ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ
17 մարտի 2021 թվականի N 170
ԻՐԱՑՄԱՆ ՇՐՋԱՆԱՌՈՒԹՅԱՆ ՈՐՈՇՄԱՆ ՎԵՐԱԲԵՐՅԱԼ
Հարց
Անհատ ձեռնարկատերը միևնույն հարկային տարվա ընթացքում գործել է հարկման հատուկ համակարգերից միկրոձեռնարկատիրության, այնուհետև շրջանառության հարկի համակարգում: Նույն հարկային տարվա ընթացքում շրջանառության հարկի համակարգից անցում է կատարել հարկման ընդհանուր համակարգ: Հարկային տարվա ընթացքում գործունեության բոլոր տեսակների մասով իրացման շրջանառությունը գերազանցել է 115 միլիոն դրամը: Արդյո՞ք գործունեության բոլոր տեսակների մասով իրացման շրջանառության 115 միլիոն դրամի ԱԱՀ-ի շեմը հաշվարկելիս իրացման շրջանառության մեջ ներառվում է նաև միկրոձեռնարկատիրության հարկման հատուկ համակարգի շրջանակում իրականացվող գործունեության տեսակներին վերագրվող իրացման շրջանառությունը:
Պատասխան
ՀՀ հարկային օրենսգրքի`
i
- 59-րդ հոդվածով սահմանված են ԱԱՀ վճարող համարվելու դեպքերն ու ժամկետները: Մասնավորապես, նույն հոդվածի 1-ին մասի 1-ին կետի համաձայն` ԱԱՀ վճարողներ են համարվում նույն հոդվածի 4-րդ մասի 1-ին կետին համապատասխան հարկային մարմնում որպես ԱԱՀ վճարող հաշվառված անհատ ձեռնարկատերերը տվյալ հարկային տարվա հունվարի 1-ից մինչև տվյալ հարկային տարվա ավարտը, եթե հարկ վճարողը տվյալ հարկային տարվա հունվարի 1-ի դրությամբ, օրենսգրքի 13-րդ բաժնի համաձայն, չի կարող համարվել շրջանառության հարկ վճարող,
i
- 254-րդ հոդվածի 2-րդ մասի համաձայն` շրջանառության հարկ վճարող կարող են համարվել այն ռեզիդենտ առևտրային կազմակերպությունը, անհատ ձեռնարկատերը և նոտարը, որոնց նախորդ հարկային տարվա ընթացքում գործունեության բոլոր տեսակների մասով իրացման շրջանառությունը չի գերազանցել 115 միլիոն դրամը: Միաժամանակ, օրենսգրքի 4-րդ հոդվածի 1-ին մասի 50-րդ կետի համաձայն` իրացման շրջանառությունը ապրանքների մատակարարումից, աշխատանքների կատարումից և (կամ) ծառայությունների մատուցումից ստացման ենթակա ձեռնարկատիրական եկամուտն է դրամական արտահայտությամբ, որը չի ներառում ավելացված արժեքի հարկի, ակցիզային հարկի և (կամ) բնապահպանական հարկի գումարները,
i
- 255-րդ հոդվածի 1-ին մասի 2-րդ կետի համաձայն` շրջանառության հարկ վճարողը դադարում է (բացառությամբ օրենսգրքի 254-րդ հոդվածի 6-րդ և 7-րդ մասերով սահմանված դեպքերի) այդպիսին համարվելուց, եթե` ընթացիկ հարկային տարում գործունեության բոլոր տեսակների մասով իրացման շրջանառությունը գերազանցել է 115 միլիոն դրամը` գերազանցելու պահից մինչև տվյալ հարկային տարվա ավարտը:
Հաշվի առնելով վերոգրյալը` հայտնում ենք, որ հարկային տարվա ընթացքում գործունեության բոլոր տեսակների մասով իրացման շրջանառությունը, որը ներառում է նաև միկրոձեռնարկատիրության հարկման հատուկ համակարգի շրջանակներում իրականացվող գործունեության տեսակներին վերագրվող իրացման շրջանառությունը, 115 միլիոն դրամը գերազանցելու դեպքում անհատ ձեռնարկատերը դադարում է համարվել շրջանառության հարկ վճարող: Ընդ որում, հաջորդ հարկային տարվա հունվարի 1-ից ևս անհատ ձեռնարկատերը չի կարող համարվել շրջանառության հարկ վճարող:
ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ