040.0048.230101
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«23» հունվարի 2001 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
23 հունվարի 2001 թվականի N 48
i
«ՀԱՅԱՍՏԱՆԻ ԱՄԵՐԻԿՅԱՆ ՀԱՄԱԼՍԱՐԱՆ» ՍՊԸ» ՀԱՄԱՏԵՂ ՁԵՌՆԱՐԿՈՒԹՅԱՆ ՎԵՐԱԿԱԶՄԱԿԵՐՊՄԱՆ ԿԱՊԱԿՑՈՒԹՅԱՄԲ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿՐԹՈՒԹՅԱՆ ԵՎ ԳԻՏՈՒԹՅԱՆ ՆԱԽԱՐԱՐՈՒԹՅԱՆԸ ԼԻԱԶՈՐՈՒԹՅՈՒՆՆԵՐ ՎԵՐԱՊԱՀԵԼՈՒ ՄԱՍԻՆ
«Հայաստանի ամերիկյան համալսարան» ՍՊԸ» համատեղ ձեռնարկությունը Հայաստանի Հանրապետության քաղաքացիական օրենսգրքի 5-րդ գլխի պահանջներին համապատասխան հիմնադրամի վերակազմակերպվելու կապակցությամբ Հայաստանի Հանրապետության կառավարությունը որոշում է.
1. Հայաստանի Հանրապետության կողմից «Հայաստանի ամերիկյան համալսարան» հիմնադրամի հիմնադրի լիազորությունը վերապահել Հայաստանի Հանրապետության կրթության և գիտության նախարարությանը:
2. Հայաստանի Հանրապետության կրթության և գիտության նախարարության` Երևանի Մարշալ Բաղրամյան պողոտայի N 40 շենքը հանձնել Հայաստանի Հանրապետության պետական գույքի կառավարման նախարարության տնօրինությանը:
3. Հայաստանի Հանրապետության կրթության և գիտության նախարարությանը և Հայաստանի Հանրապետության պետական գույքի կառավարման նախարարությանը` մեկամսյա ժամկետում ավարտել նշված շենքի հանձնման-ընդունման աշխատանքները և գույքային իրավունքների պետական գրանցումը:
4. Հայաստանի Հանրապետության պետական գույքի կառավարման նախարարությանը` Հայաստանի Հանրապետության օրենսդրությամբ սահմանված կարգով «Հայաստանի ամերիկյան համալսարան» հիմնադրամին հանձնել Երևանի Մարշալ Բաղրամյան պողոտայի N 40 շենքի անհատույց օգտագործման իրավունքը:
5. Սույն որոշումն ուժի մեջ է մտնում 2001 թվականի հունվարի 23-ից: