ԱԶԱՏ ՏՆՏԵՍԱԿԱՆ ԳՈՏՈՒ ԿԱՐԳԱՎԻՃԱԿ ՉՈՒՆԵՑՈՂ ԱՐԴՅՈՒՆԱԲ ...

041.0846.180915

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏ

ՈՐՈՇՈՒՄ

18 սեպտեմբերի 2015 թվականի N 846-Ա

ԱԶԱՏ ՏՆՏԵՍԱԿԱՆ ԳՈՏՈՒ ԿԱՐԳԱՎԻՃԱԿ ՉՈՒՆԵՑՈՂ ԱՐԴՅՈՒՆԱԲԵՐԱԿԱՆ ԳՈՏՈՒ ՍՏԵՂԾՄԱՆ ՆՊԱՏԱԿՈՎ ՆԵՐԿԱՅԱՑՎԱԾ ՀԱՅՏԵՐՆ ՈՒՍՈՒՄՆԱՍԻՐՈՂ ԵՎ ԳՆԱՀԱՏՈՂ` ՄՇՏԱՊԵՍ ԳՈՐԾՈՂ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎ ՍՏԵՂԾԵԼՈՒ, ՎԵՐՋԻՆԻՍ ԱՆՀԱՏԱԿԱՆ ԿԱԶՄԸ ԵՎ ԳՈՐԾՈՒՆԵՈՒԹՅԱՆ ԿԱՐԳԸ ՀԱՍՏԱՏԵԼՈՒ ՄԱՍԻՆ

Հիմք ընդունելով Հայաստանի Հանրապետության կառավարության 2015 թվականի հունիսի 10-ի N 618-Ն որոշման 3-րդ կետի 1-ին ենթակետը`

1. Ստեղծել ազատ տնտեսական գոտու կարգավիճակ չունեցող արդյունաբերական գոտու ստեղծման նպատակով ներկայացված հայտերն ուսումնասիրող և գնահատող` մշտապես գործող միջգերատեսչական հանձնաժողով (այսուհետ` միջգերատեսչական հանձնաժողով):

2. Հաստատել միջգերատեսչական հանձնաժողովի անհատական կազմը և գործունեության կարգը` համաձայն N N 1 և 2 հավելվածների:

ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ

2015 ԹՎԱԿԱՆԻ ՍԵՊՏԵՄԲԵՐԻ 18-ԻՆ

Հավելված N 1

ՀՀ վարչապետի

2015 թ. սեպտեմբերի 18-ի

N 846-Ա որոշման

ԱԶԱՏ ՏՆՏԵՍԱԿԱՆ ԳՈՏՈՒ ԿԱՐԳԱՎԻՃԱԿ ՉՈՒՆԵՑՈՂ ԱՐԴՅՈՒՆԱԲԵՐԱԿԱՆ ԳՈՏՈՒ ՍՏԵՂԾՄԱՆ ՆՊԱՏԱԿՈՎ ՆԵՐԿԱՅԱՑՎԱԾ ՀԱՅՏԵՐՆ ՈՒՍՈՒՄՆԱՍԻՐՈՂ ԵՎ ԳՆԱՀԱՏՈՂ` ՄՇՏԱՊԵՍ ԳՈՐԾՈՂ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ

    Ա. Ավանեսյան       - ՀՀ էկոնոմիկայի նախարարի տեղակալ

                         (հանձնաժողովի նախագահ)

    Ա. Եգանյան         - ՀՀ էկոնոմիկայի նախարարության արդյունաբերության

                         զարգացման վարչության պետ (հանձնաժողովի քարտուղար)

    Գ. Ղազարյան        - ՀՀ էկոնոմիկայի նախարարության պարենային

                         անվտանգության և ագրովերամշակման զարգացման

                         վարչության պետ

    Օ. Ալավերդյան      - ՀՀ ֆինանսների նախարարության եկամուտների

                         քաղաքականության և վարչարարության մեթոդաբանության

                         վարչության պետ

    Ա. Ավետիսյան       - ՀՀ բարձր տեխնոլոգիական արդյունաբերության

                         նախարարության թվայնացման, կապի և փոստի

                         վարչության պետ

    Տ. Մելքոնյան       - ՀՀ տարածքային կառավարման և  ենթակառուցվածքների

                         նախարարության էներգետիկայի վարչության պետ

    Ա. Միքայելյան      - ՀՀ արդարադատության նախարարության իրավական

                         ապահովման վարչության պետի տեղակալ

Լ. Հարությունյան  - ՀՀ պետական եկամուտների կոմիտեի վարչարարության

մեթոդաբանության, ընթացակարգերի և սպասարկման

վարչության պետի տեղակալ

    Տ. Մանուկյան       - ՀՀ քաղաքաշինության կոմիտեի ճարտարապետության և

                         քաղաքաշինության վարչության պետի պաշտոնակատար

    Վ. Ամիրյան         - ՀՀ առևտրաարդյունաբերական  պալատի գործառնական

                         տնօրեն (համաձայնությամբ)

    Ն. Մանուկյան       - Հայաստանի արդյունաբերողների և  գործարարների

                         միության խորհրդի անդամ (համաձայնությամբ)

(1-ին հավելվածը փոփ. 06.11.2019 թիվ 1617-Ա որոշում)

Հավելված N 2

ՀՀ վարչապետի

2015 թվականի սեպտեմբերի 18-ի

N 846-Ա որոշման

ԿԱՐԳ

ԱԶԱՏ ՏՆՏԵՍԱԿԱՆ ԳՈՏՈՒ ԿԱՐԳԱՎԻՃԱԿ ՉՈՒՆԵՑՈՂ ԱՐԴՅՈՒՆԱԲԵՐԱԿԱՆ ԳՈՏՈՒ ՍՏԵՂԾՄԱՆ ՆՊԱՏԱԿՈՎ ՆԵՐԿԱՅԱՑՎԱԾ ՀԱՅՏԵՐՆ ՈՒՍՈՒՄՆԱՍԻՐՈՂ ԵՎ ԳՆԱՀԱՏՈՂ` ՄՇՏԱՊԵՍ ԳՈՐԾՈՂ ՄԻՋԳԵՐԱՏԵՍՉԱԿԱՆ ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ

I. ԸՆԴՀԱՆՈՒՐ ԴՐՈՒՅԹՆԵՐ

1. Հանձնաժողովի նպատակն ազատ տնտեսական գոտու կարգավիճակ չունեցող արդյունաբերական գոտու ստեղծման համար ներկայացված հայտերի ուսումնասիրումն ու գնահատումն է:

2. Հանձնաժողովն իր գործունեությունն իրականացնում է ղեկավարվելով «Արդյունաբերական քաղաքականության մասին» Հայաստանի Հանրապետության օրենքով և դրանից բխող իրավական ակտերով (այսուհետ` կարգեր) և ազատ տնտեսական գոտու կարգավիճակ չունեցող արդյունաբերական գոտիներին առնչվող այլ իրավական ակտերով:

II. ՀԱՆՁՆԱԺՈՂՈՎԻ ԳՈՐԾԱՌՈՒՅԹՆԵՐԸ

3. Հանձնաժողովը`

1) հաստատում է հանձնաժողովի կանոնակարգը, դրանում փոփոխությունները և լրացումները.

2) հաստատում է ազատ տնտեսական գոտու կարգավիճակ չունեցող արդյունաբերական գոտի ստեղծելու նպատակով ներկայացված հայտերի (այսուհետ` հայտ) կարգերով սահմանված չափանիշների համաձայն գնահատման թերթիկների ձևերը.

3) հրապարակում է հանձնաժողովի գործունեության և հայտերի գնահատման հետ կապված տեղեկատվությունը` տեղադրելով այն Հայաստանի Հանրապետության էկոնոմիկայի նախարարության պաշտոնական կայքում.

4) ընդունում է հանձնաժողովի գործառույթներից բխող որոշումներ.

5) 20 աշխատանքային օրվա ընթացքում ուսումնասիրում է ներկայացված փաստաթղթերը և դրանց ամբողջականության կամ անճշտությունների բացակայության դեպքում` գնահատում հայտը, ընդունում համապատասխան եզրակացություն և 3 աշխատանքային օրվա ընթացքում համապատասխան եզրակացությունը ներկայացնում է լիազոր մարմին, որը մշակում է համապատասխան որոշման նախագիծ և ներկայացնում Հայաստանի Հանրապետության կառավարության քննարկմանը:

4. Հանձնաժողովի նախագահը`

1) Հայաստանի Հանրապետության էկոնոմիկայի նախարարի տեղակալն է, ով հանդես է գալիս հանձնաժողովի անունից.

2) հրավիրում և նախագահում է հանձնաժողովի նիստերը.

3) հանձնաժողովի նիստերին խորհրդակցական ձայնի իրավունքով մասնակցելու համար, անհրաժեշտության դեպքում, իր նախաձեռնությամբ կամ հանձնաժողովի անդամների առաջարկությամբ հրավիրում է Հայաստանի Հանրապետության նախարարությունների, գերատեսչությունների, մարզպետարանների, ձեռնարկությունների, գիտահետազոտական հիմնարկների, բանկերի և այլ կազմակերպությունների ներկայացուցիչներին և համապատասխան փորձագետների.

4) ստորագրում է հանձնաժողովի կողմից ընդունված որոշումները:

5. Հանձնաժողովի քարտուղարը`

1) Հայաստանի Հանրապետության էկոնոմիկայի նախարարության աշխատակազմի արդյունաբերության զարգացման վարչության պետն է.

2) կազմակերպում է հանձնաժողովի աշխատանքները և նիստերը.

3) կազմակերպում է հայտերի վերաբերյալ հանձնաժողովի անդամներին տեղեկատվության տրամադրման աշխատանքները.

4) ներկայացնում է հանձնաժողովի եզրակացությունները լիազոր մարմնին.

5) Հայաստանի Հանրապետության կառավարության` ազատ տնտեսական գոտու կարգավիճակ չունեցող արդյունաբերական գոտու ստեղծման վերաբերյալ դրական կամ բացասական որոշումներն ընդունելուց հետո 3 աշխատանքային օրվա ընթացքում տեղեկացնում է հայտատուներին` վերջիններիս վերաբերյալ.

6) գնահատման թափանցիկության, պետության և շահագրգիռ կողմերի միջև երկխոսության և հետադարձ կապի ապահովման նպատակով հանձնաժողովի նիստերին մասնակցելու համար հրավիրում է հայտատուներին և շահագրգիռ կազմակերպությունների ներկայացուցիչներին.

7) հանձնաժողովի նիստից առնվազն 2 աշխատանքային օր առաջ հանձնաժողովի անդամներին ներկայացնում է նախատեսվող նիստի օրակարգը և համապատասխան փաստաթղթերը.

8) կազմում է հանձնաժողովի նիստերի արձանագրությունները և ներկայացնում հանձնաժողովի նախագահին և անդամներին` ստորագրության:

6. Հանձնաժողովի անդամները`

1) հանձնաժողովի անդամները պետական կառավարման մարմինների և շահագրգիռ կազմակերպությունների համապատասխան ներկայացուցիչներն են.

2) հանձնաժողովի անդամները հայտի ընդունման առնչությամբ կայացած նիստից հետո 7 աշխատանքային օրվա ընթացքում հայտերի գնահատման թերթիկի հիման վրա գնահատում են հայտերը:

IV. ՀԱՆՁՆԱԺՈՂՈՎԻ ՆԻՍՏԵՐ ՀՐԱՎԻՐԵԼՈՒ ԵՎ ՈՐՈՇՈՒՄՆԵՐ ԸՆԴՈՒՆԵԼՈՒ ԿԱՐԳԸ

7. Հանձնաժողովն իր աշխատանքները կազմակերպում է հերթական և արտահերթ նիստերի միջոցով: Հանձնաժողովի հերթական նիստերը գումարվում են ազատ տնտեսական գոտու կարգավիճակ չունեցող արդյունաբերական գոտի ստեղծելու նպատակով հայտերը ներկայացնելուց հետո 7 աշխատանքային օրվա ընթացքում:

8. Հանձնաժողովի յուրաքանչյուր նիստի համար կազմվում է արձանագրություն: Արձանագրություններն ստորագրվում են հանձնաժողովի նախագահի և նիստին մասնակցած մյուս անդամների կողմից:

9. Հանձնաժողովն իր արտահերթ նիստերը գումարում է հանձնաժողովի նախագահի նախաձեռնությամբ կամ հանձնաժողովի անդամների առնվազն 1/3-ի առաջարկությամբ:

10. Հանձնաժողովի նիստն իրավազոր է հանձնաժողովի անդամների 2/3-ի մասնակցության դեպքում, իսկ հանձնաժողովի անդամների 2/3-ից պակաս լինելու դեպքում նիստը համարվում է չկայացած և նշանակվում է նոր նիստ: Հանձնաժողովի նոր նիստի օրվա և ժամի մասին տեղեկացվում է բոլոր հայտատուներին:

11. Հանձնաժողովի որոշումներն ընդունվում են հանձնաժողովի անդամների ձայների պարզ մեծամասնությամբ: Ձայների հավասարության դեպքում հանձնաժողովի նախագահի ձայնը վճռորոշ է: Հանձնաժողովի նախագահի բացակայության դեպքում` նրան փոխարինում է հանձնաժողովի քարտուղարը:

V. ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԴԱԴԱՐՈՒՄԸ

12. Հանձնաժողովի գործունեությունը դադարում է Հայաստանի Հանրապետության վարչապետի որոշմամբ: