ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ
ԻՐԱԶԵԿՄԱՆ ԹԵՐԹԻԿ
1 հունիսի 2022 թվականի N 342
ԱՅԼ ՊԵՏՈՒԹՅՈՒՆՆԵՐՈՒՄ ԳՐԱՆՑՎԱԾ ԿԱԶՄԱԿԵՐՊՈՒԹՅՈՒՆՆԵՐԻՆ ՎՃԱՐՎԱԾ ԵԿԱՄՈՒՏՆԵՐԻ ՄԱՍԻՆ ՏԵՂԵԿՈՒԹՅՈՒՆՆԵՐԸ ՀԱՐԿԱՅԻՆ ՄԱՐՄԻՆ ՆԵՐԿԱՅԱՑՆԵԼՈՒ ՎԵՐԱԲԵՐՅԱԼ
Հարց
ՀՀ ռեզիդենտ կազմակերպության կողմից ռուսական կազմակերպությանը փոխադրման (ֆրախտի) ծառայության համար վճարած եկամուտների դեպքում անհրաժե՞շտ է ներկայացնել ՀՀ ՊԵԿ հաշվետվությունների ներկայացման էլեկտրոնային համակարգից Ձև 273 (ԱՅԼ ՊԵՏՈՒԹՅՈՒՆՆԵՐՈՒՄ ԳՐԱՆՑՎԱԾ ԿԱԶՄԱԿԵՐՊՈՒԹՅՈՒՆՆԵՐԻՆ ՎՃԱՐՎԱԾ ԵԿԱՄՈՒՏՆԵՐԻ, ԵԿԱՄՈՒՏՆԵՐԻ ՎՃԱՐՄԱՆ ԱՄՍԱԹՎԻ, ԱՅԴ ԵԿԱՄՈՒՏՆԵՐԻՑ ՀԱՇՎԱՐԿՎԱԾ ԵՎ ՊԱՀՎԱԾ ՇԱՀՈՒԹԱՀԱՐԿԻ ՎԵՐԱԲԵՐՅԱԼ) հաշվետվությունը:
Պատասխան
i
ՀՀ հարկային օրենսգրքի 134-րդ հոդվածի 4-րդ մասին համապատասխան` հարկային գործակալները մինչև յուրաքանչյուր հարկային տարվան հաջորդող հարկային տարվա ապրիլի 20-ը ներառյալ օրենսգրքի 53-րդ հոդվածով սահմանված կարգով հարկային մարմին են ներկայացնում նախորդ հարկային տարվա ընթացքում այլ պետություններում գրանցված կազմակերպություններին վճարված եկամուտների, եկամուտների վճարման ամսաթվի, այդ եկամուտներից հաշվարկված և պահված շահութահարկի վերաբերյալ տեղեկություններ: Նույն մասով սահմանված տեղեկությունները հարկային մարմին են ներկայացվում ՀՀ վավերացրած միջազգային պայմանագրերի կողմ հանդիսացող պետություններում գրանցված կազմակերպությունների մասով` տեղեկությունների փոխանակման պահանջ սահմանված լինելու դեպքում: Նույն մասում նշված` ՀՀ վավերացրած միջազգային պայմանագրերի ցանկը հրապարակում է հարկային մարմինը` այն տեղադրելով իր պաշտոնական ինտերնետային կայքում:
Օրենսգրքի վերոնշյալ դրույթով սահմանված տեղեկության ներկայացման պահանջը բխում է, մասնավորապես` «Հարկային վարչարարություն իրականացնելու նպատակով ԱՊՀ մասնակից պետությունների միջև էլեկտրոնային եղանակով տեղեկություն փոխանակելու մասին» արձանագրության դրույթներից: Նշված արձանագրության հավելված N 1-ով սահմանված պահանջների 2-րդ կետի «ա» ենթակետի համաձայն` փոխանակման մասնակից պետությունների իրավասու մարմինները կատարում են փոխանակման մասնակից պետությունների իրավաբանական անձանց վերաբերյալ տեղեկության փոխանակում` փոխանակման մի մասնակից պետության իրավաբանական անձի եկամուտները, որոնք հարկվում են փոխանակման մեկ այլ մասնակից պետությունում` վճարման աղբյուրի մոտ:
Այլ պետություններում գրանցված կազմակերպություններին վճարված եկամուտների, եկամուտների վճարման ամսաթվի, այդ եկամուտներից հաշվարկված և պահված շահութահարկի վերաբերյալ տեղեկությունների ձևը և դրա լրացման կարգը հաստատվել է ՀՀ ՊԵԿ նախագահի 30.06.2021թ. N 639-Ն հրամանով:
i
Հաշվի առնելով վերոգրյալը` հայտնում ենք, որ ՀՀ ՊԵԿ նախագահի 30.06.2021թ. N 639-Ն հրամանով հաստատված տեղեկություններում արտացոլվում են, մասնավորապես` ԱՊՀ մասնակից պետությունների ռեզիդենտ հանդիսացող իրավաբանական անձանց վճարված այն եկամուտները, որոնք ՀՀ հարկային օրենսգրքի և ՀՀ վավերացված միջազգային պայմանագրերով սահմանված դրույթներին համապատասխան ենթակա են հարկման ՀՀ-ում` վճարման աղբյուրի մոտ:
Ընդ որում, նշված տեղեկությունները հարկային մարմին են ներկայացվում ՀՀ վավերացրած միջազգային պայմանագրերի կողմ հանդիսացող պետություններում գրանցված կազմակերպությունների մասով` տեղեկությունների փոխանակման պահանջ սահմանված լինելու դեպքում: Նույն մասում նշված` ՀՀ վավերացրած միջազգային պայմանագրերի ցանկը հրապարակում է հարկային մարմինը` այն տեղադրելով իր պաշտոնական ինտերնետային կայքում (https://www.petekamutner.am/ir.aspx?itn=irlntTreatiesApp):
ՀՀ ՊԵՏԱԿԱՆ ԵԿԱՄՈՒՏՆԵՐԻ ԿՈՄԻՏԵ