https://petekamutner.am/shared/Information/Irazekum17.pdf
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ
24 հունիսի 2020 թվականի N 17
ՀԱՆՐԱՅԻՆ ՍՆՆԴԻ ՈԼՈՐՏՈՒՄ ԳՈՐԾՈՒՆԵՈՒԹՅՈՒՆ ԻՐԱԿԱՆԱՑՆԵԼՈՒ ՎԵՐԱԲԵՐՅԱԼ
Հարց
i
«Առևտրի և ծառայությունների մասին» ՀՀ օրենքի 10-րդ հոդվածի 1-ին կետի համաձայն`
- հանրային սնունդ (սննդի ապահովման ծառայություններ) են համարվում խոհարարական արտադրանքի պատրաստման, իրացման և/ կամ սպառման կազմակերպումը.
- հանրային սննդի ծառայություն է համարվում սպառողների սննդի և հանգստի անցկացման պահանջների բավարարմանն ուղղված, վաճառողի միջոցով մատուցվող ծառայությունների համալիրը.
- խոհարարական արտադրանք է համարվում կերակրատեսակների, խոհարարական արտադրատեսակների և կիսապատրաստվածքների համախումբը.
i
ՀՀ հարկային օրենսգրքի 254 հոդվածի 8-րդ կետի համաձայն.
Սույն բաժնի կիրառության իմաստով` հանրային սննդի ոլորտում իրականացվող գործունեություն է համարվում խոհարարական արտադրանքի օտարումը (այդ թվում` առաքմամբ) և/կամ սպառման կազմակերպումը: Այդ գործունեությունը ներառում է նաև խոհարարական արտադրանքի սպառման կազմակերպման հետ անմիջականորեն կապված ապրանքների մատակարարումը, աշխատանքների կատարումը, ծառայությունների մատուցումը, մասնավորապես սպասարկումը, մուտքի թույլտվությունը;
Տվյալ դեպքում արդյո՞ք հանրային սննդի ոլորտում իրականացվող գործունեություն է համարվում հանրային սննդի օբյեկտում ալկոհոլային խմիչքների և զովացուցիչ ըմպելիքների /մասնավորապես շշով հանքային ջուր, կոկա-կոլա, գարեջուր/ օտարումը և/ կամ սպառման կազմակերպումը:
Պատասխան
i
ՀՀ հարկային օրենսգրքի 254-րդ հոդվածի 8-րդ մասին համապատասխան` օրենսգրքի 13-րդ բաժնի կիրառության իմաստով` հանրային սննդի ոլորտում իրականացվող գործունեություն է համարվում խոհարարական արտադրանքի օտարումը (այդ թվում` առաքմամբ) և (կամ) սպառման կազմակերպումը: Այդ գործունեությունը ներառում է նաև խոհարարական արտադրանքի սպառման կազմակերպման հետ անմիջականորեն կապված ապրանքների մատակարարումը, աշխատանքների կատարումը, ծառայությունների մատուցումը, մասնավորապես սպասարկումը, մուտքի թույլտվությունը:
i
ՀՀ էկոնոմիկայի նախարարի 19.09.2013թ. N 874-Ն հրամանով հաստատված Տնտեսական գործունեության տեսակների դասակարգչի համաձայն` «56 Հանրային սննդի կազմակերպում» հատվածը ներառում է անմիջական տեղում սպառման համար պատրաստի կերակրատեսակների, ինչպես նաև կերակրատեսակների հետ մատուցվող խմիչքների վաճառքը և սպասարկումը ռեստորաններում, սրճարաններում, այդ թվում` ինքնասպասարկման կամ պատրաստված սննդի դուրս տանելու հնարավորությամբ, վաճառասեղանի կանգնակի մոտ, նստելատեղերով կամ առանց նստելատեղերի:
Միաժամանակ, դասակարգչի «56.30 Բարերի և խմիչքների մատուցման համանման կետերի ծառայություններ» դասը ներառում է տեղում օգտագործելու համար խմիչքների պատրաստման, վաճառքի և սպասարկման ծառայությունները` բարերում, պանդոկներում, կոկտեյլ-սրահներում, գարեջրասրահներում, պարահրապարակներում, գիշերային ակումբներում (խմիչքների մատուցմամբ), սուրճի, հյութերի սրահներում, ինչպես նաև խմիչքների վաճառքը սայլակներից:
Հաշվի առնելով վերոգրյալը, հայտնում ենք, որ ՀՀ հարկային օրենսգրքի 13-րդ բաժնի կիրառության իմաստով` հանրային սննդի ոլորտում իրականացվող գործունեություն է համարվում խոհարարական արտադրանքի օտարումը (այդ թվում` առաքմամբ) և (կամ) սպառման կազմակերպումը, որը ներառում է նաև խոհարարական արտադրանքի սպառման կազմակերպման հետ անմիջականորեն կապված ապրանքների (տվյալ դեպքում` խոհարարական արտադրանքի հետ մատուցվող խմիչքների) մատակարարումը, աշխատանքների կատարումը, ծառայությունների մատուցումը:
ՀՀ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ