ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ
8 օգոստոսի 2020 թվականի N 39
ԵԿԱՄՏԱՅԻՆ ՀԱՐԿՈՎ ՀԱՐԿՄԱՆ ԲԱԶԱՆ ՈՐՈՇԵԼՈՒ ՆՊԱՏԱԿՈՎ ՆՎԱԶԵՑՎՈՂ ԵԿԱՄՈՒՏՆԵՐԻ ՎԵՐԱԲԵՐՅԱԼ
Հարց
Ֆիզիկական անձը ունի սեփականության իրավունքով իրեն պատկանող հասարակական նշանակության տարածք, որը ցանկանում է օտարել մեկ այլ ֆիզիկական անձի: Տվյալ դեպքում արդյո՞ք առաջանում է որևէ հարկային պարտավորություն:
Պատասխան
i
ՀՀ հարկային օրենսգրքի`
- 147-րդ հոդվածի 1-ին մասի 16-րդ կետի համաձայն` եկամտային հարկով հարկման բազան որոշելու նպատակով նվազեցվող եկամուտներ են համարվում սեփականության իրավունքով իրենց պատկանող գույքի (բացառությամբ ձեռնարկատիրական գործունեության առարկա համարվող գույքի) օտարումից անհատ ձեռնարկատեր և նոտար չհանդիսացող ֆիզիկական անձանցից ստացվող եկամուտները: Նույն կետի կիրառության իմաստով`
ա. ձեռնարկատիրական գործունեության առարկա համարվող գույքի օտարում է համարվում ավտոմեքենայի օտարումը, եթե ավտոմեքենան օտարվում է ձեռք բերելուց հետո` 365 օրվա ընթացքում,
բ. նվազեցվող եկամուտներ չեն համարվում օրենսգրքի 145-րդ հոդվածի 1-ին մասի 1-ին կետով սահմանված` կառուցապատող համարվող ֆիզիկական անձին պատկանող գույքի օտարումից հարկային գործակալ չհանդիսացողներից ստացվող եկամուտները:
Հաշվի առնելով վերոգրյալը` հայտնում ենք, որ անհատ ձեռնարկատեր և նոտար չհանդիսացող ֆիզիկական անձի կողմից հասարակական նշանակության տարածքը անհատ ձեռնարկատեր և նոտար չհանդիսացող այլ ֆիզիկական անձի օտարելու դեպքում եկամտային հարկի պարտավորություն չի առաջանում:
ՀՀ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ