ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
15 հուլիսի 2021 թվականի N 1163-Ն
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2003 ԹՎԱԿԱՆԻ ՕԳՈՍՏՈՍԻ 21-Ի N 1129-Ն ՈՐՈՇՄԱՆ ՄԵՋ ՓՈՓՈԽՈՒԹՅՈՒՆՆԵՐ ԵՎ ԼՐԱՑՈՒՄՆԵՐ ԿԱՏԱՐԵԼՈՒ ՄԱՍԻՆ
Հիմք ընդունելով «Նորմատիվ իրավական ակտերի մասին» օրենքի 34-րդ հոդվածի 1-ին մասը, «Թմրամիջոցների և հոգեմետ (հոգեներգործուն) նյութերի մասին» օրենքի 4-րդ հոդվածի 1-ին և 2-րդ մասերը` Հայաստանի Հանրապետության կառավարությունը որոշում է.
1. Հայաստանի Հանրապետության կառավարության 2003 թվականի օգոստոսի 21-ի «Հայաստանի Հանրապետությունում հսկման ենթակա թմրամիջոցների, հոգեմետ նյութերի և դրանց պրեկուրսորների կազմը (ցանկը) հաստատելու մասին» N 1129-Ն որոշմամբ հաստատված հավելվածում կատարել հետևյալ փոփոխությունները`
1) Ցուցակ N 1-ում` «Կանեփ բոլոր տեսակների» բառերից հետո լրացնել «, բացառությամբ Ցուցակ N 2-ում նշված կանեփի տեսակների: Առանց լիցենզիայի կամ լիցենզիայի պայմանների խախտմամբ արտադրված Ցուցակ N 2-ում նշված կանեփի տեսակը նույնպես համարվում է արգելված: «բառերով.
2) Ցուցակ N 1-ում «Կաննաբիս` կանեփի տարբեր տեսակներից ստացվող պատրաստուկները, որոնք պարունակում են տետրահիդրոկաննաբինոլներ` անկախ այն բանից, թե որ անվանմամբ են հանդես գալիս» բառերը փոխարինել «Կաննաբիս` կանեփի տարբեր տեսակներից ստացվող պատրաստուկները, որոնք պարունակում են Ցուցակ N2-ում նախատեսված կանեփի տեսակների համար թույլատրված տետրահիդրոկաննաբինոլի կոնցենտրացիայից ավելի` անկախ այն բանից, թե որ անվանմամբ են հանդես գալիս: Առանց լիցենզիայի կամ լիցենզիայի պայմանների խախտմամբ արտադրված Ցուցակ N 2-ում նշված կանեփի տեսակը նույնպես համարվում է արգելված:».
3) Ցուցակ N 2-ում`
ա) «Ամֆեպրամոն» բառից հետո` հաջորդ պարբերությունը լրացնել «արտադրական կանեփ` «Թմրամիջոցների և հոգեմետ (հոգեներգործուն) նյութերի մասին» Հայաստանի Հանրապետության օրենքով նախատեսված նպատակների համար նախատեսված լիցենզավորված անձի կողմից լիցենզավորման պայմանների համաձայն արտադրված կանեփի մշակաբույս, որում կանաբիդիոլի (CBD) պարունակությունը գերազանցում է տետրահիդրոկաննաբինոլի (THC) պարունակությանը, ընդ որում` տետրահիդրոկաննաբինոլի (THC) տոկոսային պարունակությունը նմուշառված զանգվածում հավասար կամ ցածր է 0,3 տոկոսից»:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
Հայաստանի Հանրապետության
վարչապետի պաշտոնակատար Ն. Փաշինյան
2021 թ. հուլիսի 19
Երևան
Պաշտոնական հրապարակման օրը` 19 հուլիսի 2021 թվական: