117.0038.170703
ԳՐԱՆՑՎԱԾ Է
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ԱՐԴԱՐԱԴԱՏՈՒԹՅԱՆ ՆԱԽԱՐԱՐՈՒԹՅԱՆ ԿՈՂՄԻՑ
«17» 07 2003 Թ.
ՊԵՏԱԿԱՆ ԳՐԱՆՑՄԱՆ ԹԻՎ 11703226
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՔԱՂԱՔԱՇԻՆՈՒԹՅԱՆ ՆԱԽԱՐԱՐ ՀՐԱՄԱՆ
5 հունիսի 2003 թվականի N 38-Ն
i
ՀՀՇՆ I-2.03-03 «ՀՀ ՊԵՏԱԿԱՆ ՔԱՂԱՔԱՇԻՆԱԿԱՆ ԿԱԴԱՍՏՐ» ՇԻՆԱՐԱՐԱԿԱՆ ՆՈՐՄԵՐԻ ՀԱՍՏԱՏՄԱՆ ՄԱՍԻՆ
«Քաղաքաշինության մասին» ՀՀ օրենքի 10.1 հոդվածի և ՀՀ կառավարության 2003 թ. փետրվարի 20-ի «Հայաստանի Հանրապետության քաղաքաշինության նախարարությանը քաղաքաշինության բնագավառում կառավարման պետական լիազորված մարմնի իրավասություն վերապահելու մասին» N 156-Ն որոշման համաձայն
ՀՐԱՄԱՅՈՒՄ ԵՄ`
Հաստատել և 2003 թ. օգոստոսի 1-ից Հայաստանի Հանրապետության տարածքում գործողության մեջ դնել ՀՀՇՆ I-2.03-03 «ՀՀ պետական քաղաքաշինական կադաստր» շինարարական նորմերը:
_______________________________________________________________________
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՇԻՆԱՐԱՐԱԿԱՆ ՆՈՐՄԵՐ
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՊԵՏԱԿԱՆ ՔԱՂԱՔԱՇԻՆԱԿԱՆ ԿԱԴԱՍՏՐ
ԳՕՍՈՒԴԱՐՍՏՎԵՆՆԻՅ ԳՐԱԴՕՍՏՐՕԻՏԵԼՆԻՅ ԿԱԴԱՍՏՐ ՐԵՍՊՈՒԲԼԻԿԻ ԱՐՄԵՆԻՅԱ
THE STATE URBAN CADASTR OF REPUBLIC OF ARMENIA _______________________________________________________________________
գործարկման թվականը
2003-08-01
1. ԿԻՐԱՌՄԱՆ ՈԼՈՐՏԸ
Սույն շինարարական նորմերը կիրառվում են Հայաստանի Հանրապետության, մարզերի, համայնքների քաղաքաշինական կադաստրի ձևավորման, նորմատիվ ակտերի և քաղաքաշինական փաստաթղթերի մշակման համար:
2. ՏԵՐՄԻՆՆԵՐ ՈՒ ՍԱՀՄԱՆՈՒՄՆԵՐ
Սույն շինարարական նորմերում ընդունված են հետևյալ տերմիններն իրենց սահմանումներով.
ՔԱՂԱՔԱՇԻՆԱԿԱՆ ԿԱՆՈՆԱԿԱՐԳԵՐ - Տարածքի, ներառյալ անշարժ գույքը, վիճակի և օգտագործման փոփոխությունների նախապատվությունները և սահմանափակումները (այդ թվում` ծանրաբեռնվածությունը, արգելքները, սերվիտուտները):
ՏԱՐԱԾՔԻ ՎԻՃԱԿ - Տարածքը բնութագրող բնական լանդշաֆտի, կառուցապատման, տրանսպորտային և ինժեներական ենթակառուցվածքների և այլ բաղադրիչների հատկությունների ամբողջություն:
ՏԱՐԱԾՔԻ ՕԳՏԱԳՈՐԾՈՒՄ - Տվյալ տարածքում գործունեության որոշակի տեսակների իրականացում:
ՏԱՐԱԾՔԻ ՔԱՂԱՔԱՇԻՆԱԿԱՆ ԱՐԺԵՔ - Հասարակության կողմից տարածքի վիճակին և դրա օգտագործմանն առաջադրվող որոշակի պահանջներ բավարարելու տվյալ տարածքի հնարավորության չափը:
ԱՐՏԱՔԻՆ ՊԱՅՄԱՆՆԵՐ - Տարածքը վիճակի և դրա օգտագործման վրա ազդեցություն ունեցող բնապահպանական, ենթակառուցվածքային և բնապաշարային գործոններ:
3. ԸՆԴՀԱՆՈՒՐ ԴՐՈՒՅԹՆԵՐ
3.1. ՀՀ պետական քաղաքաշինական կադաստրը պետական տեղեկատվական համակարգ է, որը հիմք է ծառայում պետական քաղաքաշինական քաղաքականության, տարածքային զարգացման ռազմավարության, քաղաքաշինական փաստաթղթերի մշակման, քաղաքաշինական գործունեության նկատմամբ վերահսկողության իրականացման համար և պարունակում է ստույգ տեղեկություններ քաղաքաշինական գործունեության օբյեկտների, տարածքների գոտիավորման և օգտագործման, տարածքների և բնակավայրերի քաղաքաշինական պլանավորման զարգացման, քաղաքաշինական նորմերի սահմանափակումների և սերվիտուտների տարածքների սոցիալական, ինժեներատրանսպորտային և այլ ենթակառուցվածքների բարեկարգման, ինժեներաերկրաբանական, սեյսմիկ իրադրության, գեոդեզիայի և քարտեզագրության, քաղաքաշինական գործունեության վրա ազդող այլ գործոնների մասին:
3.2. Քաղաքաշինական կադաստրը իրականացվում է հետևյալ տարածքային մակարդակներում, ըստ «Վարչատարածքային բաժանման մասին» ՀՀ օրենքի.
ա) Հայաստանի Հանրապետություն,
բ) Հայաստանի Հանրապետության մարզեր»
գ) Հայաստանի Հանրապետության համայնքներ:
3.3. Քաղաքաշինական կադաստրը Հայաստանի Հանրապետության պետական կադաստրային համակարգի բաղկացուցիչ մասն է, ներառում է քաղաքաշինական գործունեության իրականացման համար անհրաժեշտ տվյալներ այլ ճյուղային կադաստրներից և տեղեկատվական համակարգերից, ըստ «Քաղաքաշինության մասին» ՀՀ օրենքի:
3.4. Քաղաքաշինական կադաստրի տեղեկատվությունը ստացվում է Հայաստանի Հանրապետության կառավարության 1999 թ. դեկտեմբերի 31-ի N 802 որոշմամբ հաստատված «Պետական քաղաքաշինական կադաստրի վարման կարգին» համապատասխան:
3.5. Տեղեկատվության աղբյուրի վկայակոչումը արձանագրվում է քաղաքաշինական կադաստրում:
4. ՔԱՂԱՔԱՇԻՆԱԿԱՆ ԿԱԴԱՍՏՐԻ ԳՈՐԾԱՌՈՒՅԹՆԵՐԸ ԵՎ ՎԱՐՈՒՄԸ
4.1. Քաղաքաշինական կադաստրի գործառույթները և վարումը կանոնակարգվում են «Քաղաքաշինության մասին» ՀՀ օրենքով և Հայաստանի Հանրապետության կառավարության 1999 թ. դեկտեմբերի 31-ի թիվ 802 որոշմամբ հաստատված «Պետական քաղաքաշինական կադաստրի վարման կարգով»:
4.2. Քաղաքաշինական կադաստրի տեղեկատվությունը տրամադրվում է օգտագործողներին կադաստրային փաստաթղթերի, տեղեկանքների ձևով, կամ անմիջական մուտքով դեպի տվյալների բանկ` հեռահաղորդակցության կապի միջոցների կիրառմամբ:
4.3. Քաղաքաշինական կադաստրային փաստաթուղթը` իրավաբանական ուժ ունեցող, որոշակի ձևով կազմված և բովանդակություն ունեցող, տարածքի քաղաքաշինական կանոնակարգերի, քաղաքաշինական արժեքի, տարածքի փաստացի վիճակի, օգտագործման, արտաքին և այլ պայմանների վերաբերյալ տեղեկություններ պարունակող քաղաքաշինական անձնագիրն է, որը տրվում է տվյալ տարածքի տնօրինման և օգտագործման իրավունք ունեցող պետական կառավարման կամ տեղական ինքնակառավարման մարմնին, իրավաբանական կամ ֆիզիկական անձին:
Քաղաքաշինական կադաստրային փաստաթուղթը հանդիսանում է տարածքների վիճակի և օգտագործման փոփոխությունների հետ կապված իրավահարաբերությունների տեղեկատվական հիմքը:
4.4. Կադաստրային տեղեկանք` օգտագործողին տրված քաղաքաշինական անձնագրից քաղվածք է, որը պարունակում է միայն նրա հարցմանը բավարարող տվյալներ:
4.5. ՀՀ յուրաքանչյուր տարածքային մակարդակում քաղաքաշինական կադաստրի վարումն իրականացվում է քաղաքաշինական բնագավառի լիազորված համապատասխան մարմնում ստեղծված քաղաքաշինական կադաստրի ծառայության միջոցով: Քաղաքաշինական կադաստրի ծառայությունները տվյալների ստացումը և օգտագործողներին կադաստրային փաստաթղթերի և տեղեկանքների տրամադրումը գրանցում են քաղաքաշինական մատյաններում (համայնքի, մարզի (Երևան քաղաքի), Հայաստանի Հանրապետության): Քաղաքաշինական մատյաններում պարտադիր հաշվառման և մուտքագրման ենթակա քաղաքաշինական կադաստրային փաստաթղթերի տեսակները սահմանվում են Հայաստանի Հանրապետության կառավարության 1999 թ. դեկտեմբերի 31-ի N 802 որոշմամբ հաստատված «Պետական քաղաքաշինական կադաստրի վարման կարգով»:
5. ՔԱՂԱՔԱՇԻՆԱԿԱՆ ԿԱԴԱՍՏՐԻ ԿԱՌՈՒՑՎԱԾՔԸ
5.1. Ցանկացած տարածքային մակարդակներում օբյեկտի քաղաքաշինական կադաստրը պարունակում է տեղեկություններ`
ա/ քաղաքաշինական կանոնակարգերի մասին.
բ/ տարածքի վիճակի և օգտագործման, արտաքին պայմանների մասին.
գ/ տարածքի քաղաքաշինական արժեքի մասին.
դ/ ընդհանուր կամ տվյալ տարածքին վերաբերող քաղաքաշինական նորմատիվ իրավական փաստաթղթերի մասին.
ե/ տվյալ տարածքին վերաբերող նախագծահետազոտական փաստաթղթերի մասին.
զ/ քաղաքաշինական կանոնակարգերի պահպանման պատասխանատուների մասին:
5.2. Քաղաքաշինական չափորոշիչները բնութագրվում են գործունեության սահմանված ժամկետներում տարածքների վիճակի և օգտագործման փոփոխության ձևերով և պարամետրերով:
Տարածքի վիճակը բնութագրվում է նրա բաղադրիչների քանակական և որակական, նրանց տեղաբաշխվածության և կազմի ցուցանիշներով:
Տարածքի օգտագործումը բնութագրվում է գործառական կազմով, գործառական միավորների տեղաբաշխվածությամբ, նրանց որակական և քանակական ցուցանիշներով, շրջակա միջավայրի վրա նրանց ազդեցությամբ:
Արտաքին պայմանները բնութագրվում են տարածքը շրջապատող ենթակառուցվածքային, պաշարային, էկոլոգիական և այլ գործոնների տեղաբաշխվածության, որակական, քանակական ցուցանիշներով:
Տարածքի քաղաքաշինական արժեքը արտահայտվում է պայմանական համեմատական ցուցանիշներով:
Տարածքների փաստացի վիճակի և օգտագործման, արտաքին պայմանների բնութագրերը բերվում են ցուցանիշների ձևով` քաղաքաշինական կանոնակարգերի ցուցանիշների հետ համադրությամբ:
5.3. Նորմատիվ-իրավական, հետազոտական և նախագծային փաստաթղթերը բնութագրվում են իրենց տվյալներով, նշանակությամբ, բովանդակությամբ, համաձայնեցման և հաստատման մասին տվյալներով:
Տեղեկատվության աղբյուրներ են հանդիսանում փաստաթղթերը հաստատող կառավարման մարմինները, փաստաթղթերի պատվիրատուները և կատարողները:
Պետական կառավարման և տեղական ինքնակառավարման մարմինները, իրավաբանական և ֆիզիկական անձինք բնութագրվում են իրենց տեղեկատվական տվյալներով:
6. ՏԵՂԵԿԱՏՎՈՒԹՅԱՆ ԿԱԶՄԱԿԵՐՊՈՒՄԸ ԱՎՏՈՄԱՏԱՑՎԱԾ /ՀԱՄԱԿԱՐԳՉԱՎՈՐՎԱԾ/ ՔԱՂԱՔԱՇԻՆԱԿԱՆ ԿԱԴԱՍՏՐՈՒՄ
6.1. Քաղաքաշինական կադաստրի վարումը իրականացվում է համակարգչային տեխնոլոգիաների օգնությամբ:
Քաղաքաշինական կադաստրի համակարգչավորված կազմակերպման դեպքում տեղեկատվությունը կազմված է երեք հիմնական մասերից.
ա/ տվյալների բազա,
բ/ քարտեզագրական տեղեկատվություն,
գ/ տեղեկատվական-որոնողական համակարգ:
6.2. Տվյալների բազան պարունակում է քաղաքաշինական կանոնակարգերի, տարածքների փաստացի վիճակի և օգտագործման պայմանների, քաղաքաշինական արժեքի, ինչպես նաև պետական կառավարման և տեղական ինքնակառավարման մարմինների, իսկ օրենքով նախատեսված դեպքերում` նաև իրավաբանական և ֆիզիկական անձանց մասին տվյալներ: Այդ տեղեկությունները ներկայացվում են տեղեկատվական հաշվառման միավորներով: Որպես հաշվառման միավորներ ընդունվում են տարածքային օբյեկտները, գոտիները, հողամասերը, կոմունիկացիաները և նրանց հանգույցներն ու տեղամասերը, կառույցները, պետական կառավարման տեղական ինքնակառավարման մարմինները, հիմնարկները, իրավաբանական և ֆիզիկական անձինք, փաստաթղթերը և այլն:
6.3. Քարտեզագրական տեղեկատվությունն արտահայտում է այն հաշվառման միավորների ուրվագիծը և տեղադիրքը, որոնց համար նպատակահարմար է քարտեզագրական տեղակապումը (տեղամասեր, կոմունիկացիաների գծային տեղամասեր, կետային օբյեկտներ) և ներկայանում են էլեկտրոնային քարտեզների (հատակագծերի) ամբողջականությամբ, որոնց վրա համապատասխան մասշտաբով պատկերված է ամբողջ օբյեկտի տարածքը կամ նրա առանձին մասերը:
6.4. Կադաստրի վարման համար տվյալների բազայի և քարտեզագրական տեղեկատվության կոնկրետ կապի միջոցն որոշվում է ծրագրային ապահովմամբ:
Տեղեկատվական-որոնողական համակարգը ներառում է նախագծային, հետախուզական, նորմատիվ իրավական փաստաթղթերի մասին տեղեկություններ և կարող է իրացվել որպես տվյալների բազա կամ տեքստային տեղեկատվական-որոնողական համակարգ, որտեղ մուտքագրվում են փաստաթղթերի և նրանց գտնվելու տեղի մասին տվյալները:
Փաստաթղթերի նկարագրությունը կարող է զուգորդվել նաև քարտեզագրական տեղեկատվության հետ. օրինակ` նախագծային և հետախուզական փաստաթղթերի նկարագրությունը կարող է ուղեկցվել տարածքների քարտեզագրական (ուրվագծային) պատկերմամբ, որին վերաբերում են տվյալ փաստաթղթերը:
Քաղաքաշինական կադաստրի ծրագրային միջոցները պետք է ապահովեն տեղեկատվության նշված բոլոր միջոցների աշխատանքը` նրանց տարբեր զուգորդմամբ:
Կադաստրային փաստաթղթերի և տեղեկանքների ձևակերպումը կարող է իրականացվել համակարգչային (ծրագրային) միջոցներով, ընտրված տվյալների բազայից և տեղեկատվական-որոնողական համակարգերից:
Կադաստրային փաստաթղթերն ունեն որոշակի սահմանված ձևեր և լրացվում են համապատասխան ծրագրային միջոցների օգնությամբ: Կադաստրային տեղեկանքները չունեն խիստ որոշակի կառուցվածք և ձևակերպվում են տվյալների մանիպուլյացիայի ծրագրային միջոցների օգնությամբ:
7. ՔԱՂԱՔԱՇԻՆԱԿԱՆ ԿԱԴԱՍՏՐԻ ՏԵՂԵԿԱՏՎԱԿԱՆ ՀԱՇՎԱՌՄԱՆ ՄԻԱՎՈՐՆԵՐ
7.1. Քաղաքաշինական կադաստրի տվյալների բազայում տեղեկատվությունը ներկայացվում է տեղեկատվական հաշվառման միավորների հետևյալ հիմնական տեսակներով`
ա/ միայն հանրապետական քաղաքաշինական կադաստրում - Հայաստանի Հանրապետության տարածքների քաղաքաշինական իրացումը կանոնակարգող գոտիներ.
բ/ հանրապետական և մարզային քաղաքաշինական կադաստրերում - տարաբնակեցման համակարգեր, ադմինիստրատիվ-տարածքային միավորներ, քաղաքային կազմավորումներ.
գ/ մարզային և համայնքային քաղաքաշինական կադաստրերում - քաղաքաշինական կարգավորման գործառական և այլ գոտիներ:
7.2. Քաղաքաշինական կադաստրի ցանկացած տարածքային մակարդակում`
ա/ գոտիներ, ըստ ինժեներաշինարարական գոտևորման (շրջանացման).
բ/ արտակարգ իրավիճակներ ստեղծելու ընդունակ, բնական և տեխնածին վտանգավոր պրոցեսների աղբյուրներ հանդիսացող բնական կառուցվածքներ և տնտեսական օբյեկտներ.
գ/ արտակարգ իրավիճակներ ստեղծող բնական և տեխնածին վտանգավոր պրոցեսներից վնասված տարածքներ և օբյեկտներ.
դ/ հատուկ պահպանվող բնական տարածքներ.
ե/ պատմամշակութային օբյեկտներ.
զ/ ռեկրեացիոն տարածքներ և օբյեկտներ.
է/ տարածքների օգտագործման հատուկ կարգավորում պահանջող արտադրական օբյեկտներ.
ը/ հողամասեր.
թ/ տրանսպորտային կոմունիկացիաների տեղամասեր և հանգույցներ.
ժ/ ինժեներական կոմունիկացիաների տեղամասեր և հանգույցներ:
Որպես տեղեկատվական հաշվառման միավոր ներկայացվում են պետական կառավարման և տեղական ինքնակառավարման մարմինները, իրավաբանական անձինք (հողամասերի, օբյեկտների, կոմունիկացիաների տնօրինման և օգտագործման իրավունք ունեցող), որոնց մասին տվյալները մուտքագրված են քաղաքաշինական կադաստր:
8. ՔԱՂԱՔԱՇԻՆԱԿԱՆ ԳՈՐԾՈՒՆԵՈՒԹՅԱՆ ՄՈՆԻՏՈՐԻՆԳԸ
Քաղաքաշինական գործունեության մոնիտորինգը` քաղաքաշինական գործունեության օբյեկտների փոփոխությունների և վիճակի վերաբերյալ դիտարկումների համակարգ է, որը կատարվում է միջավայրի կենսագործունեության վիճակի ուսումնասիրությունների միջոցով:
Մոնիտորինգի վարման կարգը կանոնակարգվում է «Քաղաքաշինության մասին» ՀՀ օրենքով:
Մոնիտորինգային դիտարկումների արդյունքում ստացված տեղեկատվությունը ներառվում է պետական քաղաքաշինական կադաստրում: