(ուժը կորցրել է 06.11.11 թիվ 75-Ն որոշում)
i
606.0040.090403
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«09» 04 2003 Թ.
ՊԵՏԱԿԱՆ ԳՐԱՆՑՄԱՆ ԹԻՎ 60603119
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԵՆՏՐՈՆԱԿԱՆ ԸՆՏՐԱԿԱՆ ՀԱՆՁՆԱԺՈՂՈՎ
ՈՐՈՇՈՒՄ
12 մարտի 2003 թվականի N 40-Ն
i
ՀՀ ԱԶԳԱՅԻՆ ԺՈՂՈՎԻ` ՄԵԾԱՄԱՍՆԱԿԱՆ ԸՆՏՐԱԿԱՐԳՈՎ ՊԱՏԳԱՄԱՎՈՐՈՒԹՅԱՆ ԹԵԿՆԱԾՈՒ ԱՌԱՋԱԴՐԵԼՈՒ ՀԱՄԱՐ ՁԵՎԱՎՈՐՎԱԾ ՆԱԽԱՁԵՌՆՈՂ ԽՄԲԻ ՑՈՒՑԱԿՆԵՐԻ ՕՐԻՆԱԿԱՆՈՒԹՅՈՒՆԸ ՍՏՈՒԳԵԼՈՒ ԵՎ ԱՅԴ ՆՊԱՏԱԿՈՎ ՎԻՃԱԿԱՀԱՆՈՒԹՅՈՒՆ ԱՆՑԿԱՑՆԵԼՈՒ ԿԱՐԳԸ ՍԱՀՄԱՆԵԼՈՒ ՄԱՍԻՆ
Ղեկավարվելով Հայաստանի Հանրապետության ընտրական օրենսգրքի 105-րդ հոդվածի 3-րդ կետով, ՀՀ կենտրոնական ընտրական հանձնաժողովը որոշում է.
Սահմանել ՀՀ Ազգային ժողովի մեծամասնական ընտրակարգով պատգամավորության թեկնածու առաջադրելու համար ձևավորված նախաձեռնող խմբի ցուցակների օրինականությունը ստուգելու և այդ նպատակով վիճակահանություն անցկացնելու կարգը (Հավելված 1):
Հավելված 1
Հայաստանի Հանրապետության
կենտրոնական ընտրական
հանձնաժողովի 2003 թվականի
մարտի 12-ի թիվ 40-Ն որոշման
ԿԱՐԳ
ԱԶԳԱՅԻՆ ԺՈՂՈՎԻ` ՄԵԾԱՄԱՍՆԱԿԱՆ ԸՆՏՐԱԿԱՐԳՈՎ ՊԱՏԳԱՄԱՎՈՐՈՒԹՅԱՆ ԹԵԿՆԱԾՈՒ ԱՌԱՋԱԴՐԵԼՈՒ ՀԱՄԱՐ ՁԵՎԱՎՈՐՎԱԾ ՆԱԽԱՁԵՌՆՈՂ ԽՄԲԻ ՑՈՒՑԱԿՆԵՐԻ ՕՐԻՆԱԿԱՆՈՒԹՅՈՒՆԸ ՍՏՈՒԳԵԼՈՒ, ԱՅԴ ՆՊԱՏԱԿՈՎ ՎԻՃԱԿԱՀԱՆՈՒԹՅՈՒՆ ԱՆՑԿԱՑՆԵԼՈՒ
1. Հայաստանի Հանրապետության ընտրական օրենսգրքի 105-րդ հոդվածի 3-րդ կետով սահմանված կարգով նախաձեռնող խմբի ցուցակներում ընդգրկված Հայաստանի Հանրապետության քաղաքացիների ստորագրությունների վավերականությունը ճշտվում է նախաձեռնող խմբի ցուցակում ստորագրությունների փաստացի քանակի տաս տոկոսի ընտրանքային ստուգման միջոցով: Նշված տաս տոկոսը կազմող ստորագրությունների համարները որոշվում են վիճակահանությամբ:
2. Յուրաքանչյուր նախաձեռնող խմբի ցուցակի օրինականությունն ստուգելու համար անց է կացվում առանձին վիճակահանություն:
Վիճակահանություն անցկացնելու նպատակով` սույն կարգին համապատասխան վիճակահանության արկղում դրվում են նախաձեռնող խմբի ցուցակում ընդգրկված քաղաքացիների ստորագրությունների թվին հավասար, իրար հաջորդող համարներ: Արկղից հանվում են դրա պարունակության ընդհանուր թվի տաս տոկոսին համարժեք թվով համարներ: Վիճակահանությամբ հանված թվերի համարներն ամրագրվում են հանձնաժողովի արձանագրությամբ:
Ցուցակից հանվում են վիճակահանությամբ ստացված համարների դիմաց լրացված քաղաքացիների տվյալները, ամրագրվում արձանագրությամբ և համարվում ստուգման ենթակա:
Եթե տվյալ քաղաքացու բացակայության պատճառով հնարավոր չէ նրա տվյալների փաստացի ստուգումը, ապա ենթակա է ստուգման այդ համարին նախորդող չստուգված համարը, իսկ նախորդող համարի բացակայության դեպքում` դրան նախորդող և չստուգված համարը: Նախորդող չստուգված համարների բացակայության դեպքում ստուգվում է հաջորդող, չստուգված համարը:
3. Ստուգման արդյունքում անվավեր են համարվում կեղծված կամ ընտրելու իրավունք չունեցող անձին պատկանող ստորագրությունները, ինչպես նաև այն քաղաքացիների ստորագրությունները, որոնց տվյալները ցուցակում սխալ են լրացված:
Ստուգման արդյունքում հայտնաբերված անվավեր ստորագրությունների մասին կազմվում է արձանագրություն, որտեղ նշվում են ստորագրությունների համարներն ու քաղաքացու մասին տվյալները:
4. Ստորագրությունների ընդհանուր թվի 10 տոկոսում վավեր և անվավեր ստորագրությունների հարաբերակցությունը համամասնորեն տարածվում է ստորագրությունների ընդհանուր թվի վրա` ստանալով ստորագրությունների ընդհանուր թվում վավեր և անվավեր ստորագրությունների քանակը:
5. Ընտրանքային ստուգումն իրականացնելու նպատակով ընտրատարածքային ընտրական հանձնաժողովի նախագահը հանձնաժողովի կազմից կազմավորում է աշխատանքային խումբ (խմբեր):
6. Աշխատանքային խումբը, ստուգման արդյունքում հայտնաբերված կեղծիքների կամ անճշտությունների վերաբերյալ կազմվում է համապատասխան արձանագրություն, որը ստորագրվում է աշխատանքային խմբի անդամների կողմից: Ստուգման արդյունքների վերաբերյալ կազմված արձանագրությունները սահմանված ժամկետում հանձնվում են ընտրատարածքային ընտրական հանձնաժողովի քարտուղարին: