(ուժը կորցրել է 28.12.2023 թիվ 2309-Ն որոշում)
i
040.1073.091013
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
19 սեպտեմբերի 2013 թվականի N 1073-Ն
i
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԳՐԱՀՐԱՏԱՐԱԿՉԱԿԱՆ ԳՈՐԾՈՒՆԵՈՒԹՅՈՒՆ ԻՐԱԿԱՆԱՑՆՈՂ ԻՐԱՎԱԲԱՆԱԿԱՆ ԱՆՁԱՆՑ ԵՎ ԱՆՀԱՏ ՁԵՌՆԱՐԿԱՏԵՐԵՐԻՆ ՊԵՏԱԿԱՆ ՍԵՓԱԿԱՆՈՒԹՅՈՒՆ ՀԱՆԴԻՍԱՑՈՂ ԱՆՇԱՐԺ ԳՈՒՅՔԻ ԱՆՀԱՏՈՒՅՑ ՕԳՏԱԳՈՐԾՄԱՆ ՏՐԱՄԱԴՐՄԱՆ ՉԱՓՈՐՈՇԻՉՆԵՐԸ ՀԱՍՏԱՏԵԼՈՒ ՄԱՍԻՆ
Հայաստանի Հանրապետության կառավարությունը որոշում է.
i
1. Սահմանել, որ`
i
1) Հայաստանի Հանրապետությունում գրահրատարակչական գործունեություն իրականացնող իրավաբանական անձանց և անհատ ձեռնարկատերերին պետական սեփականություն հանդիսացող անշարժ գույքը (այսուհետ` տարածք) անհատույց օգտագործման է տրամադրվում պետական սեփականություն հանդիսացող համապատասխան շենքերում ազատ տարածքների առկայության և սույն որոշմամբ սահմանված չափորոշիչներին համապատասխանելու դեպքում, եթե Հայաստանի Հանրապետության կառավարության որոշմամբ այլ բան նախատեսված չէ.
2) Հայաստանի Հանրապետությունում գրահրատարակչական գործունեություն իրականացնող իրավաբանական անձանց և անհատ ձեռնարկատերերին պետական սեփականություն հանդիսացող տարածքներն անհատույց օգտագործման իրավունքով կարող են տրամադրվել մինչև երեք տարի ժամկետով:
(1-ին կետը փոփ. 27.11.15 թիվ 1534-Ն որոշում)
2. Հաստատել գրահրատարակչական գործունեություն իրականացնող իրավաբանական անձանց և անհատ ձեռնարկատերերին պետական սեփականություն հանդիսացող տարածքների անհատույց օգտագործման տրամադրման չափորոշիչները` համաձայն հավելվածի:
3. Սույն որոշումն ուժի մեջ է մտնում պաշտոնական հրապարակման օրվան հաջորդող տասներորդ օրը:
(նախաբանը փոփ. 27.11.15 թիվ 1534-Ն որոշում)
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2013 ԹՎԱԿԱՆԻ ՀՈԿՏԵՄԲԵՐԻ 9-ԻՆ
Հավելված
i
ՀՀ կառավարության
2013 թվականի սեպտեմբերի 19-ի
N 1073-Ն որոշման
ՉԱՓՈՐՈՇԻՉՆԵՐ ԳՐԱՀՐԱՏԱՐԱԿՉԱԿԱՆ ԳՈՐԾՈՒՆԵՈՒԹՅՈՒՆ ԻՐԱԿԱՆԱՑՆՈՂ ԻՐԱՎԱԲԱՆԱԿԱՆ ԱՆՁԱՆՑ ԵՎ ԱՆՀԱՏ ՁԵՌՆԱՐԿԱՏԵՐԵՐԻՆ ՊԵՏԱԿԱՆ ՍԵՓԱԿԱՆՈՒԹՅՈՒՆ ՀԱՆԴԻՍԱՑՈՂ ՏԱՐԱԾՔՆԵՐԻ ԱՆՀԱՏՈՒՅՑ ՕԳՏԱԳՈՐԾՄԱՆ ՏՐԱՄԱԴՐՄԱՆ
1. Պետական սեփականություն հանդիսացող տարածքն անհատույց օգտագործման իրավունքով տրամադրվում է գրահրատարակչական գործունեություն իրականացնող այն իրավաբանական անձանց և անհատ ձեռնարկատերերին, որոնք, համաձայն Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի կողմից տրված տեղեկատվության, պետական սեփականություն հանդիսացող տարածքի անհատույց օգտագործման իրավունք ստանալու համար դիմելու պահին (այսուհետ` դիմելու պահ) չունեն և նախորդ երեք տարվա ընթացքում չեն ունեցել սեփականության իրավունքով իրենց պատկանող շենք, շինություն, տարածք (բացառությամբ բնակելի տարածքի):
2. Գրահրատարակչական գործունեություն իրականացնող իրավաբանական անձանց և անհատ ձեռնարկատերերին, ըստ սույն չափորոշիչների, պետության կողմից անհատույց օգտագործման իրավունքով տարածքներ են տրամադրվում միայն գրահրատարակչական գործունեություն իրականացնող իրավաբանական անձի կամ անհատ ձեռնարկատիրոջ կողմից նշված` պետական սեփականություն հանդիսացող շենքում ազատ տարածքների առկայության դեպքում:
3. Եթե մինչև սույն չափորոշիչների հաստատումը գրահրատարակչական գործունեություն իրականացնող իրավաբանական անձանց և անհատ ձեռնարկատերերին նախկինում անհատույց օգտագործման իրավունքով տրամադրված` պետական սեփականություն հանդիսացող տարածքների մակերեսն ավելի քիչ է եղել, քան սույն չափորոշիչներով հաշվարկված հասանելի մակերեսներն են, ապա անհատույց օգտագործման իրավունքով նոր տրամադրվող տարածքն ավելացնելու պահանջը կարող է բավարարվել միայն տվյալ շենքում ազատ տարածքների առկայության դեպքում: Ընդ որում, տրամադրվող լրացուցիչ տարածքի մակերեսը սույն չափորոշիչներին համապատասխան հաշվարկելու ժամանակ հիմք է ընդունվում տվյալ տարածքում առկա ազատ սենյակի (կամ սենյակների) փաստացի մակերեսը:
4. Պետական սեփականություն հանդիսացող տարածքն անհատույց օգտագործելու իրավունքից օգտվելու համար գրահրատարակչական գործունեություն իրականացնող իրավաբանական անձը կամ անհատ ձեռնարկատերը`
1) համաձայն Հայաստանի Հանրապետության ֆինանսների նախարարության կողմից տրված տեղեկատվության` դիմելու պահին պետք է ունենա առնվազն 5 աշխատող.
2) համաձայն Հայաստանի Հանրապետության ֆինանսների նախարարության կողմից տրված տեղեկատվության` դիմելու պահին չպետք է ունենա Հայաստանի Հանրապետության պետական բյուջեի նկատմամբ ժամկետանց պարտավորություններ.
3) դիմելու պահին նախորդող երկու տարվա ընթացքում պետք է հրատարակած լինի տարեկան առնվազն 20 մամուլ ծավալով գրականություն, այդ թվում` նաև կատարած լինի հրատարակչական (խմբագրական) աշխատանքներ (պայմանագրային հիմունքներով).
4) անհատույց օգտագործման իրավունքով տարածք տրամադրելու մասին պայմանագրի կնքումից հետո պայմանագրով սահմանված ամբողջ ժամանակահատվածում պետք է պահպանեն սույն կետի 1-ին, 2-րդ և 3-րդ ենթակետերով նախատեսված պայմանները:
5. Սույն չափորոշիչների 4-րդ կետի 1-ին և 2-րդ ենթակետերում նշված տեղեկատվությունը Հայաստանի Հանրապետության ֆինանսների նախարարության կողմից տրամադրվում է Հայաստանի Հանրապետության կառավարությանն առընթեր պետական գույքի կառավարման վարչությանը` վերջինիս գրավոր հարցման հիման վրա:
6. Սույն չափորոշիչների 4-րդ կետում նշված չափորոշիչներին համապատասխանող` գրահրատարակչական գործունեություն իրականացնող իրավաբանական անձանց կամ անհատ ձեռնարկատերերին տրամադրվում է մեկ աշխատողի հաշվով` 6-8 քառ. մետր մակերեսով տարածք, մեկ սենյակ` տնօրենի համար, մեկ սենյակ (30-50 քառ. մետր մակերեսով)` որպես արխիվ-պահեստ, ինչպես նաև լրացուցիչ մեկ սենյակ` պայմանագրային հիմունքներով աշխատողների համար: Տարածքների հաշվարկն իրականացվում է` ելնելով սենյակների փաստացի մակերեսներից: Եթե ազատ տարածքների փաստացի մակերեսը թույլ չի տալիս ապահովել սույն կետում նշված նվազագույն չափերով տարածքի տրամադրումը, և գրահրատարակչական գործունեություն իրականացնող իրավաբանական անձը կամ անհատ ձեռնարկատերը գրավոր ցանկություն է հայտնել անհատույց օգտագործման իրավունքով ավելի փոքր մակերեսով տարածք զբաղեցնելու մասին, ապա նրան կարող է տրամադրվել տվյալ պահին ազատ այնպիսի տարածք (տարածքներ), որը (որոնք) չի (չեն) համապատասխանում սույն կետով տարածքի տրամադրման նկատմամբ սահմանված նվազագույն չափորոշչին:
7. Եթե պետական սեփականություն հանդիսացող շենքում միևնույն ազատ տարածքի օգտագործման համար դիմել են մեկից ավելի` սույն չափորոշիչների 4-րդ կետում նշված չափորոշիչներին համապատասխանող` գրահրատարակչական գործունեություն իրականացնող իրավաբանական անձինք կամ անհատ ձեռնարկատերեր, ապա ազատ տարածքը տրամադրվում է ավելի վաղ դիմողին:
8. Պետական սեփականություն հանդիսացող տարածքն անհատույց օգտագործման իրավունքով զբաղեցնող` գրահրատարակչական գործունեություն իրականացնող իրավաբանական անձինք և անհատ ձեռնարկատերերը սեփականության իրավունքով անշարժ գույք (բացառությամբ բնակելի տարածքի) ձեռք բերելու դեպքում դրա մասին մեկամսյա ժամկետում տեղեկատվություն են ներկայացնում Հայաստանի Հանրապետության կառավարությանն առընթեր պետական գույքի կառավարման վարչություն:
9. Պետական սեփականություն հանդիսացող տարածքն անհատույց օգտագործման իրավունքով տրամադրելու մասին պայմանագիրը ենթակա է վաղաժամկետ լուծման`
1) սույն չափորոշիչների 4-րդ կետով սահմանված պայմանները խախտելու.
2) սույն չափորոշիչների 8-րդ կետում նշված հանգամանքն ի հայտ գալու.
3) մյուս պայմանագրային պարտավորությունները չկատարելու դեպքերում:
(հավելվածը փոփ. 27.11.15 թիվ 1534-Ն որոշում)