040.1143.200903
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«20» սեպտեմբերի 2003 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
28 օգոստոսի 2003 թվականի N 1143-Ն
i
ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՆՀԱՏԱԿԱՆ (ԱՆՁՆԱՎՈՐՎԱԾ) ՀԱՇՎԱՌՄԱՆ ՀԱՄԱԿԱՐԳԻ ՆԵՐԴՐՄԱՆ ՓՈՐՁՆԱԿԱՆ ԾՐԱԳԻՐԸ ՀԱՍՏԱՏԵԼՈՒ ՄԱՍԻՆ
Ի կատարումն Հայաստանի Հանրապետության կառավարության 1999 թվականի դեկտեմբերի 2-ի N 734 որոշմամբ հաստատված` Հայաստանի Հանրապետությունում կենսաթոշակային ապահովության ռազմավարության հիմնադրույթների 2-րդ կետի 5-րդ ենթակետի և 3-րդ կետի պահանջների` Հայաստանի Հանրապետության կառավարությունը որոշում է.
1. Հաստատել Հայաստանի Հանրապետությունում անհատական (անձնավորված) հաշվառման համակարգի (այսուհետ` համակարգ) ներդրման փորձնական ծրագիրը` համաձայն հավելվածի:
2. Հայաստանի Հանրապետության սոցիալական ապահովագրության պետական հիմնադրամի նախագահին`
ա) համակարգի ներդրման փորձնական ծրագիրն իրականացնել Հայաստանի Հանրապետության սոցիալական ապահովագրության պետական հիմնադրամի Մաշտոց և Կենտրոն-1 տարածքային կենտրոնների կողմից սպասարկվող տարածքներում.
բ) մինչև 2004 թվականի մարտի 1-ը Հայաստանի Հանրապետության կառավարություն ներկայացնել նշված ծրագրի իրականացման արդյունքների մասին հաշվետվություն և առաջարկություն համակարգը Հայաստանի Հանրապետության ամբողջ տարածքում ներդնելու վերաբերյալ:
3. Հայաստանի Հանրապետության սոցիալական ապահովության նախարարին և Հայաստանի Հանրապետության սոցիալական ապահովագրության պետական հիմնադրամի նախագահին` համակարգի ներդրման փորձնական ծրագրի իրականացման ընթացքում ապահովել տվյալների փոխանակումն անհատական հաշվառման բազայի և անհատական ծածկագրերի տեղեկատվական բազայի միջև` այդ բազաներում փորձարկելով անհատական ծածկագրերի կիրառման ընթացակարգերը:
4. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2003 ԹՎԱԿԱՆԻ ՍԵՊՏԵՄԲԵՐԻ 17-ԻՆ
Հավելված
Հայաստանի Հանրապետության
կառավարության 2003 թվականի
օգոստոսի 28-ի N 1143-Ն որոշման
ՓՈՐՁՆԱԿԱՆ ԾՐԱԳԻՐ ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆՈՒՄ ԱՆՀԱՏԱԿԱՆ (ԱՆՁՆԱՎՈՐՎԱԾ) ՀԱՇՎԱՌՄԱՆ ՀԱՄԱԿԱՐԳԻ ՆԵՐԴՐՄԱՆ
ՓՈՐՁՆԱԿԱՆ ԾՐԱԳՐԻ ՆՊԱՏԱԿՆԵՐԸ
Հայաստանի Հանրապետությունում անհատական (անձնավորված) հաշվառման համակարգի ներդրման փորձնական ծրագիրը (այսուհետ` փորձնական ծրագիր) նպատակ ունի իրականացնելու անհատական հաշվառման համակարգի ներդրման առաջարկվող մեխանիզմը` «Պետական կենսաթոշակների մասին» Հայաստանի Հանրապետության օրենքի դրույթներին համապատասխան: Փորձնական ծրագրի նպատակներն են`
ա) ապահովադիրների կողմից ներկայացվող դիմումները և անհատական հաշվետվությունները ներկայացնելու ընթացակարգի փորձարկումը,
բ) անհատական հաշվետվությունների հաշվառման և դրանց տվյալների մուտքագրման ծրագրային միջոցների փորձարկումը,
գ) անճշտություններ պարունակող փաստաթղթերի առանձնացման, վերադարձման, ճշտման ընթացակարգերի և դրանց ծրագրային միջոցների փորձարկումը,
դ) Հայաստանի Հանրապետության սոցիալական ապահովագրության պետական հիմնադրամի (այսուհետ` պետական հիմնադրամ) տարածքային կենտրոններից կենտրոնացված տվյալների բազա ներկայացվող տվյալների և դրանց հիմք հանդիսացող փաստաթղթերի ընդունման և մշակման գործընթացների փորձարկումը,
ե) անհատական հաշվի տվյալների հիման վրա ապահովագրական ստաժների հաշվարկման ծրագրային միջոցների փորձարկումը,
զ) պետական հիմնադրամի կենտրոնացված արխիվ փաստաթղթերի հանձնման և հաշվառման գործառույթների փորձարկումը,
է) անհատական հաշվետվությունները ներկայացնելու պարբերականության փորձարկումը և որոշումը,
ը) անձնական հաշվի տվյալների հիման վրա կենսաթոշակների նշանակման, հաշվարկի ու վերահաշվարկի ընթացակարգերի և ծրագրային միջոցների փորձարկումը,
թ) անհատական հաշվառման տվյալների բազայի և անհատական ծածկագրերի տեղեկատվական բազայի միջև տվյալների փոխանակման փորձարկումը` միաժամանակ այդ բազաներում փորձարկելով անհատական ծածկագրերի կիրառման ընթացակարգերը,
ժ) ապահովագրված անձին` նրա անձնական հաշվում արտացոլված տվյալների մասին տեղեկատվություն տրամադրելու ընթացակարգերի փորձարկումը:
ՓՈՐՁՆԱԿԱՆ ԾՐԱԳՐԻ ՆԿԱՐԱԳԻՐԸ
Փորձնական ծրագրով նախատեսված աշխատանքները պետք է իրականացվեն 8 փուլով:
1. 1-ին փուլում պետք է ապահովվի համակարգի գործունեության համար անհրաժեշտ ձևաթղթերի, դրանք լրացնելու և պետական հիմնադրամի տարածքային կենտրոն ներկայացնելու ընթացակարգերի մշակումը, և պետական հիմնադրամի Մաշտոց ու Կենտրոն-1 տարածքային կենտրոնների կողմից սպասարկվող ապահովադիրները կստանան անձնական հաշվի բացման դիմումի, անհատական ծածկագիր ստանալու հայտի ձևաթղթեր և անհատական հաշվետվության ձևեր` իրենց բոլոր աշխատողների համար, կապահովվի դրանք լրացնելու ճշտությունը և սահմանված ժամկետներում ներկայացնելը պետական հիմնադրամի տարածքային կենտրոն:
2. Փորձնական ծրագրի 2-րդ փուլում պետք է ստուգվեն պետական հիմնադրամի տարածքային կենտրոններ ներկայացված ձևաթղթերի ընդունման, դրանց հաշվառման և ներկայացված տվյալների մուտքագրումը տվյալների բազա: Այս փուլում կստուգվեն բոլոր այն ընթացակարգերը, որոնք անհրաժեշտ են անճշտություն պարունակող ձևաթղթերի առանձնացման, դրանց վերադարձման և ուղղման համար:
3. Փորձնական ծրագրի 3-րդ փուլում պետք է ստուգվեն պետական հիմնադրամի տարածքային կենտրոններում ընդունված փաստաթղթերը և դրանց հիման վրա մուտքագրված տվյալները պետական հիմնադրամի կենտրոնացված տվյալների բազա ներկայացնելու ընթացակարգերը` միաժամանակ այդ տվյալները համադրելով անհատական ծածկագրերի տեղեկատվական բազայից ստացված տվյալների հետ: Այս փուլում ստուգվում են նաև պետական հիմնադրամի կենտրոնացված տվյալների բազայում անձնական հաշիվների բացման և դրանցում տվյալների լրացման բոլոր գործընթացները:
4. Փորձնական ծրագրի 4-րդ փուլում պետք է ստուգվեն պետական հիմնադրամի կենտրոնացված տվյալների բազայում հաշվառված տվյալների փաստաթղթային հիմքերի` պետական հիմնադրամի կենտրոնացված արխիվ հանձնման ընթացակարգերը և բոլոր գործառույթները` կապված կենտրոնացված արխիվի աշխատանքների հետ:
5. Փորձնական ծրագրի 5-րդ փուլում պետական հիմնադրամի կենտրոնացված տվյալների բազայում կհամեմատվեն անհատական հաշվետվությունների ու գործատուների կողմից ներկայացված եռամսյակային հաշվետվությունների տվյալները, և դրանց անհամապատասխանության դեպքում կմշակվեն անճշտություններն ուղղելու ընթացակարգերը:
6. Փորձնական ծրագրի 6-րդ փուլում կստուգվեն բոլոր այն ընթացակարգերը և գործառույթները, որոնք կապված են պետական հիմնադրամի կենտրոնացված տվյալների բազայում ընդունված և մշակված անձնական հաշվի տվյալները պետական հիմնադրամի տարածքային կենտրոններին փոխանցելու հետ:
7. Փորձնական ծրագրի 7-րդ փուլում կստուգվեն պետական հիմնադրամի տարածքային կենտրոններում անհատական հաշվի տվյալներից տեղեկանքների ստացումը և դրանց տրամադրումը դիմողներին:
8. Փորձնական ծրագրի 8-րդ փուլում պետք է ստուգվեն անհատական հաշվի տվյալների հիման վրա կենսաթոշակների նշանակման, հաշվարկի և վերահաշվարկի ընթացակարգերն ու գործառույթները:
9. Անհատական (անձնավորված) հաշվառման համակարգն ամբողջ Հայաստանի Հանրապետությունում ներդնելու վերաբերյալ բոլոր եզրակացություններն ու առաջարկությունները կպատրաստվեն փորձնական ծրագրի վերջին` 8-րդ փուլում:
ՓՈՐՁՆԱԿԱՆ ԾՐԱԳՐԻ ԻՐԱԿԱՆԱՑՄԱՆ ԺԱՄԿԵՏՆԵՐԸ
Փորձնական ծրագիրն իրականացվելու է սույն որոշման ընդունման պահից 6-ամսյա ժամկետում: