ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ
ՈՐՈՇՈՒՄ
29 դեկտեմբերի 2022 թվականի N 1546-Ա
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ 2022 ԹՎԱԿԱՆԻ ՀՈՒՆՎԱՐԻ 27-Ի N 111-Ա ՈՐՈՇՄԱՆ ՄԵՋ ԼՐԱՑՈՒՄՆԵՐ ԵՎ ՓՈՓՈԽՈՒԹՅՈՒՆՆԵՐ ԿԱՏԱՐԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ 2022 ԹՎԱԿԱՆԻ ՄԱՐՏԻ 29-Ի N 315-Ա ՈՐՈՇՈՒՄՆ ՈՒԺԸ ԿՈՐՑՐԱԾ ՃԱՆԱՉԵԼՈՒ ՄԱՍԻՆ
Ղեկավարվելով «Նորմատիվ իրավական ակտերի մասին» Հայաստանի Հանրապետության օրենքի 34-րդ և 37-րդ հոդվածներով`
1. Հայաստանի Հանրապետության վարչապետի 2022 թվականի հունվարի 27-ի «Սահմանադրական բարեփոխումների խորհուրդ ձևավորելու, խորհրդի անհատական կազմը և գործունեության կարգը հաստատելու և Հայաստանի Հանրապետության վարչապետի 2020 թվականի փետրվարի 12-ի N 181-Ա որոշումն ուժը կորցրած ճանաչելու մասին» N 111-Ա որոշման N 2 հավելվածում (այսուհետ` հավելված) կատարել հետևյալ լրացումները և փոփոխությունները`
1) 9-րդ կետը լրացնել հետևյալ բովանդակությամբ նոր` 1.1-ին և 1.2-րդ ենթակետերով.
«1.1) հաստատում է հանձնաժողովի անհատական կազմը.
1.2) ցանկացած ժամանակ կարող է դադարեցնել հանձնաժողովի գործունեությունը.».
2) 29-րդ կետը «կազմված է» բառից հետո լրացնել «առավելագույնը» բառով.
3) 30-րդ կետը շարադրել հետևյալ խմբագրությամբ.
«30. Հանձնաժողովի անդամներն ընտրվում են մրցութային բաց ընթացակարգի միջոցով` 1 տարի ժամկետով խորհրդի սահմանած կարգով: Հանձնաժողովի անդամների գործունեության ժամկետը խորհրդի որոշմամբ յուրաքանչյուր անգամ կարող է երկարաձգվել մինչև մեկ տարի ժամկետով, եթե հանձնաժողովի անդամների ընտրության նոր մրցույթ չի հայտարարվում:».
4) 31-րդ կետից հանել հետևյալ նախադասությունները.
«Հանձնաժողովի անդամների թեկնածուներն ընտրվում են խորհրդի կողմից` խորհրդի նիստին ներկա խորհրդի անդամների ձայների առնվազն երկու երրորդով: Հանձնաժողովի անհատական կազմը հաստատվում է Հայաստանի Հանրապետության վարչապետի կողմից:».
5) հավելվածի ամբողջ տեքստում «հանձնաժողովի աշխատանքները համակարգող» բառերը և դրանց համապատասխան հոլովաձևերը փոխարինել «հանձնաժողովի նախագահ» բառերով և դրանց համապատասխան հոլովաձևերով.
6) 38-րդ կետի առաջին նախադասությունը շարադրել հետևյալ խմբագրությամբ.
«Հանձնաժողովն իր կազմից ձայների պարզ մեծամասնությամբ ընտրում է հանձնաժողովի նախագահ: Եթե հանձնաժողովի նախագահ ընտրելու անհրաժեշտությունը ծագելուց հետո նախագահ չի ընտրվում, ապա հանձնաժողովի նախագահը նշանակվում է խորհրդի կողմից` խորհրդի նիստին ներկա անդամների ընդհանուր ձայների պարզ մեծամասնությամբ:».
7) 49-րդ կետից հանել «(վարողը)» բառը.
8) 51-րդ կետի`
ա. 4-րդ ենթակետը «կազմակերպում է» բառից հետո լրացնել «խորհրդի» բառով,
բ. 8-րդ ենթակետում «խորհրդի նախագահի կամ հանձնաժողովի աշխատանքները համակարգողի» բառերը փոխարինել «խորհրդի (հանձնաժողովի) նախագահի» բառերով,
գ. 10-րդ ենթակետում «խորհրդի նախագահի կամ հանձնաժողովի աշխատանքները համակարգողի» բառերը փոխարինել «խորհրդի (հանձնաժողովի) նախագահի» բառերով:
2. Հայաստանի Հանրապետության վարչապետի 2022 թվականի մարտի 29-ի «Սահմանադրական բարեփոխումների մասնագիտական հանձնաժողովի անհատական կազմը հաստատելու մասին» N 315-Ա որոշումն ուժը կորցրած ճանաչել 2022 թվականի դեկտեմբերի 31-ից:
Հայաստանի Հանրապետության
վարչապետ Ն. Փաշինյան
2022 թ. դեկտեմբերի 29
Երևան