ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ ՆԻՍՏԻ
ԱՐՁԱՆԱԳՐՈՒԹՅՈՒՆԻՑ ՔԱՂՎԱԾՔ
5 հունիսի 1999 թվականի թիվ 32
17. ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՀԻՎԱՆԴԱՆՈՑԱՅԻՆ ՀԱՄԱԿԱՐԳԻ ՕՊՏԻՄԱԼԱՑՄԱՆ ՌԱԶՄԱՎԱՐՈՒԹՅԱՆ ՄԱՍԻՆ
Հավանություն տալ Հայաստանի Հանրապետությունում հիվանդանոցային համակարգի օպտիմալացման ռազմավարությանը (կցվում է):
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՀԻՎԱՆԴԱՆՈՑԱՅԻՆ ՀԱՄԱԿԱՐԳԻ ՕՊՏԻՄԱԼԱՑՄԱՆ ՌԱԶՄԱՎԱՐՈՒԹՅՈՒՆԸ
Վերջին տասնամյակում Հայաստանի Հանրապետության տնտեսության մեջ կուտակված խնդիրներն իրենց ազդեցությունն ունեցան նաև երկրի առողջապահական համակարգի վրա: Ի պատասխան տնտեսության ազատականացման, առողջապահության բնագավառում իրականացվեցին վերափոխումներ կառուցվածքային, ֆինանսական, կադրային և այլ ոլորտներում: Այնուամենայնիվ, համակարգում դեռևս ակնհայտ են բազմաթիվ անհամամասնություններ, որոնք հատկապես ցավագին են արտահայտվում առողջապահության ամենաթանկարժեք` հիվանդանոցային օղակում: Խորհրդային տարիներին հիմնականում էքստենսիվ մեխանիզմներով զարգացած հիվանդանոցային համակարգն առանձնանում է իր կադրային և մահճակալային գերհագեցվածությամբ ու անհամաչափ բաշխմամբ, բժշկական տեխնոլոգիաների թույլ ներգրավմամբ, բուժօգնության որակի վերահսկման համակարգի բացակայությամբ, արտահիվանդանոցային ծառայությունների հետ փոխհամագործակցության անբավարար մակարդակով: Հիվանդանոցային համակարգի արդյունավետ օգտագործմանը խոչընդոտում է նաև պետական բյուջեի կողմից անբավարար ֆինանսավորումը, բնակչության վճարունակության խիստ անկումը, պարտադիր բժշկական ապահովագրական համակարգի բացակայությունը:
Արդյունքում ստեղծվել է մի իրավիճակ, երբ հիվանդանոցների զբաղվածության աստիճանը հանրապետությունում կազմում է, միջին հաշվով, ընդամենը մոտ 40 օ/օ: Հանրապետության մահճակալային ֆոնդն այսօրվա դրությամբ կազմում է 24,470 կամ 64,4` 10.000 բնակչի հաշվարկով: Ընդհանուր առմամբ եվրոպական միջին ցուցանիշների սահմաններում գտնվող այս թիվը, սակայն, չի արտացոլում հիվանդանոցային բուժօգնության կազմակերպման և պահանջարկի իրական պատկերը: Մահճակալային ֆոնդի մոտ կեսը կենտրոնացված է երկրի բնակչության մոտ 1/3-ը ունեցող մայրաքաղաքում (10.000 բնակչի հաշվով` 93 մահճակալ), մարզերում հիվանդանոցային մահճակալներով ապահովվածությունը տատանվում է 10.000 բնակչի հաշվով 22,7-ից մինչև 65,4 մահճակալային ֆոնդի ընդհանուր առմամբ զգալի թերօգտագործման պայմաններում առանձին մասնագիտությունների գծով գոյություն ունի անգամ մահճակալների պակաս և այլն: Մահճակալային ապահովվածության վերոհիշյալ ցուցանիշը հաշվի չի առնում նաև երկրից երկարաժամկետ բացակայող բնակչության թիվը:
Ընդհանուր առմամբ հիվանդանոցային համակարգում առկա են չօգտագործված կարողություններ, առանձին մասնագիտությունների գծով մահճակալների անհամաչափ բաշխում, հիվանդանոցների թվի, չափերի, զբաղվածության և իրականացվող ծառայությունների անհամարժեքություն, մարդկային ռեսուրսների ավելցուկ, ցածրորակ և անհամաչափ բաշխված բժշկական տեխնոլոգիաներ և հիվանդանոցների անհամաչափ աշխարհագրական տեղաբաշխում: Այս գործոնները ստեղծում են լուրջ խոչընդոտներ համակարգի զարգացման, առկա սուղ ֆինանսական միջոցների արդյունավետ օգտագործման և որակյալ բուժական ծառայությունների ծավալման համար, որոնք իրենց հերթին նպաստում են հիվանդանոցային ծառայությունների գների բարձրացմանը, մատչելիության և որակի անկմանը:
Ստեղծված իրավիճակը թելադրում է երկրի հիվանդանոցային համակարգի օպտիմացման ռազմավարության անհրաժեշտությունը, որի հիմնական նպատակներն են`
- համակարգի արդյունավետության բարձրացումը.
- երկրի իրական պահանջներին և միջազգայնորեն ընդունված չափանիշներին համապատասխանեցումը:
Վերոհիշյալ նպատակներին հասնելու համար հարկավոր է լուծել հետևյալ հիմնական խնդիրները`
1. Արտահիվանդանոցային առողջապահական ծառայությունների կատարելագործման միջոցով հիվանդանոցային օղակի բեռի թեթևացումը և արդյունավետության բարձրացումը.
2. Բուն հիվանդանոցային համակարգի ներուժի կատարելագործումը.
3. Առողջապահությունում ընդհանուր համակարգային նշանակության միջոցառումների իրականացումը, որոնք կնպաստեն հիվանդանոցային օղակի օպտիմալացմանը:
Ներկայացվող սխեման պատկերում է նշված խնդիրների փոխհարաբերակցությունը:
.__________________________.
| Ընդհանուր համակարգային |
|նշանակության միջոցառումներ|
.__________________________.
.__________________. .________________. .__________________.
|Մինչհիվանդանոցային|__| ՀԻՎԱՆԴԱՆՈՑԱՅԻՆ |__|Հետհիվանդանոցային |
|ծառայություններ | | ՀԱՄԱԿԱՐԳ | |ծառայություններ |
|(ամբուլատոր-պո- | .________________. |(վերականգնողական, |
| լիկլինիկական, | | երկարատև խնամքի,|
| ախտորոշիչ և այլն| | և այլն) |
.__________________. .__________________.
1. Արտահիվանդանոցային առողջապահական ծառայությունների կատարելագործման
միջոցով հիվանդանոցային օղակի բեռի թեթևացումը և արդյունավետության
բարձրացումը
1.1. Մինչհիվանդանոցային ծառայություններ
1.1.1. Ամբուլատոր-պոլիկլինիկական ծառայություններ
Առաջնային օղակի ամրապնդումը և նրա ամբուլատոր-պոլիկլինիկական համակարգի աստիճանական փոխարինումն առավելապես ընտանեկան բժշկության համակարգով (մինչև 2005 թ.` մոտ 50 օ/օ-ով և մինչև 2010 թ.` մոտ 100 օ/օ-ով) կնպաստի հիվանդությունների կանխարգելմանը և վաղ հայտնաբերմանը, որոնք արդյունավետ բուժման հիմնական երաշխիքներից են: Արդյունքում առաջնային օղակի զարգացումն ուղղակիորեն կնպաստի մասնագիտացված ծառայությունների բեռի թեթևացմանը և հիվանդանոցային ծառայությունների օպտիմալացմանը: Վերոհիշյալը բխում է նաև Հայաստանի Հանրապետությունում առողջապահության զարգացման քաղաքականության հիմնական դրույթներից, ըստ որոնց առողջության առաջնային պահպանման համակարգի առաջանցիկ զարգացումը մոտակա տարիների կարևորագույն գերակայունություններից է: Ընդ որում, կանխատեսվում է, որ ընտանեկան բժշկության համակարգի ներդրումը հիվանդանոցային ներուժի օպտիմալացման տեսանկյունից առավել արդյունավետ կլինի մայրաքաղաքում, որտեղ առավել ուռճացված են թե ամբուլատոր-պոլիկլինիկական և թե հիվանդանոցային ծառայությունները:
1.1.2. Մինչհիվանդանոցային ախտորոշիչ ծառայություններ
Մինչհիվանդանոցային օղակում մեծ դեր է վերապահվում կենտրոնացված ախտորոշիչ ծառայությունների ուժեղացմանը, որոնք միջանկյալ օղակի դեր կարող են կատարել առաջնային և հիվանդանոցային բուժհիմնարկների միջև: Այս ծառայությունների օգնությամբ հիվանդների հոսքը դեպի հիվանդանոց կֆիլտրվի և արդյունքում ճշգրիտ ախտորոշման հետևանքով կուղղորդվի հնարավոր տարբերակներով.
- հիվանդանոցային կամ այլ բուժման անհրաժեշտության աննպատակահարմարություն.
- բուժման կազմակերպման նպատակահարմարությունն ամբուլատոր-պոլիկլինիկական
օղակում.
- հիվանդի հոսպիտալացում, սակայն բուժման ավելի փոքր տևողությամբ` ի
հաշիվ արդեն իրականացված ախտորոշիչ հետազոտությունների:
Կանխատեսվում է, որ մինչհիվանդանոցային կենտրոնացված ախտորոշիչ ծառայությունների ստեղծումը հիվանդանոցային ներուժի օպտիմալացման տեսանկյունից առավել արդյունավետ կլինի մարզկենտրոններում և նախկին շրջկենտրոններում, ուր ամբուլատոր-պոլիկլինիկական ծառայությունների թույլ տեխնոլոգիական հագեցվածությունը և հետևաբար առավելապես ախտորոշման նպատակով հիվանդանոցների ավելորդ ծանրաբեռնվածությունը խիստ արտահայտված են:
1.1.3. Ցերեկային ստացիոնարներ
Ցերեկային ստացիոնարները մեծ դեր կարող են ունենալ հիվանդանոցային ներուժի օպտիմալացման հարցում: Նրանց ստեղծումը և ցանցի ընդլայնումը հնարավորություն կընձեռեն զգալիորեն բարձրացնելու բուժման մատչելիությունը` խուսափելով դասական հիվանդանոցային պայմանների անհարմարությունից և հիվանդի ու առողջապահական համակարգի համար ավելորդ ֆինանսական բեռից (այն դեպքերում, երբ դա թույլ են տալիս կոնկրետ բժշկական ցուցումները): Նախատեսվում է, որ ցերեկային ստացիոնարները կարող են առավելապես զարգանալ ամբուլատոր-պոլիկլինիկական հիմնարկների կառուցվածքում, չնայած բացառված չէ նաև ցածր արդյունավետությամբ օգտագործվող հիվանդանոցային մահճակալների որոշ մասի վերափոխումը ստացիոնար բուժման կազմակերպման զգալիորեն ավելի էժան այս ձևին: Այդ առումով հատկապես արդյունավետ կարող է գտնվել բժշկական և կազմակերպական առումով իրենց սպառած գյուղական հիվանդանոցների վերափոխումը ցերեկային ստացիոնարների` հաշվի առնելով նաև գյուղական համայնքներում ընդհանուր առմամբ առկա ձգտումը պահպանելու սեփական մահճակալային կարողությունները: Ցերեկային ստացիոնարները հնարավորություն կտան նաև լայնորեն կիրառելու հիվանդի մի քանի ժամվա հոսպիտալացում պահանջող վիրաբուժական և այլ միջոցառումներ` այս առումով ևս զգալիորեն թեթևացնելով հիվանդանոցների բեռը:
1.2. Հետհիվանդանոցային ծառայություններ
1.2.1. Վերականգնողական բուժման ծառայություններ
Առաջիկա տարիներին պետք է ուժեղացվեն վերականգնողական բուժման ծառայությունները, ընդ որում, թե ստացիոնար, թե ամբուլատոր-պոլիկլինիկական պայմաններում: Հիվանդանոցների մեծ մասում նախատեսվում է ստեղծել պահպանման ավելի փոքր ծախսեր պահանջող վերականգնողական բուժման բաժիններ, ուր բուժման ինտենսիվ կուրսից հետո հիվանդները կտեղափոխվեն ավարտելու ստացիոնար բուժումը: 2-3 առավել խոշոր մարզերում նախատեսվում է ստեղծել նաև վերականգնողական բուժման մասնագիտացված հիվանդանոցներ: Հստակ քաղաքականություն պետք է տարվի նաև ամբուլատոր-պոլիկլինիկական հիմնարկներում վերականգնողական բուժման ծառայությունների կատարելագործման ուղղությամբ, ինչը նույնպես կբերի հիվանդանոցային մահճակալին ֆոնդի օգտագործման արդյունավետության բարձրացմանը:
1.2.2. Քրոնիկ հիվանդների բուժման և երկարատև խնամքի
հիվանդանոցային ծառայություններ
Ծառայությունների այս խումբը չափազանց թույլ է զարգացած երկրում, ինչը ևս բերում է դասական, շատ ավելի թանկարժեք հիվանդանոցների ավելորդ ծանրաբեռնվածությանը: Նախատեսվում է ստեղծել քրոնիկ հիվանդների բուժման և երկարատև խնամքի մի քանի հիվանդանոցներ, այդ թվում` Երևանում և 3-4 մարզերում: Նրանցում գերակշռող կլինի քույրական խնամքը` բժշկի կողմից ցույց տրվող օգնության նվազագույն ծավալով: Հաշվի առնելով միջազգային փորձը` կանխատեսվում է, որ նմանատիպ ծառայությունների ստեղծումը որոշակիորեն կբեռնաթափի հիվանդանոցային օղակը:
2. Հիվանդանոցային համակարգի ներուժի կատարելագործումը
Բացի արտահիվանդանոցային ծառայությունների ուժեղացման ճանապարհով հիվանդանոցային օղակի սպասվող բեռնաթափումից և օպտիմալացումից, մեծ ուշադրություն է դարձվելու բուն հիվանդանոցային համակարգի ներուժի որակական և քանակական կատարելագործմանը: Այն ուղղված է լինելու մահճակալների ավելցուկի վերացմանը, ինչպես նաև գործող մահճակալների առավել համաչափ բաշխմանը:
2.1. Հինգ տարվա ընթացքում ծրագրվում է մահճակալային ֆոնդի նվազեցում
25 օ/օ-ով` տարեկան կտրվածքով` միջինը 5 օ/օ-ով, հիվանդանոցների
մահճակալների թվի կրճատման, ինչպես նաև առանձին հիվանդանոցների
լիկվիդացման կամ միացման ճանապարհով:
Այս գործընթացում առավելապես կընդգրկվեն այն հիվանդանոցները, որոնք կհամապատասխանեն հետևյալ չափանիշներին`
- շենքերը հին են, ոչ սեյսմակայուն և ծախսատար են վերակառուցման առումով.
- կարողությունների օգտագործման մակարդակը պակաս է 35 օ/օ-ից, այսինքն`
առկա են ծառայությունների և մահճակալների թվի մեծ ավելցուկ և
անհամապատասխանություն սպասարկող բնակչության իրական կարիքների
նկատմամբ.
- պայմանները բավարար չեն ֆունկցիոնալ արդյունավետություն ապահովելու
համար.
- շենքային պայմաններն անհարմար են ծառայությունների զարգացման կամ
վերապրոֆիլավորման համար.
- տեխնիկապես թերզինված են և պահանջում են մեծ ներդրումներ բժշկական
տեխնոլոգիաների մեջ.
- հիվանդանոցը չի ապահովում հիվանդների անհրաժեշտ քանակի և սպեկտորի
առկայությունը, որը հնարավորություն կտար բուժանձնակազմին պահպանելու և
կատարելագործելու իրենց բժշկական գիտելիքները:
Հաշվի առնելով այս խնդրի իրականացման սոցիալական ասպեկտները` առողջապահության նախարարությունը որդեգրում է համեմատաբար նվազագույն կարողություններով և ֆունկցիոնալ ոչ մեծ նշանակություն ունեցող հիվանդանոցների սահուն և աստիճանական լիկվիդացման կամ մահճակալային ֆոնդի կրճատման քաղաքականություն: Կտրուկ միջոցառումներն այս ուղղությամբ ցանկալի չեն մի քանի պատճառներով`
ա) առողջության առաջնային պահպանման օղակի մատչելիության բարձրացումը կարող է բերել երկրորդային և երրորդային օղակների վերակառուցման քաղաքականության ճշգրտումների անհրաժեշտության.
բ) հիվանդանոցների լիկվիդացումը և մահճակալների թվի կրճատումը պետք է զուգորդվեն մարդկային ռեսուրսների մասնակի վերապատրաստմամբ և սոցիալ-տնտեսական խնդիրների լուծմամբ, որը կպահանջի անհրաժեշտ ներդրումներ և ժամանակ.
2.2. Ծրագրվում է հիվանդանոցների մահճակալային ֆոնդի վերապրոֆիլավորում
25 օ/օ-ով` տարեկան կտրվածքով` միջինը 5 օ/օ-ով:
Բացի հիվանդանոցների մահճակալների վերապրոֆիլավորմանն ուղղված հիմնականում արտահիվանդանոցային օղակն ընդգրկող վերոհիշյալ միջոցառումներից (վերականգնողական բուժման ծառայություններ, ցերեկային ստացիոնարներ, քրոնիկ հիվանդների և քույրական խնամքի հիվանդանոցներ)` նախատեսվում է նաև բուն հիվանդանոցային համակարգի ներքին վերապրոֆիլավորում` ուղղված առկա անհամամասնությունների վերացմանը: Հաշվի են առնվելու հիվանդության փոփոխված կառուցվածքը, ժամանակակից պահանջներին համապատասխանող նոր` առավելապես նեղ մասնագիտացված ծառայությունների ստեղծման անհրաժեշտությունը, առկա ծառայությունների գծով մահճակալային ֆոնդի օգտագործման արդյունավետությունը: Այս գործընթացը ևս ընթանալու է սահուն և աստիճանական, 5 տարվա ընթացքում` հաշվի առնելով մարդկային ներուժի զուգահեռ մասնագիտական վերապրոֆիլավորման անհրաժեշտությունը և հնարավորությունները:
3. Առողջապահությունում ընդհանուր համակարգային նշանակության
միջոցառումների իրականացումը, որոնք կնպաստեն հիվանդանոցային
օղակի օպտիմալացմանը
3.1. Հանրապետական և մարզային նշանակության ծառայությունների դերը և
բաշխման հստակեցում, այդ թվում` որոշ մարզկենտրոններում
հանրապետական նշանակության բարձր տեխնոլոգիական և նեղ մասնագիտացված
ծառայությունների ստեղծմամբ:
3.2. Հանրապետության առողջապահական համակարգի տեխնոլոգիական պարկի
ուսումնասիրում և համապատասխան վերաբաշխում հատկապես հիվանդանոցային
օղակում: Այդ ճանապարհով բուժօգնության գործընթացի ավելի համաչափ
տեխնոլոգիական ապահովում և, որպես արդյունք, մահճակալային ֆոնդի
ավելի ռացիոնալ օգտագործում:
3.3. Բուժօգնության ֆինանսավորման կատարելագործման հետագա խորացում`
ամբուլատոր-պոլիկլինիկական և հիվանդանոցային օղակների ֆինանսավորման
տարանջատված մեխանիզմների կիրառմամբ հիվանդանոցային օղակում ըստ
հիվանդության յուրաքանչյուր դեպքի ֆինանսավորման համակարգի վերջնական
ներդրմամբ:
3.4. Առողջապահական ծառայությունների և հիմնարկների լիցենզավորման
չափանիշների նկատմամբ պահանջների բարձրացում, այդ ճանապարհով նրանց
կառուցվածքի ու ներուժի կատարելագործում և օպտիմալացում:
3.5. Բուժօգնության ստանդարտների և որակի վերահսկման համակարգի
աստիճանական` 4-5 տարվա ընթացքում ներդրում:
3.6. Պետական բժշկական ապահովագրական համակարգի աստիճանական ներդրում`
առաջիկա 6-7 տարվա ընթացքում, այդ ճանապարհով հիվանդանոցային
բուժօգնության մատչելիության բարձրացում և որպես արդյունք,
մահճակալային ֆոնդի ավելի արդյունավետ օգտագործում:
3.7. Կլինիկական բազաների կարգավիճակի հստակեցում, այդ ճանապարհով
հիվանդանոցային և ուսումնական հաստատությունների միջև կադրային և
տեխնոլոգիական ներուժի համակարգված և ավելի արդյունավետ
օգտագործում, որպես արդյունք` կլինիկական բազաներում արհեստականորեն
ուռճացված կադրային և, հետևաբար, նաև մահճակալային ներուժի
օպտիմալացում:
3.8. Դեղորայքային քաղաքականության վերանայում, այդ հարցում պետական
կանոնակարգման, ինչպես նաև միջհիվանդանոցային գնումների համակարգի
դերի մեծացում, որպես արդյունք` հիվանդանոցային դեղորայքի և,
հետևաբար, բուժօգնության գների կանոնակարգում և իջեցում`
հիվանդանոցային բուժօգնության մատչելիության և, հետևաբար,
մահճակալային ֆոնդի օգտագործման արդյունավետության բարձրացմամբ:
3.9. Առողջապահական տարբեր օղակները կապող (ամբուլատոր-պոլիկլինիկական,
ընդհանուր պրոֆիլի և մասնագիտացված հիվանդանոցային,
հետհիվանդանոցային և այլն) հստակ բժշկական ինֆորմացիոն համակարգի
ներդրում, որպես արդյունք` բուժօգնության տարբեր փուլերում բժշկական
միջոցառումների շարունակականության ապահովում, նախորդ փուլերում
իրականացված բուժօգնության ճիշտ և ժամանակին գնահատման ճանապարհով
առողջապահական ներուժի (հատկապես հիվանդանոցային օղակում),
արդյունավետության բարձրացում և կատարելագործում):