ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
27 հուլիսի 1994 թ. թիվ 347
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆՈՅԵՄԲԵՐՅԱՆԻ ՇՐՋԱՆԻ ԲԱԳՐԱՏԱՇԵՆ ԱՎԱՆԻ ՏԱՐԱԾՔՈՒՄ ՍԱՀՄԱՆԱՄԵՐՁ ԱՌԵՎՏՈՒՐ ԿԱԶՄԱԿԵՐՊԵԼՈՒ ՄԱՍԻՆ
Հայաստանի Հանրապետության Նոյեմբերյանի շրջանի Բագրատաշեն ավանի և Վրաստանի Հանրապետության սահմանամերձ տարածքում իրականացվող առևտրի կարգավորման նպատակով Հայաստանի Հանրապետության կառավարությունը որոշում է.
1. Հայաստանի Հանրապետության Նոյեմբերյանի շրջանի Բագրատաշեն ավանի տարածքում ստեղծել սահմանամերձ առևտրի շուկա և շուկայի աշխատանքների կազմակերպումն ու ղեկավարումը դնել Հայաստանի Հանրապետության նյութական ռեսուրսների նախարարության վրա:
2. Պատգամավորների Նոյեմբերյանի շրջանային խորհրդի գործադիր կոմիտեին և Հայաստանի Հանրապետության գյուղատնտեսության նախարարությանը` մեկամսյա ժամկետում, օրենսդրությամբ սահմանված կարգով, Հայաստանի Հանրապետության կառավարություն ներկայացնել առաջարկություն Բագրատաշեն ավանի տարածքում սահմանամերձ առևտրի շուկայի ստեղծման նպատակով Բագրատաշեն-Սադախլո կամրջին հարակից տարածքից Հայաստանի Հանրապետության նյութական ռեսուրսների նախարարությանը հողատարածություն հատկացնելու մասին:
3. Հայաստանի Հանրապետության նյութական ռեսուրսների նախարարությանը` Բագրատաշեն ավանի տարածքում սահմանամերձ առևտրի շուկայի կազմակերպման նպատակով հատկացվող հողատարածությունում իրականացվող շինմոնտաժային աշխատանքների նախագծային առաջադրանքները համաձայնեցնել Հայաստանի Հանրապետության էկոնոմիկայի նախարարության, Հայաստանի Հանրապետության ճարտարապետության և քաղաքաշինության պետական վարչության, Հայաստանի Հանրապետության մաքսային վարչության հետ:
4. Հայաստանի Հանրապետության շինարարության նախարարությանը` Հայաստանի Հանրապետության նյութական ռեսուրսների նախարարության պատվերի համաձայն իրականացնել Բագրատաշեն ավանի տարածքում սահմանամերձ առևտրի շուկայի շինմոնտաժային աշխատանքները:
5. Հայաստանի Հանրապետության էկոնոմիկայի նախարարությանը` Հայաստանի Հանրապետության ֆինանսների նախարարության և Հայաստանի Հանրապետության հարկային պետական տեսչության հետ համատեղ սահմանել Բագրատաշեն ավանի տարածքում սահմանամերձ առևտրի շուկայի ծառայություններից օգտվող ձեռնարկությունների, կազմակերպությունների, ինչպես նաև քաղաքացիների համար մուտքի միանվագ վճարների չափը և գանձման կարգը:
6. Առաջարկել Հայարդշինբաժնետերբանկին, Հայպետագրոբանկին և Հայէկոնոմբանկին սահմանամերձ առևտրի շուկայի տարածքում կազմակերպել տարադրամի փոխանակման կետ:
7. Հայաստանի Հանրապետության մաքսային վարչությանը` սահմանամերձ առևտրի շուկայի տարածքում ստեղծել մաքսային կետ և գործող օրենսդրությանը համապատասխան իրականացնել մաքսային հսկողությունն ու ձևակերպումները:
8. Հայաստանի Հանրապետության ներքին գործերի նախարարությանը` կազմավորվող սահմանամերձ առևտրի շուկայի տարածքում ապահովել հասարակական կարգի պահպանումը:
9. Հայաստանի Հանրապետության նյութական ռեսուրսների նախարարությանը, Հայաստանի հանրապետության էկոնոմիկայի նախարարությանը, Հայաստանի Հանրապետության ֆինանսների նախարարությանը և Հայաստանի Հանրապետության մաքսային վարչությանը` 15-օրյա ժամկետում Հայաստանի Հանրապետության կառավարություն ներկայացնել առաջարկություն Հայաստանի Հանրապետության Նոյեմբերյանի շրջանի Բագրատաշեն ավանի տարածքում կազմակերպվող սահմանամերձ առևտրի շուկայի աշխատանքների կանոնակարգման վերաբերյալ: