ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ
20 փետրվարի 2021 թվականի N 156
ՄԻԿՐՈՁԵՌՆԱՐԿԱՏԻՐՈՒԹՅԱՆ ՍՈՒԲՅԵԿՏ ՀԱՄԱՐՎՈՂ ԱՆՀԱՏ ՁԵՌՆԱՐԿԱՏԻՐՈՋ ՀԱՄԱՐ ԱՌԱՋԱՑՈՂ ՍՈՑԻԱԼԱԿԱՆ ՎՃԱՐՆԵՐԻ ՎԵՐԱԲԵՐՅԱԼ
Հարց
Միկրոձեռնարկատիրության սուբյեկտ համարվող անհատ ձեռնարկատերը համարվու՞մ է սոցիալական վճար վճարող, և այդպիսին համարվելու դեպքում հարկման ի՞նչ դրույքաչափ է գործում և ո՞րն է հարկման բազան:
Պատասխան
«Կուտակային կենսաթոշակների մասին» օրենքի`
i
2-րդ հոդվածի 1-ին մասի 2-րդ կետին համապատասխան` անհատ ձեռնարկատեր է համարվում «Անհատ ձեռնարկատիրոջ մասին» ՀՀ օրենքով սահմանված անհատ ձեռնարկատերը, բացառությամբ ՀՀ հարկային օրենսգրքով սահմանված` բացառապես միկրոձեռնարկատիրության սուբյեկտ համարվող անհատ ձեռնարկատերերի,
i
- 2-րդ հոդվածի 1-ին մասի 9-րդ կետին համապատասխան` ինքնազբաղված անձ է համարվում նաև բացառապես միկրոձեռնարկատիրության սուբյեկտ համարվող անհատ ձեռնարկատերը,
i
- 5-րդ հոդվածի 1-ին մասի 3-րդ կետի համաձայն` ՀՀ-ում սոցիալական վճարներ են կատարում ինքնազբաղված անձինք` անկախ տարիքից, ովքեր նույն օրենքով սահմանված կարգով ներկայացրել են կենսաթոշակային ֆոնդի ընտրության դիմում կամ նույն մասի 1-ին կետի հիման վրա երբևիցե կատարել են սոցիալական վճար,
i
- 5-րդ հոդվածի 8-րդ մասի համաձայն` անձը, որպես ինքնազբաղված անձ, ստացված եկամուտներից սոցիալական վճար կատարում է կամավորության սկզբունքով, նույն օրենքի 7-րդ հոդվածի 4-րդ մասով սահմանված կարգով (ինքնուրույն հաշվարկում և փոխանցում է սոցիալական վճարները տարեկան կտրվածքով` ՀՀ հարկային օրենսգրքով եկամտային հարկի վճարման համար սահմանված ժամկետներում),
i
- 6-րդ հոդվածի 1-ին մասի 3-րդ կետի, 2-րդ մասի 4-րդ կետի, ինչպես նաև 3-րդ մասի 1-ին կետի համաձայն` ինքնազբաղված անձանց համար սոցիալական վճարի հաշվարկման օբյեկտը հանդիսանում է որպես ինքնազբաղված անձ ստացված եկամուտները: Որպես ինքնազբաղված անձ` ստացված եկամուտներից սոցիալական վճարը կատարվում է 5% դրույքաչափով, անկախ եկամտի չափից:
Հաշվի առնելով վերոնշյալը, հայտնում ենք, որ «Կուտակային կենսաթոշակների մասին» ՀՀ օրենքի համաձայն` բացառապես միկրոձեռնարկատիրության սուբյեկտ համարվող անհատ ձեռնարկատերը համարվում է ինքնազբաղված անձ, որն ինքնազբաղվածությունից ստացված ամբողջ եկամուտներից սոցիալական վճարը կատարում է 5% դրույքաչափով կամավորության սկզբունքով:
ՀՀ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ