22.04.2025 -
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
4 հուլիսի 2024 թվականի N 1034-Ն
ԴԵՂԵՐԻ ՇՐՋԱՆԱՌՈՒԹՅԱՆ ԿԱՐԳԱՎՈՐՄԱՆ ՈԼՈՐՏՈՒՄ ՓՈՐՁԱՔՆՆՈՒԹՅՈՒՆՆԵՐԻ ՎՃԱՐՆԵՐԻ (ՏՈՒՐՔԵՐԻ) ԵՎ ԾԱԽՍԵՐԻ ՓՈԽՀԱՏՈՒՑՄԱՆ ԾՐԱԳԻՐԸ ՀԱՍՏԱՏԵԼՈՒ ՄԱՍԻՆ
Ղեկավարվելով «Արդյունաբերական քաղաքականության մասին» Հայաստանի Հանրապետության օրենքի 4-րդ հոդվածի 2-րդ մասով, 23-րդ հոդվածով և հիմք ընդունելով Հայաստանի Հանրապետության կառավարության 2023 թվականի մայիսի 25-ի N 811-Լ որոշմամբ հաստատված N 2 հավելվածի 3-րդ և 5-րդ կետերը` Հայաստանի Հանրապետության կառավարությունը որոշում է.
1. Հաստատել դեղերի շրջանառության կարգավորման ոլորտում փորձաքննությունների ծախսերի 50%-ի փոխհատուցման ծրագիրը` համաձայն հավելվածի:
(1-ին կետը փոփ. 17.04.2025 թիվ 444-Ն որոշում)
2. Հայաստանի Հանրապետության էկոնոմիկայի նախարարին` սույն որոշումն ուժի մեջ մտնելուց հետո մեկամսյա ժամկետում հաստատել փոխհատուցման տրամադրման մասին պայմանագրի օրինակելի ձևը:
3. Սույն որոշումն ուժի մեջ է մտնում պաշտոնական հրապարակմանը հաջորդող օրվանից և տարածվում է նաև 2024 թվականի հունվարի 1-ից հետո կատարված` սույն որոշման 1-ին կետում նշված դեղերի շրջանառության կարգավորման ոլորտում հարաբերությունների վրա:
(3-րդ կետը փոփ. 17.04.2025 թիվ 444-Ն որոշում)
(վերնագիրը փոփ. 17.04.2025 թիվ 444-Ն որոշում)
Հայաստանի Հանրապետության
վարչապետ Ն. Փաշինյան
2024 թ. հուլիսի 4
Երևան
Հավելված
ՀՀ կառավարության
2024 թվականի հուլիսի 4-ի
N 1034-Ն որոշման
ԾՐԱԳԻՐ ԴԵՂԵՐԻ ՇՐՋԱՆԱՌՈՒԹՅԱՆ ԿԱՐԳԱՎՈՐՄԱՆ ՈԼՈՐՏՈՒՄ ՓՈՐՁԱՔՆՆՈՒԹՅՈՒՆՆԵՐԻ ԾԱԽՍԵՐԻ 50%-Ի ՓՈԽՀԱՏՈՒՑՄԱՆ
(վերնագիրը փոփ. 17.04.2025 թիվ 444-Ն որոշում)
1. Սույն հավելվածով հաստատված ծրագրով կարգավորվում են դեղերի արտադրության ոլորտում գործունեություն իրականացնող Հայաստանի Հանրապետության ռեզիդենտ կազմակերպությունների և Հայաստանի Հանրապետությունում հաշվառված անհատ ձեռնարկատերերի կողմից Հայաստանի Հանրապետությունում արտադրվող դեղերի` Հայաստանի Հանրապետությունում դեղերի գրանցման, վերագրանցման, հավաստագրի ժամկետի երկարաձգման, Հայաստանի Հանրապետությունում գրանցված դեղի դոսյեի` Եվրասիական տնտեսական միության (այսուհետ` ԵԱՏՄ) կանոններին համապատասխանեցման կամ փոխադարձ ճանաչման նպատակով իրականացվող և հետգրանցումային փոփոխությունների փորձաքննությունների, ինչպես նաև միայն Հայաստանի Հանրապետությունում ԵԱՏՄ կարգով գրանցված կամ դոսյեն համապատասխանեցված դեղի այլ երկրների փոխադարձ ճանաչման նպատակով վերափորձաքննության, ԵԱՏՄ կարգով գրանցման կամ վերագրանցման (ռեֆերենտ երկիր) նպատակով իրականացվող փորձաքննության, հավաստագրի ժամկետի երկարաձգման, հետգրանցումային փոփոխությունների, յուրաքանչյուր հաջորդ արտադրատարածքի (արտադրատարածքների) կամ նոր ցուցման գրանցման, հետգրանցումային փոփոխության փորձաքննության, ընդհանուր ընթացակարգով գրանցված կամ ԵԱՏՄ կարգով միայն Հայաստանի Հանրապետությունում կիրառման նպատակով գրանցված դեղի փոփոխության, սպեցիֆիկացիայում ցուցանիշի փոփոխության դեպքում` լաբորատոր վճարների (տուրքերի), այլ երկրներում հայկական արտադրության դեղերի գրանցման, վերագրանցման, հավաստագրի ժամկետի երկարաձգման, հետգրանցումային փոփոխությունների, ռազմավարական նշանակության դեղերի շրջանառության կարգավորման ոլորտում փորձաքննությունների ծախսերի 50%-ի փոխհատուցման հետ կապված հարաբերությունները:
(1-ին կետը փոփ. 17.04.2025 թիվ 444-Ն որոշում)
2. Սույն ծրագրի իմաստով`
1) դեղ արտադրող է համարվում դեղերի արտադրության լիցենզիա ստացած իրավաբանական անձը կամ անհատ ձեռնարկատերը.
2) հայտատու է համարվում փոխհատուցում ստանալու նպատակով ՀՀ էկոնոմիկայի նախարարություն (այսուհետ` նախարարություն) հայտ ներկայացրած դեղ արտադրողը.
3) շահառու է համարվում հայտատուն, որը նախարարության հետ կնքել է պայմանագիր փոխհատուցման տրամադրման մասին:
3. Փոխհատուցումը տրամադրվում է շահառուին ՀՀ պետական բյուջեի միջոցների և օրենքով չարգելված այլ միջոցների հաշվին:
4. Դեղերի շրջանառության պետական կարգավորման ոլորտում ԵԱՏՄ կարգով դեղերի գրանցման, վերագրանցման, հավաստագրի ժամկետի երկարաձգման, հետգրանցումային փոփոխությունների, յուրաքանչյուր հաջորդ արտադրատարածքի (արտադրատարածքների) կամ նոր ցուցման գրանցման, ԵԱՏՄ կարգով ապակենտրոնացված կամ փոխադարձ ճանաչման ընթացակարգով գրանցման (ոչ ռեֆերենտ երկիր), գրանցված դեղի փոփոխության, սպեցիֆիկացիայում ցուցանիշի փոփոխության դեպքում` լաբորատոր փորձաքննությունների վճարների (տուրքերի) փոխհատուցումը պետական ֆինանսավորմամբ տրամադրվում է յուրաքանչյուր դեղի համար 50%-ի չափով, բայց ոչ ավելի, քան 1.05 մլն դրամը:
(4-րդ կետը փոփ. 17.04.2025 թիվ 444-Ն որոշում)
5. Միայն Հայաստանում կիրառման ենթակա դեղերի գրանցման, վերագրանցման, հավաստագրի ժամկետի երկարաձգման, Հայաստանի Հանրապետությունում գրանցված դեղի դոսյեի` ԵԱՏՄ կանոններին համապատասխանեցման կամ փոխադարձ ճանաչման նպատակով իրականացվող և հետգրանցումային փոփոխությունների փորձաքննությունների, ինչպես նաև միայն Հայաստանի Հանրապետությունում ԵԱՏՄ կարգով գրանցված կամ դոսյեն համապատասխանեցված դեղի այլ երկրների փոխադարձ ճանաչման նպատակով վերափորձաքննության, գրանցված դեղի փոփոխության, սպեցիֆիկացիայում ցուցանիշի փոփոխության դեպքում` լաբորատոր փորձաքննությունների վճարների (տուրքերի) փոխհատուցումը պետական ֆինանսավորմամբ իրականացվում է յուրաքանչյուր դեղի համար 50%-ի չափով, բայց ոչ ավելի, քան 600 հազար դրամը:
(5-րդ կետը փոփ. 17.04.2025 թիվ 444-Ն որոշում)
6. Ռազմավարական նշանակություն ունեցող դեղերի շրջանառության կարգավորման ոլորտում փորձաքննության վճարների (տուրքերի) 50%-ի չափով փոխհատուցումը ներառված է սույն ծրագրի 4-րդ և 5-րդ կետերում նշված ֆինանսավորման գումարի մեջ, քանի որ սույն ծրագրի 4-րդ և 5-րդ կետերում կարող են առկա լինել դեղեր, որոնք կհանդիսանան ռազմավարական նշանակության:
(6-րդ կետը փոփ. 17.04.2025 թիվ 444-Ն որոշում)
7. Այլ երկրներում հայկական արտադրության դեղերի գրանցումների, վերագրանցումների, հավաստագրի ժամկետի երկարաձգման, հետգրանցումային փոփոխությունների փորձաքննությունների ծախսերի փոխհատուցումը պետական ֆինանսավորմամբ իրականացվում է յուրաքանչյուր դեղի համար 50%-ի չափով, բայց ոչ ավելի, քան 2.5 մլն դրամը:
(7-րդ կետը փոփ. 17.04.2025 թիվ 444-Ն որոշում)
8. Յուրաքանչյուր տարվա համար ֆինանսավորումն իրականացվում է մինչև տվյալ տարվա համար սահմանված բյուջեի սպառումը` ըստ ներկայացված հայտերի հերթականության: Լրամշակման ուղարկված հայտի` փոխհատուցման տրամադրման նպատակով ժամկետների հաշվարկման համար հիմք է ընդունվում հայտատուի կողմից սկզբնական հայտի ներկայացման ամսաթիվը:
9. Տվյալ տարվա համար տրամադրվող ընդհանուր փոխհատուցման չափը չի կարող ավելի լինել, քան սույն ծրագրի համար տվյալ տարվա պետական բյուջեի մասին օրենքով տվյալ տարվա համար սահմանված չափն է:
10. Եթե հայտով նախատեսված` պետությունից ակնկալվող փոխհատուցման գումարի չափը գերազանցում է հայտի ներկայացման օրվա դրությամբ ծրագրի իրականացման նպատակով տվյալ տարվա պետական բյուջեի մասին օրենքով տվյալ տարվա համար սահմանված ֆինանսական միջոցների մնացորդը, և շահառուն համաձայնել է փոխհատուցում ստանալ այդ մնացորդի չափով, ապա փոխհատուցման տրամադրման չափը կազմում է այդ մնացորդի չափով, բայց ոչ ավելի, քան սույն հավելվածի 4-7-րդ կետերում նշված չափերը:
11. Սույն հավելվածի 1-ին կետում նշված վճարների (տուրքերի) կամ ծախսերի գումարի չափն արտարժույթով արտահայտված լինելու դեպքում այն հաշվարկվում է հայտատուի կողմից վճարի (տուրքի) փաստացի վճարման կամ ծախսի փաստացի կատարման օրվա դրությամբ Հայաստանի Հանրապետության կենտրոնական բանկի կողմից տվյալ օրվա համար սահմանված փոխարժեքով:
12. Հայտատուն դեղի գրանցման և վերագրանցման գործընթացի ավարտից հետո փոխհատուցում ստանալու նպատակով հայտ է ներկայացնում նախարարություն` համաձայն N 1 ձևի: Հայտը կարող է ներկայացվել նաև էլեկտրոնային փոստով (էլ. հասցե` [email protected]), որի դեպքում հայտատուն հայտը հաստատում է էլեկտրոնային ստորագրությամբ կամ ուղարկում է ստորագրված բնօրինակ փաստաթղթի սկանավորված տարբերակը:
13. Հայտին կից հայտատուն ներկայացնում է հետևյալ փաստաթղթերը`
1) լիազոր մարմնի կողմից տվյալ արտադրանքի համար տրված գրանցման հավաստագրի պատճենը, իսկ օրենսդրությամբ գրանցման հավաստագիր նախատեսված չլինելու դեպքում` դեղի գրանցումը հավաստող փաստաթղթի պատճենը.
2) լիազոր մարմնի հետ կնքված պայմանագրի պատճենը կամ լիազոր մարմնի կողմից տրված` ծախսերը հիմնավորող այլ փաստաթուղթ (առկայության դեպքում), իսկ այլ երկրներում հայկական արտադրության դեղերի գրանցումների փորձաքննությունների դեպքում` արտերկրում դեղի գրանցումն իրականացնող մարմնի հետ կնքված պայմանագրի պատճենը (առկայության դեպքում).
3) կատարված ծախսերը հավաստող համապատասխան փաստաթղթերի պատճենները (հաշվարկային փաստաթղթի, վճարման անդորրագրի կամ այլ փաստաթղթերի պատճենները).
4) ՀՀ իրավաբանական անձանց պետական ռեգիստրի վկայականի պատճենը.
5) բանկային հաշվեհամար (հավաստող փաստաթուղթ, տեղեկանք).
6) տեղեկատվություն` համաձայն N 2 ձևի.
7) հայտարարություն` համաձայն N 3 ձևի.
8) այլ տեղեկություն` դիմողի ցանկությամբ:
(13-րդ կետը փոփ. 17.04.2025 թիվ 444-Ն որոշում)
14. Հայտատուն ՀՀ օրենքով սահմանված կարգով պատասխանատվություն է կրում իր կողմից ներկայացված փաստաթղթերի և տեղեկատվության իսկության համար:
15. Նախարարությունը հայտն ստանալուց հետո 10 աշխատանքային օրվա ընթացքում ուսումնասիրում է փաստաթղթերը և դրանց ամբողջական լինելու դեպքում 10 աշխատանքային օրվա ընթացքում հայտատուի հետ կնքում է փոխհատուցում տրամադրելու մասին պայմանագիր` համաձայն սահմանված օրինակելի ձևի:
16. Հայտի և կից փաստաթղթերի թերի լինելու կամ դրանցում անհամապատասխանություններ առկա լինելու դեպքում նախարարությունը հայտն ստանալու օրվան հաջորդող 10 աշխատանքային օրվա ընթացքում այդ մասին գրավոր տեղեկացնում է հայտատուին` առաջարկելով 5 աշխատանքային օրվա ընթացքում լրացնել փաստաթղթերը կամ շտկել դրանցում առկա անհամապատասխանությունները և փաստաթղթերի լրամշակված փաթեթը ներկայացնել նախարարություն:
17. Նախարարությունը փաստաթղթերի լրամշակված փաթեթն ստանալուց հետո 5 աշխատանքային օրվա ընթացքում ուսումնասիրում է այն և ամբողջական լինելու դեպքում 10 աշխատանքային օրվա ընթացքում հայտատուի հետ կնքում պայմանագիր` սույն հավելվածի 15-րդ կետում նշված դրույթներին համապատասխան:
18. Հայտատուի կողմից ներկայացված հայտը ենթակա է մերժման`
1) եթե հայտով նախատեսված` պետությունից ակնկալվող փոխհատուցման գումարի չափը գերազանցում է հայտի ներկայացման օրվա դրությամբ ծրագրի իրականացման նպատակով տվյալ տարվա պետական բյուջեի մասին օրենքով տվյալ տարվա համար սահմանված ֆինանսական միջոցների մնացորդը, և հայտատուն չի համաձայնել օժանդակություն ստանալ այդ մնացորդի չափով.
2) հայտով ներկայացված տեղեկատվությունը չի համապատասխանում ծրագրի պահանջներին.
3) ծրագրի 16-րդ կետով սահմանված ժամկետում թերությունները շտկված հայտը չի ներկայացվել նախարարություն կամ կրկին ներկայացվել է թերի:
19. Եթե հայտը մերժվել է ծրագրի 18-րդ կետի 1-ին ենթակետի հիմքով, ապա կարող է կրկին հայտ ներկայացվել հաջորդ ժամանակահատվածում, եթե ծրագրի համար տվյալ տարվա պետական բյուջեի մասին օրենքով նախատեսված են ֆինանսական միջոցներ:
20. Նախարարությունը պայմանագիրը կնքելու օրվան հաջորդող 10 աշխատանքային օրվա ընթացքում փոխհատուցման գումարը փոխանցում է շահառուի հաշվեհամարին` տվյալ ծրագրի համար նախատեսված ֆինանսական միջոցների առկայության պարագայում:
Ձև N 1
ԴԵՂԵՐԻ ՇՐՋԱՆԱՌՈՒԹՅԱՆ ԿԱՐԳԱՎՈՐՄԱՆ ՈԼՈՐՏՈՒՄ ՓՈՐՁԱՔՆՆՈՒԹՅՈՒՆՆԵՐԻ ԾԱԽՍԵՐԻ 50%-Ի ՓՈԽՀԱՏՈՒՑՄԱՆ ՀԱՅՏ
Կազմակերպության անվանումը և կազմակերպաիրավական ձևը
__________________
ՀՎՀՀ _________________
Իրավաբանական անձի գտնվելու վայրը _________________
Գործունեության հասցեն ________________
Պետական ռեգիստրում գրանցման համարը _______
Հեռախոսահամարը __________________
Էլ. փոստի հասցեն __________________
Կազմակերպության ղեկավարի
Ա.Ա.Հ. ___________________
Պաշտոնը __________________
Հեռախոսահամարը ______________
Էլ. փոստի հասցեն ______________
Խնդրում եմ, համաձայն դեղերի շրջանառության կարգավորման ոլորտում փորձաքննությունների վճարների (տուրքերի) և ծախսերի փոխհատուցման ծրագրի` տրամադրել ծախսերի փոխհատուցում:
Կից ներկայացնում եմ հետևյալ փաստաթղթերը`
1) լիազոր մարմնի կողմից տվյալ արտադրանքի համար տրված գրանցման հավաստագրի պատճենը, իսկ օրենսդրությամբ գրանցման հավաստագիր նախատեսված չլինելու դեպքում` դեղի գրանցումը հավաստող փաստաթղթի պատճենը.
2) լիազոր մարմնի հետ կնքված պայմանագրի պատճենը կամ լիազոր մարմնի կողմից տրամադրված` ծախսերը հավաստող այլ փաստաթուղթ (առկայության դեպքում), իսկ այլ երկրներում հայկական արտադրության դեղերի գրանցումների փորձաքննությունների դեպքում` դեղի գրանցումն իրականացնող մարմնի հետ կնքված պայմանագրի պատճենը (առկայության դեպքում).
3) կատարված ծախսերը հավաստող համապատասխան փաստաթղթերի պատճենները (հաշվարկային փաստաթղթի, վճարման անդորրագրի և այլ փաստաթղթերի պատճենները).
4) ՀՀ իրավաբանական անձանց պետական ռեգիստրի վկայականի պատճենը.
5) բանկային հաշվեհամար (հավաստող փաստաթուղթ, տեղեկանք).
6) տեղեկություն` համաձայն N 2 ձևի.
7) հայտարարություն` համաձայն N 3 ձևի.
8) այլ տեղեկություն` դիմողի ցանկությամբ:
Առդիր` ____ էջ:
Կազմակերպության ղեկավար` ___________________________________________
(պաշտոնը, ստորագրությունը, անունը, ազգանունը)
«___» __________________20 թ.
(ամսաթիվը, ամիսը)
Կ. Տ.
(1-ին ձևը խմբ. 17.04.2025 թիվ 444-Ն որոշում)
Ձև N 2
ՏԵՂԵԿՈՒԹՅՈՒՆ
.___________________________________________________________________.
|Դեղի |Դեղի |Դեղերի շրջանառության կարգավորման|Դեղի |
|անվանումը|նկարագիրը|ոլորտում փորձաքննության վճարի |ռազմավարական |
| | |(տուրքի) կամ ծախսի չափը |նշանակության |
| | |________________________________|պարագայում |
| | |Հայաստանի |ԵԱՏՄ |Այլ |համապատասխան |
| | |Հանրապետու- |կարգով|երկրներում|նշանառումը (V)|
| | |թյուն | | | |
|_________|_________|______________|______|__________|______________|
.___________________________________________________________________.
(Աղյուսակի սյունակները լրացվում են ըստ համապատասխանության` կախված փորձաքննության տեսակից):
Կազմակերպության ղեկավար` __________________________________________
(պաշտոնը, ստորագրությունը, անունը, ազգանունը)
«___» __________________20 թ.
(ամսաթիվը, ամիսը)
Կ. Տ.
(2-րդ ձևը խմբ. 17.04.2025 թիվ 444-Ն որոշում)
Ձև N 3
ՀԱՅՏԱՐԱՐՈՒԹՅՈՒՆ ՏՎՅԱԼՆԵՐԻ ՀԱՄԱՊԱՏԱՍԽԱՆՈՒԹՅԱՆ ՄԱՍԻՆ
Ես` ____________________________________________________ս,
(կազմակերպության ղեկավարի պաշտոնը, ստորագրությունը,
անունը, ազգանունը)
հայտնում և հավաստում եմ, որ օժանդակություն ստանալու նպատակով հայտի ներկայացման պահի դրությամբ.
1) կազմակերպությունը սնանկության գործընթացում ներգրավված չէ.
2) կազմակերպության նկատմամբ չկատարված հարկային պարտավորությունները գանձելու վերաբերյալ հարուցված վարչական վարույթ առկա չէ.
3) նախորդող երեք տարիների ընթացքում դատապարտված չեմ եղել տնտեսական գործունեության կամ պետական ծառայության դեմ ուղղված հանցագործության համար, բացառությամբ այն դեպքերի, երբ դատվածությունն օրենքով սահմանված կարգով հանված կամ մարված է.
4) պարտավորվում եմ իմ կողմից ներկայացված նշված տեղեկատվության որևիցե փոփոխության դեպքում եռօրյա ժամկետում, թղթային տարբերակով կամ [email protected] էլեկտրոնային փոստի միջոցով, տեղեկացնել ՀՀ էկոնոմիկայի նախարարություն:
Հավաստիացնում եմ, որ սույն հայտում պարունակվող տեղեկատվությունն արժանահավատ է և ամբողջական: Գիտակցում եմ, որ որևէ կեղծ փաստաթուղթ կամ տեղեկատվություն ներկայացնելը հանգեցնում է օրենքով սահմանված պատասխանատվության:
__________________ ____________________ 20 թ.
(ստորագրությունը) (ամսաթիվը, ամիսը)
(3-րդ ձևը խմբ. 17.04.2025 թիվ 444-Ն որոշում)
Պաշտոնական հրապարակման օրը` 4 հուլիսի 2024 թվական