ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ
27 հուլիսի 2021 թվականի N 222
ՎԵՐԱՊԱՏՐԱՍՏՄԱՆ ԾԱՌԱՅՈՒԹՅՈՒՆՆԵՐԻ ԴԻՄԱՑ ՎՃԱՐԻ ԶԵՂՉԸ ՖԻԶԻԿԱԿԱՆ ԱՆՁԱՆՑ ՀԱՄԱՐ ԵԿԱՄՈՒՏ ՀԱՆԴԻՍԱՆԱԼՈՒ ԵՎ ԵԿԱՄՏԱՅԻՆ ՀԱՐԿ ՎՃԱՐԵԼՈՒ ՎԵՐԱԲԵՐՅԱԼ
Հարց
Ընկերությունը մտադիր է կազմակերպել վերապատրաստման դասընթացներ ընկերության աշխատակից չհանդիսացող ֆիզիկական անձանց համար: Մասնակիցներին տրամադրվելու է զեղչ` նմանատիպ դասընթացների համար շուկայում գործող արժեքի համեմատ:
Արդյո՞ք տրամադրված զեղչը հանդիսանում է ֆիզիկական անձանց համար եկամուտ և ընկերությունը որպես հարկային գործակալ պարտավորություն է կրում զեղչված գումարից հաշվարկել և վճարել եկամտային հարկ:
Պատասխան
ՀՀ հարկային օրենսգրքի`
i
- 4-րդ հոդվածի 1-ին մասի 27-րդ կետի համաձայն` համախառն եկամուտը հաշվետու ժամանակաշրջանում ստացված կամ ստացման ենթակա Օրենսգրքով սահմանված եկամուտների հանրագումարն է.
i
- 140-րդ հոդվածի 1-ին մասի համաձայն` եկամտային հարկ վճարողներ են համարվում ռեզիդենտ և ոչ ռեզիդենտ ֆիզիկական անձինք,
i
- 141-րդ հոդվածի 1-ին մասի համաձայն` ռեզիդենտ ֆիզիկական անձանց համար եկամտային հարկով հարկման օբյեկտ է համարվում ՀՀ աղբյուրներից և (կամ) ՀՀ-ից դուրս գտնվող աղբյուրներից ստացվող համախառն եկամուտը, իսկ ոչ ռեզիդենտ անձանց համար եկամտային հարկով հարկման օբյեկտ է համարվում ՀՀ աղբյուրներից ստացվող համախառն եկամուտը, բացառությամբ նույն մասով սահմանված դեպքերի:
Հաշվի առնելով վերոգրյալը` հայտնում ենք, որ գրությամբ նշված ֆիզիկական անձանց ծառայությունների մատուցման դեպքում, եթե զեղչվում է կողմերի միջև իրականացվող գործարքի արժեքը` մինչև կողմերի մոտ պարտավորությունների փաստացի առաջացման պահը, ապա եկամտային հարկով հարկման օբյեկտ չի առաջանում:
ՀՀ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ