040.1679.131204
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«13» դեկտեմբերի 2004 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
2 դեկտեմբերի 2004 թվականի N 1679-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2003 ԹՎԱԿԱՆԻ ԴԵԿՏԵՄԲԵՐԻ 11-Ի N 1673-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ՄԱՍԻՆ
Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2003 թվականի դեկտեմբերի 11-ի «Փոքր և միջին ձեռնարկատիրությանը պետական աջակցության 2004 թվականի ծրագիրը հաստատելու մասին» N 1673-Ն որոշման մեջ կատարել հետևյալ փոփոխությունները`
որոշմամբ հաստատված փոքր և միջին ձեռնարկատիրությանը պետական աջակցության 2004 թվականի ծրագրի`
i
ա) III գլխի 1.2-րդ ենթակետը շարադրել հետևյալ բովանդակությամբ նոր խմբագրությամբ.
«1.2. Բիզնես ինկուբատորի ստեղծման ծրագրի մշակում
Միջազգային փորձը ցույց է տալիս, որ ձեռնարկատիրության, մասնավորապես, ՓՄՁ-ի պետական աջակցության առավել արդյունավետ և հեռանկարային ուղղություններից է բիզնես ինկուբատորների ստեղծումը` հատկապես տնտեսական զարգացման ցածր մակարդակ ունեցող տարածաշրջաններում:
Բիզնես ինկուբատորները նոր ստեղծվող և զարգացող ՓՄՁ-ի սուբյեկտներին տրամադրում են տարածք և կենտրոնացված գործարար ծառայություններ, շուկայական ենթակառուցվածքներից օգտվելու առավել բարենպաստ պայմաններ և տեխնիկական այլ աջակցություն:
Բիզնես ինկուբատորներում ընդգրկված ՓՄՁ-ի սուբյեկտների համար ստեղծվում են նպաստավոր պայմաններ և միացյալ ուժերով գործելու հնարավորություն, ինչն զգալիորեն հեշտացնում է դրանց կայացումն ու հետագա արդյունավետ գործունեությունը:
Գործարար աջակցության նման մեխանիզմի կիրառմանը կարող են օժանդակել տեղական ինքնակառավարման մարմինները` բիզնես ինկուբատորի ստեղծման համար տրամադրելով չօգտագործվող տարածքները` դրանով իսկ նպաստելով մարզային և համայնքային ՓՄՁ-ի սուբյեկտների միջև կոոպերացիայի զարգացմանը:
Ծրագրով նախատեսվում է 2004 թվականի ընթացքում իրականացնել բիզնես ինկուբատորի ստեղծման նախապատրաստական աշխատանքներ` մշակել բիզնես ինկուբատորի ստեղծման ծրագիրը».
i
բ) հավելվածի փոքր և միջին ձեռնարկատիրությանը պետական աջակցության 2004 թվականի ծրագրի իրականացման միջոցառումների ցանկի 2-րդ կետում «Որպես ՓՄՁ-ի սուբյեկտներին աջակցող այլ ենթակառույցներ` բիզնես ինկուբատորի ստեղծում Գյումրիում» բառերը փոխարինել «Բիզնես ինկուբատորի ստեղծման ծրագրի մշակում» բառերով, իսկ «2004 թվականի 3-րդ եռամսյակ» բառերը` «2004 թվականի 4-րդ եռամսյակ» բառերով:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2004 ԹՎԱԿԱՆԻ ԴԵԿՏԵՄԲԵՐԻ 8-ԻՆ