(ուժը կորցրել է 05.06.08 թիվ 853-Ն որոշում)
i
040.1755.181102
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«18» նոյեմբերի 2002 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
7 նոյեմբերի 2002 թվականի N 1755-Ն
i
ՓԱԿ ՄՐՑՈՒՅԹՈՎ ԳՆՈՒՄՆԵՐԻ ԻՐԱԿԱՆԱՑՄԱՆ ԿԱՐԳԸ ՀԱՍՏԱՏԵԼՈՒ ԵՎ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅԱՆ 2001 ԹՎԱԿԱՆԻ ԴԵԿՏԵՄԲԵՐԻ 27-Ի N 1267 ՈՐՈՇՄԱՆ ՄԵՋ ԼՐԱՑՈՒՄ ԿԱՏԱՐԵԼՈՒ ՄԱՍԻՆ
«Գնումների մասին» Հայաստանի Հանրապետության օրենքի 5-րդ, 18-րդ և 21-րդ հոդվածներին համապատասխան` Հայաստանի Հանրապետության կառավարությունը որոշում է.
1. Հաստատել փակ մրցույթով գնումների իրականացման կարգը` համաձայն հավելվածի:
2. Սահմանել, որ նախքան սույն որոշումն ուժի մեջ մտնելը` Հայաստանի Հանրապետության պաշտպանության, ազգային անվտանգության կարիքների համար մրցույթի ձևով սկսված և դեռևս չավարտված գնումների հետ կապված հարաբերությունները կարգավորվում են այդ գնումների գործընթացն սկսվելու պահին գործող` գնումների մասին Հայաստանի Հանրապետության օրենսդրությամբ:
3. Հայաստանի Հանրապետության կառավարության 2001 թվականի դեկտեմբերի 27-ի «Մրցույթի հանձնաժողովների կազմավորման և գործունեության կարգը, գնումների բնութագրերի հաստատման, նախնական հսկողության և ֆինանսավորման կարգը, գնումների ընթացակարգերի արձանագրությունների ստուգման կարգը, մեկ աղբյուրից գնումներ կատարելու ձևով` գնանշման միջոցով գնումների իրականացման կարգը, Հայաստանի Հանրապետության կառավարությանն առընթեր պետական գնումների գործակալության գործունեության կարգը հաստատելու և Հայաստանի Հանրապետության կառավարության 2000 թվականի սեպտեմբերի 16-ի N 572 որոշման մեջ լրացում կատարելու մասին» N 1267 որոշման մեջ կատարել հետևյալ լրացումը`
i
որոշմամբ հաստատված` Հայաստանի Հանրապետության կառավարությանն առընթեր պետական գնումների գործակալության գործունեության կարգի 17-րդ կետը «Պետական մարմինը» բառերից հետո լրացնել «բացառությամբ պետական գաղտնիք պարունակող գնումների» բառերով:
4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2002 ԹՎԱԿԱՆԻ ՆՈՅԵՄԲԵՐԻ 12-ԻՆ
Հավելված
Հայաստանի Հանրապետության
կառավարության 2002 թվականի
նոյեմբերի 7-ի N 1755-Ն որոշման
ԿԱՐԳ
ՓԱԿ ՄՐՑՈՒՅԹՈՎ ԳՆՈՒՄՆԵՐԻ ԻՐԱԿԱՆԱՑՄԱՆ
I. ԸՆԴՀԱՆՈՒՐ ԴՐՈՒՅԹՆԵՐ
1. Սույն կարգով սահմանվում է Հայաստանի Հանրապետության պաշտպանության, ազգային անվտանգության կարիքների համար փակ մրցույթով գնումների (այսուհետ` գնումներ) իրականացման կարգը:
2. Գնման ընթացակարգի առանձնահատկություններով պայմանավորված` այլ իրավական ակտերով կարող են սահմանվել փակ մրցույթով գնումների իրականացման հետ կապված` սույն կարգով չնախատեսված նորմեր:
II. ՓԱԿ ՄՐՑՈՒՅԹՈՎ ԳՆՈՒՄՆԵՐԻ ԻՐԱԿԱՆԱՑՈՒՄԸ
3. Գնումներն իրականացվում են պարբերական և նպատակային փակ մրցույթներով:
4. Փակ մրցույթը պարբերական է (այսուհետ` պարբերական մրցույթ), եթե գնման առարկան ներառված է սույն կարգի 6-րդ կետի համաձայն հաստատվող ցանկում:
5. Փակ մրցույթը նպատակային է (այսուհետ` նպատակային մրցույթ), եթե գնման առարկան ներառված չէ սույն կարգի 6-րդ կետի համաձայն հաստատվող ցանկում:
III. ՊԱՐԲԵՐԱԿԱՆ ՄՐՑՈՒՅԹՆԵՐՈՎ ԳՆՈՒՄՆԵՐԻ ԻՐԱԿԱՆԱՑՈՒՄԸ
6. Պարբերական մրցույթներով ձեռք բերվող ապրանքների, աշխատանքների և ծառայությունների ցանկը (այսուհետ` ցանկ) հաստատում են Հայաստանի Հանրապետության պաշտպանության, ազգային անվտանգության կարիքների համար գնումների կատարման լիազոր պետական մարմինները (այսուհետ` պետական մարմին)` համաձայնեցնելով Հայաստանի Հանրապետության ֆինանսների և էկոնոմիկայի նախարարության հետ:
7. Ցանկը հաստատվելուց կամ դրանում փոփոխություն կատարվելուց հետո համապատասխան պետական մարմնի ղեկավարի կամ նրա կողմից լիազորված անձի հրամանով հաստատվում են ցանկում ներառված յուրաքանչյուր ապրանքի, աշխատանքի և (կամ) ծառայության տեխնիկական բնութագիրն ու դրանց ձեռքբերման համար հայտարարվելիք մրցույթների ժամանակացույցը:
8. Սույն կարգի 7-րդ կետում նշված հրամանի համաձայն յուրաքանչյուր մրցույթի համար կազմավորվում է մրցույթի հանձնաժողով:
Մրցույթի հանձնաժողովի կազմավորումը և գործունեությունը, մրցույթի անցկացումը, մրցույթի հաղթողի ընտրությունը և պայմանագրի կնքումը և դրա պահանջների կատարումն իրականացվում են փակ մրցույթով գնումների կատարման համար գնումների մասին Հայաստանի Հանրապետության օրենսդրությամբ սահմանված պահանջներին համապատասխան:
9. Մրցույթի հրավերը հաստատելիս մրցույթի հանձնաժողովը հաշվի է առնում, որ`
ա) մրցույթի հրավերով պետք է նախատեսվի գնման ենթակա ապրանքի, աշխատանքի կամ ծառայության մեկ միավորի գնի հաշվարկման մեթոդը, այդ գնի փոփոխման հնարավորությունը` պայմանավորված գնումների ծավալի և ապրանքի մատակարարման, աշխատանքի կատարման ու ծառայության մատուցման պայմանների փոփոխությամբ: Ընդ որում, մրցույթի հրավերում գնման առարկայի նախահաշվային գինը չի նախատեսվում.
բ) սույն կետի «ա» ենթակետում նշված յուրաքանչյուր փոփոխության դեպքում փոփոխվում են գնման առարկայի բնութագրերը, և մրցույթի հրավերում դրանք պետք է սահմանվեն որպես առանձին չափաբաժիններ.
գ) մրցույթի հաղթող ճանաչված անձի հետ կնքվող պայմանագրի գործողության ժամկետը պետք է լինի առնվազն մինչև ընթացիկ տարվան հաջորդող տարվա դեկտեմբերի 31-ը, բայց ոչ ավելի, քան երեք տարի ժամկետով:
10. Պետական մարմինը, անկախ գնման առարկայի նախահաշվային գնից, պարբերական մրցույթով կնքված` ապրանքի, աշխատանքի կամ ծառայության գնման պահանջի ծագման օրվանից երկու աշխատանքային օրվա ընթացքում տեղեկացնում է պայմանագրի մյուս կողմին` ներկայացնելով կնքված պայմանագրի շրջանակներում ապրանք մատակարարելու, աշխատանք կատարելու կամ ծառայություն մատուցելու պահանջ:
Պետական մարմինը պատվերը հաստատելու օրվան հաջորդող հինգ աշխատանքային օրվա ընթացքում` իրեն սպասարկող Հայաստանի Հանրապետության ֆինանսների և էկոնոմիկայի նախարարության տեղական գանձապետական բաժանմունք է ներկայացնում պայմանագրից քաղվածք:
11. Գնման ֆինանսավորումն իրականացվում է տվյալ պայմանագրի պայմաններին համապատասխան` գնումների մասին Հայաստանի Հանրապետության օրենսդրությամբ սահմանված կարգով:
IV. ՆՊԱՏԱԿԱՅԻՆ ՄՐՑՈՒՅԹՈՎ ԳՆՈՒՄՆԵՐԻ ԻՐԱԿԱՆԱՑՈՒՄԸ
12. Նպատակային մրցույթով գնումներն իրականացվում են Հայաստանի Հանրապետության օրենսդրությամբ սահմանված պայմաններին համապատասխան, և դրանց նկատմամբ չեն կիրառվում սույն կարգի 6-10-րդ կետերի պահանջները: