| ԻՐՏԵԿ |
Սույն ակտի ուժի մեջ մտնելու ամսաթիվը անհնար է որոշել, քանի որ ակտն ընդունող մարմնի կողմից չի կատարվել «Նորմատիվ իրավական ակտերի մասին» ՀՀ օրենքի 23-րդ հոդվածի 7-րդ մասի` ընդունող մարմնի պաշտոնական կայքէջում իրավական ակտի հրապարակման օրը նշելու պահանջը: |
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
31 հոկտեմբերի 2024 թվականի N 1715-Լ
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԴՐՈՇՄԱՎՈՐՄԱՆ ՓՈՐՁՆԱԿԱՆ ԾՐԱԳՐԻ ՇՐՋԱՆԱԿՈՒՄ ԴՐՈՇՄԱՎՈՐՄԱՆ ԵՆԹԱԿԱ ԱՊՐԱՆՔՆԵՐԻ ՑԱՆԿԸ ԵՎ ՑԱՆԿՈՒՄ ՆԵՐԱՌՎԱԾ ԱՊՐԱՆՔՆԵՐԻ ԴՐՈՇՄԱՎՈՐՄԱՆ ՓՈՐՁՆԱԿԱՆ ԾՐԱԳԻՐԸ ՀԱՍՏԱՏԵԼՈՒ ՄԱՍԻՆ
i
Հիմք ընդունելով Հայաստանի Հանրապետության Սահմանադրության 153-րդ հոդվածի 3-րդ մասը և Հայաստանի Հանրապետության հարկային օրենսգրքի 396.1-ին հոդվածի 2-րդ մասը` Հայաստանի Հանրապետության կառավարությունը որոշում է.
1. Հաստատել Հայաստանի Հանրապետությունում դրոշմավորման փորձնական ծրագրի շրջանակում դրոշմավորման ենթակա ապրանքների ցանկը` համաձայն N 1 հավելվածի:
2. Հաստատել Հայաստանի Հանրապետությունում սույն որոշման N 1 հավելվածով հաստատված ցանկում ներառված ապրանքների դրոշմավորման փորձնական ծրագիրը (այսուհետ ծրագիր)` համաձայն N 2 հավելվածի:
3. Սահմանել, որ`
1) ծրագրի իրականացման լիազոր մարմինը Հայաստանի Հանրապետության պետական եկամուտների կոմիտեն է.
2) ծրագիրը և ծրագրի արդյունքների գնահատումն իրականացվում են Հայաստանի Հանրապետության պետական եկամուտների կոմիտեի և «Հեռանկարային տեխնոլոգիաների զարգացման կենտրոն-Արմենիա» սահմանափակ պատասխանատվությամբ (Հայաստանի Հանրապետություն, քաղ. Երևան, Ե. Կողբացի 83, պետական գրանցման համարը` 269.110.1117158, հարկ վճարողի հաշվառման համարը` 02284645) ընկերության կողմից` սույն որոշումն ուժի մեջ մտնելու օրվանից մինչև այդ օրը ներառող ամսվան հաջորդող երրորդ ամսվա 1-ը` սույն որոշման N 1 հավելվածով հաստատված ցանկում ներառված ապրանքների համար.
3) Հայաստանի Հանրապետության պետական եկամուտների կոմիտեն սույն կետի 2-րդ ենթակետով սահմանված ժամկետի ավարտի օրվան հաջորդող տասնօրյա ժամկետում Հայաստանի Հանրապետության վարչապետի աշխատակազմ է ներկայացնում ծրագրի գնահատման արդյունքները:
Հայաստանի Հանրապետության
վարչապետ Ն. Փաշինյան
2024 թ. հոկտեմբերի
Երևան
Հավելված N 1
ՀՀ կառավարության
2024 թվականի հոկտեմբերի 31-ի
N 1715-Լ որոշման
ՑԱՆԿ
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԴՐՈՇՄԱՎՈՐՄԱՆ ՓՈՐՁՆԱԿԱՆ ԾՐԱԳՐԻ ՇՐՋԱՆԱԿՈՒՄ ԴՐՈՇՄԱՎՈՐՄԱՆ ԵՆԹԱԿԱ ԱՊՐԱՆՔՆԵՐԻ
1. Սույն որոշմամբ հաստատվող փորձնական ծրագրի շրջանակում ներառված ապրանքներն են`
._____________________________________________________________________.
|Հա- |Ծածկագիրն ըստ| Ապրանքախմբի անվանումը |Ապրանքախմբի |
|մարը |ԱՏԳ ԱԱ-ի | |համառոտ |
| | | |անվանումը |
|_____|_____________|____________________________________|____________|
|1) | 0207|ընտանի թռչունների միս և սննդային |միս |
| | |ենթամթերք` 0105 ապրանքային դիրքում | |
| | |դասակարգված, թարմ, պաղեցրած կամ | |
| | |սառեցրած | |
|_____|_____________|____________________________________|____________|
|2) | 0209|անյուղ մսից առանձնացված խոզի ճարպ և |միս |
| | |չհալեցրած կամ այլ եղանակով չստացած | |
| | |ընտանի թռչունների ճարպ` թարմ, պաղեց-| |
| | |րած, սառեցրած, աղ դրված, աղաջրի մեջ | |
| | |դրված, չորացրած կամ ապխտած | |
|_____|_____________|____________________________________|____________|
|3) | 0210|ընտանի թռչունների միս և մսից սննդա-|միս |
| | |յին ենթամթերք` աղ դրված, աղաջրի մեջ | |
| | |դրված, չորացրած կամ ապխտած. մսից կամ| |
| | |մսի սննդային ենթամթերքից ստացված | |
| | |մանր և խոշոր աղացվածքի ալյուր | |
|_____|_____________|____________________________________|____________|
|4) | 0901|սուրճ` բոված կամ չբոված, կոֆեինով |սուրճ |
| | |կամ առանց կոֆեինի, սուրճի կեղև և | |
| | |սուրճի հատիկների թաղանթ (պատյան), | |
| | |սուրճի փոխարինիչներ` ցանկացած համա- | |
| | |մասնությամբ սուրճ պարունակող | |
|_____|_____________|____________________________________|____________|
|5) | 0902|թեյ` համաբուրային հավելումներով կամ |թեյ |
| | |առանց դրանց | |
|_____|_____________|____________________________________|____________|
|6) |0903 00 000 0|մատե կամ պարագվայական թեյ |թեյ |
|_____|_____________|____________________________________|____________|
|7) | 1601 00|երշիկներ և մսից, մսային ենթամթերքից|պատրաստի |
| | |կամ արյունից պատրաստված համանման |սննդամթերք |
| | |մթերք. դրանց հիմքով պատրաստված պատ- | |
| | |րաստի սննդամթերք | |
|_____|_____________|____________________________________|____________|
|8) | 1603 00|լուծամզվածքներ և հյութեր մսից, ձկից|պատրաստի |
| | |կամ խեցգետնանմաններից, կակղամարմին- |սննդամթերք |
| | |ներից կամ ջրային այլ անողնաշարավոր- | |
| | |ներից | |
|_____|_____________|____________________________________|____________|
|9) | 1604310000|պատրաստի կամ պահածոյացված ձուկ, թա- |ձկնեղեն |
| | |ռափազգիների խավիար և դրա փոխարինիչ-| |
| | |ներ` պատրաստված ձկնկիթի հատիկներից | |
|_____|_____________|____________________________________|____________|
|10) | 1604320010|պատրաստի կամ պահածոյացված ձուկ, թա- |ձկնեղեն |
| | |ռափազգիների խավիար և դրա փոխարինիչ-| |
| | |ներ` պատրաստված ձկնկիթի հատիկներից | |
|_____|_____________|____________________________________|____________|
|11) | 2101|սուրճի, թեյի կամ մատեի (պարագվայական|սուրճ |
| | |թեյի) լուծամզուքներ, բնահյութեր և | |
| | |խտածոներ (կոնցենտրատներ) և պատրաստի| |
| | |մթերք` դրանց կամ սուրճի հիմքով, թեյի| |
| | |կամ մատեի (պարագվայական թեյի) հիմքով| |
| | |բոված եղերդ և սուրճի այլ բոված փո- | |
| | |խարինիչներ և դրանց լուծամզուքները, | |
| | |բնահյութերը և խտածոները | |
|_____|_____________|____________________________________|____________|
|12) | 2309|կենդանիներին կերակրելու համար օգտա- |մթերք |
| | |գործվող մթերք | |
|_____|_____________|____________________________________|____________|
|13) |2710 19 710 0|քսայուղեր, այլ յուղեր |նավթավե- |
| |2710 19 750 0| |րամշակման |
| |2710 19 820 0| |արտադրանք |
| |2710 19 860 0| | |
| |2710 19 880 0| | |
| |2710 19 920 0| | |
| |2710 19 940 0| | |
| |2710 19 980 0| | |
|_____|_____________|____________________________________|____________|
|14) | 2936|պրովիտամիններ, վիտամիններ |վիտամին |
|_____|_____________|____________________________________|____________|
|15) |3002 41 000 0|պատվաստանյութ` մարդու համար, մանրա- |պատվաստա- |
| | |ծախ առևտրի համար |նյութ |
|_____|_____________|____________________________________|____________|
|16) |3002 42 000 0|պատվաստանյութ` կենդանիների համար |պատվաստա- |
| | | |նյութ |
|_____|_____________|____________________________________|____________|
|17) | 3004|դեղամիջոց` թերապևտիկ և պրոֆիլակտիկ|դեղ |
| | |նպատակներով օգտագործման համար` փաթե-| |
| | |թավորված մանրածախ առևտրի համար, բա-| |
| | |ցառությամբ պետության կողմից կենտրո- | |
| | |նացված կարգով ձեռքբերվող և երաշխա- | |
| | |վորված կարգով տրամադրվող ինսուլինի | |
| | |կամ թմրամիջոցներ կամ հոգեմետ (հոգե- | |
| | |ներգործուն) նյութ պարունակող դեղերի,| |
| | |որոնց համար դրոշմապիտակով դրոշմավո- | |
| | |րում չի պահանջվում | |
|_____|_____________|____________________________________|____________|
|18) |3006 30 000 0|կոնտրաստային նյութեր` ռենտգենաբանա- |կոնտրաստային|
| | |կան հետազոտությունների համար, ախտո- |նյութեր |
| | |րոշիչ ռեագենտներ, որոնք նախատեսված | |
| | |են հիվանդներին բժշկական նպատակներով | |
| | |ներարկելու համար | |
|_____|_____________|____________________________________|____________|
|19) |3006 60 000 0|քիմիական հակաբեղմնավորիչներ, որոնք |հակաբեղմնա- |
| | |պատրաստված են հորմոնների, 2937 ապ- |վորիչներ |
| | |րանքային դիրքի այլ միացությունների | |
| | |կամ սպերմիցիդների հիման վրա | |
|_____|_____________|____________________________________|____________|
|20) | 3203 00|բուսական կամ կենդանական ծագում ունե-|ներկանյութեր|
| | |ցող ներկող նյութեր (ներառյալ ներկող | |
| | |լուծամզուքները, բացի կենդանական | |
| | |ածուխից)` որոշակի կամ անորոշ քիմիա- | |
| | |կան բաղադրության, տվյալ խմբի 3-րդ | |
| | |ծանոթագրության մեջ նշված բուսական | |
| | |կամ կենդանական ծագում ունեցող ներկող| |
| | |նյութերի հիմքով պատրաստված պատրաս- | |
| | |տուկներ | |
|_____|_____________|____________________________________|____________|
|21) | 3204|օրգանական սինթետիկ ներկող նյութեր` |ներկանյութեր|
| | |որոշակի կամ անորոշ քիմիական բաղա- | |
| | |դրության, պատրաստուկներ` պատրաստված | |
| | |տվյալ խմբի 3-րդ ծանոթագրության մեջ | |
| | |նշված օրգանական սինթետիկ ներկող | |
| | |նյութերի հիմքով, օրգանական սինթետիկ | |
| | |արտադրանք, որն օգտագործվում է որպես | |
| | |օպտիկական սպիտակեցնող նյութ կամ | |
| | |լյումինաֆոր` որոշակի կամ անորոշ | |
| | |քիմիական բաղադրության | |
|_____|_____________|____________________________________|____________|
|22) |3205 00 000 0|գունավոր լաքեր, տվյալ խմբի 3-րդ ծա- |լաքեր |
| | |նոթագրության մեջ նշված գունավոր լա- | |
| | |քերի հիմքով պատրաստուկներ | |
|_____|_____________|____________________________________|____________|
|23) | 3206|ներկող այլ նյութեր, տվյալ խմբի 3-րդ |ներկանյութեր|
| | |ծանոթագրության մեջ նշված և 3203, | |
| | |3204 կամ 3205 ապրանքային դիրքերում | |
| | |ընդգրկված պատրաստուկներից տարբեր | |
| | |պատրաստուկներ, որպես լյումինաֆոր օգ-| |
| | |տագործվող անօրգանական արտադրանք` | |
| | |որոշակի կամ անորոշ քիմիական | |
| | |բաղադրության | |
|_____|_____________|____________________________________|____________|
|24) |3207 10 000 0|պատրաստի գունանյութեր, ապակու պատ- |ներկանյութեր|
| | |րաստի պղտորիչներ և պատրաստի ներկեր | |
| | |և համանման պատրաստուկներ | |
|_____|_____________|____________________________________|____________|
|25) | 3208|ներկեր և լաքեր (ներառյալ արծնները |ներկանյութեր|
| | |և ողորկալաքերը)` սինթետիկ պոլիմեր- | |
| | |ների կամ քիմիապես վերափոխված բնական | |
| | |պոլիմերների հիմքով` ոչ ջրային միջա- | |
| | |վայրում դիսպերսված կամ լուծված, տվ- | |
| | |յալ խմբի 4-րդ ծանոթագրության մեջ | |
| | |նշված լուծույթներ | |
|_____|_____________|____________________________________|____________|
|26) | 3209|ներկեր և լաքեր (ներառյալ արծնները |ներկանյութեր|
| | |և ողորկալաքերը)` սինթետիկ պոլիմեր- | |
| | |ների կամ քիմիապես վերափոխված բնական | |
| | |պոլիմերների հիմքով` ջրային միջավայ- | |
| | |րում դիսպերսված կամ լուծված | |
|_____|_____________|____________________________________|____________|
|27) | 3210 00|այլ ներկեր և լաքեր (ներառյալ արծն- |ներկանյութեր|
| | |ները, ողորկալաքերը և սոսնձային ներ-| |
| | |կերը), պատրաստի ջրային գունանյութեր`| |
| | |կաշվի մշակման համար օգտագործվող | |
|_____|_____________|____________________________________|____________|
|28) |3211 00 000 0|պատրաստի չորարարներ |չորարարներ |
|_____|_____________|____________________________________|____________|
|29) | 3212|գունանյութեր (ներառյալ մետաղական փո-|գունանյութեր|
| | |շիներ և փաթիլներ)` ոչ ջրային միջա- | |
| | |վայրում դիսպերսված, հեղուկ կամ մա- | |
| | |ծուկանման, որոնք օգտագործվում են | |
| | |ներկերի արտադրության մեջ (ներառյալ | |
| | |արծնները), փայլաթիթեղ` դրոշմատպման | |
| | |համար, ներկանյութեր և ներկող այլ | |
| | |նյութեր` բաժնեծրարված կամ փաթեթավոր-| |
| | |մամբ` մանրածախ վաճառքի համար | |
|_____|_____________|____________________________________|____________|
|30) | 3303 00|օծանելիք, հարդաջուր |օծանելիք |
|_____|_____________|____________________________________|____________|
|31) |3403 19 100 0|քսայուղեր, այլ յուղեր |նավթավե- |
| |3403 19 900 0| |րամշակման |
| |3403 99 000 0| |արտադրանք |
._____________________________________________________________________.
Հավելված N 2
ՀՀ կառավարության
2024 թվականի հոկտեմբերի 31-ի
N 1715-Լ որոշման
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՊՐԱՆՔՆԵՐԻ ԴՐՈՇՄԱՎՈՐՄԱՆ ՓՈՐՁՆԱԿԱՆ ԾՐԱԳԻՐԸ
1. ՆԵՐԱԾՈՒԹՅՈՒՆ
1. Սույն ծրագրի նպատակն է` կիրառելով ժամանակակից տեխնոլոգիաները և մեթոդները` Հայաստանի Հանրապետությունում (այսուհետ` ՀՀ) ստեղծված թվային համակարգի միջոցով ավելի արդյունավետ դարձնել շրջանառվող ապրանքների հետագծելիությունը և վերահսկողությունը, որը գործում է Եվրասիական տնտեսական միության (այսուհետ` ԵԱՏՄ) օրենսդրությանը և կարգավորումներին համապատասխան, որն ինտեգրված է ԵԱՏՄ երկրների համանման համակարգերի հետ և հարթակ է ծառայում լրացուցիչ Ջի2Բի և Բի2Բի (G2B և B2B) թվային ծառայությունների զարգացմանը:
2. ԾՐԱԳՐԻ ԻՐԱԿԱՆԱՑՄԱՆ ԱՆՀՐԱԺԵՇՏՈՒԹՅՈՒՆԸ
2. Դրոշմապիտակների և դրոշմանիշների վերագրման, հաշվառման էլեկտրոնային համակարգը ՀՀ-ում ներդրվել է 2014 թվականից: Այդ ժամանակ պարտադիր դրոշմավորման ենթակա ապրանքները եղել են թվով 20-ը: Տարիների ընթացքում ավելացել է դրոշմավորման ենթակա ապրանքների քանակը` հասնելով 111 տեսակի: Սակայն, ներկայումս կիրառվող մոդելը ունի որոշակի սահմանափակումներ: Ապրանքի հետագծելիությունը ապրանքի ներմուծումից կամ արտադրումից մինչև վերջնական սպառում վերոնշյալ մոդելի կիրառմամբ հնարավոր չէ ապահովել, քանի որ ապրանքի իրացման դեպքում տվյալները լիարժեք չեն փոխանցվում ՀՀ պետական եկամուտների կոմիտե (այսուհետ` ՊԵԿ)` հսկիչ դրամարկղային մեքենաների (այսուհետ` ՀԴՄ) և հարկային հաշիվների էլեկտրոնային համակարգի միջոցով: ՊԵԿ են փոխանցվում իրացված ապրանքների վերաբերյալ տվյալներ, սակայն դրոշմավորման վերաբերյալ տվյալները բացակայում են: Դրոշմապիտակների կոդերի գեներացման տրամաբանությունը անհասանելի է, ուստի այն չի կարող օգտագործվել ապրանքների իրացման ժամանակ ՊԵԿ տվյալների փոխանցման համար:
3. 2018 թվականի փետրվարի 2-ին Ալմաթիում ԵԱՏՄ երկրների կառավարությունների ղեկավարների կողմից ստորագրվել է «ԵԱՏՄ նույնականացման միջոցներով ապրանքների դրոշմավորման մասին» համաձայնագիրը: Համաձայնագրի հիմնական խնդիրը ԵԱՏՄ ամբողջ տարածքում մեքենայաընթեռնելի և միմյանց հետ փոխկապակցված նշաններով ապրանքների դրոշմավորման գործընթացների միասնականացումն է: Այս դեպքում անհրաժեշտություն է առաջանում դրոշմավորել արտահանվող ապրանքները ԵԱՏՄ օրենսդրությանը համապատասխան, սակայն ներկայիս համակարգը թույլ չի տալիս դա իրագործել:
3. ԾՐԱԳՐԻ ՀԻՄՆԱԿԱՆ ՆՊԱՏԱԿՆ ՈՒ ԽՆԴԻՐՆԵՐԸ
4. Ծրագրի հիմնական նպատակն է տեխնոլոգիական նոր լուծումների կիրառմամբ ՀՀ-ում ներդրված ապրանքների շրջանառության հետագծելիության էլեկտրոնային համակարգի միջոցով ունենալ շուկայում շրջանառվող ապրանքների նկատմամբ ճշգրիտ և իրատեսական պատկեր և խոչընդոտել անորակ և կեղծ ապրանքների տարածումը, ինչը լուրջ խնդիր է ինչպես սպառողների, այնպես էլ արտադրողների համար:
5. Ներկայումս առկա խնդիրներն են`
1) հարկ վճարողի կողմից իրացված ապրանքների վերաբերյալ ՊԵԿ փոխանցված տեղեկատվության մեջ ոչ միշտ է հնարավոր իրականացնել վաճառված ապրանքների նույնականացում: Հատկապես դա վերաբերում է տեխնիկական հագեցվածություն չունեցող մանրածախ առևտրի կետերին.
2) չի ապահովվում ապրանքների շրջանառության ամբողջ շղթայի լիարժեք հետագծելիությունը.
3) ԵԱՏՄ անդամ պետություններ արտահանողների համար գործող դրոշմապիտակները չեն կարող օգտագործվել: Այս դեպքում անհրաժեշտություն է առաջանում դրոշմավորել արտահանվող ապրանքները ԵԱՏՄ օրենսդրության համաձայն, և կարող է տեղի ունենալ կրկնակի դրոշմավորում, եթե արտադրության ժամանակ չի առանձնացվում արտահանման համար նախատեսված ապրանքը, որը ևս լրացուցիչ դժվարություն է հարկ վճարողի համար.
4) ներկայիս դրոշմապիտակների վրա առկա 2D կոդի գեներացիայի տրամաբանությունը պատկանում է մասնավոր ընկերության և չի փոխանցվում ՊԵԿ: Այդ իսկ պատճառով ՊԵԿ-ը անհրաժեշտության դեպքում այլ ընկերությունների կամ սեփական ուժերի միջոցով հնարավորություն չունի փոփոխություններ իրականացնելու առկա ծրագրում կամ ստեղծելու նոր բջջային հավելված:
6. Ծրագրի իրագործմամբ առաջադրվում են մի շարք նպատակներ`
1) պետության համար`
ա. ստվերի նվազեցում և բիզնես միջավայրի առավել թափանցելիություն,
բ. լրացուցիչ հարկային եկամուտներ,
գ. ապրանքային շուկաների վերահսկման համար բյուջետային ծախսերի կրճատում,
դ. իրական ժամանակում վիճակագրական տվյալների առկայություն` երկրի կտրվածքով,
ե. ԵԱՏՄ երկրների վերահսկող մարմինների համագործակցության ավտոմատացում և համակարգում.
2) բիզնեսի համար`
ա. թափանցիկ միջավայրում գործող մասնակիցների մրցունակության աճ` ստվերի կրճատման հաշվին,
բ. ՀՀ-ում գործող կարգավորումները ԵԱՏՄ կանոնակարգերի հետ ներդաշնակեցնելու արդյունքում պարզեցվելու է ապրանքների շրջանառությունը ԵԱՏՄ տարածքում,
գ. թվայնացման արդյունքում լոգիստիկ շղթայում ապրանքների տեղափոխման վերաբերյալ լրացուցիչ ծառայությունների մատուցման հնարավորության ստեղծում.
3) սպառողների համար`
ա. կեղծ և անորակ ապրանքների շրջանառության սահմանափակման արդյունքում քաղաքացիների կյանքի և առողջության պաշտպանություն,
բ. հասարակական վերահսկողություն,
գ. սպառողների իրավունքների պաշտպանություն:
7. Ծրագրի իրականացումը նպատակ է հետապնդում ՀՀ-ում ստեղծել թվային էկոհամակարգ, որը ներդաշնակ ինտեգրված կլինի ԵԱՏՄ երկրների տնտեսության հետ և կծառայի ՀՀ-ում շրջանառվող ապրանքների քանակի և որակի իրական ժամանակում վերահսկողությանը (real-time trace and control): Ինչպես նաև համակարգը կնպաստի թվային տնտեսության հետագա զարգացմանը` հնարավորություն տալով ինտեգրվելու նաև այլ Ջի2Բի և Բի2Բի (G2B և B2B) էլեկտրոնային ծառայությունների հետ, օրինակ` էլեկտրոնային հարկային հաշիվներ, ռիսկերի գնահատում, շուկայի գնահատում, ապահովագրություն և այլն:
4. ԾՐԱԳՐԻ ՆԿԱՐԱԳԻՐԸ
8. Տեղեկատվական տեխնոլոգիաների զարգացման ներկայիս մակարդակը թույլ է տալիս ինչպես ավելի բարձր մակարդակով իրականացնել հետագծելիության և վերահսկողության գործառույթները, այնպես էլ համապատասխանեցնել այդ գործառույթները ԵԱՏՄ օրենսդրությանը և ինտեգրել հայկական թվային լուծումները ԵԱՏՄ երկրների համակարգերի հետ:
9. Տվյալ ծրագիրը ՀՀ-ում Ապրանքների դրոշմավորման ավտոմատացված տեղեկատվական համակարգի (ԱԴԱՏՀ) արդիականացում է, որը կապահովի տվյալ որոշումով նախատեսվող ապրանքների շրջանառության հետագծելիությունը շրջանառության բոլոր փուլերում:
10. Ծրագրի իրականացման հիմք են հանդիսացել`
1) «Եվրասիական տնտեսական միությունում նույնականացման միջոցներով ապրանքների դրոշմավորման մասին» համաձայնագիրը` ստորագրված 2018 թվականի փետրվարի 2-ին.
2) Եվրասիական տնտեսական հանձնաժողովի խորհրդի 2021 թվականի մարտի 5-ի N 19 որոշումը «Եվրասիական տնտեսական միությունում նույնականացման միջոցներով ապրանքների դրոշմավորման համակարգի բազային տեխնոլոգիական կազմակերպական մոդելի մասին»:
11. Ապրանքների դրոշմավորման ավտոմատացված համակարգը իրենից ներկայացնում է կենտրոնացված տեղեկատվական ռեսուրս, որն ապահովում է նույնականացման միջոցներով դրոշմավորման ենթակա, հետագա օգտագործման և վերահսկման նպատակներով ՀՀ տարածքում արտադրված, ներմուծված և իրացված ապրանքների մասին տեղեկատվություն:
12. Ապրանքների դրոշմավորումը իրականացվելու է ապրանքի հատուկ տվյալների մատրիցային Data Matrix կոդով մակնշման միջոցով: Թվային դրոշմավորման ծածկագիրը չկեղծվող է, ունիկալ և չկրկնվող ապրանքների յուրաքանչյուր միավորի համար: Դրոշմավորման ծածկագրերը արտադրողներին և ներմուծողներին տրամադրելու է Հայաստանի Հանրապետության կառավարության 2022 թվականի մարտի 10-ի N 312-Լ որոշմամբ սահմանված` Եվրասիական տնտեսական միության շրջանակներում նույնականացման միջոցներով ապրանքների դրոշմավորման ազգային օպերատորը (այսուհետ` ազգային օպերատոր)` թվային եղանակով:
13. Ապրանքների հետագծելիությունը հիմնվում է ապրանքի միավորների կամ ապրանքների խմբաքանակի եզակի նույնականացման իրականացման վրա, ինչն ապահովում է միավորի կամ բեռների շարժի հետագծելիությունը բաշխման ամբողջ շղթայով` շրջանառության մեջ մտնելուց (արտադրություն կամ ներմուծում) մինչև շրջանառությունից դուրս գալը (վաճառք, արտադրական նպատակով օգտագործում, արտահանում կամ ոչնչացում): Այսպիսով, յուրաքանչյուր ապրանքի վերաբերյալ տեղեկատվությունը հասանելի է դառնում իրական ժամանակում շրջանառության բոլոր փուլերում:
14. ԱԴԱՏՀ-ի փոխգործակցությունը ապրանքների շրջանառության մասնակիցների տեղեկատվական համակարգերի հետ պետք է իրականացվի տեղեկատվական էլեկտրոնային ծառայությունների միջոցով` օգտագործելով պրոտոկոլներ և էլեկտրոնային փոխազդեցության միջերեսներ, որոնց վերաբերյալ տեղեկատվությունը օպերատորի կողմից տեղադրվում է ինտերնետում օպերատորի պաշտոնական կայքում:
15. Բջջային հավելվածը, որի ստեղծումը նույնպես մտնում է սույն ծրագրի շրջանակների մեջ, սպառողներին կօգնի հեշտությամբ ստուգել ապրանքի ծագման օրինականությունը և ունենալ ապրանքի վերաբերյալ ողջ տեղեկատվությունը` այսպիսով սահմանելով որակի նկատմամբ հասարակական անուղղակի վերահսկողություն:
16. Ապրանքների դրոշմավորման ավտոմատացված տեղեկատվական համակարգը ինտեգրվելու է հետևյալ էլեկտրոնային համակարգերին`
1) ՊԵԿ-ի տեղեկատվական համակարգ.
2) Էլեկտրոնային կառավարման ենթակառուցվածքների ներդրման գրասենյակի (ԷԿԵՆԳ) տեղեկատվական համակարգ.
3) այլ պետական համակարգերի հետ` ըստ անհրաժեշտության:
17. Ապրանքների շրջանառության մասնակիցների` այլ պետական տեղեկատվական համակարգերի և տեղեկատվական համակարգերի հետ ԱԴԱՏՀ-ի տեղեկատվական փոխգործակցությունը կիրականացվի ՀՀ կառավարության սահմանած կարգով:
18. Փորձնական ծրագրի ընթացքը հնարավորություն կընձեռի իրականացնելու`
1) նույնականացման միջոցներով ապրանքների դրոշմավորման մեխանիզմների և տեղեկատվական համակարգի ֆունկցիոնալության (գործառույթների) փորձարկումը և գործընթացի հղկումը.
2) ծրագրի մասնակիցների արդյունավետ փոխգործակցության կազմակերպումը.
3) ծրագրի մասնակիցների տեղեկատվական համակարգերի ինտեգրումը և փորձարկումը օպերատորի տեղեկատվական համակարգի հետ.
4) դրոշմավորման ենթակա ապրանքների ապրանքաշրջանառության ամբողջ ցիկլի (դրոշմապիտակ պատվիրելուց մինչև շրջանառությունից դուրս գալը) գործառույթների փորձարկումը և կարգավորումը:
5. ԾՐԱԳՐԻ ՄԱՍՆԱԿԻՑՆԵՐԸ ԵՎ ԿՈՂՄԵՐԻ ՊԱՏԱՍԽԱՆԱՏՎՈՒԹՅՈՒՆՆԵՐԸ
19. Ծրագրի մասնակիցներն են հանդիսանում`
1) ՊԵԿ-ը և այլ պետական մարմիններ, որոնք լիազորված են ծրագիրն իրականացնելու համար.
2) ապրանքաշրջանառության մասնակիցները.
3) տեղեկատվական համակարգի օպերատորը:
20. Ապրանքաշրջանառության մասնակիցները փորձնական ծրագրին մասնակցում են կամավոր հիմունքներով:
21. Ծրագրի իրականացման լիազորված մարմինը ՊԵԿ-ն է, որը կապահովի`
1) ազգային օպերատորի հետ աշխատանքների համակարգումը.
2) ազգային օպերատորի հետ համատեղ փորձնական ծրագրի պլանի, ժամանակացույցի և մեթոդական առաջարկությունների մշակումը և հաստատումը.
3) փորձնական ծրագրի արդյունքների գնահատումը և ՀՀ կառավարություն ներկայացնելը:
22. Ազգային օպերատորը կապահովի`
1) տեղեկատվական համակարգի պահանջների մշակումը.
2) համակարգի տեղեկատվական անվտանգության պահանջների մշակումը.
3) տեղեկատվական համակարգի ներդրումը և շահագործումը.
4) ծրագրի մասնակիցներին փորձնական ծրագրի շրջանակներում անհրաժեշտ քանակությամբ նույնականացման միջոցների տրամադրումը` անհատույց սկզբունքով:
6. ԾՐԱԳՐԻ ԻՐԱԿԱՆԱՑՈՒՄԻՑ ԱԿՆԿԱԼՎՈՂ ԱՐԴՅՈՒՆՔՆԵՐԸ
23. Որպես ծրագրի իրականացման արդյունք ակնկալվում է հետևյալը`
1) պետական բյուջեի ծախսերի կրճատում.
2) հայկական արտահանողների կողմից ԵԱՏՄ այլ երկրների օպերատորներին դրոշմապիտակների համար վճարվելիք գումարը այսուհետ կվճարվի հայկական տնտեսավարողներին և իր դրական ազդեցությունը կունենա ՀՀ տնտեսության վրա.
3) ունենալ մեկ դրոշմապիտակի ձև ամբողջ ԵԱՏՄ-ի համար, ինչը զգալիորեն կպարզեցնի ապրանքների արտադրման գործընթացը.
4) համակարգի ինտեգրումը համապատասխան պետական մարմինների հետ կապահովի ապրանքների շրջանառության ամբողջ ցիկլի վերահսկումը` արտադրությունից (կամ ներմուծումից) մինչև սպառում.
5) ապրանքների նույնականացում և, հետևաբար, շրջանառության վերահսկում մինչև մեկ հատի ճշտությամբ.
6) ապրանքների իսկության վերահսկում հանրության կողմից` հատուկ բջջային հավելվածի միջոցով.
7) հնարավոր կլինի շատ ավելի ճշգրիտ գնահատել շրջանառվող ապրանքների քանակը և, հետևաբար, զգալիորեն նվազեցնել ստվերը:
7. ԾՐԱԳՐԻ ՌԻՍԿԵՐԸ
24. Ինչպես ցանկացած ծրագիր, այս ծրագիրը նույնպես պարունակում է որոշակի ռիսկ: Հնարավոր է, որ որոշ արտադրող կամ ներմուծող կազմակերպությունների համար տեխնիկական վերազինման անհրաժեշտություն լինի:
25. Չնայած նշված ռիսկին` կանխատեսվող դրական ազդեցությունը ՀՀ տնտեսության վրա զգալիորեն գերազանցում է ակնկալվող ծախսերը` հատկապես երկարաժամկետ հեռանկարում:
8. ԾՐԱԳՐԻ ԻՐԱԿԱՆԱՑՄԱՆ ՀԱՄԱՐ ԱՆՀՐԱԺԵՇՏ ԾԱԽՍԵՐԸ
26. ՀՀ պետական բյուջեից ֆինանսավորում չի նախատեսվում:
27. ՊԵԿ էլեկտրոնային կառավարման համակարգերում ծրագրի իրականացման նպատակով կատարվող փոփոխությունները լրացուցիչ ֆինանսական միջոցների պահանջ չեն առաջացնելու:
28. Ծրագրի իրականացման ընթացքում դրոշմանիշների տրամադրման հետ կապված ծախսերը իրականացնելու է օպերատորը: