(ուժը կորցրել է 03.12.2020 թիվ 1969-Ա որոշում)
040.0170.230218
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
15 փետրվարի 2018 թվականի N 170-Ա
ԳՈՒՅՔԻ ՓՈԽԱՆԱԿՈՒԹՅԱՆ ԹՈՒՅԼՏՎՈՒԹՅՈՒՆ ՏԱԼՈՒ ՄԱՍԻՆ
Հիմք ընդունելով «Գնումների մասին» Հայաստանի Հանրապետության օրենքի 23-րդ հոդվածի 1-ին մասի 2-րդ կետը, «Պետական կառավարչական հիմնարկների մասին» Հայաստանի Հանրապետության օրենքի 4-րդ հոդվածը, ինչպես նաև Հայաստանի Հանրապետության քաղաքացիական օրենսգրքի 589-րդ հոդվածը և 590-րդ հոդվածի 1-ին մասը` Հայաստանի Հանրապետության կառավարությունը որոշում է.
1. Թույլատրել «Հայաստանի Հանրապետության էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի աշխատակազմ» պետական կառավարչական հիմնարկին ամրացված` պետական սեփականություն հանդիսացող` Երևան քաղաքի Ագաթանգեղոսի 7/1 հասցեում գտնվող, 2017 թվականի օգոստոսի 7-ի դրությամբ 4 400 000 դրամ գնահատված արժեքով, 25.7 քառ. մետր մակերեսով պոմպակայանը և դրա օգտագործման ու սպասարկման համար հատկացված` 0.003446 հեկտար մակերեսով հողամասը (այսուհետ` գույք 1) փոխանակել «ԳՈԼԴԵՆ ՎԵՅ» սահմանափակ պատասխանատվությամբ ընկերությանը (այսուհետ` ընկերություն) սեփականության իրավունքով պատկանող` Երևան քաղաքի Մովսես Խորենացու 29/4 հասցեում գտնվող, 2017 թվականի օգոստոսի 7-ի դրությամբ 3 800 000 դրամ գնահատված արժեքով, 0.002371 հեկտար մակերեսով հողամասի հետ (այսուհետ` գույք 2):
2. Սույն որոշման 1-ին կետով նախատեսված փոխանակության արդյունքում Հայաստանի Հանրապետության կողմից ձեռք բերված գույքն ամրացնել «Հայաստանի Հանրապետության էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի աշխատակազմ» պետական կառավարչական հիմնարկին:
3. Սահմանել, որ ընկերությունը պարտավորվում է սույն որոշումն ուժի մեջ մտնելուց հետո մեկամսյա ժամկետում վճարել գույք 1-ի և գույք 2-ի շուկայական արժեքների տարբերությունը` 600 000 դրամը` Հայաստանի Հանրապետության կենտրոնական գանձապետարանի «Պետական սեփականություն համարվող հիմնական միջոցների (ֆոնդերի) օտարումից մուտքեր» N 900005029013 հաշվին:
4. Հայաստանի Հանրապետության էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի նախագահին` սույն որոշման 3-րդ կետում նշված վճարումից հետո ընկերության հետ կնքել գույքի փոխանակության պայմանագիր` դրանում սահմանելով, որ ընկերությունը պարտավորվում է`
1) եռամսյա ժամկետում իր միջոցների հաշվին իրականացնել պոմպակայանն այլ տարածք տեղափոխելու և վերազինելու հետ կապված աշխատանքները` ներառյալ տեղափոխման ծախսերը.
2) իր միջոցների հաշվին իրականացնել պայմանագրից բխող գույքային իրավունքների պետական գրանցման և նոտարական վավերացման հետ կապված ծախսերը:
5. Հայաստանի Հանրապետության էներգետիկ ենթակառուցվածքների և բնական պաշարների նախարարության ջրային տնտեսության պետական կոմիտեի նախագահին`
1) սույն որոշման 4-րդ կետում նշված պայմանագրի կնքումից հետո 15-օրյա ժամկետում ընկերության հետ համատեղ ապահովել գույքի հանձնման-ընդունման աշխատանքների կատարումը.
2) հսկողություն իրականացնել սույն որոշման 4-րդ կետի 1-ին ենթակետի պահանջների կատարման նկատմամբ:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2018 ԹՎԱԿԱՆԻ ՓԵՏՐՎԱՐԻ 23-ԻՆ