ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
31 մարտի 2020 թվականի N 418-Լ
i
ԿՈՐՈՆԱՎԻՐՈՒՍԻ ՀԵՏԵՎԱՆՔՈՎ ԱՇԽԱՏԱՆՔԻՑ ԱԶԱՏՎԱԾ ԾՆՈՂՆԵՐԻՆ ՀՐԱՏԱՊ ԴՐԱՄԱԿԱՆ ԱՋԱԿՑՈՒԹՅՈՒՆ ՏՐԱՄԱԴՐԵԼՈՒ ԿԱՐԳԸ ՀԱՍՏԱՏԵԼՈՒ ՄԱՍԻՆ
Հիմք ընդունելով Հայաստանի Հանրապետության Սահմանադրության 146-րդ հոդվածի 4-րդ մասը, Հայաստանի Հանրապետության կառավարության «Կորոնավիրուսի տնտեսական հետևանքների չեզոքացման չորրորդ միջոցառումը հաստատելու մասին» 2020 թվականի մարտի 26-ի N 358-Լ որոշումը` Հայաստանի Հանրապետության կառավարությունը որոշում է.
1. Հաստատել կորոնավիրուսի հետևանքով աշխատանքից ազատված ծնողներին հրատապ դրամական աջակցություն տրամադրելու կարգը` համաձայն հավելվածի:
2. Պետական եկամուտների կոմիտեի նախագահին` մինչև 2020 թվականի ապրիլի 3-ը ապահովել սույն որոշմամբ հաստատված կարգով նախատեսված շահառուների ցանկի ձևավորումը և տրամադրումը Հայաստանի Հանրապետության աշխատանքի և սոցիալական հարցերի նախարարության սոցիալական ապահովության պետական ծառայությանը:
3. Հայաստանի Հանրապետության աշխատանքի և սոցիալական հարցերի նախարարին` մեկօրյա ժամկետում Հայաստանի Հանրապետության կառավարություն ներկայացնել առաջարկություն` կորոնավիրուսի տնտեսական հետևանքների չեզոքացման ուղղությամբ սոցիալական պաշտպանության ոլորտում իրականացվող միջոցառումների ֆինանսավորման նպատակով Հայաստանի Հանրապետության 2020 թվականի պետական բյուջեում վերաբաշխում և Հայաստանի Հանրապետության կառավարության 2019 թվականի դեկտեմբերի 26-ի N 1919-Ն որոշման մեջ փոփոխություններ ու լրացում կատարելու վերաբերյալ:
i
4. Սույն որոշմամբ հաստատված կարգի կիրառությունը, բացառությամբ 11-րդ, 11.1-ին, 14-րդ, 15-րդ և 16-րդ կետերի, դադարեցվում է 2020 թվականի նոյեմբերի 1-ից, իսկ 14-րդ կետն ուժը կորցնում է 2021 թվականի փետրվարի 1-ից:
(4-րդ կետը լրաց. 03.09.2020 թիվ 1464-Լ որոշում)
Հայաստանի Հանրապետության
վարչապետ Ն. Փաշինյան
2020 թ. մարտի
Երևան
Հավելված
ՀՀ կառավարության
2020 թվականի մարտի 31-ի
N 418-Լ որոշման
ԿԱՐԳ
ԿՈՐՈՆԱՎԻՐՈՒՍԻ ՀԵՏԵՎԱՆՔՈՎ ԱՇԽԱՏԱՆՔԻՑ ԱԶԱՏՎԱԾ ԾՆՈՂՆԵՐԻՆ ՄԻԱՆՎԱԳ ԴՐԱՄԱԿԱՆ ԱՋԱԿՑՈՒԹՅՈՒՆ ՏՐԱՄԱԴՐԵԼՈՒ
1. Սույն կարգով կարգավորվում են հրատապ դրամական աջակցություն նշանակելուն և վճարելուն առնչվող հարաբերությունները:
i
2. Հրատապ դրամական աջակցությունը նշանակվում է 2006 թվականի ապրիլի 1-ին կամ դրանից հետո ծնված երեխա խնամող Հայաստանի Հանրապետության քաղաքացի հանդիսացող ծնողին (ծնողներին), եթե 2020 թվականի մարտի 13-ից մինչև մարտի 25-ն ընկած ժամանակահատվածում`
1) երեխայի երկու ծնողներն ազատվել են աշխատանքից (լուծվել է երեխայի երկու ծնողների հետ կնքված աշխատանքային պայմանագիրը), կամ.
2) երեխայի ծնողներից մեկն ազատվել է աշխատանքից (լուծվել է երեխայի ծնողներից մեկի հետ կնքված աշխատանքային պայմանագիրը), իսկ մյուս ծնողը 2020 թվականի մարտի 25-ի դրությամբ չի աշխատում, կամ զրկված է ծնողական իրավունքներից, կամ մահացած է, կամ օրենքով սահմանված կարգով ճանաչվել է մահացած կամ անհայտ կորած, կամ.
3) միայնակ մայրը կամ նրա հետ համատեղ բնակվող ծնողը (եթե երեխայի ծնողներն ամուսնալուծված են) ազատվել է աշխատանքից:
(2-րդ կետը փոփ. 18.05.2020 թիվ 759-Լ որոշումներ)
3. Հրատապ դրամական աջակցությունը չի նշանակվում, եթե`
i
1) աշխատանքից ազատված ծնողի (սույն կարգի 2-րդ կետի 1-ին ենթակետում նշված դեպքում` ծնողներից մեկի) համար 2020 թվականի հունվար և փետրվար ամիսներին հաշվարկված միջին ամսական աշխատավարձի չափը գերազանցել է 500 000 դրամը (միջին ամսական աշխատավարձի չափը հաշվարկվում է ծնողի համար հունվար և փետրվար ամիսներին հաշվարկված աշխատավարձի և դրան հավասարեցված այլ վճարումների հանրագումարը երկուսի բաժանելու միջոցով).
2) ծնողը (սույն կարգի 2-րդ կետի 1-ին ենթակետում նշված դեպքում` ծնողներից մեկը) 2020 թվականի մարտի 25-ի (ներառյալ) դրությամբ աշխատանքային հարաբերությունների մեջ է գտնվել այլ գործատուի հետ կամ նույն գործատուի հետ` այլ աշխատանքային պայմանագրի հիման վրա.
3) աշխատանքից ազատված ծնողը հանդիսացել է անհատ ձեռնարկատեր (բացառությամբ այն անհատ ձեռնարկատերերի, որոնք հաշվառվել են 2020 թվականի հունվարի 1-ից հետո), և գործունեությունը Հայաստանի Հանրապետության հարկային օրենսգրքով նախատեսված կարգով դադարեցված չէ:
Ընդ որում, Հայաստանի Հանրապետության կառավարության 2020 թվականի մարտի 26-ի N 358-Լ որոշման և սույն կարգի իմաստով քաղաքացիաիրավական պայմանագրի հիման վրա աշխատանք կատարող կամ ծառայություն մատուցող անձը չի համարվում վարձու աշխատող (քաղաքացիաիրավական պայմանագրի հիման վրա կատարվող աշխատանքը և մատուցվող ծառայությունը չի համարվում աշխատանք), իսկ այդ պայմանագրի հիման վրա ստացած եկամուտը` աշխատավարձում և դրան հավասարեցված այլ վճարումներում չի հաշվառվում:
(3-րդ կետը փոփ. 14.04.2020 թիվ 555-Լ, 18.05.2020 թիվ 759-Լ որոշումներ)
4. Հրատապ դրամական աջակցության չափը հաշվարկվում է 100 000 դրամի չափով 2006 թվականի ապրիլի 1-ին կամ դրանից հետո ծնված` ծնողի խնամքին գտնվող յուրաքանչյուր երեխայի համար` 100 000 դրամը բազմապատկելով այդ երեխաների թվով:
5. Հրատապ դրամական աջակցությունդ նշանակում և վճարում է Աշխատանքի և սոցիալական հարցերի նախարարության սոցիալական ապահովության ծառայությունը (այսուհետ` Ծառայություն)` Պետական եկամուտների կոմիտեից ստացված տվյալների հիման վրա:
i
6. Պետական եկամուտների կոմիտեն, հիմք ընդունելով «Եկամտային հարկի, շահութահարկի և սոցիալական վճարի անձնավորված հաշվառման մասին» օրենքով սահմանված տեղեկատվական բազայում առկա տվյալները և սույն կարգի 2-րդ ու 3-րդ կետերի դրույթները, ձևավորում է շահառուների ցանկ: Սույն կարգի իմաստով աշխատանքից ազատվելու կամ աշխատանք չունենալու փաստը հաստատվում է Պետական եկամուտների կոմիտեի տեղեկատվական շտեմարանում 2020 թվականի ապրիլի 1-ի դրությամբ առկա տվյալների միջոցով, այդ թվում` Հայաստանի Հանրապետության օրենսդրությամբ սահմանված կարգով Պետական եկամուտների կոմիտե ներկայացված աշխատանքից ազատման վերաբերյալ տեղեկատվության հիման վրա:
(6-րդ կետը փոփ. 18.05.2020 թիվ 759-Լ որոշումներ)
i
6.1. Պետական եկամուտների կոմիտեն շահառուների ցանկը ձևավորում է նաև Հայաստանի Հանրապետության քաղաքացի հանդիսացող ծնողների դիմումների կամ ՔԿԱԳ-ից ստացված տվյալների հիման վրա:
(6.1-ին կետը լրաց. 03.09.2020 թիվ 1464-Լ որոշում)
7. Շահառուների ցանկում ներառվում են`
i
1) երեխայի հոր և մոր անունը, ազգանունը, անձը հաստատող փաստաթղթի սերիան ու համարը, հանրային ծառայությունների համարանիշը,
2) սույն կարգի 2-րդ կետում նշված երեխայի (երեխաների) անունը, ազգանունը, անձը հաստատող փաստաթղթի սերիան ու համարը, հանրային ծառայությունների համարանիշը,
3) եթե երեխայի ծնողներից մեկը զրկված է ծնողական իրավունքներից, կամ մահացած է, կամ օրենքով սահմանված կարգով ճանաչվել է մահացած կամ անհայտ կորած, ապա նշում այդ մասին,
4) երեխայի ծնողներից մեկի հեռախոսահամարը և էլեկտրոնային փոստի հասցեն (առկայության դեպքում):
Աշխատանքից ազատված ծնողը շահառուների ցանկում ներառվում է նաև այն դեպքում, երբ նրա համար 2020 թվականի հունվար և փետրվար ամիսներին աշխատավարձ և դրան հավասարեցված այլ վճարումներ չի հաշվարկվել:
(7-րդ կետը փոփ. 14.04.2020 թիվ 555-Լ որոշում)
i
8. Շահառուների ցանկը էլեկտրոնային փաստաթղթաշրջանառության «Mulberry» համակարգով էլեկտրոնային եղանակով տրամադրվում է Ծառայությանդ: Սույն կարգի 6.1-ին կետում նշված կարգով ձևավորված շահառուների ցանկը Ծառայությանը տրամադրվում է մինչև 2020 թվականի հոկտեմբերի 15-ը:
(8-րդ կետը փոփ. 03.09.2020 թիվ 1464-Լ որոշում)
9. Ծառայությունը Պետական եկամուտների կոմիտեից շահառուների ցանկը ստանալուն հաջորդող 5 աշխատանքային օրվա ընթացքում ձևավորում է վճարման ցուցակներ` ըստ բանկերի:
10. Վճարման ցուցակում ներառվում են`
1) բանկի անվանումը,
2) երեխայի հոր և մոր անունը, ազգանունը, անձը հաստատող փաստաթղթի սերիան ու համարը, հանրային ծառայությունների համարանիշը, եթե նպաստը նշանակվել է սույն կարգի 2-րդ կետի 1-ին ենթակետի հիման վրա,
3) երեխայի ծնողի (միայնակ մոր) անունը, ազգանունը, անձը հաստատող փաստաթղթի սերիան ու համարը, հանրային ծառայությունների համարանիշը, եթե նպաստը նշանակվել է սույն կարգի 2-րդ կետի 2-րդ կամ 3-րդ ենթակետի հիման վրա,
4) վճարման ենթակա գումարը:
i
10.1. Պետական եկամուտների կոմիտեի կողմից տրամադրված շահառուների ցանկում ընդգրկված ծնողը (ում սույն կարգի շրջանակներում որևէ երեխայի համար արդեն վճարվել է դրամական աջակցություն) շահառուների ցանկում չներառված իր երեխայի համար (եթե Պետական եկամուտների կոմիտեի տրամադրած շահառուների ցուցակում չեն ներառվել բոլոր երեխաները) մինչև 2020 թվականի հոկտեմբերի 1-ը (ներառյալ) Ծառայությանը ներկայացնում է գրավոր դիմում` դիմումին կցելով շահառուների ցուցակում չներառված երեխայի ծննդյան վկայականի, նրա ծնողների անձը հաստատող փաստաթղթերի լուսապատճենը: Սույն կետով սահմանված կարգով երեխայի համար դրամական աջակցություն հաշվարկելու և վճարելու նպատակով լրացուցիչ տեղեկատվություն ստանալու անհրաժեշտության դեպքում Ծառայությունը դիմում է ՔԿԱԳ մարմնին: ՔԿԱԳ մարմինը Ծառայության կողմից պահանջվող տեղեկատվությունը տրամադրում է հնգօրյա ժամկետում: Սույն կետում նշված երեխայի համար հրատապ դրամական աջակցությունը հաշվարկվում է (վճարվում է), եթե երեխան նույնականացվում է բնակչության պետական ռեգիստրի տվյալների հիման վրա: Ընդ որում, այս դեպքում հրատապ դրամական աջակցությունը հաշվարկվում է (վճարվում է), եթե ծննդյան վկայականում այդ երեխայի հոր և մոր վերաբերյալ տվյալները համապատասխանում են շահառուների ցանկում ներառված երեխայի հոր և մոր վերաբերյալ տվյալներին:
(10.1-ին կետը լրաց. 03.09.2020 թիվ 1464-Լ որոշում)
i
11. Հրատապ դրամական աջակցությունը վճարվում է անկանխիկ եղանակով, Հայաստանի Հանրապետության կառավարության 2014 թվականի մարտի 6-ի N 275-Ն որոշման N 3 հավելվածի 2-րդ կետի 1.1-ին ենթակետով երեխայի ծննդյան միանվագ նպաստը վճարելու համար սահմանված կարգով` այդ հավելվածի 18-րդ կետում նշված համաձայնագիր (այսուհետ` Համաձայնագիր) կնքած բանկերի միջոցով: Ընդ որում, եթե Հրատապ դրամական աջակցության գումարը բանկին փոխանցելու ամսվան հաջորդող 3 ամսվա ընթացքում անձը բանկին չի ներկայացնում Հրատապ դրամական աջակցության գումարը ստանալու պահանջ, ապա գումարը վերադարձվում է Հայաստանի Հանրապետության պետական բյուջե:
(11-րդ կետը փոփ. 14.04.2020 թիվ 555-Լ որոշում)
i
11.1. Եթե Պետական եկամուտների կոմիտեի կողմից Ծառայությանը տրամադրված` սույն կարգի 5-րդ կետում նշված տվյալներում (շահառուների ցանկ ներառված ընտանիքի տվյալներում) կատարվում է փոփոխություն և տրամադրված նոր տվյալներով ընտանիքին չի կարող նշանակվել և վճարվել հրատապ դրամական աջակցություն, ապա Ծառայությունը նոր տվյալներն ստանալուց հետո` հինգ աշխատանքային օրվա ընթացքում դրա մասին տեղեկացնում է բանկին և պահանջում գումարը վերադարձնել Հայաստանի Հանրապետության պետական բյուջե: Եթե պահանջն ստանալու օրվա դրությամբ գումարը դեռևս չի կանխիկացվել, բանկը ոչ ուշ, քան պահանջն ստանալու հաջորդ աշխատանքային օրը գումարը փոխանցում է Հայաստանի Հանրապետության պետական բյուջե` դրա մասին տեղեկացնելով Ծառայությանը: Եթե գումարը Հայաստանի Հանրապետության պետական բյուջե վերադարձնելու պահանջն ստանալու օրվա դրությամբ գումարն արդեն կանխիկացվել է, ապա դրա մասին ևս բանկը տեղեկացնում է Ծառայությանը: Կանխիկացված գումարը Հայաստանի Հանրապետության պետական բյուջե չի վերադարձվում:
(11.1-ին կետը լրաց. 03.09.2020 թիվ 1464-Լ որոշում)
12. (12-րդ կետն ուժը կորցրել է 14.04.2020 թիվ 555-Լ որոշում)
i
13. Վճարման ցուցակում բանկի ընտրությունը կատարվում է պատահականության սկզբունքով` բոլոր շահառուներին հավասարապես բաշխելով Համաձայնագիր կնքած բանկերի միջև, բացառությամբ այն դեպքի, երբ շահառուն սույն կարգի 11-րդ կետով նախատեսված կարգով ներկայացրել է գումարը Համաձայնագիր կնքած այլ բանկի միջոցով վճարելու դիմում:
i
14. Վճարման ցուցակը բանկին փոխանցելու օրվան հաջորդող օրվանից շահառուն, online.ssa.am կայքէջում մուտքագրելով հանրային ծառայությունների համարանիշը կամ անձը հաստատող փաստաթղթի տվյալները, տեղեկանում է վճարման ցուցակում ներառված լինելու կամ չլինելու վերաբերյալ:
(14-րդ կետը փոփ. 14.04.2020 թիվ 555-Լ որոշում)
15. Հրատապ դրամական աջակցության գումարը չի կարող արգելադրվել (դրվել արգելանքի տակ), բռնագանձվել կամ հաշվանցվել հաճախորդի պարտավորությունների դիմաց:
16. Հրատապ դրամական աջակցության գումարը ընտանիքի անապահովությունը գնահատելիս ընտանիքի ամբողջական եկամտի հաշվարկի մեջ չի մտնում, ինչպես նաև եկամտային հարկով հարկման բազայում չի ներառվում: