(ուժը կորցրել է 22.02.01 թիվ 129 որոշում)
i
040.0148.090398
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀԻ ՊԱՇՏՈՆԱԿԱՏԱՐ Ռ. ՔՈՉԱՐՅԱՆ
«9» մարտի 1998թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ
ՈՐՈՇՈՒՄ
9 մարտի 1998 թ. թիվ 148
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՐԻՔԱՎՈՐ ՈՒՍԱՆՈՂՆԵՐԻ ԵՎ ԵՐԻՏԱՍԱՐԴ ԳԻՏՆԱԿԱՆՆԵՐԻ ԲՆԱԿԱՐԱՆԱՅԻՆ ՊԱՅՄԱՆՆԵՐԻ ԲԱՐԵԼԱՎՄԱՆ ՄԻՋՈՑԱՌՈՒՄՆԵՐԻ ՄԱՍԻՆ
Հայաստանի Հանրապետությունում բնակելի տարածության կարիք ունեցող և սոցիալապես անապահով ուսանողների և երիտասարդ գիտնականների բնակարանային պայմանների բարելավման նպատակով Հայաստանի Հանրապետության կառավարությունը որոշում է.
1. Թույլատրել Հայաստանի Հանրապետության կրթության և գիտության նախարարության «Նոր Նորք» ուսանողական ավանի վարչական և ասպիրանտների հանրակացարանների շենքերի վերափոխումն ու հարմարեցումը բնակարանային ֆոնդի` ուսանողներին և երիտասարդ գիտնականներին համապատասխանաբար որպես հանրակացարան ու բնակարան տրամադրելու նպատակով:
2. Հայաստանի Հանրապետության կրթության և գիտության նախարարությանը`
ա) ձեռնարկել համապատասխան միջոցներ նշված շենքերի` որպես բնակարանային ֆոնդ սահմանված կարգով հաստատված նախագծային փաստաթղթերի հիման վրա վերակառուցման հարմարեցման և նպատակային օգտագործման համար.
բ) Հայաստանի ուսանողության հանրապետական խորհրդի հետ համատեղ ապահովել հանրակացարանների և բնակարանների տրամադրումն առավել կարիքավոր ուսանողներին և երիտասարդ գիտնականներին:
3. Սույն որոշումն ուժի մեջ է մտնում 1998 թվականի մարտի 9-ից: