040.1572.111111
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
3 նոյեմբերի 2011 թվականի N 1572-Ա
«ՀԱՅԿԱԿԱՆ ՄԻՐԳ» ԲԱՑ ԲԱԺՆԵՏԻՐԱԿԱՆ ԸՆԿԵՐՈՒԹՅՈՒՆ ՍՏԵՂԾԵԼՈՒ ՄԱՍԻՆ
i
Ղեկավարվելով Հայաստանի Հանրապետության Ազգային ժողովի 2011 թվականի ապրիլի 15-ի ԱԺՈ-269-Ն որոշմամբ վավերացված` «Գյուղական կարողությունների ստեղծում» ծրագրի (այսուհետ` ծրագիր) ֆինանսավորման համաձայնագրի Գ բաժնով և N 1 հավելվածի 7-րդ կետի 7.1-ին ենթակետով սահմանված դրույթներով, ինչպես նաև «Բաժնետիրական ընկերությունների մասին» Հայաստանի Հանրապետության օրենքի 10-րդ հոդվածի 4-րդ և 12-րդ հոդվածի 5-րդ կետերին համապատասխան` Հայաստանի Հանրապետության կառավարությունը որոշում է.
1. Հիմնադրման եղանակով ստեղծել 100 տոկոս պետական մասնակցությամբ «Հայկական միրգ» բաց բաժնետիրական ընկերություն (այսուհետ` ընկերություն):
2. Սահմանել, որ ընկերության կանոնադրական կապիտալը պետք է համալրվի Հայաստանի Հանրապետության կառավարության աշխատակազմի «Գյուղական տարածքների զարգացման ծրագրերի իրականացման գրասենյակ» պետական հիմնարկի կողմից` Հայաստանի Հանրապետության դրամով` ծրագրով նախատեսված 1.700.000 ԱՄՆ-ի դոլար գումարի չափով` համաձայն «Գյուղական կարողությունների ստեղծում» ծրագրի ֆինանսավորման համաձայնագրի:
3. Ընկերության` պետական սեփականություն հանդիսացող բաժնետոմսերի կառավարման լիազորությունը վերապահել Հայաստանի Հանրապետության գյուղատնտեսության նախարարությանը:
4. Հայաստանի Հանրապետության գյուղատնտեսության նախարարին`
i
1) «Գյուղական կարողությունների ստեղծում» ծրագրի ֆինանսավորման համաձայնագրով սահմանված պայմաններին համապատասխան` մինչև 2012 թվականի մարտի 15-ը ժամկետում հաստատել ընկերության կանոնադրությունը.
2) ապահովել ընկերության պետական գրանցումը և ընկերության հիմնադրման հետ կապված` օրենքով սահմանված մյուս լիազորությունների իրականացումը` գրանցման, բաժնետոմսերի ռեեստրի բացման ծախսերն իրականացնելով ծրագրով նախատեսված միջոցներով` Հայաստանի Հանրապետության կառավարության աշխատակազմի «Գյուղական տարածքների զարգացման ծրագրերի իրականացման գրասենյակ» պետական հիմնարկի կողմից.
3) ապահովել ընկերության տնօրենների խորհրդի ստեղծումը` ծրագրի պայմաններին համապատասխան` դրա կազմում ընդգրկելով մեկական ներկայացուցչի` Հայաստանի Հանրապետության գյուղատնտեսության նախարարությունից, Հայաստանի Հանրապետության ֆինանսների նախարարությունից, Հայաստանի Հանրապետության էկոնոմիկայի նախարարությունից (փոքր և միջին ձեռնարկատիրության զարգացման ստորաբաժանումից), «Գյուղատնտեսական ասոցիացիաների ֆեդերացիա» իրավաբանական անձանց միությունից, Զարգացման հայկական գործակալությունից, և մեկական ներկայացուցչի` այգեգործությամբ զբաղվող մասնավոր ոլորտի չորս կազմակերպությունից.
4) ապահովել տնօրենների խորհրդի կողմից` ընկերության գործունեությունը կարգավորող ներքին ակտերի ընդունումը, գործունեության հիմնական ուղղությունների, տարեկան ծախսերի նախահաշվի, կառուցվածքի և հաստիքացուցակի հաստատումը.
5) ընկերության պետական գրանցումից հետո նրա հետ կնքել ծրագրով նախատեսված իրականացման պայմանագիր` ծրագրով նախատեսված միջոցառումների, նպատակների և տնտեսական ցուցանիշներին հասնելու վերաբերյալ.
6) մինչև 2012 թվականի մարտի 15-ը ժամկետում Հայաստանի Հանրապետության կառավարություն ներկայացնել առաջարկություն ընկերության կանոնադրական կապիտալում լրացուցիչ բաժնետոմսերի տեղաբաշխման եղանակով` որպես ծրագրով նախատեսված 300.000 ԱՄՆ-ի դոլարին համարժեք Հայաստանի Հանրապետության դրամ արժեքով գնահատված հողատարածք և կառույց ներդնելու վերաբերյալ, հողատարածքի և շենք-շինությունների չափագրման, գրանցման, շուկայական գնահատման և տեղեկատվության տրամադրման ծախսերն իրականացնելով «Հայկական միրգ» բաց բաժնետիրական ընկերության միջոցների հաշվին:
(4-րդ կետը փոփ. 23.02.12 թիվ 178-Ա որոշում)
5. Հայաստանի Հանրապետության ֆինանսների նախարարին` ընկերության պետական գրանցումից հետո նրա հետ կնքել ծրագրով նախատեսված ֆինանսավորման պայմանագիր` փոխառության և դրամաշնորհի տրամադրման պայմանների վերաբերյալ` առանց գրավի:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2011 ԹՎԱԿԱՆԻ ՆՈՅԵՄԲԵՐԻ 11-ԻՆ