040.1673.221203
«ՎԱՎԵՐԱՑՆՈՒՄ ԵՄ»
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
ՆԱԽԱԳԱՀ Ռ. ՔՈՉԱՐՅԱՆ
«22» դեկտեմբերի 2003 թ.
ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ԿԱՌԱՎԱՐՈՒԹՅՈՒՆ
ՈՐՈՇՈՒՄ
11 դեկտեմբերի 2003 թվականի N 1673-Ն
i
ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆԸ ՊԵՏԱԿԱՆ ԱՋԱԿՑՈՒԹՅԱՆ 2004 ԹՎԱԿԱՆԻ ԾՐԱԳԻՐԸ ՀԱՍՏԱՏԵԼՈՒ ՄԱՍԻՆ
Ղեկավարվելով «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքի 4-րդ հոդվածի պահանջներով` Հայաստանի Հանրապետության կառավարությունը որոշում է.
1. Հաստատել փոքր և միջին ձեռնարկատիրությանը պետական աջակցության 2004 թվականի ծրագիրը` համաձայն հավելվածի:
2. Սույն որոշումն ուժի մեջ է մտնում պաշտոնական հրապարակմանը հաջորդող օրվանից:
ՍՏՈՐԱԳՐՎԵԼ Է ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԱՐՉԱՊԵՏԻ ԿՈՂՄԻՑ
2003 ԹՎԱԿԱՆԻ ԴԵԿՏԵՄԲԵՐԻ 16-ԻՆ
Հավելված
ՀՀ կառավարության
2003 թվականի դեկտեմբերի 11-ի
N 1673-Ն որոշման
2004 ԹՎԱԿԱՆԻ ԾՐԱԳԻՐ
ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆԸ ՊԵՏԱԿԱՆ ԱՋԱԿՑՈՒԹՅԱՆ
I. ԾՐԱԳՐԻ ՄՇԱԿՄԱՆ ՀԻՄՔԵՐԸ
Փոքր և միջին ձեռնարկատիրությանը պետական աջակցության 2004 թվականի ծրագրի (այսուհետ` ծրագիր) մշակման և իրականացման հիմքը 2000 թվականի դեկտեմբերի 5-ի «Փոքր և միջին ձեռնարկատիրությանը պետական աջակցության մասին» Հայաստանի Հանրապետության օրենքն է:
Ծրագրի մշակման համար հիմք են հանդիսացել նաև`
ա) 2003 թվականի հունիսին Հայաստանի Հանրապետության Ազգային ժողովի կողմից ընդունված Հայաստանի Հանրապետության կառավարության գործունեության ծրագիրը,
բ) Հայաստանում փոքր և միջին ձեռնարկատիրության զարգացման քաղաքականության և ռազմավարության հիմնադրույթները (Հայաստանի Հանրապետության կառավարության 2000 թվականի օգոստոսի 3-ի նիստի N 32 արձանագրության 3-րդ կետ),
գ) Հայաստանի Հանրապետության կառավարության 2002 թվականի դեկտեմբերի 26-ի «Հայաստանի Հանրապետության 2003 թվականի գործունեության միջոցառումների ծրագիրը հաստատելու մասին» N 2141-Ն որոշումը,
դ) Հայաստանի Հանրապետության կառավարության 2002 թվականի դեկտեմբերի 19-ի N 2172-Ն որոշմամբ հաստատված` փոքր և միջին ձեռնարկատիրությանը պետական աջակցության 2003 թվականի ծրագիրը,
ե) Հայաստանի Հանրապետության կառավարության 2003 թվականի օգոստոսի 8-ի N 994-Ն որոշմամբ հաստատված` աղքատության հաղթահարման ռազմավարական ծրագիրը:
II. ԾՐԱԳՐԻ ՆՊԱՏԱԿՆԵՐԸ ԵՎ ԽՆԴԻՐՆԵՐԸ
Ծրագրի նպատակները և խնդիրներն են`
ա) փոքր և միջին ձեռնարկատիրության (այսուհետ` ՓՄՁ) սուբյեկտներին աջակցության համապատասխան ենթակառուցվածքների ստեղծումը և ամրապնդումը.
բ) ՓՄՁ-ի սուբյեկտների ֆինանսական և ներդրումային հնարավորությունների ընդլայնումը.
գ) ՓՄՁ-ի սուբյեկտների արտաքին տնտեսական գործունեության ընդլայնումը.
դ) ՓՄՁ-ի սուբյեկտներում նորարարությունների և ժամանակակից տեխնոլոգիաների ներդրմանն աջակցությունը.
ե) ՓՄՁ-ի սուբյեկտների որակի կառավարման միջազգային ստանդարտների ներդրմանն աջակցությունը.
զ) ՓՄՁ-ի սուբյեկտների` գործարար տեղեկատվության, խորհրդատվության, ուսուցման ծառայություններից օգտվելու հնարավորությունների ընդլայնումը:
III. ԾՐԱԳՐԱՅԻՆ ՄԻՋՈՑԱՌՈՒՄՆԵՐԻ ՀԱՄԱԿԱՐԳԸ
2004 թվականի համար նախատեսված ծրագրային միջոցառումների համակարգն ընդգրկում է ՓՄՁ-ի ոլորտի զարգացման և պետական աջակցության հետևյալ հիմնական ուղղությունները`
1. ՓՄՁ-ի սուբյեկտներին աջակցության համապատասխան ենթակառուցվածքների
ստեղծում և ամրապնդում
1.1. «Հայաստանի փոքր և միջին ձեռնարկատիրության զարգացման ազգային
կենտրոն» հիմնադրամի գործունեության ընդլայնում, դրա մարզային 3
մասնաճյուղերի ստեղծում Հայաստանի Հանրապետության Արագածոտնի, Լոռու
և Կոտայքի մարզերում
Հայաստանի Հանրապետության սոցիալ-տնտեսական զարգացման կարևորագույն հիմնախնդիրներից է Հայաստանի Հանրապետության մարզերի սոցիալ-տնտեսական զարգացումը: Այդ գործում հատկապես կարևորվում է ձեռնարկատիրական գործունեության, մասնավորապես, ՓՄՁ-ի զարգացումը տարածաշրջաններում:
Այդ նպատակով փոքր և միջին ձեռնարկատիրությանը պետական աջակցության 2003 թվականի ծրագրի շրջանակներում ստեղծվել է «Հայաստանի փոքր և միջին ձեռնարկատիրության զարգացման ազգային կենտրոն» հիմնադրամի (Հայաստանի ՓՄՁ ԶԱԿ) 3 մասնաճյուղ` Հայաստանի Հանրապետության Շիրակի, Սյունիքի և Տավուշի մարզերում, որոնք համակարգում են Հայաստանի ՓՄՁ ԶԱԿ-ի կողմից իրականացվող ծրագրերը` վերոհիշյալ մարզերում:
Հաշվի առնելով Հայաստանի Հանրապետության յուրաքանչյուր մարզի աշխարհագրական դիրքը և առանձնահատկությունները, ինչպես նաև Հայաստանի տնտեսության որոշակի ճյուղերի զարգացման համար առկա պայմանները` ծրագրով նախատեսվում է Հայաստանի ՓՄՁ ԶԱԿ-ի 3 մասնաճյուղ ստեղծել Հայաստանի Հանրապետության Արագածոտնի, Լոռու և Կոտայքի մարզերում, ինչը պայմանավորված է այնտեղ ՓՄՁ-ին աջակցության համապատասխան ենթակառուցվածքների բացակայությամբ, ձեռնարկատիրական գործունեության համար անհրաժեշտ ներուժի առկայությամբ:
Այդ մասնաճյուղերի գործունեությունը կնպատակաուղղվի ՓՄՁ-ի զարգացման տարածաշրջանային և մարզային ու համայնքային ծրագրերի իրականացմանը` հաշվի առնելով տարածաշրջանային զարգացման գերակայությունները, առանձին բնակավայրերի առանձնահատկությունները և առկա ներուժը:
1.2. Բիզնես ինկուբատորի ստեղծման ծրագրի մշակում
i
Միջազգային փորձը ցույց է տալիս, որ ձեռնարկատիրության, մասնավորապես, ՓՄՁ-ի պետական աջակցության առավել արդյունավետ և հեռանկարային ուղղություններից է բիզնես ինկուբատորների ստեղծումը` հատկապես տնտեսական զարգացման ցածր մակարդակ ունեցող տարածաշրջաններում:
Բիզնես ինկուբատորները նոր ստեղծվող և զարգացող ՓՄՁ-ի սուբյեկտներին տրամադրում են տարածք և կենտրոնացված գործարար ծառայություններ, շուկայական ենթակառուցվածքներից օգտվելու առավել բարենպաստ պայմաններ և տեխնիկական այլ աջակցություն:
Բիզնես ինկուբատորներում ընդգրկված ՓՄՁ-ի սուբյեկտների համար ստեղծվում են նպաստավոր պայմաններ և միացյալ ուժերով գործելու հնարավորություն, ինչն զգալիորեն հեշտացնում է դրանց կայացումն ու հետագա արդյունավետ գործունեությունը:
Գործարար աջակցության նման մեխանիզմի կիրառմանը կարող են օժանդակել տեղական ինքնակառավարման մարմինները` բիզնես ինկուբատորի ստեղծման համար տրամադրելով չօգտագործվող տարածքները` դրանով իսկ նպաստելով մարզային և համայնքային ՓՄՁ-ի սուբյեկտների միջև կոոպերացիայի զարգացմանը:
Ծրագրով նախատեսվում է 2004 թվականի ընթացքում իրականացնել բիզնես ինկուբատորի ստեղծման նախապատրաստական աշխատանքներ` մշակել բիզնես ինկուբատորի ստեղծման ծրագիրը:
(1.2-րդ կետը փոփ. 02.12.04 թիվ 1679-Ն որոշում)
1.3. ՓՄՁ-ի սուբյեկտներում նորարարությունների և ժամանակակից
տեխնոլոգիաների ներդրմանն աջակցության նպատակով տեխնոպարկի ստեղծում
Երևան քաղաքի տարածքում
ՓՄՁ-ի սուբյեկտների տեխնոլոգիական և նորարարական աջակցության ձևերից է տեխնոպարկը: Այն գիտական կենտրոնի շուրջ համախմբված նորաստեղծ կազմակերպությունների համախումբ է, որն առաջարկում է ժամանակակից բարձրորակ խորհրդատվություն և տեղեկատվություն` ուղղված դրանց տեխնոլոգիական զարգացմանը, արտադրանքի որակի կատարելագործմանը, ինչպես նաև տրամադրում է իրացման շուկաների ուսումնասիրություններ իրականացնելու լայն հնարավորություններ:
Տեխնոպարկերն ավելի հարմար են արդյունաբերական կամ բարձր տեխնոլոգիական ոլորտներում գործող ՓՄՁ-ի սուբյեկտների համար, որտեղ արտադրանքի կամ արտադրական պրոցեսների կատարելագործման համար շատ կարևոր է նոր տեխնոլոգիաների և գիտական նոր մշակումների կիրառումը: Սա փոխշահավետ է ինչպես գիտնականների, այնպես էլ ձեռնարկատերերի համար` փորձի և հմտությունների փոխանակման առումով, երբ գիտական ծրագրերը կարող են ներդրվել գործարարության մեջ, իսկ ձեռնարկատերերը կարող են օգտվել գիտական մշակումներից:
Այս մոդելն արդյունավետ կարող է գործել արդյունաբերական և գիտական ներուժ ունեցող խոշոր քաղաքներում, մասնավորապես, Երևանում` հաշվի առնելով պարապուրդի մատնված արդյունաբերական կազմակերպությունների և հիմնական միջոցների, ինչպես նաև մասնագիտական բարձր մակարդակ ունեցող աշխատուժի առկայությունը: Այս ուղղությամբ անհրաժեշտ է համագործակցել տեղական գիտական և գիտակրթական հաստատությունների (կենտրոնների) հետ:
ՓՄՁ-ի սուբյեկտներում նորարարությունների և նոր տեխնոլոգիաների ներդրումը կնպաստի հայրենական արտադրանքի մրցունակության բարձրացմանը, գիտատեխնիկական արդյունքների արդյունավետ օգտագործմանը, արտահանման ներուժի ընդլայնմանը:
2. ՓՄՁ-ի սուբյեկտներին ֆինանսական և ներդրումային աջակցություն
Հայաստանի ՓՄՁ ԶԱԿ-ը, ընդլայնելով իր գործունեությունը, կշարունակի իրականացնել «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքով նախատեսված` ՓՄՁ-ի սուբյեկտներին ֆինանսական ու ներդրումային աջակցության շրջանակներում ՓՄՁ-ի սուբյեկտներին վարկային երաշխիքների տրամադրման գործառույթը:
Հայաստանի ՓՄՁ ԶԱԿ-ը ՓՄՁ-ի սուբյեկտների ֆինանսավորման (վարկավորման) հետ կապված հիմնախնդիրները հաղթահարելու, նրանց ֆինանսական ու ներդրումային աջակցություն ցուցաբերելու նպատակով 2004 թվականին կընդլայնվի ՓՄՁ-ի սուբյեկտներին վարկային երաշխիքների տրամադրման ծրագիրը: Հայաստանի ՓՄՁ ԶԱԿ-ը ծրագրային այս միջոցառման կատարելագործման աշխատանքներում կներգրավի այս բնագավառում մեծ փորձառություն ունեցող փորձագետների:
ՓՄՁ-ի սուբյեկտներին վարկային երաշխիքների տրամադրման ուղղությամբ Հայաստանի ՓՄՁ ԶԱԿ-ը պայմանագրային հիմունքներով կհամագործակցի ՓՄՁ-ի սուբյեկտների վարկավորման ծրագրեր իրականացնող առևտրային բանկերի հետ:
Վարկային երաշխիքների տրամադրման ծրագրից կարող են օգտվել «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքով սահմանված ՓՄՁ-ի սուբյեկտ հանդիսացող առևտրային կազմակերպությունները և անհատ ձեռնարկատերերը: Ծրագրի շրջանակներում նախապատվությունը կտրվի գրավի բացակայության պատճառով մերժվող հայտերին, արտադրության կամ ծառայությունների բնագավառում, ինչպես նաև նոր, ոչ առևտրական գործունեություն ծավալած ՓՄՁ-ի սուբյեկտներին և Երևան քաղաքի տարածքից դուրս գործող ՓՄՁ-ի սուբյեկտներին:
3. ՓՄՁ-ի սուբյեկտներում որակի կառավարման միջազգային ստանդարտների (ԻՍՕ
9000 շարքի) ներդրմանն աջակցություն
Շուկայական տնտեսավարման պայմաններում, հատկապես ՓՄՁ-ի սուբյեկտների համար, ձեռնարկատիրական արդյունավետ գործունեություն ծավալելու հիմնական գրավականը թողարկվող արտադրանքի, մատուցվող ծառայությունների համապատասխանեցումն է միջազգային ստանդարտներին: Մասնավորապես, ներքին շուկայում ամրապնդվելու և արտաքին շուկաներ մուտք գործելու կարևոր նախապայման է որակի կառավարման (ԻՍՕ 9000 շարքի) միջազգային ստանդարտների ներդրումը:
Տնտեսավարող սուբյեկտներում որակի կառավարման համակարգերի ներդրումն էականորեն բարելավում է դրանց կառավարման արդյունավետությունը, ավելի մատչելի է դարձնում տեղեկատվությամբ ապահովումը և, վերջապես, բարձրացնում է տնտեսավարող սուբյեկտների մրցունակությունն ու հեղինակությունը:
Ներկայումս ՓՄՁ-ի սուբյեկտները, որակի կառավարման համակարգերի ներդրման հետ կապված, տեխնիկական ու ֆինանսական աջակցության կարիք ունեն:
Ելնելով նշված նկատառումներից և Հայաստանի Հանրապետության տնտեսական զարգացման գերակայություններից` 2004 թվականին ծրագրի շրջանակներում կցուցաբերվի աջակցություն ՓՄՁ-ի սուբյեկտներում որակի կառավարման (ԻՍՕ 9000 շարքի) միջազգային ստանդարտների ներդրմանը, մասնավորապես, ԻՍՕ 9000 շարքի որակի կառավարման համակարգի ներդրման ուղղությամբ խորհրդատվական աշխատանքների իրականացման համար կցուցաբերվի աջակցություն, ինչպես նաև կկազմակերպվեն ՓՄՁ-ի սուբյեկտներում ԻՍՕ 9000 շարքի որակի կառավարման միջազգային ստանդարտների ներդրման գործընթացներին նվիրված դասընթացներ /սեմինարներ/, կհրատարակվեն համապատասխան տեղեկատվական նյութեր:
4. ՓՄՁ-ի սուբյեկտներին գործարար տեղեկատվական և խորհրդատվական
աջակցություն
ՓՄՁ-ի սուբյեկտներին գործարար տեղեկատվությամբ ապահովումը դրանց արդյունավետ գործունեության հիմնական երաշխիքներից է: ՓՄՁ-ի սուբյեկտներին անհրաժեշտ է ունենալ օպերատիվ տեղեկատվություն ընդհանուր տնտեսական վիճակի (կոնյունկտուրայի), արտաքին և ներքին շուկաներում, օրենսդրական դաշտում կատարվող փոփոխությունների, գիտատեխնիկական առաջընթացի ու բարձր տեխնոլոգիաների կիրառման, պետական գնումների իրականացման ընթացքի և ձեռնարկատիրության ոլորտին առնչվող այլ գործընթացների մասին:
Նման տեղեկատվությունը հիմնականում տարածվում է զանգվածային լրատվության միջոցներով, որը միշտ չէ, որ ամբողջական է, և չի բավարարում գործարարների պահանջները:
Ծրագրով նախատեսվում է տեղեկատվական ու վերլուծական նյութերի և պարբերականի հրատարակում (դրանք կտեղադրվեն նաև Հայաստանի ՓՄՁ ԶԱԿ-ի ինտերնետային էջում), ինչը համապարփակ գործարար տեղեկատվությամբ կապահովի Հայաստանի գործարար համայնքին (ՓՄՁ-ի սուբյեկտներ, գործարարությանն աջակցող կառույցներ և ՓՄՁ-ի սուբյեկտների շահերը ներկայացնող այլ կառույցներ):
Ծրագրով նախատեսվում է նաև աջակցություն ցուցաբերել ՓՄՁ-ի սուբյեկտներին` ինտերնետային էջերի պատրաստման ուղղությամբ:
ՓՄՁ-ի սուբյեկտների արդյունավետ գործունեության հիմնական երաշխիքներից և կարևոր նախադրյալներից է նաև ՓՄՁ-ի սուբյեկտների համար որակյալ գործարար խորհրդատվության ապահովումը: Ծրագրով նախատեսվում է շարունակել պետական աջակցությունը ՓՄՁ-ի սուբյեկտներին` խորհրդատվական ծառայությունների մատուցման մատչելիության ապահովման գործում:
ՓՄՁ-ի սուբյեկտներին խորհրդատվական աջակցությունը կիրականացվի մասնագիտացված խորհրդատվական կազմակերպությունների միջոցով ներդրումային և զարգացման ծրագրերի մշակման, շուկայական հետազոտությունների իրականացման, պարբերաբար կազմակերպվող բաց դռների միջոցով գործարար խորհրդատվության տրամադրման (Երևանում և Հայաստանի Հանրապետության մարզերում), պոտենցիալ գործընկերների հայտնաբերման, ինչպես նաև այլ ուղղություններով` ըստ ՓՄՁ-ի սուբյեկտների կողմից ներկայացված պահանջների:
Մաքսային բրոքերի ինստիտուտի զարգացման նպատակով մաքսային միջնորդներին (բրոքերներին) և մաքսային միջնորդական ծառայություններ մատուցող ընկերություններին կցուցաբերվի խորհրդատվական աջակցություն մաքսային ընթացակարգային հիմնահարցերի հաղթահարման (լուծման) և ՓՄՁ-ի սուբյեկտներին մատուցվող մաքսային միջնորդական ծառայությունների որակի բարելավման ուղղությամբ:
5. ՓՄՁ-ի ոլորտի կադրերի մասնագիտական ուսուցում և վերապատրաստում
Որպես տեխնիկական բնույթի առաջնահերթ հիմնախնդիր կարելի է առանձնացնել գործարարների համապատասխան գիտելիքների, ֆինանսական, հաշվապահական հաշվետվությունները գրագետ կազմելու և գործարար ծրագրեր մշակելու ունակությունների պակասը, ինչպես նաև Հայաստանի Հանրապետության օրենսդրությանը թերի տիրապետելը և այլն:
ՓՄՁ-ի սուբյեկտների գործարար հմտությունների զարգացման և մասնագիտական վերապատրաստման նպատակով կապահովվի նրանց մասնակցությունն ուսուցողական և վերապատրաստման դասընթացներին: Դրա հետ մեկտեղ` մաքսային բրոքերի ինստիտուտի զարգացման նպատակով պարբերաբար կկազմակերպվեն մասնագիտական ուսուցման և վերապատրաստման դասընթացներ:
Հաշվի առնելով այն հանգամանքը, որ ՓՄՁ-ի սուբյեկտներին մեծ մասամբ հասանելի չեն գործարար ծառայությունները` հիմնականում դրանց թանկության պատճառով, ծրագրի շրջանակներում նախատեսվում է աջակցություն ցուցաբերել նրանց մասնակցությանն այդ դասընթացներին` ամբողջությամբ կամ մասնակիորեն վճարելով դասընթացների արժեքը:
Նման դասընթացներին մասնակցությունը հնարավորություն կընձեռի սկսնակ գործարարներին ծանոթանալու ձեռնարկատիրական գործունեության հիմունքներին, իսկ գործող ՓՄՁ-ի սուբյեկտներին` ստանալու պարզաբանումներ գործող հարկային և մաքսային համակարգերի, հաշվապահական (ֆինանսական) հաշվետվությունների ու գործարար ծրագրերի կազմման ուղղությամբ, ինչպես նաև` ձեռք բերելու համապատասխան մասնագիտական գիտելիքներ կառավարման, շուկայավարման, գործարար էթիկայի և այլ բնագավառներում:
IV. ԾՐԱԳՐԻ ԻՐԱԿԱՆԱՑՄԱՆ ՍԿԶԲՈՒՆՔՆԵՐԸ
1. Ծրագիրն իրականացվում է Հայաստանի ՓՄՁ ԶԱԿ-ի և սույն ծրագրով նախատեսված ՓՄՁ-ի ոլորտին աջակցող այլ կառույցների միջոցով:
2. Համաձայն «Փոքր և միջին ձեռնարկատիրության պետական աջակցության մասին» Հայաստանի Հանրապետության օրենքի` ՓՄՁ-ի զարգացման տարեկան պետական ծրագրերի ֆինանսավորումը, որն արտացոլվում է Հայաստանի Հանրապետության պետական բյուջեում առանձին տողով, կատարվում է Հայաստանի Հանրապետության պետական բյուջեի միջոցների հաշվին:
3. Ծրագրի իրականացման միջոցառումների ցանկը` համաձայն հավելվածի, մշակում է Հայաստանի Հանրապետության առևտրի և տնտեսական զարգացման նախարարությունը` Հայաստանի ՓՄՁ ԶԱԿ-ի հետ համատեղ, որը հաստատվում է հիմնադրամի հոգաբարձուների խորհրդի կողմից:
4. Ծրագրով նախատեսված միջոցառումներն իրականացվում են Հայաստանի ՓՄՁ ԶԱԿ-ի կողմից սահմանված մրցույթների անցկացման կարգով:
5. Միջազգային դոնոր կազմակերպությունների հետ փոխհամաձայնությունների շրջանակներում 2004 թվականին կիրականացվեն ՓՄՁ-ի ոլորտի զարգացման համատեղ ծրագրեր (համաֆինանսավորման սկզբունքով)` Հայաստանի Հանրապետության օրենսդրությամբ սահմանված կարգով:
Հավելված
փոքր և միջին
ձեռնարկատիրությանը պետական
աջակցության 2004 թվականի
ծրագրի
ՑԱՆԿ
ՓՈՔՐ ԵՎ ՄԻՋԻՆ ՁԵՌՆԱՐԿԱՏԻՐՈՒԹՅԱՆԸ ՊԵՏԱԿԱՆ ԱՋԱԿՑՈՒԹՅԱՆ 2004 ԹՎԱԿԱՆԻ ԾՐԱԳՐԻ ԻՐԱԿԱՆԱՑՄԱՆ ՄԻՋՈՑԱՌՈՒՄՆԵՐԻ
.__________________________________________________________________________.
|NN | Միջոցառումը | Կատարողը | Կատարման |
|ը/կ| | | ժամկետը |
|___|________________________________|_______________________|_____________|
|1. |«Հայաստանի փոքր և միջին |Հայաստանի ՓՄՁ ԶԱԿ |2004 թվականի |
| |ձեռնարկատիրության զարգացման | |ընթացքում |
| |ազգային կենտրոն» հիմնադրամի | | |
| |գործունեության ընդլայնում, դրա | | |
| |մարզային 3 մասնաճյուղերի | | |
| |ստեղծում Հայաստանի | | |
| |Հանրապետության Արագածոտնի, Լոռու| | |
| |և Կոտայքի մարզերում | | |
|___|________________________________|_______________________|_____________|
|2. |Բիզնես ինկուբատորի ստեղծման |Հայաստանի |2004 թվականի |
i
| |ծրագրի մշակում |Հանրապետության առևտրի |4-րդ եռամսյակ|
| | |և տնտեսական զարգացման | |
| | |նախարարություն, | |
| | |Հայաստանի ՓՄՁ ԶԱԿ | |
|___|________________________________|_______________________|_____________|
|3. |ՓՄՁ-ի սուբյեկտներում |Հայաստանի |2004 թվականի |
| |նորարարությունների և |Հանրապետության առևտրի |4-րդ եռամսյակ|
| |ժամանակակից տեխնոլոգիաների |և տնտեսական զարգացման | |
| |ներդրմանն աջակցության նպատակով |նախարարություն, | |
| |Երևանում տեխնոպարկի ստեղծում |Հայաստանի | |
| | |Հանրապետության | |
| | |կրթության և գիտության | |
| | |նախարարություն, | |
| | |Հայաստանի ՓՄՁ ԶԱԿ, | |
| | |Հայաստանի | |
| | |Հանրապետության | |
| | |շահագրգիռ | |
| | |նախարարություններ | |
|___|________________________________|_______________________|_____________|
|4. |ՓՄՁ-ի սուբյեկտներին ֆինանսական |Հայաստանի |սկսած 2004 |
| |և ներդրումային աջակցության |Հանրապետության առևտրի |թվականի 1-ին |
| |նպատակով ՓՄՁ-ի սուբյեկտներին |և տնտեսական զարգացման |եռամսյակից |
| |վարկային երաշխիքների տրամադրման |նախարարություն, | |
| |ծրագրի շարունակում և ընդլայնում|Հայաստանի ՓՄՁ ԶԱԿ, | |
| | |Հայաստանի | |
| | |Հանրապետության | |
| | |շահագրգիռ | |
| | |նախարարություններ | |
|___|________________________________|_______________________|_____________|
|5. |ՓՄՁ-ի սուբյեկտներում որակի |Հայաստանի ՓՄՁ ԶԱԿ |սկսած 2004 |
| |կառավարման միջազգային | |թվականի 1-ին |
| |ստանդարտների (ԻՍՕ 9000 շարքի) | |եռամսյակից |
| |ներդրմանն աջակցություն | | |
|___|________________________________|_______________________|_____________|
|6. |ՓՄՁ-ի սուբյեկտներին գործարար |Հայաստանի ՓՄՁ ԶԱԿ |սկսած 2004 |
| |տեղեկատվական և խորհրդատվական | |թվականի 1-ին |
| |աջակցություն | |եռամսյակից |
|___|________________________________|_______________________|_____________|
|7. |ՓՄՁ-ի ոլորտի կադրերի |Հայաստանի ՓՄՁ ԶԱԿ |սկսած 2004 |
| |մասնագիտական ուսուցման և | |թվականի 1-ին |
| |վերապատրաստման դասընթացների | |եռամսյակից |
| |կազմակերպում` ինչպես ՓՄՁ-ի | | |
| |սուբյեկտների, այնպես էլ | | |
| |ուսուցողական ծառայություններ | | |
| |մատուցող կազմակերպությունների | | |
| |համար | | |
|___|________________________________|_______________________|_____________|
|8. |Միջազգային դոնոր |Հայաստանի |2004 թվականի |
| |կազմակերպությունների հետ ՓՄՁ-ի |Հանրապետության առևտրի |ընթացքում |
| |ոլորտի զարգացման համատեղ |և տնտեսական զարգացման | |
| |(համաֆինանսավորման սկզբունքով) |նախարարություն, | |
| |ծրագրերի մշակում և իրականացում |Հայաստանի ՓՄՁ ԶԱԿ, | |
| | |Հայաստանի | |
| | |Հանրապետության | |
| | |շահագրգիռ | |
| | |նախարարություններ | |
.__________________________________________________________________________.
(հավելվածը փոփ. 02.12.04 թիվ 1679-Ն որոշում)