Սեղմել Esc փակելու համար:
«ՀԱՅԱՍՏԱՆԻ ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈ...
Քարտային տվյալներ

Տեսակ
Գործում է
Ընդունող մարմին
Ընդունման ամսաթիվ
Համար

Վավերացման ամսաթիվ
ՈՒժի մեջ մտնելու ամսաթիվ
ՈՒժը կորցնելու ամսաթիվ
Ընդունման վայր
Սկզբնաղբյուր

Ժամանակագրական տարբերակ Փոփոխություն կատարող ակտ

Որոնում:
Բովանդակություն

Հղում իրավական ակտի ընտրված դրույթին X
irtek_logo

«ՀԱՅԱՍՏԱՆԻ ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆ ԶԱՐԳԱՑՄ ...

 

 

040.0282.190302

«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ

 

«19» մարտի 2002 թ.

 

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ

ՈՐՈՇՈՒՄ

 

19 մարտի 2002 թվականի N 282

 

i

«ՀԱՅԱՍՏԱՆԻ ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆ ԶԱՐԳԱՑՄԱՆ ԱԶԳԱՅԻՆ ԿԵՆՏՐՈՆ» ՀԻՄՆԱԴՐԱՄ ՍՏԵՂԾԵԼՈՒ ՄԱՍԻՆ

 

Համաձայն Հայաստանի Հանրապետության քաղաքացիական օրենսգրքի 123-րդ հոդվածի և Հայաստանի Հանրապետության կառավարության 2001 թվականի դեկտեմբերի 27-ի «Փոքր և միջին ձեռնարկատիրության զարգացման 2002 թվականի պետական ծրագիրը հաստատելու մասին» N 1281 որոշման` Հայաստանի Հանրապետության կառավարությունը որոշում է.

1. Ստեղծել «Հայաստանի փոքր և միջին ձեռնարկատիրության զարգացման ազգային կենտրոն» հիմնադրամ:

2. Հաստատել «Հայաստանի փոքր և միջին ձեռնարկատիրության զարգացման ազգային կենտրոն» հիմնադրամի կանոնադրությունը (կցվում է):

3. Հայաստանի Հանրապետության արդյունաբերության և առևտրի նախարարությանը` «Հայաստանի փոքր և միջին ձեռնարկատիրության զարգացման ազգային կենտրոն» հիմնադրամի գործունեության համար նրան անհատույց տրամադրել համապատասխան տարածք և սահմանված կարգով ապահովել նրա պետական գրանցումը:

4. Հայաստանի Հանրապետության ֆինանսների և էկոնոմիկայի նախարարությանը` «Հայաստանի փոքր և միջին ձեռնարկատիրության զարգացման ազգային կենտրոն» հիմնադրամի պետական գրանցումից հետո Հայաստանի Հանրապետության կառավարության անունից որպես նշված հիմնադրամի հիմնադրման կամավոր գույքային վճար հիմնադրամին հատկացնել 8938,3 հազ. դրամ` Հայաստանի Հանրապետության 2002 թվականի պետական բյուջեով` Հայաստանում փոքր և միջին ձեռնարկատիրության զարգացման պետական ծրագրին Հայաստանի Հանրապետության կառավարության մասնակցության համար նախատեսված միջոցների հաշվին:

5. Սույն որոշումն ուժի մեջ է մտնում 2002 թվականի մարտի 19-ից:

 

Հաստատված է

Հայաստանի Հանրապետության

կառավարության 2002 թվականի

մարտի 19-ի N 282 որոշմամբ

 

ԿԱՆՈՆԱԴՐՈՒԹՅՈՒՆ «ՀԱՅԱՍՏԱՆԻ ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆ ԶԱՐԳԱՑՄԱՆ ԱԶԳԱՅԻՆ ԿԵՆՏՐՈՆ» ՀԻՄՆԱԴՐԱՄԻ

 

I. ԸՆԴՀԱՆՈՒՐ ԴՐՈՒՅԹՆԵՐ

 

1. «Հայաստանի փոքր և միջին ձեռնարկատիրության զարգացման ազգային կենտրոն» հիմնադրամը (այսուհետև` հիմնադրամ) Հայաստանի Հանրապետության կառավարության գույքային վճարների հիման վրա ստեղծված և անդամություն չունեցող ոչ առևտրային կազմակերպություն է:

2. Հիմնադրամն ստեղծվել է Հայաստանի Հանրապետության քաղաքացիական օրենսգրքի (այսուհետև` օրենսգիրք) պահանջներին համապատասխան և իր գործունեության ընթացքում ղեկավարվում է Հայաստանի Հանրապետության Սահմանադրությամբ, Հայաստանի Հանրապետության օրենսդրությամբ, այլ իրավական ակտերով և սույն կանոնադրությամբ:

3. Հիմնադրամը գործում է Հայաստանի Հանրապետության ամբողջ տարածքում` Հայաստանի Հանրապետության օրենսդրությանը համապատասխան:

4. Հիմնադրամի գտնվելու վայրն է` Հայաստանի Հանրապետություն, քաղ. Երևան:

5. Հիմնադրամի անվանումն է`

հայերեն լրիվ` «Հայաստանի փոքր և միջին ձեռնարկատիրության զարգացման ազգային կենտրոն» հիմնադրամ,

հայերեն կրճատ` «Հայաստանի ՓՄՁ ԶԱԿ»,

ռուսերեն լրիվ` Ֆոնդ «Նացիոնալնիյ ցենտռ ռազվիտիյա մալոգո ի սրեդնեգո պրեդպրինիմատելստվա Արմենիի»,

ռուսերեն կրճատ` «ՆՑՊ ՄՍՊ Արմենիի»,

անգլերեն լրիվ` Fund «Small and Medium Entrepreneurship Development National Center of Armenia»,

անգլերեն կրճատ` «SME DNC of Armenia»:

6. Հիմնադրամի գործունեության ժամկետը չի սահմանափակվում:

 

II. ՀԻՄՆԱԴՐԱՄԻ ԳՈՐԾՈՒՆԵՈՒԹՅԱՆ ՆՊԱՏԱԿՆԵՐՆ ՈՒ ԽՆԴԻՐՆԵՐԸ

 

7. Հիմնադրամի գործունեության նպատակներն են`

ա) Հայաստանի Հանրապետությունում փոքր և միջին ձեռնարկատիրության (այսուհետև` ՓՄՁ) ոլորտին պետական աջակցության ապահովումը.

բ) Հայաստանի Հանրապետությունում ՓՄՁ-ի ոլորտի զարգացումը.

գ) ՓՄՁ-ի սուբյեկտների գործունեության արդյունավետության և մրցունակության բարձրացումը.

դ) ՓՄՁ-ի սուբյեկտներին տեխնիկական և ֆինանսական աջակցության տրամադրումը:

8. Հիմնադրամի խնդիրներն են`

ա) ՓՄՁ-ի ոլորտի զարգացման նպատակային, այդ թվում` տարածաշրջանային ծրագրերի և միջոցառումների իրականացումը.

բ) միջազգային կազմակերպությունների հետ ՓՄՁ-ի զարգացման համատեղ ծրագրերի իրականացումը.

գ) ՓՄՁ-ի ոլորտի զարգացման ծրագրերի համակարգումը.

դ) ՓՄՁ-ի սուբյեկտներին մատուցվող խորհրդատվական և տեղեկատվական ծառայությունների մատչելիության ապահովումը.

ե) ՓՄՁ-ի սուբյեկտների ֆինանսական (վարկային) և ներդրումային հնարավորությունների ընդլայնումը.

զ) ՓՄՁ-ի սուբյեկտների արտաքին տնտեսական գործունեության խթանումը.

է) ՓՄՁ-ի սուբյեկտների նորարարական գործունեությանը և ժամանակակից տեխնոլոգիաների ներդրմանն աջակցությունը.

ը) ՓՄՁ-ի սուբյեկտների համար կադրերի պատրաստման և վերապատրաստման հնարավորությունների ընդլայնումը:

 

III. ՀԻՄՆԱԴՐԱՄԻ ԻՐԱՎԱԿԱՆ ԿԱՐԳԱՎԻՃԱԿԸ

 

9. Հիմնադրամի իրավունակությունը ծագում է նրա պետական գրանցման պահից և դադարում` նրա լուծարմամբ: Հիմնադրամն ունի ինքնուրույն հաշվեկշիռ: Այն կարող է Հայաստանի Հանրապետության օրենսդրությամբ սահմանված կարգով հաշվարկային և այլ հաշիվներ բացել Հայաստանի Հանրապետության ու օտարերկրյա բանկերում: Հիմնադրամն ունի իր անվանմամբ կլոր կնիք (հայերեն, ռուսերեն և անգլերեն գրառումներով), դրոշմակնիք և ձևաթղթեր:

10. Հիմնադրամն ունի սեփական առանձնացված գույք, իր պարտավորությունների համար պատասխանատու է այդ գույքով, կարող է իր անունից ձեռք բերել ու իրականացնել գույքային և անձնական ոչ գույքային իրավունքներ, կրել պարտականություններ, դատարանում հանդես գալ որպես հայցվոր կամ պատասխանող:

11. Հիմնադրամը կարող է`

ա) Հայաստանի Հանրապետության օրենսդրությամբ չարգելված ցանկացած ձևով ձեռք բերել գույք, ինչպես նաև արժեթղթեր, տնօրինել, տիրապետել և օգտագործել դրանք, ինչպես նաև դրանց արդյունքում առաջացած եկամուտը.

բ) ինքնուրույն կազմավորել իր ֆինանսական միջոցները, ինչպես նաև վարկ վերցնել.

գ) Հայաստանի Հանրապետության օրենսդրությամբ սահմանված կարգով կնքել պայմանագրեր և ստանձնել պարտականություններ.

դ) հրատարակել նյութեր և ունենալ դրանց նկատմամբ հեղինակային իրավունք.

ե) սահմանված կարգով իրականացնել ձեռնարկատիրական գործունեություն` ուղղված իր կանոնադրական նպատակների իրագործմանը:

12. Հիմնադրամը պարտավոր է ամեն տարի հրապարակել հաշվետվություն իր գործունեության և գույքի օգտագործման մասին:

13. Իր կանոնադրական նպատակներն իրականացնելու համար հիմնադրամն իրավունք ունի հիմնադրելու տնտեսական ընկերություններ և (կամ) մասնակից լինելու դրանց:

14. Հիմնադրամի գործունեության արդյունքում ստացված եկամուտը չի կարող փոխանցվել նրա հիմնադրին:

 

IV. ՀԻՄՆԱԴՐԱՄԻ ՄԱՍՆԱՃՅՈՒՂԵՐԸ, ՆԵՐԿԱՅԱՑՈՒՑՉՈՒԹՅՈՒՆՆԵՐԸ ԵՎ ՀԻՄՆԱՐԿՆԵՐԸ

 

15. Հիմնադրամն իրավունք ունի օրենսգրքի, այլ օրենքների ու իրավական ակտերի պահանջներին համապատասխան ստեղծելու մասնաճյուղեր, ներկայացուցչություններ և հիմնարկներ:

16. Հիմնադրամի կողմից օտարերկրյա պետություններում մասնաճյուղերը, ներկայացուցչությունները և հիմնարկներն ստեղծվում են մասնաճյուղերի, ներկայացուցչությունների և հիմնարկների գտնվելու վայրի երկրի օրենսդրությանը համապատասխան:

17. Մասնաճյուղերի, ներկայացուցչությունների և հիմնարկների ղեկավարները նշանակվում են հիմնադրամի գործադիր տնօրենի և հաստատվում հոգաբարձուների խորհրդի կողմից:

 

V. ՀԻՄՆԱԴՐԱՄԻ ՍԵՓԱԿԱՆՈՒԹՅՈՒՆԸ

 

18. Հիմնադրամի գույքը հիմնադրամի սեփականությունն է: Հիմնադրամի սեփականության իրավունքի օբյեկտներն են`

ա) գույքը` ներառյալ դրամական միջոցները, արժեթղթերը և գույքային իրավունքները, այդ թվում` մտավոր գործունեության արդյունքները` ներառյալ դրանց նկատմամբ բացառիկ իրավունքները (մտավոր սեփականությունը).

բ) գույքի ոչ նյութական օբյեկտները:

19. Հիմնադրամի սեփականություն կարող է հանդիսանալ ցանկացած շարժական կամ անշարժ գույք` բացառությամբ գույքի առանձին տեսակների, որոնք Հայաստանի Հանրապետության օրենսդրությանը համապատասխան չեն կարող պատկանել իրավաբանական անձանց: Հիմնադրամի սեփականությունը հանդիսացող գույքի քանակն ու արժեքը չեն սահմանափակվում` բացառությամբ Հայաստանի Հանրապետության օրենսդրությամբ նախատեսված դեպքերի:

20. Հիմնադրամի միջոցները ձևավորվում են կամավորության սկզբունքով: Հիմնադրամի կազմավորմանը կարող են մասնակցել ցանկացած ֆիզիկական և իրավաբանական անձինք, ինչպես նաև միջազգային և օտարերկրյա կազմակերպություններ: Յուրաքանչյուր ֆիզիկական կամ իրավաբանական անձ, ինչպես նաև միջազգային և օտարերկրյա կազմակերպություն կարող է միջոցներ հատկացնել հիմնադրամին: Հիմնադրամին կարող են հատկացումներ կատարվել նաև նվիրատվության, ժառանգման, անանուն փոխանցումների և օրենքով նախատեսված այլ ձևերով: Խոշոր միանվագ միանվագ մուծումների դեպքում կարող են իրականացվել անվանական ծրագրեր: Հիմնադրամի կազմավորման յուրաքանչյուր մասնակից իր մուծումների չափին համապատասխան ստանում է վկայական: Հիմնադրամի կազմավորման և միջոցների հավաքագրման գործին մեծ նպաստ բերողներին հոգաբարձուների խորհրդի կողմից կարող են շնորհվել պատվավոր կոչումներ:

21. Հիմնադրամը, Հայաստանի Հանրապետության օրենսդրությամբ և իր կանոնադրությամբ սահմանված կարգով, իր հայեցողությամբ տիրապետում, տնօրինում և օգտագործում է սեփականության իրավունքով իրեն պատկանող գույքը, այդ թվում` որպես սեփականություն օտարում այլ անձանց, նրանց փոխանցում այդ գույքի օգտագործման, տիրապետման և տնօրինման իրավունքները, գրավ դնում կամ տնօրինում օրենքով չարգելված այլ եղանակով:

22. Հայաստանի Հանրապետության տարածքում հիմնադրամի սեփականությունը պաշտպանվում է Հայաստանի Հանրապետության օրենսդրությամբ:

23. Հիմնադրամի սեփականությունը կարող է բռնագանձվել միայն դատական կարգով` օրենքով նախատեսված դեպքերում:

24. Հիմնադրի և այլ անձանց կողմից հիմնադրամին որպես կամավոր վճար հատկացված գույքը հանդիսանում է հիմնադրամի սեփականությունը:

 

VI. ՀԻՄՆԱԴՐԱՄԻ ԿԱՌԱՎԱՐՄԱՆ ՄԱՐՄԻՆՆԵՐԸ

 

25. Հիմնադրամի կառավարման մարմիններն են հիմնադրամի հոգաբարձուների խորհուրդն ու հիմնադրամի գործադիր տնօրենը:

26. Հիմնադրամի կառավարման բարձրագույն մարմինը հիմնադրամի հոգաբարձուների խորհուրդն է (այսուհետև` խորհուրդ):

27. Խորհրդի անդամների թիվը չի կարող 7 անդամից պակաս և 15 անդամից ավելի լինել: Խորհրդի կազմի մեջ են մտնում Հայաստանի Հանրապետության Նախագահի աշխատակազմից` մեկ ներկայացուցիչ, Հայաստանի Հանրապետության արդյունաբերության և առևտրի նախարարությունից` երկու ներկայացուցիչ, մեկական ներկայացուցիչ` Հայաստանի Հանրապետության ֆինանսների և էկոնոմիկայի նախարարությունից ու Հայաստանի Հանրապետության գյուղատնտեսության նախարարությունից, ինչպես նաև ներկայացուցիչներ` ՓՄՁ-ի շահերը ներկայացնող հասարակական կազմակերպություններից: Խորհրդի անդամ կարող է լինել ցանկացած անհատ, որը կկատարի նշանակալի կամավոր վճար:

28. Խորհուրդը գլխավորում է խորհրդի նախագահը (այսուհետև` հիմնադրամի նախագահ): Հիմնադրամի նախագահն ի պաշտոնե Հայաստանի Հանրապետության արդյունաբերության և առևտրի նախարարն է կամ նրա կողմից նշանակված անձը: Խորհրդի առաջին կազմը հաստատում է հիմնադրամի նախագահը:

29. Խորհրդի նիստերը հրավիրվում են հիմնադրամի նախագահի կողմից` տարեկան առնվազն 4 անգամ: Հիմնադրամի նախագահը սահմանում է խորհրդի նիստերի անցկացման օրը, ժամը և օրակարգը: Խորհրդի նիստերը նախագահում է հիմնադրամի նախագահը կամ, նրա լիազորությամբ, խորհրդի անդամներից մեկը:

30. Խորհրդի նիստում յուրաքանչյուր անդամ ունի 1 ձայնի իրավունք: Որոշում ընդունելիս ձայների հավասարության դեպքում հիմնադրամի նախագահի ձայնը վճռորոշ է:

31. Խորհուրդը`

ա) փոփոխություններ ու լրացումներ է կատարում հիմնադրամի կանոնադրության մեջ.

բ) հաստատում է հիմնադրամի տարեկան ծրագրերը.

գ) հիմնադրամի գործադիր տնօրենի ներկայացմամբ ընդունում է որոշումներ հիմնադրամի կողմից իրականացվող խոշոր գործարքների մասին.

դ) հիմնադրամի գործադիր տնօրենի ներկայացմամբ հաստատում է հիմնադրամի տարեկան ծախսերի նախահաշիվը.

ե) հիմնադրամի նախագահի ներկայացմամբ նշանակում և ազատում է հիմնադրամի գործադիր տնօրենին.

զ) դադարեցնում է խորհրդի անդամների լիազորությունները և առաջադրում նոր թեկնածություններ.

է) իրականացնում է վերահսկողություն հիմնադրամի գործադիր տնօրենի կողմից հիմնադրամի միջոցների օգտագործման նկատմամբ.

ը) հաստատում է հիմնադրամի տարեկան հաշվետվությունները.

թ) ստեղծում, վերակազմավորում ու լուծարում է հիմնադրամի մասնաճյուղերը, ներկայացուցչությունները և հիմնարկները, ինչպես նաև հաստատում է դրանց կանոնադրությունները.

ժ) վերահսկում է իր կողմից ընդունված որոշումների կատարումը:

32. Խորհրդի անդամներն ընտրվում են իրենց մասնագիտական որակավորման և աշխատանքային փորձի հիման վրա, ինչպես նաև հաշվի է առնվում նրանց անկախ և օբյեկտիվ մոտեցումը հիմնադրամի նպատակներին: Խորհրդի անդամները պետք է իրենց պարտականությունները կատարեն ազնվորեն և միշտ ձգտեն ընդունել օբյեկտիվ որոշումներ:

33. Խորհրդի անդամն իրավունք ունի հիմնադրամի աշխատանքները բարելավելու նպատակով նրա մարմիններ ներկայացնելու առաջարկություններ և սահմանված կարգով պահանջելու քվեարկություն:

34. Խորհրդի անդամները պարտավոր են մասնակցել խորհրդի նիստերին:

35. Խորհրդի անդամի լիազորությունները կարող են դադարեցվել`

ա) եթե նա խախտել է խորհրդի գործունեության կանոնակարգային պահանջները, անհարգելի պատճառով անընդմեջ բացակայել է խորհրդի 2 կամ ավելի նիստերից և շահագրգռություն չի ցուցաբերում քննարկվող հարցերի նկատմամբ.

բ) սեփական նախաձեռնությամբ:

36. Խորհրդի անդամի փոփոխությունը կարող է կատարվել նաև այն մարմնի ղեկավարի որոշմամբ, որը ներկայացնում է խորհրդի տվյալ անդամը:

37. Խորհրդի անդամի լիազորությունները դադարեցվում են խորհրդի որոշմամբ` խորհրդի նիստին մասնակցող անդամների ձայների պարզ մեծամասնությամբ:

38. Հիմնադրամի նախագահը`

ա) հրավիրում և վարում է խորհրդի նիստերը.

բ) ներկայացնում է հիմնադրամը Հայաստանի Հանրապետությունում և օտարերկրյա պետություններում.

գ) ստորագրում է խորհրդի նիստերի արձանագրությունները.

դ) համակարգում է խորհրդի անդամների և գործադիր տնօրենի գործունեությունը.

ե) հաստատում է խորհրդի գործունեության կանոնակարգը.

զ) հաստատում է հիմնադրամի աշխատողների հաստիքացուցակները.

է) իրականացնում է խորհրդի կողմից լիազորված այլ իրավասություններ:

39. Հիմնադրամի գործադիր մարմինը հիմնադրամի տնօրենն է, որը վարում է հիմնադրամի ընթացիկ աշխատանքները և հաշվետու է խորհրդին:

40. Հիմնադրամի գործադիր տնօրենը`

ա) ներկայացնում է հիմնադրամը Հայաստանի Հանրապետությունում և օտարերկրյա պետություններում.

բ) առանց լիազորագրի գործում է հիմնադրամի անունից, ներկայացնում հիմնադրամի շահերը, տնօրինում հիմնադրամի գույքը, կնքում է պայմանագրեր (այդ թվում` աշխատանքային) ու համաձայնագրեր և տալիս լիազորագրեր.

գ) արձակում է հրամաններ հիմնադրամի աշխատողներին պաշտոնների նշանակման, նրանց տեղափոխման և ազատման մասին, կիրառում է խրախուսման միջոցներ և նշանակում կարգապահական տույժեր.

դ) խորհրդակցական ձայնի իրավունքով մասնակցում է խորհրդի նիստերին.

ե) կազմակերպում է խորհրդի նիստերի անցկացումը և նախատեսված փաստաթղթերի տրամադրումը խորհրդի անդամներին:

 

VII. ՀԻՄՆԱԴՐԱՄԻ ԿԱՆՈՆԱԴՐՈՒԹՅԱՆ ՄԵՋ ՓՈՓՈԽՈՒԹՅՈՒՆՆԵՐԻ ՈՒ ԼՐԱՑՈՒՄՆԵՐԻ ԿԱՏԱՐՈՒՄԸ ԵՎ ՀԱՍՏԱՏՈՒՄԸ

 

41. Հիմնադրամի կանոնադրության մեջ փոփոխություններ ու լրացումներ կատարվում են խորհրդի որոշմամբ:

42. Եթե հիմնադրամի կանոնադրությունն անփոփոխ պահելը հանգեցնում է այնպիսի հետևանքների, որոնք հնարավոր չէր կանխատեսել հիմնադրամն ստեղծելիս, իսկ խորհուրդը չի փոփոխում հիմնադրամի կանոնադրությունը, ապա հիմնադրամի կանոնադրության մեջ փոփոխությունները կարող է կատարել դատարանը` հիմնադրամի հիմնադրի կամ խորհրդի մեկ կամ ավելի անդամների դիմումի հիման վրա:

 

VIII. ԽՈՐՀՐԴԻ ՆԻՍՏԵՐԸ

 

43. Խորհրդի նիստերը գումարվում են հիմնադրամի նախագահի կողմից` համաձայն սույն կանոնադրության 29-րդ կետի պահանջների:

44. Խորհրդի նիստն իրավազոր է, եթե դրան մասնակցում է խորհրդի անդամների կեսից ավելին:

45. Սույն կանոնադրության 31-րդ կետի «ա» ենթակետում նշված հարցերի մասին որոշումներն ընդունվում են խորհրդի նիստին ներկա բոլոր անդամների ձայների 2/3-ով: Մնացած հարցերի մասին որոշումներն ընդունվում են խորհրդի նիստին ներկա անդամների ձայների պարզ մեծամասնությամբ:

46. Խորհրդի նիստերի օրակարգն ու օրակարգին վերաբերող փաստաթղթերը (դրանց պատճենները) խորհրդի անդամներին են տրամադրվում նիստից մեկ շաբաթ առաջ:

47. Խորհրդի արտահերթ նիստերը գումարվում են հիմնադրամի նախագահի կողմից` խորհրդի անդամների 1/2-ի, հիմնադրամի վերստուգող հանձնաժողովի նախագահի կամ հիմնադրամի գործադիր տնօրենի պահանջով: Եթե հիմնադրամի նախագահը 20 օրվա ընթացքում չի կատարում արտահերթ նիստի հրավիրման պահանջը, ապա նախաձեռնողները կարող են իրենք հրավիրել արտահերթ նիստ:

48. Խորհրդի կողմից լուծման ենթակա ցանկացած հարց պետք է գրավոր ներկայացվի հիմնադրամի նախագահին` նիստից առնվազն մեկ շաբաթ առաջ:

 

IX. ՇԱՀԱԳՐԳՌՈՒԹՅՈՒՆԸ ՀԻՄՆԱԴՐԱՄԻ ԳՈՐԾԱՐՔՆԵՐՈՒՄ

 

49. Հիմնադրամի կողմից կնքվող գործարքներում շահագրգիռ անձ են համարվում հիմնադրամի նախագահը, խորհրդի անդամները, հիմնադրամի գործադիր տնօրենը, եթե նրանք և (կամ) նրանց հետ փոխկապակցված անձինք`

ա) հանդիսանում են գործարքի կողմ կամ մասնակցում են գործարքին` որպես միջնորդ կամ ներկայացուցիչ.

բ) տիրապետում են գործարքի կողմ, միջնորդ կամ ներկայացուցիչ հանդիսացող իրավաբանական անձի քվեարկող բաժնետոմսերի (բաժնեմասերի, փայերի) 20 և ավելի տոկոսին.

գ) պաշտոններ են զբաղեցնում գործարքի կողմ, միջնորդ կամ ներկայացուցիչ հանդիսացող իրավաբանական անձի կառավարման մարմիններում:

50. Շահագրգիռ անձինք պարտավոր են պահպանել հիմնադրամի շահերն ու չօգտագործել հիմնադրամի հնարավորությունները կամ թույլ չտալ դրանք օգտագործել այլ նպատակների համար, բացի հիմնադրամի կանոնադրությամբ նախատեսված նպատակներից:

51. Այն դեպքում, երբ անձը շահագրգռություն ունի այն գործարքում, որի կողմ է ինքը կամ կողմ դառնալու մտադրություն ունի, ապա նա, որպես շահագրգիռ անձ, պարտավոր է մինչև գործարքը կնքելու մասին որոշման ընդունումը խորհրդին տեղյակ պահել իր շահագրգռության մասին:

52. Նշված պայմանների խախտմամբ կնքված գործարքը կարող է վիճարկվել դատական կարգով:

53. Շահագրգիռ անձը պատասխանատվություն է կրում հիմնադրամի առջև` հիմնադրամին պատճառած վնասների չափով: Եթե վնասը պատճառվել է մի քանի անձանց կողմից, ապա նրանք հիմնադրամի առջև կրում են համապարտ պատասխանատվություն:

 

X. ՀԻՄՆԱԴՐԱՄԻ ԳՈՐԾՈՒՆԵՈՒԹՅԱՆ ՎԵՐԱՀՍԿՈՂՈՒԹՅՈՒՆԸ

 

54. Հիմնադրամի գործունեության վերահսկողությունն իրականացնում է հիմնադրամի վերստուգող հանձնաժողովը: Վերստուգող հանձնաժողովը կազմված է երեք անդամից, որոնք ներկայացվում և հաստատվում են խորհրդի կողմից:

55. Հիմնադրամի վերստուգող հանձնաժողովն իրավունք ունի ծանոթանալու հիմնադրամի ֆինանսատնտեսական գործունեությանը վերաբերող բոլոր փաստաթղթերին, ստուգելու հիմնադրամի ֆինանսական միջոցների շարժը:

56. Հիմնադրամի վերստուգող հանձնաժողովի պահանջով հիմնադրամի տնօրենը պարտավոր է տրամադրել անհրաժեշտ տեղեկատվություն, տալ պարզաբանումներ:

57. Հիմնադրամի վերստուգող հանձնաժողովը վերլուծում է հիմնադրամի տարեկան ֆինանսական հաշվետվությունները, տալիս դրանց մասին եզրակացություն:

58. Խորհրդի տարեկան ժողովը հաստատում է հիմնադրամի տարեկան հաշվետվությունները, հաշվապահական հաշվեկշիռը` հիմնադրամի վերստուգող հանձնաժողովի եզրակացության առկայության դեպքում:

59. Հիմնադրամի վերստուգող հանձնաժողովը պարտավոր է պահանջել խորհրդի արտահերթ նիստի գումարում, եթե`

ա) վտանգ է սպառնում հիմնադրամի շահերին.

բ) հայտնաբերվել են հիմնադրամի գործադիր տնօրենի կողմից կատարված չարաշահումներ:

60. Խորհրդի անդամների 1/3-ի պահանջով կարող է ֆինանսական տարվա ավարտից հետո հրավիրվել անկախ աուդիտոր` հիմնադրամի գործունեությունն ստուգելու նպատակով:

61. Հիմնադրամի վերստուգող հանձնաժողովի և (կամ) անկախ աուդիտորի ծախսերի հատուցման կարգը և չափը սահմանվում են խորհրդի որոշմամբ:

 

XI. ՀԱՇՎԱՊԱՀԱԿԱՆ ՀԱՇՎԱՌՈՒՄԸ ԵՎ ՖԻՆԱՆՍԱԿԱՆ ՀԱՇՎԵՏՎՈՒԹՅՈՒՆԸ

 

62. Հիմնադրամը Հայաստանի Հանրապետության օրենսդրությամբ սահմանված կարգով վարում է հաշվապահական հաշվառում և ներկայացնում ֆինանսական ու վիճակագրական հաշվետվություններ:

63. Հիմնադրամի գործադիր տնօրենը պատասխանատվություն է կրում հիմնադրամի հաշվապահական հաշվառման կազմակերպման վիճակի և դրա հավաստիության, տարեկան հաշվետվությունը, ֆինանսական ու վիճակագրական հաշվետվությունները համապատասխան պետական մարմիններ ժամանակին ներկայացնելու, ինչպես նաև զանգվածային լրատվության միջոցներին հիմնադրամի մասին տրամադրվող տեղեկատվության համար:

 

XII. ՀԻՄՆԱԴՐԱՄԻ ՎԵՐԱԿԱԶՄԱԿԵՐՊՈՒՄԸ ԵՎ ԼՈՒԾԱՐՈՒՄԸ

 

64. Հիմնադրամը կարող է վերակազմակերպվել Հայաստանի Հանրապետության օրենսդրությամբ սահմանված կարգով:

65. Հիմնադրամը կարող է լուծարվել միայն դատարանի որոշմամբ` Հայաստանի Հանրապետության օրենսդրությամբ սահմանված կարգով:

 

 

pin
ՀՀ կառավարություն
19.03.2002
N 282
Որոշում