ՀԱՄԱՁԱՅՆԱԳԻՐ ՀՀ ԿԱՌԱՎԱՐՈՒԹՅԱՆ ԵՎ ԲԵԼԱՌՈՒՍԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ԲԱ ...

ՀԱՄԱՁԱՅՆԱԳԻՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ԵՎ ԲԵԼԱՌՈՒՍԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՄԻՋԵՎ ԲԱՐՁՐԱԳՈՒՅՆ ՈՐԱԿԱՎՈՐՄԱՆ ԳԻՏԱԿԱՆ ԵՎ ԳԻՏԱՄԱՆԿԱՎԱՐԺԱԿԱՆ ԿԱԴՐԵՐԻ ԱՏԵՍՏԱՎՈՐՄԱՆ ԲՆԱԳԱՎԱՌՈՒՄ ՀԱՄԱԳՈՐԾԱԿՑՈՒԹՅԱՆ ՄԱՍԻՆ

Հայաստանի Հանրապետության կառավարությունը և Բելառուսի Հանրապետության կառավարությունը, այսուհետ` Կողմեր,

ղեկավարվելով գիտական աստիճանների փաստաթղթերի ճանաչման և նոստրիֆիկացման, գիտական աստիճանների համադրելիության սկզբունքների մասին պայմանավորվածություններով,

ձգտելով պահպանել և զարգացնել գիտական կապերը,

հաստատելով բարձրագույն որակավորման գիտական և գիտամանկավարժական կադրերի ատեստավորման բնագավառում համագործակցությունը շարունակելու ձգտումը,

պայմանավորվեցին ներքոհիշյալի մասին.

ՀՈԴՎԱԾ 1

Կողմերը իրենց պետությունների տարածքներում ճանաչում են մյուս Կողմի համապատասխան պետական որակավորման մարմնի տված գիտական կոչումների և գիտական աստիճանների շնորհման մասին պետական նմուշի փաստաթուղթը վկայագրեր ունեցողների վերաատեստավորման ճանապարհով` Կողմերից յուրաքանչյուրի պետության օրենսդրությամբ սահմանված կարգով:

ՀՈԴՎԱԾ 2

Կողմերի լիազոր մարմինները.

անցկացնում են փոխադարձ խորհրդակցություններ` որակավորման ազգային համակարգերի զարգացման հայեցակարգի և բարձրագույն որակավորման գիտական և գիտամանկավարժական կադրերի որակավորմանը առաջադրված պահանջները, ինչպես նաև գիտաշխատողների մասնագիտությունների ազգային ցանկերը (անվանացանկերը) մշակելիս,

ապահովում են բարձրագույն որակավորման գիտական և գիտամանկավարժական կադրերի ատեստավորման պետական համակարգում գիտական աստիճաններ հայցողներին առաջադրվող հիմնական պահանջների համադրելիությունը:

ՀՈԴՎԱԾ 3

Կողմերի լիազոր մարմինները կզարգացնեն համագործակցություն բարձրագույն որակավորման գիտական և գիտամանկավարժական կադրերի ատեստավորման բնագավառում`

իրենց տարածքի ատենախոսությունների պաշտպանությունների խորհուրդներում մյուս Կողմի հայցողների ատենախոսությունների պաշտպանությունների անցկացման համար հավասար պայմաններ ստեղծելով,

ժամանակին փոխադարձաբար տեղեկացնելով Կողմերի բարձրագույն որակավորման գիտական և գիտամանկավարժական կադրերի ատեստավորման պետական համակարգում կատարվող փոփոխությունների մասին, փոխանակելով այդ կադրերի ատեստավորման հարցերի վերաբերյալ համապատասխան նորմատիվ ակտեր և այլ նյութեր,

փորձի փոխանակման նպատակով անցկացնելով անհրաժեշտ համատեղ միջոցառումներ` բարձրագույն որակավորման գիտական և գիտամանկավարժական կադրերի ատեստավորման ընթացքի կառավարման և կատարելագործման ուղղությամբ:

ՀՈԴՎԱԾ 4

Ատենախոսությունների փորձաքննության որակը բարձրացնելու նպատակով Կողմերի լիազոր մարմինները աջակցում են`

մյուս Կողմի ատենախոսության պաշտպանության խորհուրդներում առաջատար գիտնականների և մասնագետների մասնակցությամբ, նաև` որպես ատենախոսությունների ժամանակ ընդդիմախոսներ,

մյուս Կողմի ատենախոսության պաշտպանության խորհուրդներում պաշտպանած ատենախոսությունների լրացուցիչ փորձաքննության անցկացմանը` իրենց տարածքում ատենախոսությունների պաշտպանության խորհուրդներում:

ՀՈԴՎԱԾ 5

Հայաստանի Հանրապետության կողմից լիազոր մարմին է սահմանված Հայաստանի Հանրապետության բարձրագույն որակավորման հանձնաժողովը, իսկ Բելառուսի Հանրապետության կողմից` Բելառուսի Հանրապետության բարձրագույն որակավորման պետական կոմիտեն:

ՀՈԴՎԱԾ 6

Մասնակցությունը սույն Համաձայնագրին չի սահմանափակում Կողմերի իրավունքը բարձրագույն որակավորման գիտական և գիտամանկավարժական կադրերի ատեստավորման բնագավառում համագործակցության այլ ձևերի օգտագործման մեջ:

ՀՈԴՎԱԾ 7

Սույն Համաձայնագրի իրականացման հետ կապված կոնկրետ հարցերի շուրջ կարող են ստորագրվել լրացուցիչ համաձայնագրեր և արձանագրություններ:

ՀՈԴՎԱԾ 8

Կողմերի փոխադարձ համաձայնությամբ Համաձայնագրի տեքստում կարող են կատարվել փոփոխություններ և լրացումներ:

ՀՈԴՎԱԾ 9

Սույն Համաձայնագրի դրույթների մեկնաբանման կամ կիրառման հարցերով տարաձայնություններ առաջանալու դեպքում Կողմերը կվերացնեն դրանք խորհրդակցությունների և բանակցությունների ճանապարհով:

ՀՈԴՎԱԾ 10

Սույն Համաձայնագիրն ուժի մեջ է մտնում Կողմերի կողմից Համաձայնագիրն ուժի մեջ մտնելու համար անհրաժեշտ ներպետական ընթացակարգերի կատարման մասին վերջին գրավոր ծանուցագրի ստացման օրվանից:

Սույն Համաձայնագիրը կգործի հինգ տարվա ընթացքում, և նրա գործողության ժամկետը ինքնաբերաբար կերկարաձգվի հետագա հնգամյա ժամկետներով, եթե Կողմերից ոչ մեկը համապատասխան ժամկետը լրանալուց 6 ամիս առաջ գրավոր չի ծանուցի Համաձայնագրի գործողությունը դադարեցնելու իր մտադրության մասին:

Կատարված է Մինսկ քաղաքում 2000 թվականի հուլիսի 19-ին, երկու բնօրինակով, յուրաքանչյուրը` հայերեն, բելառուսերեն և ռուսերեն, ընդ որում բոլոր տեքստերն էլ հավասարազոր են: Մեկնաբանման ժամանակ տարաձայնությունների դեպքում առավելությունը տրվում է ռուսերեն տեքստին:

Համաձայնագիրն ուժի մեջ է մտել 2001 թվականի փետրվարի 6-ից: