հայրիվանք, Նորատուս, Գավառ, Կարմիրգյուղ, Գեղարքունիք, Երանոս, Վարդաձոր, Ձորագյուղ, Ծակքար, Լիճք, Ն. Գետաշեն, քաղ. Մարտունի, Վաղաշեն, Աստղաձոր, Զոլաքար, Վարդենիկ, Ծովինար, Արծվանիստ, Կարճաղբյուր, Լճավան, Ծովակ, Նորակերտ, Գեղամասար, Արեգունի, Դարանակ, Փամբակ, Ծափաթաղ, Ջիլ, Արտանիշ, Շորժա, Աղբերք, Դրախտիկ, Կալավան, Ծովագյուղ, Սևան, Լճաշեն, Չկալովկա, Նորաշեն.

________________________

ԻՐՏԵԿ - սխեման չի բերվում

 

(1-ին հավելվածը փոփ. 24.06.10 թիվ 788-Ն որոշում)

 

Հավելված N 2

ՀՀ կառավարության

2008 թվականի դեկտեմբերի 18-ի

N 1563-Ն որոշման

 

ՏԵԽՆԻԿԱԿԱՆ ԲՆՈՒԹԱԳՐԵՐ ԼՈՂԱՓԻ ԵՎ ԲՈՒՖԵՐԱՅԻՆ ԳՈՏԻՆԵՐԻ ԿԱՀԱՎՈՐՄԱՆ ՈՒ ՍԱՐՔԱՎՈՐՈՒՄՆԵՐՈՎ ԱՊԱՀՈՎՄԱՆ ՏԱՐՐԵՐԻ

 

1. Լողափի գոտու տարածքի կահավորման և սարքավորումների տարրերի տեխնիկական բնութագրերն են`

1) հանդերձարան-խցիկներ (հանգստացողների 20 տոկոսի հաշվարկով` 100 մարդու համար` 5 խցիկ, 1 մարդու համար` 1,2-1,3 քառ. մետր մակերեսով).

2) սոլյարիում (հանգստացողների 30 տոկոսի հաշվարկով` 1 մարդու համար` 3-5 քառ. մետր մակերեսով).

3) օդահարթակ-աերարիում (հանգստացողների 8-10 տոկոսի հաշվարկով` 1 մարդու համար` 3,5-4,5 քառ. մետր).

4) տենտեր, հովանոցներ (հանգստացողների 30 տոկոսի հաշվարկով` 1 մարդու համար` 3,5 քառ. մետր).

5) լողափի գոտու մանկական հատվածը կարող է կահավորվել տոբոգանով (H=2,5-3,0 մետր` մեկ ելքով դեպի լիճ), շվաքարաններով, ավազամաններով, մանկական ջրավազաններով, ճոճանակներով, ընդ որում, մանկական հատվածի լողալու գոտու հատակը պետք է ունենա փոքր թեքություն` ոչ ավելի, քան 70 սանտիմետր խորությամբ.

6) աղբանոթներ` 50 մարդու համար` 1 աղբանոթ հաշվարկով.

7) լողափի գոտու տարածքի մակերեսը որոշվում է` ելնելով մեկ չափահաս հանգստացողի համար` առնվազն 8 քառ. մետր, մեկ երեխայի համար` առնվազն 5 քառ. մետր հաշվարկից, ընդ որում, լողափի գոտու եզրագծի նվազագույն ձգվածությունը մեկ մարդու համար կազմում է 0,25 մետր, իսկ լողալու գոտու ջրի հայելու մակերեսը` մեկ մարդու համար` 10 քառ. մետր:

2. Բուֆերային գոտու տարածքի կահավորման և սարքավորումների տարրերի տեխնիկական բնութագրերն են`

1) դրամարկղային տաղավարները` վճարովի ծառայություններ տրամադրող լողափերում (առանձին տաղավարի տեսքով կամ վարչական մասի կազմում` 1 դրամարկղը` 0,5-1,0 հազ. հաճախորդի համար հաշվարկով).

2) ցնցուղարանները (75 մարդու համար` 2-4 ցնցուղ, բայց առնվազն 2 ցնցուղ հաշվարկով), խմելու ջրի ծորակները (200-300 մարդու համար` 1 ծորակ, բայց առնվազն 1 ծորակ հաշվարկով): Թույլատրվում է ցնցուղարանների ջուրը տաքացնել արևի ճառագայթների ջերմությամբ.

3) զուգարանները, որոնք տեղադրվում են լողափի գոտուց առնվազն 50 մետր հեռավորության վրա (50 մարդու համար` 1 զուգարանակոնք և 1 միզաման, բայց առնվազն 2 զուգարանակոնք և 1 միզաման).

4) աղբի կոնտեյներները, որոնք պետք է ունենան կողպվող կափարիչներ, տեղադրված լինեն հարթակների վրա և ունենան հարմար մերձատար ուղիներ.

5) բուֆերային գոտում կարող են տեղադրվել գույքի վարձույթի կետեր, բուժկետ, սրճարան-տաղավարներ, առևտրի կրպակներ (հյութեր, պաղպաղակ և այլ սննդամթերք, հուշանվերներ, լողի պարագաներ և այլն), լողափի սպասարկումն ապահովող այլ ոչ հիմնական օբյեկտներ.

6) բուֆերային գոտու սպորտային հատվածը կարող է ներառել վոլեյբոլի, բադմինթոնի և այլ մարզահրապարակներ, ինչպես նաև այլ հարթային շինություններ:

 

Հավելված N 3

i

ՀՀ կառավարության

2008 թվականի դեկտեմբերի 18-ի

N 1563-Ն որոշման

 

ՍԵՎԱՆԱ ԼՃԻ ՋՐԻ ՄԱԿԱՐԴԱԿԻ ԲԱՐՁՐԱՑՄԱՆ ԿԱՆԽԱՏԵՍՎՈՂ ՀԱՇՎԱՐԿԱՅԻՆ ՑՈՒՑԱՆԻՇՆԵՐԸ

(3-րդ հավելվածն ուժը կորցրել է 29.12.11 թիվ 1908-Ն որոշում)

(3-րդ հավելվածը լրաց. 24.06.10 թիվ 788-Ն որոշում)

 

 

pin
ՀՀ կառավարություն
18.12.2008
N 1563-Ն
Որոշում