041.0802.190618
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ
ՈՐՈՇՈՒՄ
19 հունիսի 2018 թվականի N 802-Լ
ԱՆՎՏԱՆԳՈՒԹՅԱՆ ԽՈՐՀՐԴԻ ԱՇԽԱՏԱԿԱՐԳԸ ՀԱՍՏԱՏԵԼՈՒ ՄԱՍԻՆ
i
Հիմք ընդունելով «Անվտանգության խորհրդի կազմավորման և գործունեության մասին» օրենքի 6-րդ հոդվածի 1-ին մասը`
1. Հաստատել Անվտանգության խորհրդի աշխատակարգը` համաձայն հավելվածի:
2. Անվտանգության խորհրդի քարտուղարին` 15-օրյա ժամկետում Անվտանգության խորհրդի գործունեության 2018 թվականի ծրագիրը ներկայացնել Հայաստանի Հանրապետության վարչապետի հաստատմանը:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2018 ԹՎԱԿԱՆԻ ՀՈՒՆԻՍԻ 19-ԻՆ
Հավելված
ՀՀ վարչապետի
2018 թվականի հունիսի 19-ի
N 802-Լ որոշման
ԱՆՎՏԱՆԳՈՒԹՅԱՆ ԽՈՐՀՐԴԻ ԱՇԽԱՏԱԿԱՐԳ
I. ԸՆԴՀԱՆՈՒՐ ԴՐՈՒՅԹ
1. Սույն աշխատակարգը կարգավորում է Անվտանգության խորհրդի գործունեությանն առնչվող ընթացակարգային հարցերը` «Անվտանգության խորհրդի կազմավորման և գործունեության մասին» օրենքի 6-րդ հոդվածին համապատասխան:
II. ԱՆՎՏԱՆԳՈՒԹՅԱՆ ԽՈՐՀՐԴԻ ԳՈՐԾՈՒՆԵՈՒԹՅԱՆ ԿԱԶՄԱԿԵՐՊՄԱՆ ԵՎ ԻՐԱԿԱՆԱՑՄԱՆ ԿԱՐԳԸ
2. Անվտանգության խորհրդի գործունեությունը կազմակերպվում է տարեկան ծրագրի հիման վրա, որն Անվտանգության խորհրդի քարտուղարի կողմից, յուրաքանչյուր տարվա համար, ներկայացվում է Հայաստանի Հանրապետության վարչապետի հաստատմանը` մինչև նախորդող տարվա ավարտը:
3. Անվտանգության խորհրդի գործունեության տարեկան ծրագրում ներառվում են Անվտանգության խորհրդի նիստերում քննարկվելիք հարցերը, այդ թվում` Հայաստանի Հանրապետության անվտանգությանը, տարածքային ամբողջականությանը և սահմանների անձեռնմխելիությանը վերաբերող հարցերը, Պաշտպանության նախարարի կիսամյակային զեկույցները` պաշտպանության ոլորտի քաղաքականության հիմնական ուղղությունների կատարման վերաբերյալ, անվտանգության սպառնալիքների վերաբերյալ տեղեկատվությունը և դրանց հակազդմանն ուղղված առաջարկությունները, ինչպես նաև Անվտանգության խորհրդի որոշումների կատարման մշտադիտարկումների և հաշվետվությունների ներկայացման ժամկետները:
4. Անվտանգության խորհուրդը պաշտպանության ռազմավարական պլանավորումն ու վերանայումն իրականացնում է Պաշտպանության նախարարի միջոցով:
5. Պաշտպանության նախարարն Անվտանգության խորհուրդ է ներկայացնում պաշտպանության ռազմավարական պլանավորման ու վերանայման արդյունքում մշակված փաստաթղթերը, ինչպես նաև զինված ուժերի և այլ զորքերի զարգացման, զինված ուժերի ծավալման, զորահավաքային, կիրառման, Հայաստանի Հանրապետության տարածքի պաշտպանության օպերատիվ սարքավորման պլանները, ինչպես նաև համապատասխան մարմինների հետ համաձայնեցված զինված ուժերի և այլ զորքերի բարձրագույն հրամանատարական կազմի պաշտոնների, բարձրագույն սպայական կազմի պաշտոնների և դրանց համապատասխանող բարձրագույն սպայական զինվորական կոչումների ցանկերը:
6. Արտակարգ իրավիճակների նախարարն Անվտանգության խորհուրդ է ներկայացնում քաղաքացիական պաշտպանության հանրապետական պլանը:
7. Համաձայն «Անվտանգության խորհրդի կազմավորման և գործունեության մասին» օրենքի 4-րդ հոդվածի 4-րդ մասի` Անվտանգության խորհրդի նիստերը հրավիրվում են Հայաստանի Հանրապետության վարչապետի կողմից` ըստ անհրաժեշտության, սակայն ոչ ուշ, քան եռամսյակը մեկ անգամ:
8. Անվտանգության խորհրդի նիստերը վարում է Հայաստանի Հանրապետության վարչապետը:
9. Հայաստանի Հանրապետությանն սպառնացող անմիջական վտանգի կամ զինված հարձակման, ինչպես նաև պատերազմ հայտարարվելու դեպքում Հայաստանի Հանրապետության վարչապետը հրավիրում է Անվտանգության խորհրդի նիստ:
10. Համաձայն «Անվտանգության խորհրդի կազմավորման և գործունեության մասին» օրենքի 4-րդ հոդվածի 9-րդ մասի` Անվտանգության խորհրդի նիստերի օրակարգը, հարցերի քննարկման հերթականությունը և հիմնական զեկուցողներին որոշում է Հայաստանի Հանրապետության վարչապետը:
11. Անվտանգության խորհրդի քարտուղարը սահմանված ժամկետում կազմակերպում է Անվտանգության խորհրդի նիստի օրակարգի և քննարկվելիք փաստաթղթերի տրամադրումն Անվտանգության խորհրդի անդամներին, իսկ Հայաստանի Հանրապետության վարչապետի հանձնարարությամբ` նաև Անվտանգության խորհրդի նիստերին մասնակցող այլ անձանց:
12. Անվտանգության խորհրդի անդամներն Անվտանգության խորհրդի նիստին մասնակցելու անհնարինության մասին նիստից երեք օր առաջ, իսկ հրատապ դեպքերում` անհապաղ, ծանուցում են Անվտանգության խորհրդի քարտուղարին, ով այդ մասին զեկուցում է Հայաստանի Հանրապետության վարչապետին:
13. Անվտանգության խորհրդի նիստի օրակարգի հարցը զեկուցող Անվտանգության խորհրդի անդամն Անվտանգության խորհրդի նիստին փորձագետներ հրավիրելու վերաբերյալ առաջարկությունը ծանուցում է Անվտանգության խորհրդի քարտուղարին, ով այդ մասին զեկուցում է Հայաստանի Հանրապետության վարչապետին:
14. Հայաստանի Հանրապետության վարչապետի կողմից Անվտանգության խորհրդի նիստին հրավիրված անձանց մասնակցությունն ապահովում է Անվտանգության խորհրդի գրասենյակը` համագործակցելով Հայաստանի Հանրապետության վարչապետի աշխատակազմի արարողակարգի իրավասու պաշտոնատար անձանց հետ:
15. Անվտանգության խորհրդի նիստերին հրավիրված անձինք ներկա են գտնվում միայն իրենց վերաբերող հարցի քննարկմանը` բացառությամբ Հայաստանի Հանրապետության վարչապետի թույլտվությամբ:
16. Անվտանգության խորհրդի քարտուղարը, Անվտանգության խորհրդի նիստի օրակարգը մշակելիս, մինչև այն Հայաստանի Հանրապետության վարչապետի հաստատմանը ներկայացնելը, հաշվի է առնում Անվտանգության խորհրդի անդամներից ստացված առաջարկությունները:
17. Անվտանգության խորհրդի նիստերի օրակարգի և քննարկվելիք փաստաթղթերի վերաբերյալ Անվտանգության խորհրդի անդամներն առաջարկություններ կարող են ներկայացնել նիստից առնվազն երկու օր առաջ, կամ նիստի ընթացքում` անհրաժեշտության դեպքում նիստին ներկայացնելով առաջարկությունների գրավոր տարբերակը, կամ դրանց էլեկտրոնային կրիչը:
18. Անվտանգության խորհրդի նիստի օրակարգում լրացուցիչ, այդ թվում` Անվտանգության խորհրդի գործունեության ծրագրով չնախատեսված, հարցերի ներառման վերաբերյալ Անվտանգության խորհրդի անդամներն առաջարկություններ կարող են ներկայացնել նիստից առնվազն երեք օր առաջ, որոնք Անվտանգության խորհրդի քարտուղարի կողմից ամփոփվում և ներկայացվում են Հայաստանի Հանրապետության վարչապետին` նիստից առնվազն երկու օր առաջ:
19. Անվտանգության խորհրդի նիստի օրակարգում ներառված առանձին նյութերին ծանոթանալու հատուկ կարգը սահմանվում է Հայաստանի Հանրապետության վարչապետի կողմից:
20. Անվտանգության խորհրդի քարտուղարը, մինչև Անվտանգության խորհրդի նիստն սկսվելը, Հայաստանի Հանրապետության վարչապետին զեկուցում է քվորումի առկայության մասին:
21. Քվորումի բացակայության դեպքում նիստը հետաձգվում է Հայաստանի Հանրապետության վարչապետի կողմից սահմանված ժամկետով:
22. Նիստն սկսվում է Անվտանգության խորհրդի նիստի օրակարգի հրապարակմամբ, որին հետևում է օրակարգի հարցերի քննարկումը` Հայաստանի Հանրապետության վարչապետի կողմից սահմանված հերթականությամբ:
23. Անվտանգության խորհրդի նիստում հարցերը զեկուցում են Անվտանգության խորհրդի անդամները կամ Հայաստանի Հանրապետության վարչապետի թույլտվությամբ` այլ անձինք:
24. Օրակարգի յուրաքանչյուր հարցի քննարկման ավարտին Հայաստանի Հանրապետության վարչապետի կողմից քվեարկության է դրվում տվյալ հարցով Անվտանգության խորհրդի դիրքորոշումը: Դրա հիման վրա Անվտանգության խորհրդի գրասենյակի կողմից նախապատրաստվում է Անվտանգության խորհրդի համապատասխան որոշման նախագիծ և Անվտանգության խորհրդի քարտուղարի կողմից Անվտանգության խորհրդի անդամների հետ համաձայնեցվելուց հետո այն ներկայացվում է ստորագրման:
25. Առանձին դեպքերում Անվտանգության խորհուրդը կարող է սահմանափակվել հարցերի քննարկմամբ` առանց որոշում ընդունելու կամ տարաժամկետելու որոշման ընդունումը` մինչև Անվտանգության խորհրդի հաջորդ նիստը:
26. Անվտանգության խորհրդի որոշումներն ստորագրվում են Հայաստանի Հանրապետության վարչապետի կողմից` դրանք ընդունելու օրվանից ոչ ուշ, քան երեք օր հետո:
27. Անվտանգության խորհրդի քարտուղարն Անվտանգության խորհրդի որոշումների կատարման մշտադիտարկումների արդյունքների վերաբերյալ Հայաստանի Հանրապետության վարչապետի կողմից սահմանված կարգով հաշվետվություն է ներկայացնում Հայաստանի Հանրապետության վարչապետին և Անվտանգության խորհուրդ:
28. Հայաստանի Հանրապետության վարչապետի հանձնարարությամբ` Անվտանգության խորհրդի նիստում քննարկված հարցերի վերաբերյալ պաշտոնական հաղորդագրությունը նախապատրաստում է Հայաստանի Հանրապետության վարչապետի աշխատակազմի տեղեկատվության և հասարակայնության հետ կապերի ստորաբաժանումը` համագործակցելով Անվտանգության խորհրդի գրասենյակի հետ:
29. Հայաստանի Հանրապետության վարչապետի հանձնարարությամբ` Անվտանգության խորհրդի նիստի լուսաբանումը կազմակերպում է Հայաստանի Հանրապետության վարչապետի աշխատակազմի տեղեկատվության և հասարակայնության հետ կապերի ստորաբաժանումը` Անվտանգության խորհրդի գրասենյակի հետ համատեղ:
30. Անվտանգության խորհրդի նիստերն արձանագրվում են Անվտանգության խորհրդի գրասենյակի կողմից, ընդ որում, արձանագրությունները համարակալվում են նիստերին տրված համարների հերթականությամբ:
31. Անվտանգության խորհրդի գործունեության վերաբերյալ փաստաթղթերը և այլ նյութեր պահվում են Անվտանգության խորհրդի գրասենյակում:
III. ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՆՎՏԱՆԳՈՒԹՅԱՆ ՍՊԱՌՆԱԼԻՔՆԵՐԻՆ ՎԵՐԱԲԵՐՈՂ ՏԵՂԵԿԱՏՎՈՒԹՅՈՒՆԸ ՀԱՎԱՔԵԼՈՒ ԵՎ ԱՄՓՈՓԵԼՈՒ ԿԱՐԳԸ
32. Անվտանգության խորհրդի քարտուղարը Հայաստանի Հանրապետության անվտանգության սպառնալիքներին վերաբերող տեղեկատվության հավաքումը և ամփոփումը կազմակերպելու նպատակով համապատասխան հարցումներ է ուղարկում գործադիր իշխանության մարմիններին և ամփոփում նրանց առաջարկությունները:
33. Հայաստանի Հանրապետության անվտանգության սպառնալիքներին վերաբերող տեղեկատվության ամփոփագրերը և ձեռնարկվելիք միջոցների վերաբերյալ առաջարկություններն Անվտանգության խորհուրդ և Հայաստանի Հանրապետության վարչապետին ներկայացվում են Հայաստանի Հանրապետության վարչապետի կողմից սահմանված պարբերականությամբ:
IV. ԱՆՎՏԱՆԳՈՒԹՅԱՆ ԽՈՐՀՐԴԻ ՀԱՆՁՆԱԽՄԲԵՐԸ ԵՎ ԱՇԽԱՏԱՆՔԱՅԻՆ ԽՄԲԵՐԸ
34. Անվտանգության խորհրդի հանձնախմբերը և աշխատանքային խմբերն ստեղծվում են Անվտանգության խորհրդի լիազորությունների իրականացման, Անվտանգության խորհրդի առանձին օրակարգային հարցերի քննարկման, Անվտանգության խորհրդի տարեկան ծրագրով նախատեսված հարցերով կամ Անվտանգության խորհրդի գործունեությանն առնչվող այլ հարցերով նախապատրաստական աշխատանքներ և փորձագիտական ուսումնասիրություններ կատարելու նպատակով` Անվտանգության խորհրդի քարտուղարի, իսկ պաշտպանության ռազմավարական պլանավորման և վերանայման մասով` Պաշտպանության նախարարի կողմից Հայաստանի Հանրապետության վարչապետին և Անվտանգության խորհուրդ ներկայացված հիմնավորումների հիման վրա:
35. Անվտանգության խորհրդի քարտուղարը, իսկ պաշտպանության ռազմավարական պլանավորման և վերանայման մասով` Պաշտպանության նախարարը, Անվտանգության խորհրդի հանձնախմբերի և աշխատանքային խմբերի ստեղծման նպատակով ապահովում է Անվտանգության խորհրդի անդամներից համապատասխան առաջարկությունների ստացումը և դրանց ամփոփումը:
36. Անվտանգության խորհրդի հանձնախմբերի և աշխատանքային խմբերի ստեղծման, կազմի և դրանց գործունեության կարգի վերաբերյալ առաջարկությունները և համապատասխան որոշման նախագծերը Հայաստանի Հանրապետության վարչապետի հաստատմանն է ներկայացնում Անվտանգության խորհրդի քարտուղարը, իսկ պաշտպանության ռազմավարական պլանավորման և վերանայման մասով` Պաշտպանության նախարարը:
37. Անվտանգության խորհրդի հանձնախմբերի և աշխատանքային խմբերի անհատական կազմը հաստատվում է Անվտանգության խորհրդի քարտուղարի, իսկ պաշտպանության ռազմավարական պլանավորման և վերանայման մասով` Պաշտպանության նախարարի կողմից` գործադիր իշխանության մարմիններին ուղղված հարցման հիման վրա ստացված առաջարկությունների հաշվառմամբ:
38. Անվտանգության խորհրդի քարտուղարը, իսկ պաշտպանության ռազմավարական պլանավորման և վերանայման մասով` Պաշտպանության նախարարը ղեկավարում է Անվտանգության խորհրդի հանձնախմբերի և աշխատանքային խմբերի գործունեությունը:
39. Հայաստանի Հանրապետության վարչապետի որոշմամբ Անվտանգության խորհրդի հանձնախմբերի և աշխատանքային խմբերի գործունեության ղեկավարումը կարող է դրվել Անվտանգության խորհրդի այլ անդամների վրա:
40. Անվտանգության խորհրդի հանձնախմբերի և աշխատանքային խմբերի գործունեությունն իրականացվում է նիստերի միջոցով:
41. Անվտանգության խորհրդի հանձնախմբերի և աշխատանքային խմբերի գործունեության արդյունքները հանձնախմբերի և աշխատանքային խմբերի ղեկավարների կողմից ներկայացվում են Հայաստանի Հանրապետության վարչապետին և Անվտանգության խորհուրդ:
42. Անվտանգության խորհրդի հանձնախմբերի և աշխատանքային խմբերի ղեկավարներն Անվտանգության խորհրդի հանձնախմբերին և աշխատանքային խմբերին տալիս են հանձնարարականներ և վերահսկում դրանց կատարումը:
43. Անվտանգության խորհրդի հանձնախմբերի և աշխատանքային խմբերի գործունեությունը դադարեցվում է դրանց առջև դրված խնդիրների սպառման կամ Հայաստանի Հանրապետության վարչապետի որոշմամբ` Անվտանգության խորհրդի քարտուղարի, իսկ պաշտպանության ռազմավարական պլանավորման և վերանայման մասով` Պաշտպանության նախարարի կողմից Հայաստանի Հանրապետության վարչապետին և Անվտանգության խորհուրդ ներկայացված հիմնավորումների հիման վրա: