ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՈՍՏԻԿԱՆՈՒԹՅԱՆ ՊԵՏԻ
ՀՐԱՄԱՆ
Թիվ 12-Լ
i
ԹԻԿՆԱՊԱՀԻ ԵՎ ՊԱՀՆՈՐԴԻ ՈՐԱԿԱՎՈՐՄԱՆ ՍՏՈՒԳՄԱՆ ՀԱՆՁՆԱԺՈՂՈՎԻ ԿԱԶՄԸ ԵՎ ՀԱՆՁՆԱԺՈՂՈՎԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ
Ղեկավարվելով Հայաստանի Հանրապետության կառավարության 2012 թ. դեկտեմբերի 27-ի թիվ 1671-Ն որոշման հավելվածով հաստատված կարգի 3-րդ կետի պահանջներով և ՀՀ Վարչապետի 2018 թ. հունիսի 11-ի «ՀՀ ոստիկանության կանոնադրությունը հաստատելու մասին» թիվ 751-Լ որոշմամբ հաստատված հավելվածի 20-րդ կետի 8-րդ ենթակետով.
ՀՐԱՄԱՅՈՒՄ ԵՄ`
i
1. Ստեղծել թիկնապահի և պահնորդի որակավորման ստուգման հանձնաժողով հետևյալ կազմով`
- ՀՀ ոստիկանության ՀԱՄԴ վարչության պետ, ոստիկանության գնդապետ Գ. Այվազյան (հանձնաժողովի նախագահ),
- ՀՀ ոստիկանության հասարակական անվտանգության ապահովման գլխավոր վարչության հասարակական կարգի ապահովման վարչության պետի տեղակալ, ոստիկանության գնդապետ Վ. Սահակյան (հանձնաժողովի նախագահի տեղակալ),
- ՀՀ ոստիկանության պետական պահպանության գլխավոր վարչության ծառայության վարչության պետի տեղակալ, ոստիկանության գնդապետ Ա. Մարտիրոսյան,
- ՀՀ ոստիկանության կազմակերպական բաժնի պետի տեղակալ, ոստիկանության գնդապետ Տ. Սահակյան,
- ՀՀ ոստիկանության հասարակական անվտանգության ապահովման գլխավոր վարչության հասարակական կարգի ապահովման վարչության լիցենզավորման և թույլտվության աշխատանքների կազմակերպման բաժնի պետ ոստիկանության փոխգնդապետ Ա. Նազարյան,
- ՀՀ ոստիկանության շտաբի կազմակերպական-վերլուծական վարչության բարեփոխումների և կառավարչական որոշումների համակարգման բաժնի ՀԿՀ ավագ տեսուչ, ոստիկանության մայոր Ա. Մելիքյան
- ՀՀ ոստիկանության կրթահամալիրի ուսումնական կենտրոնի «Ընդհանուր պատրաստականություն» կրթաճյուղի պետ, ոստիկանության գնդապետ Ա. Ալեքսանյան,
- ՀՀ ոստիկանության հասարակական անվտանգության ապահովման գլխավոր վարչության հասարակական կարգի ապահովման վարչության լիցենզավորման և թույլտվության աշխատանքների կազմակերպման բաժնի մասնավոր պահնորդական գործունեության վերահսկողության բաժանմունքի տեսուչ (ավագ տեսուչ), ոստիկանության կապիտան Ա.Գասպարյան (հանձնաժողովի քարտուղար):
(1-ին կետը փոփ. 18.07.2020 թիվ 24-Լ, 10.08.2020 թիվ 29-Լ, 21.08.2020 թիվ 31-Լ, 08.09.2020 թիվ 33-Լ, 04.02.2021 թիվ 5-Լ հրամաններ)
2. Հաստատել թիկնապահի և պահնորդի որակավորման ստուգման հանձնաժողովի կանոնադրությունը` համաձայն հավելվածի:
3. Հրամանը հայտարարել թիկնապահի և պահնորդի որակավորման ստուգման հանձնաժողովի անդամներին:
Ժամանակավոր պաշտոնակատար,
ոստիկանության գնդապետ Ա. Սարգսյան
2020 թ. փետրվարի 25
Երևան
Հավելված
ՀՀ ոստիկանության պետի
ժամանակավոր պաշտոնակատարի
2020 թվականի փետրվարի 25-ի
թիվ 12-Լ հրամանի
ԿԱՆՈՆԱԴՐՈՒԹՅՈՒՆ ԹԻԿՆԱՊԱՀԻ ԵՎ ՊԱՀՆՈՐԴԻ ՈՐԱԿԱՎՈՐՄԱՆ ՍՏՈՒԳՄԱՆ ՀԱՆՁՆԱԺՈՂՈՎԻ
I. ԸՆԴՀԱՆՈՒՐ ԴՐՈՒՅԹՆԵՐ
1. Թիկնապահի և պահնորդի որակավորման ստուգման հանձնաժողովն (այսուհետ` հանձնաժողով) իր գործունեության ընթացքում ղեկավարվում է ՀՀ կառավարության 2012 թ. դեկտեմբերի 27-ի «Թիկնապահի և պահնորդի որակավորման ստուգման կարգը սահմանելու մասին» թիվ 1671-Ն որոշման, սույն հրամանի և այլ իրավական ակտերի պահանջներով:
ՀԱՆՁՆԱԺՈՂՈՎԻ ԽՆԴԻՐՆ ՈՒ ԳՈՐԾԱՌՈՒՅԹՆԵՐԸ
2. Հանձնաժողովի խնդիրը թիկնապահի կամ պահնորդի մասնագիտական կրթություն ստացած անձանց որակավորման ստուգումն է:
3. Հանձնաժողովն իրականացնում է հետևյալ գործառույթները`
1) որակավորման ստուգում թեստավորման առաջադրանքների միջոցով` էլեկտրոնային եղանակով.
2) որակավորման ստուգման դրական գնահատականների հիման վրա ընդունում է որոշում թեկնածուներին որակավորման ստուգման վկայականներ տրամադրելու մասին:
ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԿԱԶՄԱԿԵՐՊՈՒՄԸ
4. Թիկնապահի և պահնորդի որակավորման ստուգման հանձնաժողովի գործունեությունն ուղղված է թիկնապահների և պահնորդների որակավորման ստուգումը պատշաճ կերպով կազմակերպելուն:
5. Հանձնաժողովը իր աշխատանքները կազմակերպում է նիստերի և դրանց նախորդող նախապատրաստական միջոցառումների իրականացման միջոցով:
6. Հանձնաժողովը կազմված է հանձնաժողովի նախագահից, նախագահի տեղակալից, հինգ անդամներից և քարտուղարից:
7. Հանձնաժողովի նիստերի ընթացքի և ընդունված որոշումների վերաբերյալ կազմվում է արձանագրություն, որը ստորագրում են հանձնաժողովի նախագահը, անդամները և քարտուղարը:
8. Հանձնաժողովը.
1) իրավազոր է, եթե նիստին մասնակցում են հանձնաժողովի անդամների կեսից ավելին.
2) կազմակերպում և իրականացնում է որակավորման ստուգման աշխատանքները.
3) ընդունում է որակավորման ստուգմանը մասնակցելու դիմում ներկայացրած անձի կողմից որակավորման ստուգմանը մասնակցելու համար ներկայացված անհրաժեշտ փաստաթղթերը.
4) համապատասխան հարցումներ կատարելու միջոցով պարզում է որակավորման ստուգմանը մասնակցելու դիմում ներկայացրած անձի կողմից դիտավորյալ հանցագործություն կատարած լինելու կամ դիտավորյալ հանցագործության համար դատվածության` սահմանված կարգով հանված կամ մարված լինելու, ինչպես նաև համապատասխան բուժհիմնարկներում հոգեկան հիվանդության, հարբեցողության կամ թմրամոլության պատճառով հաշվառված չլինելու հանգամանքները.
5) կազմում է որակավորման ստուգման թեստավորման հարցաշարերը և թեստավորման առաջադրանքները` ըստ թիկնապահի և պահնորդի մասնագիտությունների.
6) որակավորման ստուգման թեստավորման հարցաշարերը ստուգման օրվանից ոչ ուշ քան վեց ամիս առաջ պարտադիր հրապարակում է http://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում.
7) որակավորման ստուգմանը մասնակցելու համար անհրաժեշտ փաստաթղթերի ներկայացման ժամկետների վերաբերյալ որակավորման ստուգումից առնվազն մեկ ամիս առաջ ոստիկանության http://www.police.am ինտերնետային կայքում և http://www.azdarar.am հասցեում գտնվող Հայաստանի Հանրապետության հրապարակային ծանուցումների պաշտոնական ինտերնետային կայքում տալիս է իրազեկում.
8) որակավորման ստուգման անցկացման օրվա, ժամի և տեղի վերաբերյալ ստուգմանը մասնակցելու դիմում ներկայացրած անձանց պատշաճ կերպով ծանուցում է որակավորման ստուգումից առնվազն յոթ օր առաջ: Ծանուցումը տրվում է գրավոր` ըստ անձի նշած հասցեի, իսկ նրա ցանկությամբ` նաև հեռախոսով, էլեկտրոնային փոստով.
9) հրապարակում է որակավորման ստուգման օրվա արդյունքները` նույն օրը ամփոփելուց հետո մեկ ժամվա ընթացքում.
10) քննարկում է որակավորման ստուգման արդյունքների հետ կապված բողոքները, որոնց պատասխանում է նույն օրը.
11) որակավորման ստուգման արդյունքներով 10 աշխատանքային օրվա ընթացքում թեկնածուներին տրամադրում է որակավորման ստուգման վկայականներ.
12) ընդունում է որակավորման ստուգման հետ կապված այլ որոշումներ.
13) իրականացնում է սույն հրամանով սահմանված այլ լիազորություններ:
9. Հանձնաժողովի անդամի` նիստին հարգելի պատճառով մասնակցության անհնարինության դեպքում այդ մասին պատշաճ տեղեկացվում է հանձնաժողովի նախագահը:
10. Հանձնաժողովը որոշումները ընդունում է ձայների պարզ մեծամասնությամբ:
11. Քվեարկությանը մասնակցում են հանձնաժողովի նախագահը, նախագահի տեղակալը և նիստին ներկա անդամները:
12. Քվեարկության արդյունքում ձայների հավասարության դեպքում որոշումն ընդունվում է թեկնածուի օգտին:
13. Հանձնաժողովի նախագահը`
1) ղեկավարում է հանձնաժողովի աշխատանքները, հրավիրում և վարում է հանձնաժողովի նիստերը.
2) հսկողություն է իրականացնում որակավորման ստուգման բնականոն ընթացքի ապահովման ուղղությամբ.
3) ստորագրում է հանձնաժողովի նիստի արձանագրությունները և ընդունված այլ որոշումները,
4) իրականացնում է սույն հրամանով սահմանված այլ լիազորություններ:
14. Հանձնաժողովի նախագահի` նիստին չմասնակցելու դեպքում նրան փոխարինում է հանձնաժողովի նախագահի տեղակալը:
15. Հանձնաժողովի քարտուղարը`
1) նախապատրաստում է հանձնաժողովի նիստերը.
2) ընդունում, հավաքում և պահպանում է անձանց կողմից որակավորման ստուգմանը մասնակցելու համար ներկայացված անհրաժեշտ փաստաթղթերը.
3) հանձնաժողովի նիստի անցկացման վայրի, օրվա և ժամի վերաբերյալ պատշաճ կերպով իրազեկում է հանձնաժողովի անդամներին.
4) արձանագրում է հանձնաժողովի նիստի ընթացքը, ստորագրում նիստի արձանագրությունը:
ՀԱՆՁՆԱԺՈՂՈՎԻ ԳՈՐԾՈՒՆԵՈՒԹՅԱՆ ԴԱԴԱՐԵՑՈՒՄԸ
16. Հանձնաժողովի գործունեությունը դադարեցվում է իրավունքի ուժով` թիկնապահի և պահնորդի որակավորման ստուգման անհրաժեշտությունը վերանալու դեպքում: