Սեղմել Esc փակելու համար:
ՏԱՐՐԱԿԱՆ ԴՊՐՈՑՈՒՄ ՀԱՄԱԿԱՐԳՉԱՅԻՆ ՀՄՏՈՒ...
Քարտային տվյալներ

Տեսակ
Գործում է
Ընդունող մարմին
Ընդունման ամսաթիվ
Համար

ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo

ՏԱՐՐԱԿԱՆ ԴՊՐՈՑՈՒՄ ՀԱՄԱԿԱՐԳՉԱՅԻՆ ՀՄՏՈՒԹՅՈՒՆՆԵՐԻ ՈՒՍՈՒՑՄԱՆ ՀԱՅԵՑԱԿԱՐԳԻՆ ԵՎ ՏԱՐՐԱԿԱ ...

 

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՆԻՍՏԻ
ԱՐՁԱՆԱԳՐՈՒԹՅՈՒՆԻՑ ՔԱՂՎԱԾՔ

 

8 ապրիլի 2010 թվականի N 13

 

16. ՏԱՐՐԱԿԱՆ ԴՊՐՈՑՈՒՄ ՀԱՄԱԿԱՐԳՉԱՅԻՆ ՀՄՏՈՒԹՅՈՒՆՆԵՐԻ ՈՒՍՈՒՑՄԱՆ ՀԱՅԵՑԱԿԱՐԳԻՆ ԵՎ ՏԱՐՐԱԿԱՆ ԴՊՐՈՑՈՒՄ ՀԱՄԱԿԱՐԳՉԱՅԻՆ ՀՄՏՈՒԹՅՈՒՆՆԵՐԻ ՈՒՍՈՒՑՄԱՆ ՆԵՐԴՐՈՒՄՆ ԱՊԱՀՈՎՈՂ ՄԻՋՈՑԱՌՈՒՄՆԵՐԻ ՑԱՆԿԻՆ ՀԱՎԱՆՈՒԹՅՈՒՆ ՏԱԼՈՒ ՄԱՍԻՆ

 

Հավանություն տալ տարրական դպրոցում համակարգչային հմտությունների ուսուցման հայեցակարգին և տարրական դպրոցում համակարգչային հմտությունների ուսուցման ներդրումն ապահովող միջոցառումների ցանկին` համաձայն NN 1 և 2 հավելվածների:

 

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2010 ԹՎԱԿԱՆԻ ԱՊՐԻԼԻ 19-ԻՆ

 

Հավելված N 1

ՀՀ կառավարության

2010 թվականի ապրիլի 8-ի

նիստի N 13 արձանագրային

որոշման

 

ՀԱՅԵՑԱԿԱՐԳ ՏԱՐՐԱԿԱՆ ԴՊՐՈՑՈՒՄ ՀԱՄԱԿԱՐԳՉԱՅԻՆ ՀՄՏՈՒԹՅՈՒՆՆԵՐԻ ՈՒՍՈՒՑՄԱՆ

 

I. ՆԵՐԱԾՈՒԹՅՈՒՆ

 

Աշխարհում տեղի ունեցող գործընթացներն անշեղորեն տանում են տեղեկատվական հասարակության ձևավորմանը, որի առանձնահատկություններից են` տեղեկատվության, գիտելիքների, տեղեկատվական տեխնոլոգիաների դերի բարձրացումը հասարակության կյանքում, տեղեկատվական և հաղորդակցական տեխնոլոգիաների (ՏՀՏ) արտադրանքի ծավալի աճը ընդհանուր արտադրության ծավալի մեջ, ՏՀՏ ոլորտում աշխատողների թվաքանակի ավելացումը, հասարակության տեղեկատվայնացումը: Գլոբալ տեղեկատվական միջավայրի ձևավորումը պահանջում է, որ հասարակության յուրաքանչյուր անդամ, օգտագործելով տեղեկատվական և հաղորդակցական նորագույն տեխնոլոգիաներ, հաղորդակցվի հասարակության անդամների հետ, բավարարի իր տեղեկատվական պահանջները, մուտք գործի համաշխարհային տեղեկատվական շտեմարաններ:

Զարգացման այս միտումները` տեղեկատվության ստացման, մշակման, պահպանման և փոխանցման առումով, բարձր պահանջներ են ներկայացնում հասարակության բոլոր անդամների, առավել ևս` աշխատանքային շուկայում մասնագետների գիտելիքների և հմտությունների մակարդակին: Այսօր տեղեկատվության հետ աշխատանքը չի կարելի պատկերացնել առանց համակարգիչների, թվային այլ տեխնոլոգիաների և ժամանակակից կապուղիների: Դրանք, լինելով մարդու մտքի թռիչքի արդյունքը, մնում են սոսկ սարքեր, որ ազատում են մարդուն մեծածավալ մեխանիկական աշխատանք կատարելուց: Տեղեկատվության հետ արդյունավետ աշխատանքի կարևորագույն երաշխիքներն են` հասարակության անդամի տեղեկատվական մշակույթը (կուլտուրան), վերլուծական և լեզվատրամաբանական հմտությունները:

Հասարակության լիարժեք և ակտիվ անդամ, աշխատաշուկայում մրցունակ մասնագետ «աճեցնելու» համար անհրաժեշտ է ներկայացվող բարձր պահանջներին համապատասխանող կրթական համակարգ, որի պարտադիր պայման է ՏՀՏ-ի ներդրումը կրթության մեջ, ինչպես նաև ՏՀՏ ոլորտի առարկաների միջանցիկ և անընդհատ դասավանդումը կրթության բոլոր աստիճաններում` սկսած տարրականից: Դա թույլ է տալիս ապահովել`

- ուսումնական նյութի մեծ ծավալի ուսումնասիրությունը,

- ձևավորել նորագույն տեղեկատվական և հաղորդակցական տեխնոլոգիաների և սարքերի հետ աշխատանքի հմտություններ,

- սովորողների մոտ ձևավորել արժեքային համակարգ` հիմնված ազգային և համաշխարհային արժեքների վրա:

 

II. ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՀԱՆՐԱԿՐԹԱԿԱՆ ՀԱՄԱԿԱՐԳՈՒՄ ՏՀՏ-Ի ԴՐՎԱԾՔԸ ԵՎ ԶԱՐԳԱՑՄԱՆ ՀՆԱՐԱՎՈՐՈՒԹՅՈՒՆՆԵՐԸ

 

Հայաստանի Հանրապետության կառավարության կողմից որդեգրած կրթության քաղաքականության համատեքստում մեծ դեր ունի ՏՀՏ ներդրումը հանրակրթության մեջ: ՏՀՏ-ի արդյունավետ ներդրումն ապահովելու նպատակով իրականացվում են գործնական ծրագրեր`

- հանրակրթության կրթակարգում սահմանվել են ՏՀՏ դերն ու նպատակները,

- հանրակրթական դպրոցներն ապահովվում են համակարգչային տեխնիկայով,

- ստեղծված են համակարգչային տեխնիկայի շահագործման և թարմացման մեխանիզմներ,

- արագ տեմպերով աճում է դպրոցների և կրթական այլ կառույցների ընդգրկումը համակարգչային ցանցում,

- 2006 թվականից իրականացվել և շարունակվում է «Համակարգչային գրագիտություն» և «ՏՀՏ-ն դասապրոցեսում» ծրագրի ուղղություններով ուսուցիչների վերապատրաստումը,

- «Ինֆորմատիկա» առարկայի դասավանդումն սկսվում է 6-րդ դասարանից,

- մշակվել են «Ինֆորմատիկա» առարկայի 6-9-րդ դասարանների ուսումնական գործընթացը, ծրագրերն ու չափորոշիչները, դասագրքերը, ինչպես նաև ավագ դպրոցի հոսքային դասարանների ուսումնական ծրագրերն ու չափորոշիչները,

- ստեղծվել և դպրոցներին են բաժանվել հայալեզու թվային ուսումնական նյութեր` տարբեր առարկաների դասավանդման ժամանակ օգտագործելու համար:

Այսօրվա առաջին դասարանցին դպրոցն ավարտելու է 2021 թվականին, երբ բարձր պահանջներ կներկայացվեն շրջանավարտներին` տեղեկատվության որոնման, մշակման, փոխանցման և պահպանման առումով: Դպրոցի շրջանավարտի` ՏՀՏ ոլորտի մեծ ծավալի գիտելիքներն ու հմտություններն անհրաժեշտ հիմք կապահովեն կրթությունը շարունակելու և աշխատաշուկայում (այդ թվում նաև միջազգային) պատշաճ տեղ գտնելու համար:

Հաշվի առնելով, որ երեխաների մտածելակերպը, լեզվատրամաբանությունը, սովորելու և հաղորդակցվելու կարողությունները ձևավորվում են տարրական դպրոցում` համակարգչային հմտությունների ուսուցումը անհրաժեշտ է սկսել 2-րդ դասարանից: Դա թույլ կտա սովորողների մոտ զարգացնել անհրաժեշտ տեղեկատվական մշակույթ, սովորողին հաղորդել գիտելիքների մեծ ծավալ և ձևավորել արժեքային համակարգ ու անհրաժեշտ այն հմտությունները, որոնք պետք է ունենա դպրոցի շրջանավարտը մոտ ապագայում:

Տեխնոլոգիաներին տիրապետելու հմտություններն ու գիտելիքներն ուսումնառության ընթացքում կբարձրացնեն կրթության որակը, կընդլայնեն սովորողների ստեղծագործական աշխատանքի հնարավորությունները, թույլ կտան սովորողներին հաղորդակցվել ոչ միայն Հայաստանի, այլև աշխարհի իրենց հասակակիցների հետ:

 

III. ՏԱՐՐԱԿԱՆ ԴԱՍԱՐԱՆՆԵՐՈՒՄ «ԻՆՖՈՐՄԱՏԻԿԱ» ԱՌԱՐԿԱՅԻ ՏԵՂԸ ԵՎ ԿԱՊՆ ԱՅԼ ԱՌԱՐԿԱՆԵՐԻ ՀԵՏ

 

ՈՒսումնառության առաջին օրից աշակերտներն, օգտագործելով դասագրքերը, աշխատանքային տետրերը, նկարչական ալբոմները, տեսաերիզները և ձայներիզները, աշխատում են տարբեր տիպի տեղեկատվության հետ` սովորում են ստանալ, պահպանել, վերլուծել և հաղորդել տեղեկատվությունը: Սա նշանակում է, որ «Ինֆորմատիկա» առարկայի հիմնական տարրերը առկա են ուսումնառության առաջին իսկ օրից: Սկզբնական այս փուլում շատ կարևոր է ընդգծել տեղեկատվության հետ աշխատանքի կանոնները բոլոր առարկաների ուսուցման ընթացքում:

Լինելով ճշգրիտ առարկաներից մեկը` «Ինֆորմատիկան» պետք է դասավանդվի այլ առարկաների հետ ինտեգրված: Ինֆորմատիկայի դասավանդումը տարրական դպրոցում այն նախապատրաստական փուլն է, որը թույլ կտա միջին և ավագ դպրոցում խորությամբ ուսումնասիրել ինֆորմատիկան որպես գիտություն, ձեռք բերել ժամանակակից տեխնոլոգիաների հետ աշխատանքի հմտություններ:

Տարրական դպրոցում ինֆորմատիկայի դասավանդման հիմքում ընկած են այլ առարկաներից ստացված գիտելիքների` այբուբենի, թվերի, թվաբանական գործողությունների, հեքիաթների հերոսների, վարվելակերպի կանոնների և այլնի համակարգումը, համակարգչի` որպես գործիքի հետ ծանոթանալը: «Ինֆորմատիկա» առարկայի դասերին աշակերտները կսովորեն համակարգել, փոխկապակցել իրենց շուրջը տեղի ունեցող գործընթացները, կատարել տրամաբանական հետևություններ, հաղորդակցվել:

Տարրական դասարանի աշակերտները տարբեր աղբյուրներից պատկերացում ունեն համակարգչի մասին, շատերն ունեն դրա օգտագործման սահմանափակ կարողություններ: Ինֆորմատիկայի դասերին աշակերտները կսովորեն ընկալել համակարգիչը որպես գործիք, համակարգված գիտելիքներ կստանան համակարգչի հետ աշխատելու համար, կյուրացնեն համակարգչով աշխատելու օրինաչափություններն ու ինֆորմատիկայի հիմնական օրենքները: Համակարգչի հետ աշխատանքի հմտությունները լայն հնարավորություններ կստեղծեն հետագա ուսումնառության համար:

2-4-րդ դասարաններում համակարգչային հմտությունների ուսուցումը նաև նպատակ ունի աշակերտների համար ստեղծել օտար լեզուն սովորելու հոգեբանական և դիդակտիկ պայմաններ` օգտագործելով համակարգչի լայն հնարավորությունները:

Տարրական դասարաններում «Ինֆորմատիկա» առարկայի դասավանդումը բաղկացած է երկու բաղադրիչներից` տեսական և գործնական:

Տեսական բաղադրիչը նախատեսում է ծանոթացում ինֆորմատիկայի հիմնական հասկացություններին, թեմաների և հասկացությունների շարադրման բարդությունը որոշվում է այդ տարիքի երեխաների կարողություններին համապատասխան: Օգտագործվող օրինակներն ընդգրկում են այլ առարկաներից ծանոթ ուսումնական նյութը:

Գործնական բաղադրիչը նախատեսում է գործնական աշխատանքների կատարում, խնդիրների լուծում, որոնց կատարման համար կիրառվում են սովորողներին ծանոթ գործողություններ, քայլեր: Սովորողները տարրական դպրոցում ստանում են նաև համակարգչի հետ աշխատելու տարրական գիտելիքներ` վարվելակերպը համակարգչի հետ աշխատելուց, գործողությունների իրականացում մկնիկի միջոցով, աշխատանք ստեղնաշարի հետ:

Ընդհանուր առմամբ, յուրացնելով ինֆորմատիկայի ուսումնական նյութը, սովորողները ամրապնդում են այլ առարկաներից ստացված տեղեկատվությունը, սովորում դա կիրառել կյանքում:

Տարրական դպրոցում ինֆորմատիկայի դասավանդման նպատակներն են` ալգորիթմական մտածելակերպի, տեղեկատվական մոդելներ կառուցելու, գործողությունները պլանավորելու, հաղորդակցվելու, համակարգչային տեխնիկայից օգտվելու հմտությունների ձևավորումը:

Տարրական դասարաններում «Ինֆորմատիկա» առարկայի դասավանդման սկզբունքները բխում են հանրակրթական դպրոցում ինֆորմատիկայի միջանցիկ դասավանդման սկզբունքից, շրջանավարտին ներկայացվող պահանջներից և սովորողների տարիքային առանձնահատկություններից:

Տարրական դասարաններում Ինֆորմատիկա առարկայի դասավանդումը հիմնված է առարկայական չափորոշչի և ծրագրի վրա: Հաշվի առնելով, որ այդ տարիքի սովորողների գործունեության հիմնական ձևը խաղն է` ինֆորմատիկայի դասավանդման մեթոդների հիմքը խաղային միջավայրն է, կարելի է կիրառել նախագծերի մեթոդը, այլ մեթոդներ, որոնք համապատասխանում են սովորողների տարիքային առանձնահատկություններին և բարձրացնում են դասավանդման արդյունավետությունը: Համակարգչային տեխնոլոգիաներին տիրապետելու համար նախատեսվում է հատուկ հայալեզու միջավայր, որը թույլ կտա սովորողներին առանց դժվարությունների տիրապետել նախատեսված հմտություններին: Այդպիսի ուսուցանող միջավայրը թույլ կտա բոլոր դպրոցներում դասավանդել միանման մոտեցումներով, հասնել որոշակի հաստատուն արդյունքի: Դասի կառուցվածքը, ուսումնական նյութը պետք է բաժանվեն այնպես, որ պահպանվի համակարգչի հետ աշխատանքի անվտանգության կանոնները և սանիտարահիգիենիկ նորմերը:

«Ինֆորմատիկա» առարկայի դասավանդումն իրականացնում են դասվարները:

Հաշվի առնելով տարրական դպրոցում ինֆորմատիկայի դասավանդման առանձնահատկությունները` անհրաժեշտ է`

մշակել 12-ամյա դպրոցի 2-12-րդ դասարաններում ինֆորմատիկայի դասավանդման չափորոշիչներն ու ծրագրերը կրթական բոլոր աստիճանների համար,

մշակել, փորձարկել և ներդնել հայալեզու էլեկտրոնային ուսուցողական միջավայր,

ստեղծել տարրական դպրոցի աշակերտների համար նախատեսված տպագիր ուսումնական ռեսուրսներ,

իրականացնել դասվարների մասնագիտական զարգացման ծրագիր:

 

Հավելված N 2

ՀՀ կառավարության

2010 թվականի ապրիլի 8-ի

նիստի N 13 արձանագրային

որոշման

 

Ցանկ

 

տարրական դպրոցում համակարգչային հմտությունների ուսուցման

ներդրումն ապահովող միջոցառումների

 

._____________________________________________________________________.

|Միջոցառման անվանումը|ժամկետը  |ֆինանսավորման|Պատաս-   |Ակնկալվող     |

|                    |         |աղբյուրը     |խանատու  |արդյունքներ   |

|____________________|_________|_____________|_________|______________|

|1. Տարրական         |2010 թ.  |Ֆինանսավորում|ՀՀ       |Տեղեկանք -    |

|դասարաններում       |ապրիլ    |չի պահանջում |կրթգիտնախ|հաշվետվություն|

|Ինֆորմատիկայի       |         |             |         |              |

|դասավանդման         |         |             |         |              |

|տեղական և           |         |             |         |              |

|արտասահմանյան       |         |             |         |              |

|փորձի               |         |             |         |              |

|ուսումնասիրություն  |         |             |         |              |

|____________________|_________|_____________|_________|______________|

|2. 2-րդ դասարանի    |2010 թ.  |Ֆինանսավորում|ՀՀ       |Աշակերտին     |

|ավարտին             |ապրիլ    |չի պահանջում |կրթգիտնախ|ներկայացվող   |

|Ինֆորմատիկայից      |         |             |         |գիտելիքների,  |

|աշակերտի            |         |             |         |կարողություն- |

|գիտելիքների,        |         |             |         |ների և        |

|կարողությունների և  |         |             |         |հմտությունների|

|հմտությունների      |         |             |         |ցանկ          |

|վերաբերյալ          |         |             |         |              |

|պահանջների          |         |             |         |              |

|սահմանում           |         |             |         |              |

|____________________|_________|_____________|_________|______________|

|3. 2-րդ դասարանի    |2010 թ.  |«Քվանտ       |ՀՀ       |Փորձնական     |

|առարկաների          |մայիս    |վարժարան»    |կրթգիտնախ|ուսումնական   |

|բովանդակությունից`  |         |             |         |նյութեր       |

|Ինֆորմատիկայի       |         |             |         |              |

|դասավանդման համար   |         |             |         |              |

|ուսումնական նյութերի|         |             |         |              |

|ընտրություն         |         |             |         |              |

|____________________|_________|_____________|_________|______________|

|4. ՈՒսուցիչների     |2010 թ.  |ՀՀ պետբյուջե |ՀՀ       |Մասնագիտական, |

|(դասվարների)        |հունիս   |             |կրթգիտնախ|մեթոդական     |

|վերապատրաստում      |         |             |         |աջակցություն  |

|                    |         |             |         |գիտափորձին    |

|                    |         |             |         |մասնակցող     |

|                    |         |             |         |դասվարներին   |

|____________________|_________|_____________|_________|______________|

|5. Աշակերտների      |2010 թ.  |ՀՀ պետբյուջե |ՀՀ       |Աշխատանքային  |

|համար աշխատանքային  |հուլիս - |             |կրթգիտնախ|տետրեր և      |

|տետրերի և           |օգոստոս  |             |         |ուսուցչի      |

|ուսուցիչների համար  |         |             |         |ձեռնարկ       |

|ուսումնական         |         |             |         |              |

|ձեռնարկների         |         |             |         |              |

|տպագրում            |         |             |         |              |

|____________________|_________|_____________|_________|______________|

|6. ՈՒսումնական      |2010 թ.  |Ֆինանսավորում|ՀՀ       |Գիտափորձի     |

|գործընթացի          |սեպտեմբեր|չի պահանջում |կրթգիտնախ|ընթացքի       |

|մոնիտորինգի         |2011 թ.  |             |         |վերահսկում    |

|իրականացում         |մայիս    |             |         |              |

|____________________|_________|_____________|_________|______________|

|7. Գիտափորձի        |2011թ.   |Ֆինանսավորում|ՀՀ       |Գիտափորձի     |

|արդյունքների        |հունվար -|չի պահանջում |կրթգիտնախ|գնահատման     |

|գնահատման           |ապրիլ    |             |         |չափանիշներ    |

|չափանիշների մշակում |         |             |         |              |

|____________________|_________|_____________|_________|______________|

|8. ՈՒսուցման և      |2011 թ.  |ՀՀ պետբյուջե |ՀՀ       |Տեղեկանք -    |

|ուսումնառության     |մայիս    |             |կրթգիտնախ|հաշվետվություն|

|գործընթացի          |         |             |         |              |

|արդյունքների        |         |             |         |              |

|գնահատում և         |         |             |         |              |

|ամփոփում            |         |             |         |              |

|____________________|_________|_____________|_________|______________|

|9. Առարկայական      |         |Ֆինանսավորում|ՀՀ       |Գործող ծրագրեր|

|չափորոշիչների և     |2012 թ   |չի պահանջում |կրթգիտնախ|և  առարկայական|

|ծրագրերի մշակում    |         |             |         |չափորոշիչներ  |

._____________________________________________________________________.

 

 

pin
ՀՀ կառավարություն
08.04.2010
N 13
Արձանագրային որոշում