020.0373.190802
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐԱԿԱՆ ԴԱՏԱՐԱՆԻ ՈՐՈՇՈՒՄԸ
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԵՎ ԿԱՏԱՐԻ ՊԵՏՈՒԹՅԱՆ ՄԻՋԵՎ ՀԱՄԱՏԵՂ ՀԱՆՁՆԱԺՈՂՈՎԻ ՍՏԵՂԾՄԱՆ ՄԱՍԻՆ ՀԱՄԱՁԱՅՆԱԳՐՈՒՄ ԱՄՐԱԳՐՎԱԾ ՊԱՐՏԱՎՈՐՈՒԹՅՈՒՆՆԵՐԻ` ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՍԱՀՄԱՆԱԴՐՈՒԹՅԱՆԸ ՀԱՄԱՊԱՏԱՍԽԱՆՈՒԹՅԱՆ ՀԱՐՑԸ ՈՐՈՇԵԼՈՒ ՎԵՐԱԲԵՐՅԱԼ ԳՈՐԾՈՎ
| Քաղ. Երևան |
19 օգոստոսի 2002 թվականի |
Հայաստանի Հանրապետության սահմանադրական դատարանը, նախագահությամբ` սահմանադրական դատարանի նախագահ Գ. Հարությունյանի, կազմով` սահմանադրական դատարանի նախագահի տեղակալ Վ. Հովհաննիսյանի, սահմանադրական դատարանի անդամներ Ա. Գյուլումյանի, Հ. Նազարյանի, Վ. Պողոսյանի, Մ. Սևյանի,
մասնակցությամբ` Հայաստանի Հանրապետության Նախագահի պաշտոնական ներկայացուցիչ` Հայաստանի Հանրապետության արտաքին գործերի նախարարի տեղակալ Ռ. Շուգարյանի,
համաձայն Հայաստանի Հանրապետության Սահմանադրության 100 հոդվածի 2 կետի, 101 հոդվածի 1 կետի, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետի, 25 հոդվածի 1 կետի և 56 հոդվածի,
դռնբաց նիստում քննեց «Հայաստանի Հանրապետության և Կատարի Պետության միջև համատեղ հանձնաժողովի ստեղծման մասին համաձայնագրում ամրագրված պարտավորությունների` Հայաստանի Հանրապետության Սահմանադրությանը համապատասխանության հարցը որոշելու վերաբերյալ» գործը:
Գործի քննության առիթը Հայաստանի Հանրապետության Նախագահի դիմումն է սահմանադրական դատարան:
Լսելով սույն գործով զեկուցող` Հայաստանի Հանրապետության սահմանադրական դատարանի անդամ Հ. Նազարյանի հաղորդումը, Հայաստանի Հանրապետության Նախագահի ներկայացուցիչ Ռ. Շուգարյանի բացատրությունը, հետազոտելով համաձայնագիրն ու գործում առկա մյուս փաստաթղթերը, Հայաստանի Հանրապետության սահմանադրական դատարանը ՊԱՐԶԵՑ.
1. Համաձայնագիրն ստորագրվել է 2002թ. ապրիլի 22-ին` Դոհայում, պայմանավորվող պետությունների միջև բարեկամական հարաբերությունները զարգացնելու և ամրապնդելու, ինչպես նաև բոլոր ոլորտներում երկկողմ համագործակցությունը խրախուսելու նպատակով:
2. Համաձայնագրի նպատակն իրականացնելու համար Կողմերը որոշել են հիմնել հայ-կատարական հանձնաժողով, որը կներկայացվի երկու պետությունների առևտրի և տնտեսության նախարարների կամ նրանց կողմից նշանակված ներկայացուցիչների մակարդակով և կներառի Կողմերի համագործակցության համապատասխան բնագավառների ներկայացուցիչներին:
Համաձայնագրով նախատեսված է նաև, որ համատեղ հանձնաժողովը, անհրաժեշտության դեպքում, կարող է ստեղծել ենթահանձնաժողովներ, մշտական կամ ժամանակավոր աշխատանքային խմբեր, որոնց ընդունած եզրակացությունները կներկայացվեն համատեղ հանձնաժողովի հաստատմանը:
3. Համաձայնագրով Կողմերը պարտավորվել են.
- խրախուսել երկու պետությունների միջև տնտեսական, առևտրային, մշակութային, գիտական, տեխնիկական, տեղեկատվական և կրթական բնագավառներում հարաբերությունների զարգացումը,
- հետևել երկու երկրների միջև կնքված համաձայնագրերի կատարմանն ու յուրաքանչյուր դժվարության առաջացման դեպքում դրանք ներկայացնել համատեղ հանձնաժողովի լուծմանը,
- զարգացնել տեղեկատվության և փորձի փոխանակումը, ինչպես նաև` երկկողմ համագործակցության խրախուսումը` բանակցությունների միջոցով,
- նախանշել մասնագիտացված հանձնաժողովների գործունեության բնագավառները:
4. Համաձայնագրում Կողմերը նախատեսել են նաև դրույթներ համատեղ հանձնաժողովի աշխատակարգի, համաձայնագրի կատարման, ուժի մեջ մտնելու, դադարելու վերաբերյալ:
5. Համաձայնագրում ամրագրված պարտավորություններն իրենց բնույթով համահունչ են Հայաստանի Հանրապետության Սահմանադրության 9 հոդվածի դրույթներին, քանի որ միջազգային իրավունքի նորմերին համապատասխան պետությունների միջև ապահովում են բարիդրացիական և փոխշահավետ համագործակցություն:
Ելնելով գործի քննության արդյունքներից և ղեկավարվելով Հայաստանի Հանրապետության Սահմանադրության 100 հոդվածի 2 կետով, 102 հոդվածի առաջին և երրորդ մասերով, «Սահմանադրական դատարանի մասին» Հայաստանի Հանրապետության օրենքի 5 հոդվածի 2 կետով, 67 և 68 հոդվածներով, Հայաստանի Հանրապետության սահմանադրական դատարանը ՈՐՈՇԵՑ.
i
1. Հայաստանի Հանրապետության և Կատարի Պետության միջև համատեղ հանձնաժողովի ստեղծման մասին համաձայնագրում ամրագրված պարտավորությունները համապատասխանում են Հայաստանի Հանրապետության Սահմանադրությանը:
2. Հայաստանի Հանրապետության Սահմանադրության 102 հոդվածի երկրորդ մասի համաձայն սույն որոշումը վերջնական է, վերանայման ենթակա չէ, ուժի մեջ է մտնում հրապարակման պահից:
19 օգոստոսի 2002 թվականի
ՍԴՈ-373