ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԱՌՈՂՋԱՊԱՀՈՒԹՅԱՆ ՆԱԽԱՐԱՐ
ՀՐԱՄԱՆ
27 մայիսի 2020 թվականի N 14-Ն
ԾԽԱԽՈՏԱՅԻՆ ԱՐՏԱԴՐԱՏԵՍԱԿԻ ԿԱՄ ԾԽԱԽՈՏԱՅԻՆ ԱՐՏԱԴՐԱՏԵՍԱԿՆԵՐԻ ՓՈԽԱՐԻՆԻՉԻ ՕԳՏԱԳՈՐԾՄԱՆ ԱՐԳԵԼՔԻ ԵՎ ՍԱՀՄԱՆԱՓԱԿՈՒՄՆԵՐԻ ՄԱՍԻՆ ՏԵՂԵԿԱՏՎՈՒԹՅՈՒՆ ՊԱՐՈՒՆԱԿՈՂ ՑՈՒՑԱՆԱԿՆԵՐԻՆ ՆԵՐԿԱՅԱՑՎՈՂ ՊԱՀԱՆՋՆԵՐԸ ՍԱՀՄԱՆԵԼՈՒ ՄԱՍԻՆ
i
Հիմք ընդունելով «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքի 6-րդ հոդվածի 4-րդ մասը`
ՀՐԱՄԱՅՈՒՄ ԵՄ`
1. Սահմանել ծխախոտային արտադրատեսակի կամ ծխախոտային արտադրատեսակների փոխարինիչի օգտագործման արգելքի և սահմանափակումների մասին տեղեկատվություն պարունակող ցուցանակներին ներկայացվող պահանջները` համաձայն հավելվածի:
2. Սույն հրամանն ուժի մեջ է մտնում պաշտոնական հրապարակմանը հաջորդող օրվանից:
Ա. Թորոսյան
Հավելված
Առողջապահության նախարարի
2020 թվականի մայիսի 27-ի
N 14-Ն հրամանի
ԾԽԱԽՈՏԱՅԻՆ ԱՐՏԱԴՐԱՏԵՍԱԿԻ ԿԱՄ ԾԽԱԽՈՏԱՅԻՆ ԱՐՏԱԴՐԱՏԵՍԱԿՆԵՐԻ ՓՈԽԱՐԻՆԻՉԻ ՕԳՏԱԳՈՐԾՄԱՆ ԱՐԳԵԼՔԻ ԵՎ ՍԱՀՄԱՆԱՓԱԿՈՒՄՆԵՐԻ ՄԱՍԻՆ ՏԵՂԵԿԱՏՎՈՒԹՅՈՒՆ ՊԱՐՈՒՆԱԿՈՂ ՑՈՒՑԱՆԱԿՆԵՐԻՆ ՆԵՐԿԱՅԱՑՎՈՂ ՊԱՀԱՆՋՆԵՐ
1. Սույն հավելվածով սահմանվում են ծխախոտային արտադրատեսակի կամ ծխախոտային արտադրատեսակների փոխարինիչի օգտագործման արգելքի և սահմանափակումների մասին տեղեկատվություն պարունակող ցուցանակներին (այսուհետ` Ցուցանակ) ներկայացվող պահանջները:
2. Ցուցանակները լինում են` հորիզոնական և ուղղահայաց:
3. Ցուցանակի թույլատրվող չափերն են`
1) ուղղահայաց դիրքով` ցուցանակի չափը 210x297 միլիմետր է, իսկ ցուցանակում տեղադրված ծխախոտային արտադրատեսակի կամ ծխախոտային արտադրատեսակների փոխարինիչի օգտագործումն արգելող նշանի (այսուհետ` արգելող նշան) չափը` 200x200 միլիմետր:
2) հորիզոնական դիրքով` ցուցանակի չափը 280x105 միլիմետր է, իսկ Ցուցանակում տեղադրված արգելող նշանի չափը` 100x100 միլիմետր:
4. Ցուցանակի վրա տեղադրվում են`
1) «Ծխախոտային արտադրատեսակների և դրանց փոխարինիչների օգտագործման հետևանքով առողջությանը հասցվող վնասի նվազեցման և կանխարգելման մասին» օրենքի անվանումը` Ցուցանակի ներքևի հատվածում,
2) սույն հավելվածի Ձև 1-ով սահմանված ծխախոտային արտադրատեսակի կամ ծխախոտային արտադրատեսակների փոխարինիչի օգտագործումն արգելող նշանը,
3) սույն հավելվածի 5-րդ կետով սահմանված ծխախոտային արտադրատեսակի կամ ծխախոտային արտադրատեսակների փոխարինիչի օգտագործման արգելքը խախտելու դեպքում առաջացող տուգանքի չափերը ներկայացնող նախազգուշացման տեքստերը (այսուհետ` նախազգուշացման տեքստեր):
5. Ցուցանակի վրա տեղադրվում են հետևյալ նախազգուշացման տեքստերը.
1) արգելված վայրերում` համաձայն Ձև 2-ի (ուղղահայաց) և Ձև 2.1-ի (հորիզոնական).
«օգտագործումն առաջացնում է տուգանք` 50 000 ՀՀ դրամ»,
2) ընդհանուր օգտագործման տրանսպորտային միջոցներում կամ թեթև մարդատար-տաքսի ավտոմոբիլներում` համաձայն Ձև 3-ի (ուղղահայց) և Ձև 3.1-ի (հորիզոնական).
«ընդհանուր օգտագործման տրանսպորտային միջոցներում կամ թեթև մարդատար-տաքսի ավտոմոբիլներում օգտագործումն առաջացնում է տուգանք` 20 000 ՀՀ դրամ»,
3) ծխախոտային արտադրատեսակի կամ դրանց պատկանելիքների կամ ծխախոտային արտադրատեսակների փոխարինիչի վաճառքի իրականացման վայրերում` համաձայն Ձև 4-ի (ուղղահայց) և Ձև 4.1-ի (հորիզոնական).
«վաճառքը` 18 տարին չլրացած անձանց, առաջացնում է տուգանք` 80 000-100 000 ՀՀ դրամ»:
6. Արգելող նշանին ներկայացվող պահանջներն են`
1) գույները` սև, սպիտակ և կարմիր,
2) արգելող նշանն իրենից ներկայացնում է սպիտակ գույնի շրջան` երիզված կարմիր լայն եզրագծով, որն իր հերթին ունի նեղ սպիտակ եզրագիծ: Շրջանի կենտրոնում հորիզոնական դիրքով տեղադրվում են ամենատարածված ծխախոտային արտադրատեսակի, ծխախոտային արտադրատեսակների փոխարինիչի` սիգարետի և էլեկտրոնային սիգարետի գրաֆիկական պատկերները, որոնք 45 աստիճան անկյան տակ, աջից-ձախ մասնակիորեն փակված են իրենց հատող կարմիր գծով,
3) արգելող նշանի տրամագիծը (սպիտակ եզրագծով)` 200x200 միլիմետր,
4) սպիտակ շրջանի տրամագիծը` 159 միլիմետր,
5) կարմիր երիզի տրամագիծը` 193 միլիմետր,
6) կարմիր երիզի հաստությունը` 17 միլիմետր,
7) թեք կարմիր գծի հաստությունը 17 միլիմետր,
8) սիգարետի պատկերի չափերը` 115x34 միլիմետր,
9) էլեկտրոնային սիգարետի պատկերի չափերը` 132x45 միլիմետր:
7. Սույն հավելվածի 3-րդ կետի 1-ին ենթակետով նախատեսված չափի մակերեսի բացակայության դեպքում թույլատրվում է ուղղահայաց դիրքով ցուցանակի չափը համաչափ փոքրացնել 50 տոկոսով:
8. Ցուցանակը տեղադրվում է ծխախոտային արտադրատեսակի կամ ծխախոտային արտադրատեսակների փոխարինիչի օգտագործումն արգելված վայրում` հաստատությունների կամ հիմնարկների կամ վայրերի կամ տարածքների տեսանելի հատվածներում, մասնավորապես յուրաքանչյուր մուտքի մոտ, ընդհանուր օգտագործման տարածքներում, այդ թվում` սանհանգույցներում, իսկ հասարակական տրանսպորտային միջոցներում` դռան վրա արտաքին կողմից և ներսում` տեսանելի հատվածում:
9. Բացի հիմնական ցուցանակներից, գործունեության իրականացման տարածքներում և վայրերում լրացուցիչ ցուցանակներ կարող են տեղադրվել սեփականատիրոջ կամ սեփականատիրոջ կողմից լիազորված այլ անձի ցանկությամբ:
Ձև 1
Ձև 2
Ձև 3
Ձև 4
