041.0074.010300
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ
ՈՐՈՇՈՒՄ
1 մարտի 2000 թվականի N 74
«ՄԱՆԵՍ ԵՎ ՎԱԼԼԵՔՍ» ՓԱԿ ԲԱԺՆԵՏԻՐԱԿԱՆ ԸՆԿԵՐՈՒԹՅԱՆ ԿՈՂՄԻՑ ՍԵՎ ՊՂՆՁԵ ԱՐՏԱԴՐՈՒԹՅԱՆ ԾՐԱԳԻՐՆ ԻՐԱԳՈՐԾԵԼՈՒ ՄԱՍԻՆ
Հայաստանի Հանրապետության լեռնամետալուրգիական համալիրի զարգացման և հյուսիսային տարածաշրջանում սոցիալ-տնտեսական խնդիրների լուծման նպատակով`
1. Հայաստանի Հանրապետության արդյունաբերության և առևտրի նախարարությանը`
ա) «Մանես և Վալլեքս» փակ բաժնետիրական ընկերությանը տարեկան ոչ պակաս 5000 տոննա սև պղնձե արտադրության պայմանով, համապատասխան պայմանագրերի միջոցով մինչև 2002 թվականի ավարտն ապահովել հանրապետությունում արդյունահանվող պղնձի խտանյութով.
բ) սահմանված կարգով մշակել «Մանես և Վալլեքս» փակ բաժնետիրական ընկերության կողմից «Զանգեզուրի պղնձամոլիբդենային կոմբինատ» պետական փակ բաժնետիրական ընկերությանն ունեցած պարտքերի մարման ժամանակացույց.
գ) Հայաստանի Հանրապետության էներգետիկայի նախարարության հետ սահմանված կարգով մշակել «Մանես և Վալլեքս» փակ բաժնետիրական ընկերության կողմից Հայաստանի Հանրապետության էներգետիկայի նախարարության կազմակերպություններին ունեցած պարտքերի վերաձևակերպման և մարման ժամանակացույց:
2. Հայաստանի Հանրապետության գյուղատնտեսության և բնօգտագործման նախարարությանը` Հայաստանի Հանրապետության օրենսդրությամբ սահմանված կարգով քննարկել «Մանես և Վալլեքս» փակ բաժնետիրական ընկերության կողմից տարեկան 5000 տոննա սև պղնձի արտադրության հետ կապված բնապահպանական խնդիրները:
3. Հայաստանի Հանրապետության ֆինանսների և էկոնոմիկայի նախարարությանը և Հայաստանի Հանրապետության պետական եկամուտների նախարարությանը` Հայաստանի Հանրապետության օրենսդրությամբ սահմանված ժամկետներում ապահովել «Մանես և Վալլեքս» փակ բաժնետիրական ընկերությանը Հայաստանի Հանրապետության պետական բյուջեի նկատմամբ ունեցած գերավճարների վերադարձը:
4. Սույն որոշման կատարման վերահսկողությունը դնել Հայաստանի Հանրապետության արտադրական ենթակառուցվածքների գործունեությունը համակարգող նախարարի վրա: