Սեղմել Esc փակելու համար:
ՀՀ ՍԱՀՄԱՆԱՄԵՐՁ ԵՎ ԲԱՐՁՐ ԼԵՌՆԱՅԻՆ ԲՆԱԿ...
Քարտային տվյալներ

Տեսակ
Գործում է
Ընդունման ամսաթիվ
Համար

Վավերացման ամսաթիվ
ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

ՀՀ ՍԱՀՄԱՆԱՄԵՐՁ ԵՎ ԲԱՐՁՐ ԼԵՌՆԱՅԻՆ ԲՆԱԿԱՎԱՅՐԵՐԻ ԱՌԱՋՆԱՀԵՐԹ ՀԻՄՆԱԽՆԴԻՐՆԵՐԻ ՀԱՅԵՑԱԿԱ ...

 

 

040.0246.210499

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ

 

«21» ապրիլի 1999 թ.

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

 

21 ապրիլի 1999 թվականի թիվ 246

 

i

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱՄԵՐՁ ԵՎ ԲԱՐՁՐ ԼԵՌՆԱՅԻՆ ԲՆԱԿԱՎԱՅՐԵՐԻ ԱՌԱՋՆԱՀԵՐԹ ՀԻՄՆԱԽՆԴԻՐՆԵՐԻ ՀԱՅԵՑԱԿԱՐԳԱՅԻՆ ԾՐԱԳՐԻ ՄԱՍԻՆ

 

Հայաստանի Հանրապետության կառավարությունը որոշում է.

1. Հավանություն տալ Հայաստանի Հանրապետության սահմանամերձ և բարձր լեռնային բնակավայրերի առաջնահերթ հիմնախնդիրների լուծման հայեցակարգային ծրագիրն և միջոցառումների ժամանակացույցին (կցվում են):

2. Սույն որոշումն ուժի մեջ է մտնում 1999 թվականի ապրիլի 21-ից:

 

ՀԱՅԵՑԱԿԱՐԳԱՅԻՆ ԾՐԱԳԻՐ

Հայաստանի Հանրապետության սահմանամերձ և բարձր

լեռնային բնակավայրերի առաջնահերթ հիմնախնդիրների լուծման

 

1. Հայեցակարգային ծրագրի էությունն ու նպատակը

 

Հայաստանի Հանրապետության սահմանամերձ (ՍՄ) և բարձր լեռնային (ԲԼ) բնակավայրերի առաջնահերթ հիմնախնդիրների լուծման հայեցակարգային ծրագիրը (այսուհետև` հայեցակարգային ծրագիր) որոշակի սկզբունքների, միջոցառումների և մեխանիզմների ամբողջական համակարգ է, որի նպատակը նշված բնակավայրերի սոցիալ-տնտեսական կայուն զարգացման հիմքերի ստեղծումն է, ինչպես նաև համալիր միջոցառումների իրականացման միջոցով սահմանամերձ և բարձր լեռնային բնակավայրերի ամրապնդումն ու կայուն զարգացման ապահովումը:

 

2. Սահմանամերձ և բարձր լեռնային բնակավայրերի

i

համառոտ բնութագիրը

 

Համաձայն «Հայաստանի Հանրապետության պետական սահմանի մասին» Հայաստանի Հանրապետության օրենքի 19 հոդվածի` Հայաստանի Հանրապետության պետական սահմանագծից Հայաստանի Հանրապետության տարածքի խորքը մինչև 5 կմ լայնությամբ ծավալվող տարածքը կոչվում է սահմանային գոտի: Իսկ սահմանային գոտու մի մասը, որը հարում է պետական սահմանային մինչև 1 կմ լայնությամբ, կոչվում է սահմանային շերտ:

«Սահմանամերձ բնակավայր» տերմինն օրենքում ամրագրված չէ, սակայն լայն կիրառություն ունի:

Սահմանամերձ բնակավայրերի ցանկերը հաստատելիս հիմք են ընդունվել հետևյալ չափանիշները`

ա) Ադրբեջանի Հանրապետության հետ պետական սահմանի սահմանային գոտում գտնվելը.

բ) Հայաստանի Հանրապետության սահմանային շերտում գտնվելը.

գ) Հայաստանի Հանրապետության կառավարության 1993-1995 թվականների որոշումներով հաստատված ցանկերում ընդգրկված լինելը:

Նշված չափանիշներին համապատասխանող սահմանամերձ բնակավայրերը 200-ն են, որոնք ընդգրկված են 173 համայնքում:

i

Համաձայն Հայաստանի Հանրապետության կառավարության 1998 թվականի նոյեմբերի 27-ի N 756 որոշման` բարձր լեռնային բնակավայրերի շարքն են դասվում ծովի մակերևույթից 2000 և ավելի մետր բարձրության վրա գտնվող բնակավայրերը:

 

3. Սահմանամերձ և բարձր լեռնային բնակավայրերի

հիմնախնդիրները

 

Նշված բնակավայրերի հիմնախնդիրներն են`

- տնտեսական ներուժի անկումը,

- օգտագործվող ցանքատարածությունների կրճատումը,

- ֆինանսական միջոցների բացակայությունը կամ սակավությունը,

- մարտական գործողությունների և տարերային աղետների հետևանքով շարքից դուրս եկած կամ խիստ վնասված ենթակառուցվածքները (բնակարանային ֆոնդ, շինություններ, ճանապարհներ, խմելու ջրագծեր, ոռոգման ցանցեր և կոյուղագծեր),

- տարիներով չնորոգված դպրոցական շենքերը, բուժկետերի, մշակույթի օջախների բացակայությունը կամ քայքայված վիճակը,

բնակչության թվի զգալի նվազումը,

- երիտասարդության արտահոսք ու ծնելիության մակարդակի անկումը և այլն:

 

4. Սահմանամերձ և բարձր լեռնային բնակավայրերի

զարգացման խնդիրներն ըստ առաջնահերթության

և դրանց լուծման ուղիները

 

Նշված խնդիրներն են`

ա) մարտական գործողություններից և տարերային աղետներից ավերված ու վնասված բնակարանների վերականգնումը, բնակչության արտահոսքի կանխարգելումը, լքված ու սակավ բնակեցված բնակավայրերի վերաբնակեցումը: Այդ նպատակով`

- միջազգային ծրագրերի միջոցով անտոկոս երկարաժամկետ վարկերի տրամադրում` ավերածության հետևանքները վերացնելու, վերաբնակիչների համար նոր բնակարաններ կառուցելու նպատակով,

- սահմանված չափով տնամերձ հողամասերի անհատույց հատկացում,

- Հայաստանի Հանրապետության գյուղական համայնքների վարչական տարածքներում գտնվող` պետական սեփականություն համարվող պահուստային ֆոնդի հողերի` սեփականության իրավունքով անհատույց տրամադրում.

բ) տնտեսական և ֆինանսական պայմանների բարելավումը, նոր աշխատատեղերի ստեղծումը: Այդ նպատակով`

- մինչև 5 տարի ժամկետով հողի հարկից ազատում, համայնքներին Հայաստանի Հանրապետության պետական բյուջեից լրավճարների հատկացում,

- ազատ ձեռներեցությամբ զբաղվելու համար համայնքի անդամներին ու վերաբնակիչներին արտոնյալ պայմաններով վարկերի հատկացում, միջազգային տարբեր ծրագրերով ստացված ֆինանսական միջոցներից որոշակի մասի նպատակաուղղում արտադրության կազմակերպմանը,

- օժանդակություն համայնքներին` գյուղատնտեսական, արդյունաբերական, վառելիքաէներգետիկ համակարգի, սննդի և վերամշակող ձեռնարկությունների վերագործարկման, նոր աշխատատեղերի ստեղծման գործում,

- կապի և գազամատակարարման խնդիրների լուծում` տնտեսավարող սուբյեկտների գործունեության համար նպաստավոր պայմաններ ստեղծելու միջոցով.

գ) բնակավայրերի սոցիալական և տնտեսական ենթակառուցվածքների վերականգնումը`

- խմելու ջրի հիմնախնդրի լուծում,

- դպրոցական շենքերի վերականգնում կամ նորերի հիմնում,

- բուժկետերի վերականգնում կամ հիմնում,

- ոռոգման ցանցի վերակառուցում,

- ճանապարհների, հաղորդակցուղիների վերականգնում կամ հիմնում,

- հեռախոսակապի ապահովում,

- էլեկտրամատակարարման ապահովում,

- հեռուստակապի ապահովում:

Այս ոլորտների ֆինանսավորման աղբյուր կարող են ծառայել ոչ միայն Հայաստանի Հանրապետության պետական բյուջեի միջոցները, այլև միջազգային կազմակերպությունների տրամադրած վարկերն ու գրանտները, այդ թվում` Հայաստանի սոցիալական ներդրումների հիմնադրամի (ՀՍՆՀ) միջոցները:

 

5. Սահմանամերձ և բարձր լեռնային բնակավայրերի զարգացման

հայեցակարգային ծրագրի իրականացման հիմնական սկզբունքները

 

Նշված հիմնական սկզբունքներն են`

ա) հայեցակարգային ծրագրով նախատեսվող միջոցառումների կենսագործման և արտոնությունների տրամադրման նկատմամբ տարբերակված մոտեցումը` հաշվի առնելով Հայաստանի Հանրապետության մարզերի ու կոնկրետ բնակավայրերի ռազմավարական նշանակությունը.

բ) սահմանամերձ և բարձր լեռնային բնակավայրերի` արտակարգ իրավիճակներում պաշտպանության ապահովման, տնտեսական, սոցիալական, քաղաքաշինական և բնապահպանական խնդիրների լուծման նկատմամբ համակարգված մոտեցումը: Այդ նպատակով`

- սակավաբնակ բնակավայրերի ամրապնդում,

- սահմանային գոտու թույլ զարգացած տարածքներում քաղաքաշինական- տնտեսական առաջնահերթ զարգացման ռեժիմի սահմանում,

- տրանսպորտային և ինժեներական ենթակառուցվածքների կրկնակված ցանցի, տեղական նշանակության ճանապարհների ցանցի տեղաբաշխում,

- սահմանամերձ գոտու արդյունաբերական ներուժի պահպանման նպատակով ռեսուրսաօգտագործման հատուկ ռեժիմի սահմանում,

- սահմանային գոտում գտնվող` ռազմավարական նշանակության աղբյուրների և արտեզյան ջրերի պահպանության ապահովում:

 

6. Սահմանամերձ ու բարձր լեռնային բնակավայրերի զարգացման

հայեցակարգային ծրագրի կենսագործումը

 

Սահմանամերձ և բարձր լեռնային բնակավայրերի հիմնախնդիրների համալիր լուծումները նախատեսվում են Հայաստանի Հանրապետության սոցիալ-տնտեսական զարգացման ամենամյա ծրագրերով, Հայաստանի Հանրապետության պետական բյուջեով, ինչպես նաև համապատասխան համայնքների բյուջեներով, Հայաստանի Հանրապետության նախարարությունների և գերատեսչությունների ծրագրերով: Այդ նպատակով`

- համապատասխան օրենսդրական դաշտի ստեղծում,

- սահմանամերձ և բարձր լեռնային բնակավայրերի զարգացման համալիր միջոցառումների ծրագրերի մշակում` ըստ մարզերի ու առանձին բնակավայրերի, ձեռնարկվող միջոցառումների առաջնահերթության ճշգրտում,

- միջոցառումների ծրագրի և ժամանակացույցի նկատմամբ մշտական վերահսկողության ապահովում:

 

---------------------------------------

հեղինակների կողմից - միջոցառումների ժամանակացանկը չի բերվում

 

 

pin
ՀՀ կառավարություն
21.04.1999
N 246
Որոշում