(ուժը կորցրել է 09.04.18 թվականից` 05.04.18 ՆՀ-227-Ն հրամանագիր)
i
030.0353.230799
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻ
ՀՐԱՄԱՆԱԳԻՐԸ
i
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻՆ ԱՌԸՆԹԵՐ ՊԵՏԱԿԱՆ ՊԱՐԳԵՎՆԵՐԻ ՀԱՆՁՆԱԺՈՂՈՎԻ ԿԱՆՈՆԱԴՐՈՒԹՅՈՒՆԸ ՀԱՍՏԱՏԵԼՈՒ ՄԱՍԻՆ
Ղեկավարվելով «Հայաստանի Հանրապետության պետական պարգևների մասին» Հայաստանի Հանրապետության օրենքով` որոշում եմ.
1. Հաստատել Հայաստանի Հանրապետության Նախագահին առընթեր պետական պարգևների հանձնաժողովի կանոնադրությունը (կցվում է):
2. Սույն հրամանագիրն ուժի մեջ է մտնում ստորագրման պահից:
23 հուլիսի 1999 թ.
ՆՀ-353
Հաստատված է Հայաստանի
Հանրապետության Նախագահի
1999 թվականի հուլիսի 23-ի
ՆՀ-353 հրամանագրով
ԿԱՆՈՆԱԴՐՈՒԹՅՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՆԱԽԱԳԱՀԻՆ ԱՌԸՆԹԵՐ ՊԵՏԱԿԱՆ ՊԱՐԳԵՎՆԵՐԻ ՀԱՆՁՆԱԺՈՂՈՎԻ
1. Հայաստանի Հանրապետության Նախագահին առընթեր պետական պարգևների հանձնաժողովը (այսուհետ` հանձնաժողով) խորհրդակցական մարմին է:
2. Հանձնաժողովի գործունեությունը կանոնակարգվում է սույն կանոնադրությամբ և իրականացվում է Հայաստանի Հանրապետության օրենսդրությանը համապատասխան:
3. Հանձնաժողովը Հայաստանի Հանրապետության պետական պարգևներ շնորհելու վերաբերյալ ստացված միջնորդությունները նախնական քննարկումից հետո իր առաջարկությունների հետ ներկայացնում է Հայաստանի Հանրապետության Նախագահի քննարկմանը:
4. Հանձնաժողովի կազմը, կանոնադրությունը հաստատում և փոփոխում է Հայաստանի Հանրապետության Նախագահը:
5. Հանձնաժողովը կազմված է նախագահից և անդամներից:
6. Հանձնաժողովի նախագահը և անդամները հանձնաժողովի աշխատանքներին մասնակցում են հասարակական կարգով:
Հանձնաժողովի գործունեությունը իրականացվում է հանձնաժողովի նիստերի միջոցով:
7. Հանձնաժողովի նիստերն անցկացնում է հանձնաժողովի նախագահը, իսկ նրա բացակայության դեպքում` հանձնաժողովի որոշմամբ` նրա անդամներից որևէ մեկը:
Հանձնաժողովի նիստերն իրավազոր են, եթե դրանց ներկա է հանձնաժողովի կազմի կեսից ավելին: Որոշումներն ընդունվում են հանձնաժողովի նիստին ներկա անդամների ձայների մեծամասնությամբ: Հավասար ձայների դեպքում նախագահողի ձայնը վճռորոշ է:
8. Հանձնաժողովի քննարկմանը ներկայացվող միջնորդությունների վերաբերյալ նյութերը պետք է նախապես տրամադրվեն հանձնաժողովի անդամներին:
9. Հանձնաժողովն իր քննարկմանը ներկայացված նյութերի վերաբերյալ Հայաստանի Հանրապետության Նախագահի աշխատակազմի ներման, քաղաքացիության, պարգևների և կոչումների վարչության միջոցով պետական մարմիններից կարող է պահանջել լրացուցիչ փաստաթղթեր:
10. Հանձնաժողովի քննարկմանը ներկայացվող Հայաստանի Հանրապետության պետական պարգևներ շնորհելու վերաբերյալ նյութերի նախապատրաստումն իրականացնում է Հայաստանի Հանրապետության Նախագահի աշխատակազմի ներման, քաղաքացիության, պարգևների և կոչումների վարչությունը:
11. Հայաստանի Հանրապետության պետական պարգևներ շնորհելու վերաբերյալ նիստում ներկայացված նյութերի քննարկման հիման վրա հանձնաժողովն ընդունում է որոշում:
Հանձնաժողովի նիստի վերաբերյալ կազմվում է արձանագրություն:
12. Հայաստանի Հանրապետության Նախագահի աշխատակազմի ներման, քաղաքացիության, պարգևների և կոչումների վարչությունը իրականացնում է Հայաստանի Հանրապետության պետական պարգևներ շնորհելու վերաբերյալ Հայաստանի Հանրապետության Նախագահի հրամանագրերի կատարման վերահսկողությունը: