040.0113.070202
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«7» փետրվարի 2002 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
7 փետրվարի 2002 թվականի N 113
2002 ԹՎԱԿԱՆԻ ԱՂՔԱՏՈՒԹՅԱՆ ԸՆՏԱՆԵԿԱՆ ՆՊԱՍՏԻ ԵՎ ՄԻԱՆՎԱԳ ԴՐԱՄԱԿԱՆ ՕԳՆՈՒԹՅԱՆ ՎՃԱՐՈՒՄՆԵՐԸ ԿԱԶՄԱԿԵՐՊԵԼՈՒ ՄԱՍԻՆ
Սոցիալական աջակցության հասցեականության մեծացման և 2002 թվականի աղքատության ընտանեկան նպաստի ու միանվագ դրամական օգնության վճարման աշխատանքների կազմակերպման նպատակով Հայաստանի Հանրապետության կառավարությունը որոշում է.
i
1. Ժամանակավորապես կասեցնել Հայաստանի Հանրապետության կառավարության 2000 թվականի հուլիսի 3-ի «Հայաստանի Հանրապետությունում աղքատության ընտանեկան նպաստի և միանվագ դրամական օգնության նշանակման ու վճարման կարգի մասին» N 350 որոշման 5-րդ կետի, այդ որոշմամբ հաստատված կարգի 1-ին գլխի 6-րդ և 7-րդ կետերի և 5-րդ գլխի դրույթների գործողությունը:
(1-ին կետն ուժը կորցրել է 15.04.02 թիվ 407 որոշում)
2. Հայաստանի Հանրապետության սոցիալական ապահովության նախարարությանը` մինչև 2002 թվականի մարտի 1-ը` սահմանված կարգով Հայաստանի Հանրապետության կառավարություն ներկայացնել առաջարկություն ընտանիքի անապահովության սահմանային մեծության միավորի, բազային նպաստի, ընտանիքի յուրաքանչյուր անդամին տրվող հավելման չափի վերաբերյալ և աղքատության ընտանեկան նպաստի ու միանվագ դրամական օգնության վճարման համար նախատեսված ֆինանսական միջոցների ամսական չափն ըստ մարզերի` հաշվի առնելով սոցիալական ծառայությունների տարածքային կենտրոններում հաշվառված նպաստառու ընտանիքների թիվն ու Հայաստանի Հանրապետության պետական բյուջեով աղքատության ընտանեկան նպաստի համար հատկացված ֆինանսական միջոցները:
3. Հայաստանի Հանրապետության ֆինանսների և էկոնոմիկայի նախարարությանը` 2002 թվականի հունվար, փետրվար, մարտ ամիսներին անապահովության գնահատման համակարգում հաշվառված ընտանիքների փաստագրման աշխատանքների արդյունավետ իրականացման նպատակով 2002 թվականի 1-ին եռամսյակում Հայաստանի Հանրապետության սոցիալական ապահովության նախարարությունն ու սոցիալական ծառայությունների տարածքային կենտրոններն ապահովել Հայաստանի Հանրապետության պետական բյուջեով տնտեսական ծախսերի և գործուղումների համար նախատեսված գումարների առաջնահերթ ֆինանսավորմամբ:
i
4. Հայաստանի Հանրապետության սոցիալական ապահովագրության պետական հիմնադրամին` մինչև 2002 թվականի փետրվարի 12-ը Հայաստանի Հանրապետության սոցիալական ապահովության նախարարությանը տրամադրել տեղեկատվություն կենսաթոշակառուների մասին` նշելով վերահաշվարկված կենսաթոշակների չափը` հիմք ընդունելով Հայաստանի Հանրապետության կառավարության 2001 թվականի նոյեմբերի 12-ի «Բազային կենսաթոշակի և յուրաքանչյուր տարվա աշխատանքային (ապահովագրական) ստաժի համար տրվող հավելման չափերը սահմանելու մասին» N 1092 որոշումը:
5. Սույն որոշումն ուժի մեջ է մտնում պաշտոնական հրապարակման պահից: