(ուժը կորցրել է 02.07.01 թիվ 588 որոշում)
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
11 հունվարի 1995 թվականի թիվ 8
i
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ՁԵՌՆԱՐԿՈՒԹՅՈՒՆՆԵՐԻ, ՀԻՄՆԱՐԿՆԵՐԻ ԵՎ ԿԱԶՄԱԿԵՐՊՈՒԹՅՈՒՆՆԵՐԻ ՀԱՇԻՎՆԵՐԻՑ ՎՃԱՐՈՒՄՆԵՐԻՑ ՎՃԱՐՈՒՄՆԵՐԻ ՀԵՐԹԱԿԱՆՈՒԹՅՈՒՆ ՍԱՀՄԱՆԵԼՈՒ ՄԱՍԻՆ
Հայաստանի Հանրապետությունում ձեռնարկությունների, հիմնարկների և կազմակերպությունների հաշիվներից վճարումների հերթականությունը կանոնակարգելու նպատակով Հայաստանի Հանրապետության կառավարությունը որոշում է`
1. Սահմանել Հայաստանի Հանրապետությունում ձեռնարկությունների, հիմնարկների և կազմակերպությունների հաշիվներից վճարումների հետևյալ հերթականությունը'
ա) Հայաստանի Հանրապետության օրենսդրությամբ սահմանված հարկերը և պետական բյուջեի նկատմամբ այլ պարտադիր վճարումները.
i
Ընդ որում, հարկերը և պետական բյուջեի նկատմամբ այլ պարտադիր վճարումները Հայաստանի Հանրապետության հարկային պետական տեսչության մարմինների կատարողական փաստաթղթերի (վճարման պահանջագրերի) հիման վրա անվիճելի կարգով կարող են կատարվել այդ հաշիվներին առկա կամ հետագայում մինչև կատարողական փաստաթղթերի (վճարման պահանջագրերի) լրիվ կատարումը` փաստացի մուտքագրված յուրաքանչյուր գումարի 75 տոկոսի չափով:
Այն դեպքում, երբ կատարողական փաստաթղթերի (վճարման պահանջագրերի) ներկայացման պահին տվյալ հաշվում առկա գումարի 75 տոկոսը գերազանցում է պահանջագրի գումարին, ապա այն կատարվում է միանգամից և ամբողջությամբ:
/լրաց. 12.06.95 թիվ 331 որոշում/
բ) Հայաստանի Հանրապետության կենսաթոշակային և զբաղվածության ֆոնդին կատարվող մուծումները.
գ) մյուս բոլոր վճարումները` վճարողի կողմից ինքնուրույնաբար:
2. Սահմանել, որ բյուջետային հիմնարկների և կազմակերպությունների վճարումների իրականացման կարգը սահմանում է Հայաստանի Հանրապետության ֆինանսների նախարարությունը:
i
Սահմանել, որ սույն որոշման 1-ին կետի գործողությունը չի տարածվում Հայաստանի Հանրապետության օրենսդրությամբ սահմանված կարգով միայնակ մայրերին, մինչև 2 տարեկան երեխաների խնամքի համար տրվող ամենամսյա պետական նպաստների, մինչև 17 տարեկան (սովորող և կրթաթոշակ չստացող` մինչև 18 տարեկան) երեխաներին տրվող ամենամսյա նպաստների և երեխայի ծննդյան կապակցությամբ տրվող միանվագ նպաստների վճարման նպատակով ձեռնարկությունների, հիմնարկների և կազմակերպությունների հաշիվներին փոխանցված միջոցների վրա: Այդ միջոցների հաշվին վճարումները կատարվում են Հայաստանի Հանրապետության օրենսդրությամբ սահմանված ժամկետներում` անկախ հարկերի և Հայաստանի Հանրապետության պետական բյուջեի նկատմամբ այլ պարտադիր վճարումների գծով Հայաստանի Հանրապետության հարկային տեսչության մարմինների կողմից ձեռնարկությունների, հիմնարկների և կազմակերպությունների հաշիվներին ներկայացված անվիճելի փաստաթղթերի առկայությունից:
/լրաց. 28.12.95 թիվ 119 որոշում/
3. Առաջարկել Հայաստանի Հանրապետության կենտրոնական բանկին` մեկշաբաթյա ժամկետում սույն որոշումից բխող համապատասխան փոփոխություններ և լրացումներ կատարել Հայաստանի Հանրապետության կենտրոնական բանկի նորմատիվ ակտերում:
4. Ուժը կորցրած ճանաչել Հայաստանի Հանրապետության կառավարության 1992 թվականի հունվարի 5-ի «Միավորումների, ձեռնարկությունների և կազմակերպությունների հաշիվներից վճարումների հերթականության մասին» թիվ 9 որոշումը: