ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐ
ՀՐԱՄԱՆ
5 մայիսի 2021 թվականի N 1635-Ա
ԿՈՐՈՆԱՎԻՐՈՒՍԱՅԻՆ ՀԻՎԱՆԴՈՒԹՅԱՆ (COVID-19) ԴԵՄ «ԿՈՐՈՆԱՎԱԿ» (CORONAVAC) ՊԱՏՎԱՍՏԱՆՅՈՒԹԻ ԿԻՐԱՌՄԱՆ ՈՒՂԵՑՈՒՅՑԸ ՀԱՍՏԱՏԵԼՈՒ ԵՎ ԿՈՐՈՆԱՎԻՐՈՒՍԱՅԻՆ ՀԻՎԱՆԴՈՒԹՅԱՆ (COVID-19) ԴԵՄ «ԿՈՐՈՆԱՎԱԿ» (CORONAVAC) ՊԱՏՎԱՍՏԱՆՅՈՒԹՈՎ ՊԱՏՎԱՍՏՈՒՄՆԵՐ ԻՐԱԿԱՆԱՑՆԵԼՈՒ ՄԱՍԻՆ
i
Հիմք ընդունելով «Հայաստանի Հանրապետության բնակչության սանիտարահամաճարակային անվտանգության ապահովման մասին» Հայաստանի Հանրապետության օրենքի 24-րդ հոդվածի 2-րդ մասը, Հայաստանի Հանրապետության կառավարության 2020 թվականի դեկտեմբերի 17-ի N 2129-Ն որոշմամբ հաստատված «2021-2025 թվականների իմունականխարգելման ազգային ծրագիրը և իմունականխարգելման ազգային ծրագրի գերակա միջոցառումների ցանկը» պետական ծրագրի 43-րդ կետի 8-րդ ենթակետը, Հայաստանի Հանրապետության առողջապահության նախարարի 2020 թվականի օգոստոսի 17-ի թիվ 21-Ն հրամանով հաստատված հավելվածի 7-րդ կետը, ղեկավարվելով Հայաստանի Հանրապետության վարչապետի 2018 թվականի հունիսի 11-ի թիվ 728-Լ որոշման հավելվածով հաստատված Հայաստանի Հանրապետության առողջապահության նախարարության կանոնադրության 18-րդ կետի 20-րդ ենթակետով.
ՀՐԱՄԱՅՈՒՄ ԵՄ`
1. Հաստատել`
1) Կորոնավիրուսային հիվանդության (COVID-19) դեմ «ԿորոնաՎակ» (CoronaVac) պատվաստանյութի կիրառման ուղեցույցը` համաձայն հավելվածի:
2. Առողջապահության նախարարության բժշկական օգնության քաղաքականության վարչության պետ Քնար Ղոնյանին, Առողջապահության նախարարության «Հիվանդությունների վերահսկման և կանխարգելման ազգային կենտրոն» պետական ոչ առևտրային կազմակերպության գլխավոր տնօրեն Արտավազդ Վանյանին` սահմանված կարգով ապահովել.
1) Կորոնավիրուսային հիվանդության (COVID-19) դեմ «Կորոնավակ» (Coronavac) պատվաստանյութով պատվաստումային գործընթացի կազմակերպումը Առողջապահության նախարարի 2021 թվականի փետրվարի 15-ի թիվ 436-Ա հրամանով սահմանված ռիսկի խմբերի 55 և բարձր տարիքի անձանց շրջանում, ինչպես նաև 18 և բարձր տարիքի անձանց շրջանում, ըստ դիմելիության, կամավորության սկզբունքով` համաձայն հավելվածի:
3. Առողջապահության նախարարության «Հիվանդությունների վերահսկման և կանխարգելման ազգային կենտրոն» պետական ոչ առևտրային կազմակերպության գլխավոր տնօրեն Արտավազդ Վանյանին` սահմանված կարգով ապահովել.
1) Բժշկական օգնություն և սպասարկում իրականացնող կազմակերպություններում կորոնավիրուսային հիվանդության (COVID-19) դեմ պատվաստումային գործընթացի շարունակական դիտարկումը:
2) Բժշկական օգնություն և սպասարկում իրականացնող կազմակերպություններում կորոնավիրուսային հիվանդության (COVID-19) դեմ իրականացված պատվաստումների ու արձանագրված հետպատվաստումային անբարեհաջող դեպքերի վերաբերյալ ամենօրյա տեղեկատվության ընդունումը, ամփոփումը:
3) Շարժական պատվաստումային խմբի ձևավորումն ըստ անհրաժեշտության շարժական պատվաստումային կետերում (իմունականխարգելման գործընթաց չիրականացնող կազմակերպություններում) պատվաստումներ իրականացնելու համար` համաձայն Հայաստանի Հանրապետության առողջապահության նախարարի 2020 թվականի օգոստոսի 17-ի թիվ 21-Ն և Առողջապահության նախարարի 2017 թվականի ապրիլի 10-ի թիվ 1189-Ա հրամաններով սահմանված պատվաստումների անվտանգ իրականացման պահանջների:
4. Առաջարկել Երևանի քաղաքապետարանի աշխատակազմի քարտուղարի պաշտոնակատար Դավիթ Համբարյանին, մարզպետարանների գլխավոր քարտուղարներին, բժշկական օգնություն և սպասարկում իրականացնող կազմակերպությունների ղեկավարներին (համաձայնությամբ)` ապահովել.
1) Կորոնավիրուսային հիվանդության (COVID-19) դեմ «Կորոնավակ» (Coronavac) պատվաստանյութով պատվաստումների իրականացման կազմակերպումը Առողջապահության նախարարի 2021 թվականի փետրվարի 15-ի թիվ 436-Ա հրամանով սահմանված ռիսկի խմբերի 55 և բարձր տարիքի անձանց շրջանում` անկախ առողջության առաջնային պահպանման կազմակերպություններում կցագրումից համաձայն հավելվածի:
2) Կորոնավիրուսային հիվանդության (COVID-19) դեմ «Կորոնավակ» (Coronavac) պատվաստանյութով պատվաստումների իրականացման կազմակերպումը 18 և բարձր տարիքի անձանց շրջանում, ըստ դիմելիության, կամավորության սկզբունքով` սույն հրամանի հավելվածի Ձև 6-ով սահմանված կորոնավիրուսային հիվանդության (COVID-19) դեմ «Կորոնավակ» պատվաստանյութով պատվաստվելու համաձայնության ստորագրմամբ, անկախ առողջության առաջնային պահպանման կազմակերպություններում կցագրումից համաձայն հավելվածի:
3) Աջակցել բժշկական օգնություն և սպասարկում իրականացնող կազմակերպություններում Առողջապահության նախարարության «Հիվանդությունների վերահսկման և կանխարգելման ազգային կենտրոն» պետական ոչ առևտրային կազմակերպության մասնագետների կողմից կորոնավիրուսային հիվանդության (COVID-19) դեմ պատվաստումային գործընթացի շարունակական դիտարկմանը:
4) Ապահովել կատարված կորոնավիրուսային հիվանդության (COVID-19) դեմ պատվաստումների ու արձանագրված հետպատվաստումային անբարեհաջող դեպքերի վերաբերյալ ամենօրյա տեղեկատվության ներկայացումը Առողջապահության նախարարության «Հիվանդությունների վերահսկման և կանխարգելման ազգային կենտրոն» պետական ոչ առևտրային կազմակերպության համապատասխան մասնաճյուղերին:
5) Ապահովել շարժական պատվաստումային խմբերի ձևավորումն ըստ անհրաժեշտության շարժական պատվաստումային կետերում (իմունականխարգելման գործընթաց չիրականացնող կազմակերպություններում) պատվաստումներ իրականացնելու համար` համաձայն Հայաստանի Հանրապետության առողջապահության նախարարի 2020 թվականի օգոստոսի 17-ի թիվ 21-Ն և Առողջապահության նախարարի 2017 թվականի ապրիլի 10-ի թիվ 1189-Ա հրամաններով սահմանված պատվաստումների անվտանգ իրականացման պահանջների:
5. Առողջապահության նախարարության հասարակայնության հետ կապերի բաժնի պետ Լիլիթ Բաբախանյանին` ապահովել.
1) Սույն հրամանի տեղադրումը առողջապահության նախարարության պաշտոնական կայքում,
2) Կորոնավիրուսային հիվանդության (COVID-19) դեմ «Կորոնավակ» (Coronavac) պատվաստանյութով պատվաստումների իրականացման վերաբերյալ հանրային իրազեկումը:
6. Սույն հրամանի կատարման հսկողությունը հանձնարարել Առողջապահության նախարարի առաջին տեղակալ Լենա Նանուշյանին:
ՊԱՇՏՈՆԱԿԱՏԱՐ` Ա. ԱՎԱՆԵՍՅԱՆ
Հավելված
Առողջապահության նախարարի
2021 թվականի մայիսի 05-ի
N 1635-Ա հրամանի
ԿԻՐԱՌՄԱՆ ՈՒՂԵՑՈՒՅՑ ԿՈՐՈՆԱՎԻՐՈՒՍԱՅԻՆ ՀԻՎԱՆԴՈՒԹՅԱՆ (COVID-19) ԴԵՄ «ԿՈՐՈՆԱՎԱԿ» CORONAVAC) ՊԱՏՎԱՍՏԱՆՅՈՒԹԻ
1. «ԿՈՐՈՆԱՎԱԿ» (CORONAVAC) ՊԱՏՎԱՍՏԱՆՅՈՒԹԻ ԱՌԱՆՁՆԱՀԱՏԿՈՒԹՅՈՒՆՆԵՐԸ ԵՎ ԲԱՂԱԴՐՈՒԹՅՈՒՆԸ
1. Կորոնավիրուսային հիվանդության (COVID-19) դեմ «ԿորոնաՎակ» (CoronaVac) պատվաստանյութը կախույթ է, որը կարող է ձևավորել շերտավորված նստվածք, այն թափահարելուց անհետանում է: Կորոնավակը լուծույթ է ներարկման համար, մեկ դեղաչափը` 0.5 մլ է: Յուրաքանչյուր դեղաչափ պարունակում է (0.5 մլ) ոչ ակտիվ SARS-COV-2 վիրուս 3 մկգ/դեղաչափ (հավասար է 600 SU):
2. Օժանդակ նյութերն են` ալյումինի հիդրօքսիդ, նատրիումի հիդրոգեն ֆոսֆատ, նատրիումի դիհիդրոգեն ֆոսֆատ, նատրիումի քլորիդ, նատրիումի հիդրօքսիդ և HCl` որպես pH կարգավորիչ:
3. Այս պատվաստանյութը չի պարունակում կոնսերվանտներ:
4. Պատվաստումից հետո խթանում է SARS-CoV-2-ի նկատմամբ իմունիտետի ձևավորումը` ինչն անհրաժեշտ է COVID-19-ի կանխարգելման համար: SARS-CoV-2 պատվաստանյութը (Vero Cell), արտադրված Sinovac Life Sciences Co. Ltd.-ի կողմից, կարող է առաջացնել ակտիվ իմունիտետ և կանխել SARS-COV-2 վիրուսով հարուցված հիվանդությունները` չեզոքացնող հակամարմինների առաջացման ճանապարհով:
5. Այս պատվաստանյութը կիրառելի է 18-ից բարձր տարիքի անձանց համար:
2. ԿՈՐՈՆԱՎԱԿԻ ՊԱՀՊԱՆՄԱՆ ՊԱՅՄԱՆՆԵՐԸ
6. ԿորոնաՎակի չբացված շշիկը պահվում է սառնարանում` +2 oC- +8 oC ջերմաստիճանային պայմաններում: Չի կարելի սառեցնել:
7. ԿորոնաՎակի բացված շշիկը չի կարելի վերադարձնել սառնարան:
8. ԿորոնաՎակի շշիկները պետք է պահել սառնարանի միջին հատվածում, հատկապես, եթե սառնարանն ունի սառցարանային բաժին:
3. ԿՈՐՈՆԱՎԱԿԻ ԿԻՐԱՌՄԱՆ ԱՌԱՆՁՆԱՀԱՏԿՈՒԹՅՈՒՆՆԵՐԸ ԵՎ ՑՈՒՑՈՒՄՆԵՐԸ
9. ԿորոնաՎակը ցուցված է կորոնավիրուսային հիվանդության (COVID-19) կանխարգելման համար 18 տարեկան և բարձր տարիքի անձանց ակտիվ իմունականխարգելման համար:
10. ԿորոնաՎակը կիրառվում է երկու դեղաչափով` յուրաքանչյուրը 0,5 մլ: Արտակարգ իրավիճակներում երկրորդ դեղաչափն իրականացվում է առաջին դեղաչափից 14 օր հետո: Սովորական դեպքերում պատվաստումների ժամանակացույցը` 2 դեղաչափ 4 շաբաթ տևողությամբ ընդմիջումով (0 և 28 օր) յուրաքանչյուր դեղաչափը 0,5 մլ:
11. ԿորոնաՎակ պատվաստանյութի առաջին դեղաչափը ստացած անձանց խորհուրդ է տրվում երկրորդ դեղաչափը ստանալ հենց նույն ԿորոնաՎակ պատվաստանյութով:
12. ԿորոնաՎակի միաժամանակյա կիրառումն այլ պատվաստանյութերի հետ չի ուսումնասիրվել: Այլ պատվաստանյութերի (ոչ կորոնավիրուսային հիվանդության դեմ պատվաստանյութեր) հետ պահպանվում է 14 օր ընդմիջում:
13. Մինչև 18 տարեկան երեխաների և դեռահասների շրջանում ԿորոնաՎակի անվտանգության ու արդյունավետության վերաբերյալ դեռևս առկա չէ որևէ տվյալ:
14. ԿորոնաՎակը նախատեսված է միայն միջմկանային ներարկման համար` բազկի վերին դրսային երրորդականում, դելտայաձև մկանի շրջանում:
15. Հղի կանանց շրջանում ԿորոնաՎակի կիրառման փորձը սահմանափակ է: Հղիների պատվաստումը ԿորոնաՎակով պետք է կատարել այն դեպքում, երբ հիվանդության ռիսկն ավելի մեծ է հղիի ու պտղի վրա, քան պատվաստանյութի ռիսկը:
16. Կերակրող մայրերը ԿորոնաՎակով պատվաստվելուց հետո կարող են շարունակել կրծքով կերակրումը:
17. ՄԻԱՎ վարակակիրների, իմունային անբավարարությամբ անձանց պատվաստումները կարող են իրականացվել` յուրաքանչյուր դեպքում գնահատելով օգուտները և ռիսկերը: Հայտնի չէ իմունային անբավարարությամբ, ինչպես նաև իմունոսուպրեսոր բուժում ստացող անձանց շրջանում, պատվաստումից հետո իմուն պատասխանի ձևավորումն ինչքանով է համադրելի իմունային անբավարարություն չունեցող անձանց մոտ ձևավորված իմուն պատասխանին:
18. Աուտոիմուն հիվանդություններով անձինք կարող են պատվաստվել, եթե պատվաստման ցուցում ունեցող խմբում են:
19. Պատվաստվելուց առաջ COVID-19-ի դեմ հակամարմիններ որոշելու կամ պոլիմերազային շղթայական ռեակցիայով հետազոտության անհրաժեշտություն չկա: Նախկինում COVID-19-ով հիվանդացած անձինք կարող են պատվաստվել:
4. ՀԱԿԱՑՈՒՑՈՒՄՆԵՐ ԵՎ ՀԱՏՈՒԿ ՆԱԽԱԶԳՈՒՇԱԿԱՆ ՄԻՋՈՑԱՌՈՒՄՆԵՐ
20. Ծանր ալերգաբանական ռեակցիա` ԿորոնաՎակ պատվաստանյութի ակտիվ նյութի կամ նրա որևէ բաղադրիչի նկատմամբ հակացուցում է պատվաստման համար, ինչպես նաև առաջնային իմունային անբավարարության դեպքում: Պացիենտները, ովքեր անամնեզում ունեն հաստատված կամ կասկածելի իմունոսուպրեսիվ/ընկճված իմունիտետի կամ իմունանբավարարության վիճակ:
21. Սուր հիվանդությունների (միջին և ծանր ընթացքով), ինչպես նաև թեթև հիվանդությունների դեպքում, ինչպիսիք են սուր, թեթև շնչառական վարակները (37 oC-ից բարձր ջերմությամբ), ԿորոնաՎակով պատվաստումը ժամանակավոր հետաձգվում է:
ՆԱԽԱԶԳՈՒՇԱԿԱՆ ՄԻՋՈՑԱՌՈՒՄՆԵՐ`
Ստորև նշված իրավիճակներում պատվաստումը պետք է զգուշությամբ իրականացվի.
1) Թրոմբոցիտոպենիա, արյան մակարդելիության խանգարումներ ունեցող կամ հակակոագուլյացիոն բուժում ստացող անձանց դեպքում Կորոնավակ պատվաստանյութը, ինչպես մյուս ներարկումային պատվաստանյութերը, պետք է ներարկվեն զգուշությամբ, քանի որ այդ անձանց մոտ միջմկանային ներարկումից հետո կարող է դիտվել արյունահոսություն կամ առաջանալ կապտուկներ,
2) Պացիենտներն, ովքեր ստանում են իմունոսուպրեսիվ/իմունիտետն ընկճող բուժում, (ստանում են ներերակային իմունոգլոբուլին, արյան բաղադրիչներ կամ կորտիկոստերոիդներով երկարատև բուժում` >2 շաբաթ), պատվաստանյութի նկատմամբ իմունային արձագանքը կարող է թույլ լինել:
3) Չվերահսկվող էպիլեպսիայով կամ այլ պրոգրեսիվ նյարդաբանական խանգարումներով, ինչպես օրինակ` Գիհեն Բարրեի համախտանիշով պացիենտները,
4) Անամնեզում բրոնխյալ ասթմա կամ պատվաստանյութի նկատմամբ ծանր անբարեհաջող ռեակցիա, ինչպես օրինակ` եղնջացան, շնչառության խանգարում և անգիոնևրոտիկ այտուց ունեցող պացիենտները,
5) Լուրջ քրոնիկ հիվանդություն ունեցող անձինք` (սիրտանոթային, չվերահսկվող հիպերտենզիա/գերճնշում, շաքարային դիաբետ, երիկամային կամ լյարդի հիվանդություն, չարորակ նորագոյացություն և այլն),
6) ԿորոնաՎակի կիրառման ժամանակ բժշկական օգնություն և սպասարկում իրականացնող կազմակերպությունները պետք է ապահովված լինեն անաֆիլաքսիայի բուժման համար անհրաժեշտ անհետաձգելի օգնության միջոցներով:
ԱՐԴՅՈՒՆԱՎԵՏՈՒԹՅՈՒՆԸ
22. ԿորոնաՎակ պատվաստանյութի ընդհանուր արդյունավետությունը Ինդոնեզիայում մեծահասակների 3-րդ փուլի ուսումնասիրությունը SARS-COV2 պատվաստանյութի արդյունավետության, իմունոգենության և անվտանգության վերաբերյալ երկրորդ դեղաչափից 3 ամիս անց IgG հակամարմինների թեստի արդյունքները ցույց տվեցին, որ seropositive մակարդակը 99.23% է:
23. Չինաստանում մեծահասակների 2-րդ փուլի ուսումնասիրությունն արտակարգ իրավիճակներում (0-14 օր) 28 օր հետո և՛ միջին, և՛ բարձր դեղաչափերով համապատասխանաբար կազմել են 94,07% և 99,15%:
24. Ինդոնեզիայում, Թուրքիայում և Բրազիլիայում իրականացված կլինիկական հետազոտությունների 3-րդ փուլի նախնական վերլուծության արդյունքները հաստատել են պատվաստանյութի արդյունավետությունը, երկրորդ դեղաչափից 14 օրից 6 ամիս անց:
25. Թուրքիայում կատարված 3-րդ փուլի կլինիկական փորձաքննության արդյունքում պատվաստանյութի արդյունավետությունը կազմել է 91.25%:
26. Բրազիլիայում կատարված 3-րդ փուլի կլինիկական փորձաքննության արդյունքում պատվաստանյութի արդյունավետությունը կազմել է 78%:
5. ՊԱՏՎԱՍՏՈՒՄԱՅԻՆ ԳՈՐԾԸՆԹԱՑԻ ԻՐԱԿԱՆԱՑՈՒՄ
27. Բժշկական օգնություն և սպասարկում իրականացնող կազմակերպություններում (այսուհետ` ԲԿ) կորոնավիրուսային հիվանդության դեմ պատվաստումների իրականացման համար սահմանվում է հստակ ժամանակացույց (որոշակի ժամեր կամ օրեր)` հնարավորության դեպքում իմունականխարգելման կաբինետն ապահովելով առանձին մուտքով:
28. ԿորոնաՎակ պատվաստանյութով պատվաստումից առաջ գնահատվում է պացիենտի առողջական վիճակը` համաձայն Առողջապահության նախարարի 2020 թվականի օգոստոսի 17-ի թիվ 21-Ն հրամանի պահանջների:
29. ԿորոնաՎակ պատվաստանյութով պատվաստումից առաջ բուժաշխատողի կողմից իրականացվում և լրացվում է հարցում` ըստ Ձև 1-ի հարցաթերթի:
30. Իրականացված պատվաստումների տվյալները գրանցվում են համաձայն Առողջապահության նախարարի 2020 թվականի օգոստոսի 17-ի թիվ 21-Ն հրամանի պահանջների, ինչպես նաև «COVID-19-ի դեմ պատվաստման քարտում» (Ձև 2):
6. ՀԵՏՊԱՏՎԱՍՏՈՒՄԱՅԻՆ ԱՆԲԱՐԵՀԱՋՈՂ ԴԵՊՔԵՐԻ ՎԱՐՈՒՄ
31. Համաձայն Չինաստանում, Ինդոնեզիայում իրականացված կլինիկական փորձարկման արդյունքների` CoronaVac-ի պատվաստման հետ կապված արձանագրվել են թեթև և միջին ծանրության անբարեհաջող դեպքեր:
32. Հետպատվաստումային ռեակցիաների մեծամասնությունը եղել է թեթև և միջին ծանրության և սովորաբար անցել են պատվաստումից հետո մի քանի օրվա ընթացքում: Անհրաժեշտության դեպքում կարելի է օգտագործել ցավազրկող և/կամ ջերմիջեցնող դեղամիջոցներ (օրինակ` պարացետամոլ պարունակող դեղորայքներ): Առաջին դեղաչափի համեմատ, երկրորդ դեղաչափից հետո հաղորդված անբարեհաջող դեպքերն ավելի մեղմ են և ավելի հազվադեպ:
33. Պատվաստվածներից որոշ մասի մոտ արձանագրվել է սարսուռ, դող և ջերմության բարձրացում, երբեմն` քրտնարտադրություն, գլխացավ (ներառյալ միգրենի նման գլխացավեր), սրտխառնոց, մկանացավեր և ընդհանուր թուլություն, սկսած պատվաստման օրվանից: Այս երևույթները սովորաբար 1-2 օր են տևում: Եթե հիվանդը գանգատվում է անսովոր բարձր կամ երկարատև ջերմությունից կամ այլ ախտանիշներից, անհրաժեշտ է փնտրել այլ պատճառներ և անհրաժեշտության դեպքում տրամադրել համապատասխան խորհուրդներ ախտորոշիչ հետազոտության և բուժման վերաբերյալ:
34. Պատվաստումից հետո անձը մնում է ԲԿ-ում` առնվազն 30 րոպե:
35. Պատվաստումից հետո հնարավոր անաֆիլակտիկ շոկի բուժումն իրականացվում է` համաձայն Հայաստանի Հանրապետության առողջապահության նախարարի 2018 թվականի մարտի 5-ի N 566-Ա հրամանի: Անաֆիլակտիկ շոկի ախտորոշման կլինիկական չափանիշները և իրականացվող անհետաձգելի օգնության ընթացակարգը ներկայացված են Ձև 3-ում և Ձև 4-ում:
36. Հետպատվաստումային շրջանում կատարվում են դիտարկումներ բուժաշխատողի կողմից, մասնավորապես` պատվաստանյութի ներմուծումից հետո 0-48 ժամվա ընթացքում, ինչպես նաև` 4-20-րդ օրերին: Պատվաստումից հետո չորս օր և ավել դիտվող արտահայտված գլխացավերի, գլխուղեղում ճնշման զգացողության, մարմնի վրա կապտուկների կամ արյունազեղումների առկայության դեպքում, անհրաժեշտ է պացիենտին մանրամասն հետազոտել և ըստ անհրաժեշտության` ուղղորդել համապատասխան մասնագետի խորհրդատվության:
37. Հետպատվաստումային անբարեհաջող դեպքերի վերաբերյալ շտապ հաղորդումները տրվում են համաձայն Առողջապահության նախարարի 2020 թվականի օգոստոսի 17-ի թիվ 21-Ն հրամանի պահանջների:
7. ՀԱՂՈՐԴԱԿՑՈՒԹՅՈՒՆ ԵՎ ԲՆԱԿՉՈՒԹՅԱՆ ԻՐԱԶԵԿՈՒՄ
38. Բնակչության ռիսկի խմբերի անձանց տրամադրել կորոնավիրուսային հիվանդության (COVID-19) դեմ պատվաստումների արդյունավետության և անվտանգության վերաբերյալ տեղեկատվություն` համաձայն Ձև 5-ի:
39. Պատվաստվողին տրամադրել տեղեկատվություն պատվաստումից հետո դիտվող հնարավոր հետպատվաստումային անբարեհաջող դեպքերի վերաբերյալ, մասնավորապես` պատվաստումից հետո կարող է դիտվել ներարկման տեղի կարմրություն, ցավոտություն, գլխացավ, հոգնածություն, մկանացավ, ընդհանուր թուլություն, ջերմության բարձրացում, դող, հոդացավ, սրտխառնոց: Պատվաստումից հետո 4-ից 20 օրվա ընթացքում շատ հազվադեպ կարող են դիտվել թրոմբոէմբոլիային բնորոշ երևույթներ` արտահայտված գլխացավ, գլխում ճնշման զգացողություն, մարմնի վրա կապտուկներ կամ արյունազեղումներ, որոնց առկայության դեպքում պետք է անհապաղ դիմել բժշկի:
Ձև 1
ԿՈՐՈՆԱՎԻՐՈՒՍԱՅԻՆ ՀԻՎԱՆԴՈՒԹՅԱՆ (COVID-19) ԴԵՄ ՊԱՏՎԱՍՏՈՒՄՆԵՐԻ ԻՐԱԿԱՆԱՑՄԱՆ ՀԱՄԱՐ ՆԱԽԱՊԱՏՎԱՍՏՈՒՄԱՅԻՆ ՀԱՐՑԱԹԵՐԹ
Պացիենտի Ա.Ա.Հ. ____________________________________________________
Տարիք ______________________________________________________________
Ստորև հարցերը կօգնեն բացահայտել արդյո՞ք կա որևէ պատճառ, որով
պայմանավորված այսօր պացիենտը COVID-19-ի դեմ պատվաստում չպետք է
ստանա:
Եթե պատասխանը «այո» է, դա չի նշանակում, որ պացիենտը չպետք է
պատվաստվի: Դա պարզապես նշանակում է, որ պացիենտին պետք է տրվեն
լրացուցիչ հարցեր:
._____________________________________________________________________.
| |Այո|Ոչ|Չգիտեմ|
|_______________________________________________________|___|__|______|
|1. Արդյո՞ք վատ եք զգում այսօր | | | |
|_______________________________________________________|___|__|______|
|2. Երբևէ COVID-19-ի դեմ պատվաստում ստացել եք | | | |
|_______________________________________________________|___|__|______|
|. Եթե այո, ապա նշեք պատվաստանյութի անվանումը | | | |
|_______________________________________________________|___|__|______|
|3. Երբևէ ալերգիա ունեցե՞լ եք (Ներառյալ` ծանր ալերգիկ | | | |
|ռեակցիա/անաֆիլակտիկ շոկ, որի կապակցությամբ ստացել եք | | | |
|ադրենալին կամ էպինեֆրին կամ EpiPenR կամ ուղեգրվել եք | | | |
|հիվանդանոց: Այն կարող է ներառել նաև 4 ժամվա ընթացքում | | | |
|առաջացած եղնջացան, այտուց, շնչառության խանգարում, խռպոտ| | | |
|շնչառություն:) | | | |
|_______________________________________________________|___|__|______|
|. COVID-19-ի պատվաստանյութ` ներառյալ ստորև նշվածներից | | | |
|որևէ մեկը. | | | |
|_______________________________________________________|___|__|______|
|- Պոլիէթիլեն գլիկոլ (PEG), որը պարունակվում է մի շարք | | | |
|դեղամիջոցներում, ինչպիսիք են, օրինակ լաքսատիվները կամ | | | |
|կոլոնոսկոպիայի նախապատրաստման դեղամիջոցները | | | |
|_______________________________________________________|___|__|______|
|- Պոլիսորբատ 80, որը պարունակվում է որոշ | | | |
|պատվաստանյութերում, թաղանթապատ հաբերում և ներերակային | | | |
|ստերոիդներում: | | | |
|_______________________________________________________|___|__|______|
|. COVID-19 պատվաստանյութի նախորդ դեղաչափ | | | |
|_______________________________________________________|___|__|______|
|. Պատվաստանյութ կամ այլ ներարկումային բուժում, որը | | | |
|պարունակում է բազմաթիվ բաղադրիչներ, որոնցից մեկը | | | |
|COVID-19 պատվաստանյութի բաղադրիչն է, բայց հայտնի չէ, | | | |
|թե որ բաղադրիչն է անմիջական ռեակցիայի պատճառը: | | | |
|_______________________________________________________|___|__|______|
|4. Երբևէ ալերգիա ունեցե՞լ եք այլ պատվաստանյութի | | | |
|նկատմամբ (ոչ COVID-19 պատվաստանյութ) կամ այլ ներարկվող | | | |
|դեղանյութի նկատմամբ | | | |
|(ներառյալ` ծանր ալերգիկ ռեակցիա/անաֆիլակտիկ շոկ, որի | | | |
|կապակցությամբ ստացել եք էպինեֆրին կամ EpiPenR կամ | | | |
|ուղեգրվել եք հիվանդանոց: Այն կարող է ներառել նաև 4 | | | |
|ժամվա ընթացքում առաջացած եղնջացան, այտուց, շնչառության | | | |
|խանգարում, խռպոտ շնչառություն:) | | | |
|_______________________________________________________|___|__|______|
|5. Երբևէ ծանր ալերգիկ ռեակցիա (օր.` անֆիլակտիկ շոկ) | | | |
|ունեցե՞լ եք այլ նյութերի նկատմամբ: Այն կարող է լինել | | | |
|սնունդ, կենդանիներ, թունավոր նյութեր, դեղորայք: | | | |
|_______________________________________________________|___|__|______|
|6. Վերջին 14 օրվա ընթացքում որևէ պատվաստում ստացե՞լ եք| | | |
|_______________________________________________________|___|__|______|
|7. Երբևէ COVID-19-ի ախտորոշման թեսթի դրական պատասխան | | | |
|ունեցել եք, կամ երբևէ բժիշկը Ձեզ ասել է, որ | | | |
|COVID-19-ով հիվանդ եք: | | | |
|_______________________________________________________|___|__|______|
|8. Ստացել եք պասիվ հակամարմինային բուժում (մոնոկլոնալ | | | |
|հակամարմիններ կամ առողջացածի շիճուկ, որպես COVID-19-ի | | | |
|բուժում) | | | |
|_______________________________________________________|___|__|______|
|9. Արդյո՞ք ունեք ՄԻԱՎ վարակ կամ քաղցկեղ, կամ արդյոք | | | |
|ստանում եք իմունոսուպրեսիվ դեղորայք կամ բուժում: | | | |
|_______________________________________________________|___|__|______|
|10. Ունե՞ք արյունահոսություն կամ ստանում եք արյունը | | | |
|նոսրացնող դեղամիջոցներ: | | | |
|_______________________________________________________|___|__|______|
|11. Հղի՞ եք, կերակրող մա՞յր եք | | | |
|_______________________________________________________|___|__|______|
|12. Ունե՞ք մաշկային խնդիրներ | | | |
._____________________________________________________________________.
_____________________ Ամսաթիվ
Ձև 2
COVID-19-Ի ԴԵՄ ՊԱՏՎԱՍՏՄԱՆ ՔԱՐՏ
._____________________________________________________________________.
| ՄԻ՛ ՄՈՌԱՑԵՔ ՊԱՏՎԱՍՏՎԵԼ COVID-19-Ի ԴԵՄ |
|_____________________________________________________________________|
| Պատվաստումից հետո սպասվող Ի՞նչ անել |
| հնարավոր երևույթներ` |
| . Ընդհանուր թուլություն . 38.5 oC և բարձր ջերմության |
| . Կարճատև գրիպանման երևույթներ դեպքում` ջերմիջեցնող |
| . Ջերմության բարձրացում . Ներարկման տեղի կարմրության կամ |
| . Մկանացավեր այտուցի դեպքում` դնել սառը թրջոց|
| . Հոդացավեր (ծորակի ջրով) |
| . Ներարկման տեղում` . Անհանգստության դեպքում` |
| ցավ, այտուց, կարմրություն ցավազրկող (ջերմիջեցնող) |
| . Եթե պատվաստումից հետո |
| ջերմությունը պահպանվում է 48 ժամ|
| և ավել, կամ առաջացել է |
| առողջական որևէ խնդիր` դիմել |
| բժշկի |
._____________________________________________________________________.
.___________________________________________________________________.
|ԱԱՀ ______________________________________________ |
|Name/Surname |
|___________________________________________________________________|
|Տարիք __________ Անձնագիր _____________________________ |
|Age Passport |
|________________________________________________________________ |
|1. Պատվաստանյութի անվանում` |
| Name of vaccine |
| __________________________________________________________ |
| Սերիա Պատվաստման ամսաթիվ |
| Batch No: Date vaccine given: |
|___________________________________________________________________|
|Հաջորդ պլանավորված այցի ամսաթիվ __________________________ |
|Second appointment date: |
|________________________________________________________________ |
|2. Պատվաստանյութի անվանում` |
| Name of vaccine |
| __________________________________________________________ |
| Սերիա Պատվաստման ամսաթիվ |
| Batch No: Date vaccine given: |
.___________________________________________________________________.
Ձև 3
ԱՆԱՖԻԼԱՔՍԻԱՅԻ ԱԽՏՈՐՈՇՄԱՆ ԿԼԻՆԻԿԱԿԱՆ ՉԱՓԱՆԻՇՆԵՐ ____________________________________
Ձև 4
ԱՆԱՖԻԼԱՔՍԻԱՅԻ ԱՆՀԵՏԱՁԳԵԼԻ ԲՈՒԺՕԳՆՈՒԹՅԱՆ ԸՆԹԱՑԱԿԱՐԳ ____________________________________
Ձև 5
ՀԱՃԱԽԱԿԻ ՀՆՉՈՂ ՀԱՐՑԵՐ ԵՎ ՊԱՏԱՍԽԱՆՆԵՐ ԿՈՐՈՆԱՎԻՐՈՒՍԱՅԻՆ ՀԻՎԱՆԴՈՒԹՅԱՆ (COVID-19) ԴԵՄ ՊԱՏՎԱՍՏՈՒՄՆԵՐԻ ՎԵՐԱԲԵՐՅԱԼ
1. Արդյո՞ք կա COVID-19-ի դեմ պատվաստվելու անհրաժեշտություն, եթե հիվանդացել եք COVID-19-ով և ապաքինվել:
Այո: Անկախ այն հանգամանքից, թե տվյալ անձը հիվանդացել է COVID-19-ով, թե ոչ, պատվաստումը պետք է իրականացվի` COVID-19-ի հետ կապված առողջական լուրջ ռիսկերի, ինչպես նաև կրկնավարակի հնարավոր լինելու պատճառով:
Ներկայում, դեռևս հայտնի չէ, թե որքան ժամանակ է պաշտպանված տվյալ անձը COVID-19-ով հիվանդանալուց և ապաքինվելուց հետո: Յուրաքանչյուր անձի մոտ վարակի հետևանքով առաջացած բնական իմունիտետը տարբեր է: Հիմնվելով որոշ վաղ հետազոտությունների վրա` կարելի է ենթադրել, որ բնական իմունիտետը երկար չի տևում:
2. Եթե պատվաստվենք, նորից պետք է դիմակ կրենք:
Այո, քանի որ պատվաստումը այս փուլում չի կանխում վիրուսի շրջանառությունը, այն կանխում է հիվանդության ծանր ձևերի առաջացումը և նվազեցնում է մահացությունը:
3. COVID-19-ով հիվանդանալուց հետո ինչքա՞ն ժամանակ պետք է անցնի, որպեսզի պատվաստվի անձը:
Հիվանդանալուց հետո անձը կարող է պատվաստվել վերջին ախտանիշներն անցնելուց 14 օր հետո:
4. Արդյոք պետք է հիվանդացած անձի հակամարմինները որոշվեն պատվաստելուց առաջ:
Պատվաստվելուց առաջ հակամարմիններ որոշելու անհրաժեշտություն չկա:
5. Ի՞նչ հակացուցումներ կան:
Հակացուցումները նույնն են, ինչպես բոլոր պատվաստումների դեպքում:
. Ծանր ալերգաբանական ռեակցիա (գերզգայուն) ակտիվ նյութի կամ պատվաստանյութի բաղադրիչներից որևէ մեկի նկատմամբ
. Միջին կամ ծանր ընթացքով ուղեկցվող սուր հիվանդություն: Այս դեպքում պատվաստումը պետք է հետաձգվի մինչև առողջացումը
. Թեթև հիվանդությունը պատվաստման համար հակացուցում չի:
6. Ի՞նչ երևույթներ են առաջանում պատվաստումից հետո:
Արտահայտվում են պատվաստմանը հաջորդող 3 օրերի ընթացքում, և անցնում են 1-3 օրվա ընթացքում` առանց բուժման
. Գլխացավեր,
. Կարճատև գրիպանման երևույթներ,
. Հոդացավեր,
. Մկանային ցավեր,
. Անհանգստություն, հոգնածություն, անսովոր թուլություն,
. Ներարկման տեղում ցավ, կարմրություն, այտուց, կոշտություն
7. Ովքե՞ր առաջնահերթ կպատվաստվեն COVID-19-ի դեմ
Առաջնահերթ կպատվաստվեն բուժաշխատողները, 65 տարեկան և բարձր տարիքի անձինք, 16-ից 64 տարեկան քրոնիկ հիվանդները, տարեցների խնամքի և պաշտպանության հաստատությունների շահառուները և աշխատակիցները, բնակչության սոցիալական պաշտպանության հաստատությունների աշխատակիցները:
8. Արդյո՞ք COVID-19-ի դեմ պատվաստանյութը կարող է առաջացնել կորոնավիրուսային հիվանդություն (COVID-19)
Ոչ: Ինչպես COVID-19-ի դեմ առկա պատվաստանյութերից, այնպես էլ մշակման փուլում գտնվող COVID-19-ի դեմ պատվաստանյութերից որևէ մեկը չի պարունակում կենդանի վիրուս: Ինչը նշանակում է, որ COVID-19-ի դեմ պատվաստանյութը չի կարող առաջացնել կորոնավիրուսային հիվանդություն (COVID-19):
9. Արդյո՞ք COVID-19-ի դեմ պատվաստվելու դեպքում COVID-19-ի ՊՇՌ ախտորոշիչ թեստի արդյունքները կլինեն դրական:
Ոչ: Ինչպես առկա COVID-19-ի դեմ պատվաստանյութերից, այնպես էլ մշակման փուլում գտնվող COVID-19-ի դեմ պատվաստանյութերից որևէ մեկով պատվաստվելու դեպքում ՊՇՌ թեստի արդյունքները չեն կարող լինել դրական:
Օրգանիզմի կողմից իմունային պատասխանի զարգացման դեպքում (ինչը հանդիսանում է պատվաստման նպատակը) հնարավոր է հակամարմինների որոշման թեստի դրական արդյունք: Հակամարմինների որոշման թեստը ցույց է տալիս, որ նախկինում ունեցել եք տվյալ վիրուսը և, որ, հավանաբար, որոշ չափով ունեք պաշտպանություն տվյալ վիրուսի նկատմամբ:
10. Արդյո՞ք COVID-19-ի դեմ պատվաստանյութը պաշտպանում է COVID-19-ից:
Այո: COVID-19-ի դեմ պատվաստանյութը վարժեցնում է իմունային համակարգը, որպեսզի այն ճանաչի և պայքարի կորոնավիրուսային հիվանդություն (COVID-19) առաջացնող վիրուսի դեմ:
11. Կարո՞ղ է արդյոք COVID-19-ի դեմ պատվաստանյութի ազդեցությամբ փոփոխվել ԴՆԹ-ն:
Ոչ: COVID-19-ի դեմ ՌՆԹ-պատվաստանյութը չի փոփոխում կամ որևէ կերպ չի առնչվում մարդու ԴՆԹ-ի հետ: ՌՆԹ-պատվաստանյութերը վարժեցնում են բջիջներին արտադրել սպիտակուց, որը խթանում է իմունային պատասխանը: COVID-19-ի դեմ ՌՆԹ-պատվաստանյութը չի ներթափանցում բջջի կորիզի մեջ, որտեղ և գտնվում է ԴՆԹ-ն, ինչը նշանակում է, որ ՌՆԹ-պատվաստանյութը չի կարող ազդել ԴՆԹ-ի վրա կամ որևէ կերպ առնչվել նրա հետ: COVID-19-ի դեմ ՌՆԹ-պատվաստանյութն աշխատում է օրգանիզմի բնական պաշտպանական համակարգի հետ, որպեսզի զարգացնի հիվանդության հանդեպ իմունային պատասխանը:
Արդյունքում, օրգանիզմը սովորում է պաշտպանվել հետագա վարակներից: Հենց իմունային պատասխանը և հակամարմինների արտադրությունն է պաշտպանում վարակներից, երբ իրական վիրուսը ներթափանցում է օրգանիզմ:
12. Ապահո՞վ է արդյոք COVID-19-ի դեմ պատվաստանյութը, եթե տվյալ անձը պլանավորում է երեխա ունենալ:
Այո: Կանայք, ովքեր պլանավորում են հղիանալ, կարող են պատվաստվել COVID-19-ի դեմ:
COVID-19-ի դեմ պատվաստանյութը, ինչպես նաև ցանկացած այլ պատվաստանյութ, վարժեցնում է օրգանիզմին, որպեսզի այն արտադրի հակամարմիններ, որոնք կպայքարեն COVID-19-ը առաջացնող վիրուսի դեմ, որն իր հերթին կպաշտպանի հետագա հիվանդությունից: Առկա չէ որևէ ապացույց, որ COVID-19-ի դեմ պատվաստումը հղիության, այդ թվում պլացենտայի ձևավորման հետ կապված որևէ խնդիր կարող է առաջացնել: Ի լրումն, չկա որևէ ապացույց, առ այն, որ անպտղություն հետ կապված խնդիրները, հանդիսանում են պատվաստանյութերի կողմնակի ազդեցություն: Հղիանալ պատրաստվող կամ մոտ ապագայում հղիություն պլանավորող կանայք կարող են պատվաստվել COVID-19-ի դեմ` առաջին իսկ հնարավորության դեպքում:
13. Արդյո՞ք կարելի է COVID-19-ի դեմ պատվաստանյութերը փոխարինել մեկը մյուսով:
Ոչ: COVID-19-ի դեմ պատվաստումները տվյալ անձի մոտ պետք է իրականացվեն նույն պատվաստանյութով, պատվաստանյութերը չեն կարող փոխարինվել մեկը մյուսով:
14. Ի՞նչ ընդմիջում է անհրաժեշտ պահպանել COVID-19-ի դեմ պատվաստման և այլ պատվաստումների միջև:
COVID-19-ի դեմ պատվաստման և այլ պատվաստումների միջև անհրաժեշտ է պահպանել 14 օր ընդմիջում:
15. Ե՞րբ կարող են նախկինում COVID-19-ի բուժման նպատակով COVID-19-ի հակամարմիններ ստացած անձինք պատվաստվել:
Նախկինում COVID-19-ի բուժման նպատակով COVID-19-ի հակամարմիններ ստացած անձանց պատվաստումն իրականացվում է հակամարմինների ստացումից առնվազն 90 օր հետո:
Ձև 6
ԿՈՐՈՆԱՎԻՐՈՒՍԱՅԻՆ ՀԻՎԱՆԴՈՒԹՅԱՆ (COVID-19) ԴԵՄ «ԿՈՐՈՆԱՎԱԿ» ՊԱՏՎԱՍՏԱՆՅՈՒԹՈՎ ՊԱՏՎԱՍՏՎԵԼՈՒ ՀԱՄԱՁԱՅՆՈՒԹՅԱՆ
Ես` ___________________________________________________________________
_______________________________________________________________________
սույնով հաստատում եմ, որ տեղեկացված եմ այն մասին, որ Հայաստանի Հանրապետությունում կորոնավիրուսային հիվանդության (COVID-19) դեմ «ԿորոնաՎակ» պատվաստանյութը նախատեսված է կիրառել 55 տարեկան և բարձր տարիքային խմբում` հետպատվաստումային անբարեհաջող լուրջ դեպքերի գրանցման հավանականությունը նվազեցնելու նպատակով:
Հաշվի առնելով վերոհիշյալը, սույն փաստաթղթով հաստատում եմ, որ համաձայն եմ կամավորության սկզբունքով պատվաստվելու կորոնավիրուսային հիվանդության (COVID-19) դեմ «ԿորոնաՎակ» պատվաստանյութով` 2 դեղաչափ սխեմայով, 4 շաբաթ ընդմիջումով:
_____________________ ___________________
Անուն, ազգանուն Ստորագրություն
Ամսաթիվ ___________