040.0517.210513
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
16 մայիսի 2013 թվականի N 517-Ն
ՆՈՒՅՆԱԿԱՆԱՑՄԱՆ ՔԱՐՏ ԿԱՐԴԱՑՈՂ ՍԱՐՔԵՐԸ ԲԱՇԽԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2013 ԹՎԱԿԱՆԻ ՀՈՒՆՎԱՐԻ 16-Ի N 31-Ն ՈՐՈՇՈՒՄԸ ՄԱՍՆԱԿԻ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ
Հայաստանի Հանրապետության կառավարությունը որոշում է.
1. Սահմանել, որ`
i
1) Հայաստանի Հանրապետության կառավարության կողմից ձեռք բերված` նույնականացման քարտ կարդացող սարքերը կազմակերպություններին, «Եկամտային հարկի և պարտադիր կուտակային վճարի անձնավորված հաշվառման մասին» Հայաստանի Հանրապետության օրենքի 11-րդ հոդվածում նշված ֆիզիկական անձանց, պարտադիր կուտակային բաղադրիչի մասնակից` նույնականացման քարտ ստացած ֆիզիկական անձանց (շահառուներին) են տրամադրվում ինքնարժեքով` 3500 դրամով (ընդ որում, յուրաքանչյուր ֆիզիկական անձի տրամադրվում է նույնականացման քարտ կարդացող մեկ սարք).
2) պետական և համայնքային կառավարչական հիմնարկներին, պետական և համայնքային կազմակերպություններին նույնականացման քարտ կարդացող սարքերը տրամադրվում են անվճար` պետական կառավարման համապատասխան մարմնի, մարզպետարանի, Երևանի քաղաքապետարանի միջոցով.
3) ԳԱՂՏՆԻ.
4) նույնականացման քարտ կարդացող սարք ձեռք բերելու նպատակով «Կենսաթոշակային համակարգի իրազեկման կենտրոն» հիմնադրամին է ներկայացվում`
ա. պետական կառավարման համապատասխան մարմնի ղեկավարի (մարզպետի, Երևանի քաղաքապետի) գրությունը` նույնականացման քարտ կարդացող սարքերն ստանալու համար լիազորված անձի տվյալների և սարքերի անհրաժեշտ թվի վերաբերյալ, կամ,
բ. գանձապետական հատուկ հաշվեհամարին անհրաժեշտ գումարի վճարման անդորրագիրը և կազմակերպության գրությունը, որը պարունակում է կազմակերպության ՀՎՀՀ-ն, անվանումը, սարքը (սարքերը) ստանալու իրավասություն ունեցող անձի անունը, ազգանունը, ծննդյան օրը, ամիսը, տարեթիվը և անձը հավաստող փաստաթղթի տվյալները.
գ. «Եկամտային հարկի և պարտադիր կուտակային վճարի անձնավորված հաշվառման մասին» Հայաստանի Հանրապետության օրենքի 11-րդ հոդվածում նշված ֆիզիկական անձի նույնականացման քարտը, հարկային մարմնի հետ կնքած` անձնավորված հաշվարկը (գրանցման հայտը) էլեկտրոնային եղանակով ներկայացնելու պայմանագիրը (պայմանագրի պատճենը) և գանձապետական հատուկ հաշվեհամարին անհրաժեշտ գումարի վճարման անդորրագիրը,
դ. պարտադիր կուտակային բաղադրիչի մասնակից` նույնականացման քարտ ստացած ֆիզիկական անձի նույնականացման քարտը և գանձապետական հատուկ հաշվեհամարին անհրաժեշտ գումարի վճարման անդորրագիրը, իսկ կամավոր մասնակցի դեպքում` նաև «Կուտակային կենսաթոշակների մասին» Հայաստանի Հանրապետության օրենքի 6-րդ հոդվածի 3-րդ մասով սահմանված` կենսաթոշակային հաշիվ բացած լինելու վերաբերյալ հավաստումը.
5) Հայաստանի Հանրապետության կառավարության 2013 թվականի փետրվարի 7-ի N 139-Ն որոշմամբ «Կենսաթոշակային համակարգի իրազեկման կենտրոն» հիմնադրամին որպես դրամաշնորհ տրամադրված 90,580.0 հազ. դրամ գումարից 9,685.1 հազ. դրամը փոխանցվում է Հայաստանի Հանրապետության կառավարության 2013 թվականի հունվարի 16-ի N 31-Ն որոշման 13-րդ կետի համաձայն բացված գանձապետական հատուկ հաշվեհամարին:
(1-ին կետը փոփ. 23.10.13 թիվ 1152-Ն որոշում)
2. Ընդունել ի գիտություն, որ Հայաստանի Հանրապետության կառավարության 2013 թվականի փետրվարի 7-ի N 139-Ն որոշմամբ «Կենսաթոշակային համակարգի իրազեկման կենտրոն» հիմնադրամին որպես դրամաշնորհ տրամադրված 90,580.0 հազ. դրամ գումարից նույնականացման քարտ կարդացող սարքեր ձեռք բերելու և սարքերը կազմակերպություններին (շահառուներին) տրամադրելու համար կարող է ծախսվել առավելագույնը 80,894.9 հազ. դրամ` ներառյալ Հայաստանի Հանրապետության պետական բյուջե վճարման ենթակա 11,559.2 հազ. դրամ ավելացված արժեքի հարկը:
i
3. ՈՒժը կորցրած ճանաչել Հայաստանի Հանրապետության կառավարության 2013 թվականի հունվարի 16-ի «Նույնականացման քարտ կարդացող սարքերը բաշխելու մասին» N 31-Ն որոշման 1-12-րդ կետերը:
4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2013 ԹՎԱԿԱՆԻ ՄԱՅԻՍԻ 21-ԻՆ